Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Efesobii 5:1-33

5  No hewɔ lɛ, akɛ bii ni asumɔɔ lɛ, nyɛfea nyɛhe mɛi ni kaseɔ Nyɔŋmɔ,  ni nyɛyaa nɔ nyɛnyiɛa yɛ suɔmɔ mli, tamɔ bɔ ni Kristo lɛ hu sumɔ wɔ,* ní eŋɔ ehe ehã yɛ wɔhewɔ* akɛ nɔ ko ni aŋɔhã, kɛ afɔle, nɔ ko ni jeɔ ŋma krɔŋŋ ni akɛhã Nyɔŋmɔ lɛ.  Bɔlɛnamɔ jeŋba sha* kɛ muji nii srɔtoi fɛɛ loo amimyeli lɛ, akatsĩ tã tete yɛ nyɛteŋ, ejaakɛ enɛ esaaa mɛi krɔŋkrɔŋi;  asaŋ akatsĩ hiɛgbejianifeemɔ loo kwashiai awiemɔ loo yakayaka wiemɔ ni akɛyeɔ fɛo—nibii ni esaaa nyɛ lɛ—tã yɛ nyɛteŋ, shi moŋ, shidaa.  Ejaakɛ nyɛle enɛ, ni nyɛ diɛŋtsɛ nyɛkpɛlɛɔ nɔ akɛ, mɔ fɛɛ mɔ ni kɛ ehe woɔ bɔlɛnamɔ jeŋba sha* mli loo ekɛ ehe woɔ muji nii amli loo eji amimyelɔ, ni tsɔɔ akɛ eji amagajalɔ lɛ, bɛ gbɛfaŋnɔ ko yɛ Kristo lɛ Maŋtsɛyeli lɛ kɛ Nyɔŋmɔ Maŋtsɛyeli lɛ mli.  Nyɛkahãa mɔ ko mɔ ko kɛ wiemɔi foji lakaa nyɛ, ejaakɛ nibii nɛɛ ahewɔ lɛ, Nyɔŋmɔ mlifu lɛ miiba toigbele bii lɛ anɔ.  No hewɔ lɛ, nyɛkɛ amɛ akanáa nɔ ko nɔ ko mli gbɛfaŋnɔ;  ejaakɛ be ko ni eho lɛ, duŋ ji nyɛ, shi amrɔ nɛɛ, nyɛtsɔmɔ la yɛ Nuŋtsɔ lɛ mli. Nyɛyaa nɔ nyɛnyiɛa akɛ la bii,  ejaakɛ la lɛ yibiiwoo ji ekpakpafeemɔ kɛ jalɛ kɛ anɔkwale srɔtoi fɛɛ. 10  Nyɛyaa nɔ nyɛkaa nyɛkwɛa ní nyɛna nɔ ni sa Nuŋtsɔ lɛ hiɛ; 11  ni nyɛkanáa gbɛfaŋnɔ yɛ duŋ nitsumɔi ni wooo yibii lɛ amli dɔŋŋ; moŋ lɛ, nyɛkpaa amɛhe mama ní ana nɔ ni amɛji diɛŋtsɛ. 12  Ejaakɛ nibii ní amɛfeɔ yɛ teemɔŋ lɛ, eyɛ hiɛgbele akɛ aaatsĩ tã tete. 13  Agbɛnɛ, nibii fɛɛ ní aakpa amɛhe mama* lɛ, aatsɔ la lɛ nɔ aahã eeje kpo faŋŋ, ejaakɛ nɔ fɛɛ nɔ ni aahã eeje kpo faŋŋ lɛ, la ni. 14  No hewɔ lɛ, akɛɔ akɛ: “Oo bo mɔ ni owɔɔ, ohiɛ atsɛ̃, ní ote shi kɛjɛ gbohii ateŋ, ni Kristo lɛ baatso ahã bo.” 15  No hewɔ lɛ, nyɛhiɛ ahia nyɛhe nɔ jogbaŋŋ be fɛɛ be koni nyɛkanyiɛ akɛ mɛi ni hiɛ kãaa shi, shi moŋ akɛ hiɛshikalɔi, 16  ní nyɛkɛ nyɛbe atsu nii jogbaŋŋ,* ejaakɛ gbii nɛɛ, gbii fɔji ni. 17  Enɛ hewɔ lɛ, nyɛkafea nyɛhe mɛi ni bɛ jwɛŋmɔ dɔŋŋ, moŋ lɛ, nyɛyaa nɔ nyɛyɔsea nɔ ni ji Yehowa* suɔmɔnaa nii lɛ. 18  Agbɛnɛ hu, nyɛkatɔrɔa dãa,* nɔ mli ní sakasakafeemɔ* yɔɔ lɛ, shi moŋ nyɛyaa nɔ nyɛyimɔa obɔbɔ kɛ mumɔ lɛ. 19  Nyɛkɛ nyɛhe awiewiea* yɛ lalai, Nyɔŋmɔ yijiemɔ lalai, kɛ mumɔŋ lalai amli, ní nyɛláa ni nyɛfoa lala nyɛhãa Yehowa* yɛ nyɛtsuii amli, 20  ní nyɛdaa wɔ-Nyɔŋmɔ kɛ wɔ-Tsɛ lɛ shi be fɛɛ be yɛ nɔ fɛɛ nɔ hewɔ, yɛ wɔ-Nuŋtsɔ Yesu Kristo gbɛ́i mli. 21  Nyɛteŋ mɔ fɛɛ mɔ aŋɔ ehe awo enyɛmi shishi yɛ Kristo gbeyeishemɔ mli. 22  Ŋamɛi aŋɔ amɛhe awo amɛwumɛi ashishi, tamɔ bɔ ni amɛŋɔɔ amɛhe amɛwoɔ Nuŋtsɔ lɛ shishi lɛ, 23  ejaakɛ wu lɛ ji eŋa lɛ yitso, tamɔ bɔ ni Kristo lɛ hu ji asafo lɛ yitso, ní lɛ nɔŋŋ ji gbɔmɔtso nɛɛ yiwalaherelɔ lɛ. 24  Anɔkwa, bɔ ni asafo lɛ ŋɔɔ ehe ewoɔ Kristo lɛ shishi lɛ, nakai nɔŋŋ esa akɛ ŋamɛi hu aŋɔ amɛhe amɛwo amɛwumɛi ashishi yɛ nɔ fɛɛ nɔ mli. 25  Wumɛi, nyɛyaa nɔ nyɛsumɔa nyɛŋamɛi, tamɔ bɔ ni Kristo lɛ hu sumɔ asafo lɛ, ní eŋɔ ehe ehã yɛ ehewɔ lɛ, 26  bɔ ni afee ni etsuu he yɛ hejuu nu ni ji wiemɔ lɛ mli, ní ehã efee krɔŋkrɔŋ, 27  koni eŋɔ asafo lɛ ehã lɛ diɛŋtsɛ ehe akɛ nɔ ko ni yɔɔ nyam, ní muji ko loo kuamɔ ko loo nɔ ko ni tamɔ nakai bɛ he, shi moŋ efee krɔŋkrɔŋ, ní kpa ko bɛ he. 28  Yɛ nakai gbɛ nɔŋŋ nɔ lɛ, esa akɛ wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei. Nuu ní sumɔɔ eŋa lɛ, lɛ diɛŋtsɛ ehe esumɔɔ, 29  ejaakɛ gbɔmɔ ko gbɔmɔ ko enyɛko lɛ diɛŋtsɛ egbɔmɔtso* dã, shi moŋ elɛɔ lɛ ni edɔɔ he, tamɔ bɔ pɛ ni Kristo lɛ feɔ asafo lɛ, 30  ejaakɛ wɔji egbɔmɔtso lɛ henii. 31  “Enɛ hewɔ lɛ, nuu baashi etsɛ kɛ enyɛ ni ebaakpɛtɛ eŋa he,* ni amɛyi enyɔ lɛ fɛɛ amɛbaatsɔ heloo kome.” 32  Nɛkɛ teemɔŋ sane krɔŋkrɔŋ nɛɛ tsii. Agbɛnɛ, miiwie Kristo kɛ asafo lɛ he. 33  Kɛ̃lɛ, esa akɛ nyɛteŋ mɔ fɛɛ mɔ asumɔ eŋa tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.

Shishigbɛ Niŋmaa

Aloo eeenyɛ efee akɛ, “nyɛ.”
Aloo eeenyɛ efee akɛ, “nyɛhewɔ.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Aloo “aakune amɛ.”
Sht. ŋm., “nyɛhéa be ni ato lɛ.”
Kwɛmɔ Wiemɔi Titrii Amligbalamɔ lɛ.
Aloo “wein.”
Aloo “basabasafeemɔ.”
Aloo eeenyɛ efee akɛ, “nyɛkɛ nyɛ diɛŋtsɛ nyɛhe awiea.”
Kwɛmɔ Wiemɔi Titrii Amligbalamɔ lɛ.
Sht. ŋm., “eheloo.”
Aloo “ebaahi eŋa masɛi.”