Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Filipibii 1:1-30

1  Paulo kɛ Timoteo, Kristo Yesu nyɔji, kɛyahã mɛi krɔŋkrɔŋi ni kɛ Kristo Yesu efee ekome, ní yɔɔ Filipi lɛ fɛɛ, kɛ agbɛnɛ hu nɔkwɛlɔi kɛ asafoŋ sɔɔlɔi lɛ:  Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Be fɛɛ be ní mikaiɔ nyɛ lɛ, midaa mi-Nyɔŋmɔ lɛ shi  yɛ fai fɛɛ fai ní mikɛ hiɛdɔɔ kpaa mihãa nyɛ fɛɛ lɛ mli. Yɛ fai ní mikɛ hiɛdɔɔ kpaa mihãa nyɛ lɛ ateŋ eko fɛɛ eko mli lɛ, mikɛ miishɛɛ feɔ,  yɛ yelikɛbuamɔ ní nyɛkɛhã yɛ sane kpakpa lɛ gbɛfaŋ* kɛjɛ klɛŋklɛŋ gbi lɛ nɔ kɛbashi amrɔ nɛɛ hewɔ.  Ejaakɛ miyɛ nɔmimaa yɛ enɛ nɔŋŋ mli, akɛ, mɔ ni je nitsumɔ kpakpa shishi yɛ nyɛmli lɛ, lɛ nɔŋŋ ebaakã he kɛyashi ebaagbe naa yɛ Kristo Yesu gbi lɛ nɔ.  Akɛni nyɛkã mitsui nɔ hewɔ lɛ, eja jogbaŋŋ akɛ mijwɛŋɔ enɛ yɛ nyɛ fɛɛ nyɛhe, nyɛ ní yɛ migboklɛi kɛ sane kpakpa lɛ hefãmɔ kɛ enɔmimaa yɛ mla naa fɛɛ mli lɛ, nyɛkɛ mi náa gbɛfaŋnɔ yɛ duromɔ lɛ mli lɛ.  Ejaakɛ Nyɔŋmɔ ji midasefonyo akɛ mihiɛ tseɔ nyɛ fɛɛ waa akɛni midɔɔ nyɛhe tamɔ Kristo Yesu feɔ lɛ hewɔ.  Ni enɛ ji nɔ ni miyaa nɔ misɔleɔ yɛ he, akɛ nyɛsuɔmɔ lɛ aya nɔ afa ní eteke nɔ fe tsutsu lɛ, kɛ nilee krɔŋŋ kɛ sanesɛɛkɔmɔ ni hi kɛwula shi; 10  ní nyɛkaa nyɛkwɛa ní nyɛna nibii ni he hiaa waa lɛ, koni nyɛfee krɔŋŋ, ní nyɛkatɔ̃tɔ mɛi anane, kɛyashi Kristo gbi lɛ nɔ; 11  ní jalɛ yibii ní atsɔɔ Yesu Kristo nɔ awoɔ lɛ ayimɔ nyɛ obɔbɔ, ní akɛwo Nyɔŋmɔ hiɛ nyam, ní akɛjie eyi hu. 12  Agbɛnɛ, nyɛmimɛi, miisumɔ ni nyɛle akɛ, yɛ anɔkwale mli lɛ, shihilɛ ni miyɔɔ mli lɛ ehã sane kpakpa lɛ miishwere moŋ, 13  ni no ehã Roma Maŋtsɛ lɛ Bulɔi* lɛ fɛɛ kɛ mɛi ni eshwɛ lɛ fɛɛ ená ele gboklɛi ni awo mi yɛ Kristo hewɔ lɛ faŋŋ. 14  Agbɛnɛ, gboklɛi ni awo mi nɛɛ ewaje nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo, ni amɛkɛ ekãa babaoo fe tsutsu lɛ miijaje Nyɔŋmɔ wiemɔ lɛ ni amɛsheee gbeyei. 15  Eji anɔkwale akɛ, mɔnɔklɔmɔ kɛ béi hewɔ mɛi komɛi shiɛɔ Kristo lɛ, shi mɛi komɛi hu kɛ jwɛŋmɔ kpakpa shiɛɔ. 16  Mɛi ni kɛ jwɛŋmɔ kpakpa shiɛɔ lɛ jɛɔ suɔmɔ mli amɛshiɛɔ Kristo lɛ, ejaakɛ amɛle akɛ ahala mi koni mafã sane kpakpa lɛ he; 17  shi mɛi ni shiɛɔ yɛ mɔnɔklɔmɔ kɛ béi hewɔ lɛ, mansɔtsɔɔ hewɔ amɛfeɔ nakai, shi jeee kɛ tsui krɔŋŋ, ejaakɛ amɛmiitao amɛtee naagba shi amɛwo mi yɛ migboklɛi lɛ amli. 18  Mɛni ejɛ mli kɛba? Sane lɛ kɛkɛ ji akɛ, yɛ gbɛ fɛɛ gbɛ nɔ lɛ, osatofeemɔ naa jio, anɔkwale naa jio, aajaje Kristo aatsɔɔ, ni mináa miishɛɛ babaoo yɛ enɛ hewɔ. Anɔkwa, maya nɔ maná miishɛɛ babaoo hu, 19  ejaakɛ mile akɛ kɛtsɔ fai ní nyɛkɛ hiɛdɔɔ kpaa lɛ nɔ, kɛ agbɛnɛ hu, yɛ Yesu Kristo mumɔ lɛ yelikɛbuamɔ naa lɛ, enɛ baatsɔ miyiwalaheremɔ. 20  Enɛ kɛ gbɛ ní mikwɛɔ kɛ miishɛɛ, kɛ hiɛnɔkamɔ ní miyɔɔ lɛ kpãa gbee, akɛ mihiɛ akagbo yɛ gbɛ ko kwraa nɔ, shi moŋ, akɛni miwieɔ kɛ nɔmimaa babaoo hewɔ lɛ, matsɔ migbɔmɔtso nɔ, yɛ wala mli jio, gbele mli jio, mawó Kristo nɔ gojoo amrɔ nɛɛ, tamɔ bɔ ni mifeɔ daa lɛ. 21  Ejaakɛ yɛ migbɛfaŋ lɛ, kɛ́ mihiɛ kã lɛ, Kristo ni, ni kɛ́ migbo lɛ, sɛɛnamɔ ni. 22  Agbɛnɛ, kɛ́ maya nɔ mahi shi yɛ heloo lɛ mli hu lɛ, enɛ ji minitsumɔ lɛ yibiiwoo; kɛ̃lɛ mihãŋ ale nɔ ni mahala lɛ. 23  Nibii enyɔ nɛɛ ehɔ mi atrɔma, ejaakɛ miishwe jiemɔ lɛ kɛ Kristo ní mikɛaahi shi ní ekã shi faŋŋ akɛ, no ji nɔ ni hi fe fɛɛ lɛ. 24  Shi nyɛ hewɔ lɛ, heloo mli ní maya nɔ mahi shi yɛ lɛ he miihia fe no. 25  No hewɔ lɛ, akɛni miyɛ nɔmimaa yɛ enɛ mli hewɔ lɛ, mile akɛ mahi shi, ni mi kɛ nyɛ fɛɛ baaya nɔ ahi shi yɛ nyɛhiɛyaa hewɔ, kɛ agbɛnɛ hu, yɛ nyɛmiishɛɛnamɔ yɛ hemɔkɛyeli lɛ mli lɛ hewɔ, 26  koni kɛ́ miba nyɛŋɔɔ ekoŋŋ lɛ, nyɛmlifilimɔ lɛ ateke nɔ yɛ Kristo Yesu mli yɛ mihewɔ. 27  Nɔ kome kɛkɛ ji akɛ, nyɛbaa nyɛjeŋ* bɔ ni sa Kristo lɛ he sane kpakpa lɛ, koni kɛ́ miba ní mibana nyɛ jio, mibɛ nyɛŋɔɔ jio, manu nyɛhe sane, ní maná male hu akɛ nyɛdamɔ shi shiŋŋ yɛ mumɔ kome mli, kɛ susuma kome,* ni nyɛfee ekome kɛmiibɔ nyɛhe mɔdɛŋ waa kɛhã sane kpakpa lɛ hemɔkɛyeli lɛ, 28  ní nyɛhãaa nyɛhenyɛlɔi lɛ awo nyɛhe gbeyei yɛ gbɛ ko kwraa nɔ. Enɛ nɔŋŋ ji odase kɛhã amɛ akɛ abaakpãtã amɛhiɛ, shi nyɛ lɛ, eji odase kɛhã nyɛ akɛ abaahere nyɛyiwala; ni enɛ jɛ Nyɔŋmɔ dɛŋ. 29  Ejaakɛ aŋɔ hegbɛ lɛ ahã nyɛ yɛ Kristo hewɔ, jeee koni nyɛná hemɔkɛyeli yɛ emli kɛkɛ, shi moŋ, koni nyɛna nɔ hu yɛ ehewɔ. 30  Ejaakɛ nakai nɔmɔ kome too lɛ ní nyɛna ni miinɔ, ní amrɔ nɛɛ nyɛnuɔ akɛ miinɔ lolo lɛ, no nɔŋŋ mli nyɛ hu nyɛhiɛ nɛɛ.

Shishigbɛ Niŋmaa

Aloo “yɛ nɔ ni nyɛfeɔ koni sane kpakpa lɛ ashwere.”
Aloo “Pritoriɔm Bulɔi.”
Aloo “nyɛyaa nɔ nyɛfea nyɛnii akɛ maŋbii.”
Aloo “kɛ jwɛŋmɔ kome.”