Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Filipibii 2:1-30

2  Belɛ kɛ́ Kristo mli hewalɛwoo ko yɛ, kɛ́ suɔmɔ miishɛjemɔ ko yɛ, kɛ́ mumɔŋ naanyobɔɔ ko* yɛ, kɛ́ hedɔɔ kɛ musuŋtsɔlɛ ko yɛ lɛ,  nyɛhãa mimiishɛɛ lɛ ayia obɔ, akɛ nyɛmiijwɛŋ nɔ kome, nyɛhiɛ suɔmɔ kome, nyɛfee ekome kɛwula shi,* ni nyɛhiɛ susumɔ kome.  Nyɛkajɛa mansɔtsɔɔ loo nyɛhe ní nyɛnaa tsɔ mli nyɛfea nɔ ko nɔ ko, shi moŋ nyɛkɛ heshibaa* abua mɛi krokomɛi akɛ amɛnɔ kwɔlɔ fe nyɛ,  be mli ni nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.  Nyɛyaa nɔ nyɛhiɛa jwɛŋmɔ nɛɛ ní Kristo Yesu hu ná eko lɛ,  mɔ ni hiɛ Nyɔŋmɔ su moŋ, shi ebaaa ejwɛŋmɔ mli kɔkɔɔkɔ akɛ ebaashɔ̃ nɔ ko, no ji akɛ, esa akɛ ekɛ Nyɔŋmɔ aye egbɔ.  Dabi, moŋ lɛ, ejie nɔ fɛɛ nɔ efɔ̃ shi, ni eŋɔ nyɔŋ su, ni ebatsɔ gbɔmɔ.*  Nɔ ni fe nakai lɛ, be ni eba akɛ gbɔmɔ lɛ,* eba ehe shi, ni ebo toi kɛtee gbele mli tɔ̃ɔ, hɛɛ, gbele yɛ piŋmɔ tso* nɔ.  Enɛ nɔŋŋ hewɔ lɛ, Nyɔŋmɔ wó enɔ ni ehã lɛ gbɛhe ni nɔ kwɔ, ni ejɛ mlihilɛ mli ehã lɛ gbɛ́i ni ta gbɛ́i krokomɛi fɛɛ nɔ, 10  koni yɛ Yesu gbɛ́i mli lɛ, mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi 11  ní lilɛi fɛɛ lilɛi ajaje atsɔɔ akɛ Yesu Kristo ji Nuŋtsɔ, kɛwo Nyɔŋmɔ, ni ji Tsɛ lɛ hiɛ nyam. 12  No hewɔ lɛ, mɛi ni misumɔɔ, bɔ ni nyɛboɔ toi daa nɛɛ, jeee be ni miyɔɔ nyɛŋɔɔ kɛkɛ, shi moŋ, amrɔ nɛɛ ní mibɛ nyɛŋɔɔ nɛɛ po lɛ nyɛfeɔ fe nakai lɛ, nyɛyaa nɔ nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ he nii. 13  Ejaakɛ Nyɔŋmɔ ji mɔ ni kanyaa nyɛ bɔ ni sa ehiɛ, ni ehãa nyɛshweɔ, ni ehãa nyɛnáa hewalɛ ní nyɛkɛaafee hu. 14  Nyɛyaa nɔ nyɛfea nii fɛɛ ní huhuuhuwiemɔi kɛ ŋwanejei akahi mli, 15  koni nyɛfee mɛi ni shwamɔ ko bɛ amɛhe, ní nyɛfee krɔŋŋ, Nyɔŋmɔ bii ní kpa ko bɛ amɛhe yɛ yinɔ kɔɔdɔŋ ní bɛ eŋɛlɛ nɔ nɛɛ teŋ, mɛi ateŋ ní nyɛtsoɔ yɛ akɛ kanei yɛ je lɛ mli lɛ, 16  ní nyɛya nɔ nyɛhiɛ wala wiemɔ lɛ mli kpɛŋŋ. Kɛkɛ lɛ maná nɔ ko nɔ madamɔ maná miishɛɛ babaoo yɛ Kristo gbi lɛ nɔ, akɛni mile akɛ foi ní mida lɛ efeko yaka, aloo nitsumɔ ní mitsu dɛŋdɛŋ lɛ, efeko yaka lɛ hewɔ. 17  Kɛ̃lɛ, kɛ́ aafɔse mi tamɔ dãa afɔle aashwie afɔle lɛ kɛ sɔɔmɔ krɔŋkrɔŋ* ní nyɛhemɔkɛyeli lɛ ekpala nyɛ kɛba he lɛ nɔ po lɛ, mimii shɛɔ mihe, ni mikɛ nyɛ fɛɛ náa miishɛɛ naakpa. 18  Nakai nɔŋŋ esa akɛ nyɛ hu nyɛmii ashɛ nyɛhe, ní nyɛkɛ mi aná miishɛɛ. 19  Agbɛnɛ, mihiɛ kã nɔ yɛ Nuŋtsɔ Yesu mli akɛ etsɛŋ ni matsu Timoteo kɛba nyɛŋɔɔ, koni kɛ́ ababɔ mi nyɛhe amaniɛ lɛ, no awo mi hewalɛ. 20  Ejaakɛ mibɛ mɔ ko ni subaŋ tamɔ enɔ lɛ, ní baajɛ tsui krɔŋŋ mli etsu nyɛsaji ahe nii. 21  Ejaakɛ mɛi krokomɛi lɛ fɛɛ miitao amɛ diɛŋtsɛ amɛnii, shi jeee Yesu Kristo nii. 22  Shi nyɛle odase ní lɛ diɛŋtsɛ eye yɛ ehe, ni akɛ, tamɔ bi kɛ etsɛ lɛ, ekɛ mi sɔmɔ akɛ nyɔŋ koni sane kpakpa lɛ ashwere. 23  No hewɔ lɛ, lɛ ji mɔ ni mihiɛ kã nɔ akɛ, kɛ́ mina bɔ ni nibii anaa baayakpa kɛhã mi nɔŋŋ lɛ, matsu lɛ. 24  Anɔkwa, miyɛ nɔmimaa yɛ Nuŋtsɔ lɛ mli akɛ, mi diɛŋtsɛ hu etsɛŋ ni maba. 25  Shi amrɔ nɛɛ, misusuɔ akɛ ehe miihia ni matsu Epafrodito, minyɛmi nuu kɛ minaanyo nitsulɔ kɛ minaanyo asraafonyo, kɛ nyɛ hu nyɛbɔfo kɛ tsulɔ ni tsuɔ mihiamɔ nii ahe nii ehãa mi lɛ, nyɛŋɔɔ, 26  ejaakɛ eeshwe ní ena nyɛ fɛɛ, ni akɛni nyɛnu akɛ no mli lɛ ehe miiye hewɔ lɛ, ehao. 27  Ehe ye lɛɛlɛŋ, ni ebɛŋkɛ gbele tã; shi Nyɔŋmɔ na lɛ mɔbɔ, anɔkwa, jeee lɛ pɛ, shi mi hu, koni mikaye awerɛho mishi awerɛho nɔ. 28  No hewɔ lɛ, mikɛ oyaiyeli kpele miitsu lɛ, koni kɛ́ nyɛna lɛ lɛ, nyɛná miishɛɛ babaoo ekoŋŋ, ní mi hu mikafee yeyeeye tsɔ. 29  No hewɔ lɛ, nyɛherea lɛ atuu taakɛ afɔɔ feemɔ yɛ Nuŋtsɔ lɛ mli lɛ kɛ miishɛɛ fɛɛ, ni nyɛyaa nɔ nyɛbua gbɔmɛi ni tamɔ nɛkɛ akɛ mɛi ni sa woo, 30  ejaakɛ shwɛ sharao ni egbo yɛ Kristo nitsumɔ lɛ* hewɔ, ni ekɛ ewala wo oshara mli* koni ebaye nyɛnajiaŋ kɛsɔmɔ mi yɛ sɔɔmɔ ní ehiii nyɛ sɔɔmɔ akɛni nyɛbɛ biɛ lɛ hewɔ.

Shishigbɛ Niŋmaa

Sht. ŋm., “mumɔ mli gbɛfaŋnɔnamɔ ko.”
Aloo “nyɛfee ekome yɛ susuma mli.”
Aloo “heshibaa jwɛŋmɔ.”
Sht. ŋm., “ebatsɔ tamɔ bɔ ni gbɔmɛi yɔɔ lɛ.”
Sht. ŋm., “be ni ana esu akɛ gbɔmɔ lɛ.”
Kwɛmɔ Wiemɔi Titrii Amligbalamɔ lɛ.
Aloo “sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ.”
Aloo eeenyɛ efee akɛ, “yɛ Nuŋtsɔ lɛ nitsumɔ lɛ.”
Aloo “ekɛ esusuma wo oshara mli.”