Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Galatiabii 2:1-21

2  Kɛkɛ ni no sɛɛ afii nyɔŋma kɛ ejwɛ lɛ, mi kɛ Barnaba kwɔ kɛtee Yerusalem ekoŋŋ, ni miŋɔ Tito hu mifata mihe.  Mikwɔ kɛtee yɛ kpojiemɔ ko hewɔ, ni mikɛ sane kpakpa ni mishiɛɔ yɛ jeŋmaji lɛ ateŋ lɛ yaŋmɛ amɛhiɛ. Shi mifee enɛ yɛ hii ni abuɔ amɛ waa lɛ pɛ ahiɛ, bɔ ni afee ni maná nɔmimaa akɛ foi ni midaa lɛ, aloo nɔ ni mida lɛ, efeko yaka.  Kɛ̃lɛ, Tito po ní fata mihe lɛ, eyɛ mli akɛ eji Helanyo moŋ, shi anyɛɛɛ enɔ akɛ efo ketia.  Shi nɛkɛ sane nɛɛ bate shi yɛ amale nyɛmimɛi ni ba mli nigii lɛ ahewɔ; amɛju shi kɛba mli ní amɛbakpá heyeli ni wɔyɔɔ yɛ ekome ni wɔ kɛ Kristo Yesu efee lɛ mli lɛ shi amɛkwɛ, koni amɛye wɔ nyɔŋ kwraa;  wɔŋmɛɛɛ wɔhe wɔhãaa mɛi nɛɛ kɛbaaa wɔhe shi wɔhãaa amɛ, dabi, wɔfeee nakai be kukuoo ko po,* koni sane kpakpa lɛ anɔkwale lɛ aya nɔ ahi shi ahã nyɛ.  Shi yɛ mɛi ni etamɔ nɔ ni amɛhe hiaa lɛ agbɛfaŋ lɛ—bɔ fɛɛ bɔ ni amɛyɔɔ tsutsu ko lɛ, no jeee mihe sane ko, ejaakɛ Nyɔŋmɔ kwɛɛɛ bɔ ni mɔ ko ji yɛ kponɔgbɛ—hii ni abuɔ amɛ waa nɛɛ kɛ nɔ hee ko hãaa mi.  Moŋ lɛ, be ni amɛna akɛ atu awo midɛŋ akɛ mijaje sane kpakpa lɛ mitsɔɔ foolɔi, tamɔ bɔ ni atu awo Petro hu dɛŋ akɛ ejaje etsɔɔ mɛi ni afolɔ amɛ ketia lɛ—  ejaakɛ mɔ ni hã Petro hewalɛ akɛ etsu bɔfo nitsumɔ yɛ mɛi ni afolɔ amɛ ketia lɛ ateŋ lɛ, lɛ nɔŋŋ ehã mi hu hewalɛ akɛ mifee nakai yɛ jeŋmaji lɛ ateŋ—  ni be ni amɛna duromɔ ní aŋɔhã mi lɛ, Yakobo kɛ Kefa* kɛ Yohane, mɛi ni abuɔ amɛ akɛ akulashiŋi lɛ, kɛ naanyobɔɔ* ninejurɔ lɛ ta mi kɛ Barnaba dɛ̃, koni wɔ lɛ wɔya jeŋmaji lɛ aŋɔɔ, shi amɛ lɛ, amɛya mɛi ni afolɔ amɛ ketia lɛ aŋɔɔ. 10  Nɔ ni amɛkɛɛ wɔ kɛkɛ ji akɛ wɔhã ohiafoi lɛ ahi wɔjwɛŋmɔ mli, ni enɛ nɔŋŋ he mɔdɛŋ mi hu mikɛ hiɛdɔɔ bɔɔ akɛ mafee. 11  Shi be ni Kefa* ba Antiokia lɛ, midamɔ ehiɛ miku enaa,* ejaakɛ eyɛ faŋŋ akɛ eye sane ni ejaaa.* 12  Ejaakɛ dani hii komɛi ni jɛ Yakobo ŋɔɔ lɛ baaba lɛ, ekɛ jeŋmajiaŋbii lɛ yeɔ nii; shi be ni amɛba lɛ, ekpa nakai feemɔ ni etse ehe ejaakɛ eeshe mɛi ni fiɔ ketiafoo lɛ sɛɛ lɛ gbeyei. 13  Yudafoi ni eshwɛ lɛ hu yafata ehe kɛfee nakai osato lɛ, ni amɛkpala Barnaba po amɛwo amɛsatofeemɔ lɛ mli. 14  Shi be ni mina akɛ amɛnyiɛɛɛ yɛ sane kpakpa lɛ anɔkwale lɛ naa lɛ, mikɛɛ Kefa* yɛ amɛ fɛɛ amɛhiɛ akɛ: “Kɛ́ bo ni oji Yudafonyo lɛ ohiɔ shi tamɔ bɔ ni jeŋmaji lɛ feɔ lɛ, ni jeee tamɔ bɔ ni Yudafoi feɔ lɛ, te feɔ tɛŋŋ ni onyɛɔ jeŋmajiaŋbii lɛ anɔ ni amɛhi shi yɛ Yudafoi akusum naa lɛ?” 15  Wɔ ni afɔ wɔ akɛ Yudafoi ni wɔjeee eshafeelɔi ni jɛ jeŋmaji lɛ amli lɛ, 16  wɔyɔse akɛ atsɔɔɔ mla nitsumɔi anɔ abuuu gbɔmɔ ko jalɔ, moŋ lɛ, atsɔɔ hemɔkɛyeli yɛ Yesu Kristo mli pɛ nɔ afeɔ nakai. No hewɔ lɛ, wɔná hemɔkɛyeli yɛ Kristo Yesu mli koni atsɔ Kristo mli hemɔkɛyeli nɔ abu wɔ jalɔi, shi jeee kɛtsɔ mla nitsumɔi anɔ, ejaakɛ atsɔŋ mla nitsumɔi anɔ abuŋ mɔ ko mɔ ko* jalɔ. 17  Agbɛnɛ, kɛ́ abuɔ wɔ hu akɛ eshafeelɔi akɛni wɔmiitao ni atsɔ Kristo nɔ abu wɔ jalɔi hewɔ lɛ, belɛ ani no tsɔɔ akɛ Kristo ji esha sɔɔlɔ? Dabida! 18  Kɛ́ nibii ni mikumɔ lɛ nɔŋŋ mitswaa mimaa shi ekoŋŋ lɛ, belɛ miitsɔɔ akɛ mlatɔlɔ ji mi. 19  Ejaakɛ mi lɛ mitsɔ mla nɔ migbo yɛ mla gbɛfaŋ koni mihiɛ akã yɛ Nyɔŋmɔ gbɛfaŋ. 20  Akala mi akpɛtɛ tso jaŋŋ lɛ he afata Kristo he. Jeee mi mihiɛ kã dɔŋŋ, moŋ lɛ, Kristo ji mɔ ni hiɛ kã ni ekɛ mi efee ekome.* Anɔkwa, mihiɛ ni kã yɛ heloo lɛ mli amrɔ nɛɛ, hemɔkɛyeli ni miyɔɔ yɛ Nyɔŋmɔ Bi lɛ ni sumɔ mi ni eŋɔ ehe ehã yɛ mihewɔ lɛ mli mihiɛ kã yɛ. 21  Mikpooo Nyɔŋmɔ duromɔ lɛ,* ejaakɛ kɛ́ mla nɔ jalɛ tsɔɔ kɛbaa lɛ, belɛ, yɛ anɔkwale mli lɛ Kristo lɛ, yakatswaa egbo lɛ.

Shishigbɛ Niŋmaa

Sht. ŋm., “ŋmɛlɛtswaa kome po.”
Atsɛɔ lɛ Petro hu.
Aloo “nyɛmifeemɔ.”
Atsɛɔ lɛ Petro hu.
Aloo “mikɛ nibii yamamɔ ehiɛ.”
Aloo “ejaakɛ eyeɔ fɔ.”
Atsɛɔ lɛ Petro hu.
Sht. ŋm., “heloo ko.”
Sht. ŋm., “Kristo hiɛ kã yɛ mimli.”
Aloo “mitswaaa Nyɔŋmɔ duromɔ lɛ mifɔ̃ɔɔ afã.”