Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Efesobii 6:1-24

YITSEI LƐ AMLI SAJI

  • Ŋaawoo kɛhã bii kɛ fɔlɔi (1-4)

  • Ŋaawoo kɛhã nyɔji kɛ nuŋtsɔmɛi (5-9)

  • Tawuu nii ni jɛ Nyɔŋmɔ ŋɔɔ lɛ fɛɛ (10-20)

  • Naagbee ŋamɔ (21-24)

6  Bii, nyɛboa nyɛfɔlɔi atoi yɛ Nuŋtsɔ lɛ mli, ejaakɛ enɛ ja.  “Wo otsɛ kɛ onyɛ” ji klɛŋklɛŋ kitã ni hiɛ shiwoo akɛ:  “Koni ahi ahã bo,* ní otsɛ yɛ shikpɔŋ lɛ nɔ.”  Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛyaa nɔ nyɛkwɛa amɛ yɛ Yehowa* tsɔsemɔ kɛ ewiemɔkɛtsɔɔmɔ* lɛ mli.  Nyɔji, nyɛjɛa tsui krɔŋŋ mli nyɛkɛ gbeyeishemɔ kɛ hekpokpomɔ aboa nyɛnuŋtsɔmɛi ni ji gbɔmɛi* lɛ atoi, tamɔ bɔ ni nyɛfeɔ nyɛhãa Kristo lɛ,  jeee be ni aana nyɛ pɛ koni nyɛkɛsa gbɔmɛi ahiɛ kɛkɛ,* shi moŋ akɛ Kristo nyɔji, ní kɛ amɛsusuma* muu fɛɛ feɔ Nyɔŋmɔ suɔmɔnaa nii.  Nyɛkɛ su kpakpa asɔmɔa akɛ nyɔji, tamɔ nɔ ni nyɛmiisɔmɔ Yehowa,* shi jeee gbɔmɛi,  ejaakɛ nyɛle akɛ mɔ fɛɛ mɔ lɛ, nyɔŋ ji lɛ jio, odehe ji lɛ jio, nɔ kpakpa ní efeɔ lɛ, no he najiaŋ Yehowa* baato lɛ.  Agbɛnɛ hu, nyɛ nuŋtsɔmɛi, nyɛyaa nɔ nyɛkɛ amɛ ayea yɛ nakai gbɛ nɔŋŋ nɔ, nyɛkawoa amɛhe gbeyei, ejaakɛ nyɛle akɛ nyɛ kɛ amɛ fɛɛ Nuŋtsɔ lɛ yɛ ŋwɛi, ni ekwɛɛɛ hiɛiaŋ. 10  Naagbee lɛ, nyɛyaa nɔ nyɛnáa hewalɛ yɛ Nuŋtsɔ lɛ mli, kɛ agbɛnɛ hu, yɛ enyɛmɔ kpele lɛ mli. 11  Nyɛwoa tawuu hewulamɔ nii ni jɛ Nyɔŋmɔ ŋɔɔ lɛ fɛɛ koni nyɛnyɛ nyɛdamɔ shi shiŋŋ nyɛshi Abonsam ŋaatsɔi lɛ;* 12  ejaakɛ jeee heloo kɛ lá wɔkɛnɔɔ lɛ,* shi moŋ wɔkɛ nɔyelii, wɔkɛ hegbɛi, wɔkɛ je ni mli ewo duŋ nɛɛ mli nɔyelɔi lɛ, wɔkɛ mumɔi fɔji atai ni yɔɔ ŋwɛiniiaŋ lɛ. 13  Enɛ hewɔ lɛ, nyɛŋɔa tawuu hewulamɔ nii ni jɛ Nyɔŋmɔ ŋɔɔ lɛ fɛɛ, koni be ni nyɛgbe nɔ fɛɛ nɔ naa lɛ, nyɛnyɛ henyɛlɔ lɛ naa nyɛtsĩ yɛ gbi fɔŋ lɛ nɔ, ni agbɛnɛ hu nyɛnyɛ nyɛdamɔ shi shiŋŋ. 14  No hewɔ lɛ, nyɛdamɔa shi shiŋŋ, be mli ni nyɛkɛ anɔkwale efi nyɛhɛ akɛ hɛfiinɔ, ní nyɛwo jalɛ akɛ dama, 15  ní nyɛwo klalo ni nyɛfee akɛ nyɛbaajaje toiŋjɔlɛ he sane kpakpa lɛ yɛ nyɛnaji akɛ tokotai lɛ. 16  Enɛɛmɛi fɛɛ sɛɛ lɛ, nyɛŋɔa hemɔkɛyeli akɛ tsɛŋ agbo, ni ji nɔ ni nyɛbaanyɛ nyɛkɛgbe mɔ fɔŋ lɛ gãimlibii ni tsoɔ lɛ* fɛɛ lɛ. 17  Kɛfata he lɛ, nyɛŋɔa yiwalaheremɔ lɛ akɛ fai, kɛ mumɔ lɛ klante lɛ, ni ji Nyɔŋmɔ wiemɔ lɛ, 18  ni yɛ nakai be lɛ mli nɔŋŋ lɛ, nyɛyaa nɔ nyɛkɛ sɔlemɔi srɔtoi fɛɛ kɛ faikpamɔi ni yɔɔ hiɛdɔɔ srɔtoi fɛɛ asɔlea yɛ shihilɛ fɛɛ shihilɛ mli yɛ mumɔ mli. Ni enɛ hewɔ lɛ, nyɛyaa nɔ nyɛshia kpe, ní nyɛkãa he daa nyɛkɛ hiɛdɔɔ akpaa fai nyɛhãa mɛi krɔŋkrɔŋi lɛ fɛɛ. 19  Nyɛsɔlea nyɛhãa mi hu, koni kɛ́ migbele minaa lɛ, aŋɔ wiemɔi lɛ awo minaa, ní manyɛ mawie kɛ ekãa kɛ́ miijaje sane kpakpa lɛ he teemɔŋ sane krɔŋkrɔŋ lɛ, 20  nɔ ni mitsuɔ he nii akɛ maŋ bɔfo yɛ kɔsɔŋkɔsɔi amli nɛɛ, ní mawie he kɛ ekãa, bɔ ni sa akɛ mawie lɛ. 21  Agbɛnɛ, bɔ ni afee ni nyɛ hu nyɛle mihe sane kɛ nɔ ni mitsuɔ lɛ, Tihiko, nyɛmi nuu ni asumɔɔ lɛ kɛ sɔɔlɔ anɔkwafo yɛ Nuŋtsɔ lɛ mli lɛ, baahã nyɛle nɔ fɛɛ nɔ. 22  Yiŋtoo nɛɛ nɔŋŋ hewɔ miitsu lɛ nyɛŋɔɔ lɛ, koni nyɛle bɔ ni wɔyɔɔ, ní eshɛje nyɛtsuii amii. 23  Toiŋjɔlɛ kɛ suɔmɔ ní hemɔkɛyeli fata he, ní jɛ Nyɔŋmɔ, ni ji Tsɛ lɛ, kɛ Nuŋtsɔ Yesu Kristo ŋɔɔ lɛ ahã nyɛmimɛi lɛ. 24  Duromɔ lɛ kɛ mɛi fɛɛ ni sumɔɔ wɔ-Nuŋtsɔ Yesu Kristo kɛ suɔmɔ ni fiteee lɛ ahi shi.

Shishigbɛ Niŋmaa

Aloo “Koni oye omanye.”
Kwɛmɔ Wiemɔi Titrii Amligbalamɔ lɛ.
Aloo “enitsɔɔmɔ; egbɛtsɔɔmɔ.” Sht. ŋm., “ejwɛŋmɔ ni akɛwoɔ mɔ mli.”
Sht. ŋm., “nyɛheloo gbɛfaŋ nuŋtsɔmɛi.”
Sht. ŋm., “jeee kɛ hiɛiaŋhiɛiaŋ sɔɔmɔ akɛ gbɔmɛi ahiɛsalɔi.”
Kwɛmɔ Wiemɔi Titrii Amligbalamɔ lɛ, “Susuma.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “akpatsɔi lɛ.”
Sht. ŋm., “wɔkɛfɔ̃ɔ abɔtiri lɛ.”
Aloo “tawuu nii ni afɔ̃ɔ; akpɔlɔi bibii.”