Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Efesobii 4:1-32

YITSEI LƐ AMLI SAJI

  • Kristo gbɔmɔtso lɛ efee ekome (1-16)

    • Gbɔmɛi ni akɛhã akɛ nikeenii (8)

  • Subaŋ momo lɛ kɛ subaŋ hee lɛ (17-32)

4  No hewɔ lɛ, mi, ní miji gboklɛfonyo yɛ Nuŋtsɔ lɛ mli lɛ, miikpa nyɛ fai ni nyɛnyiɛ bɔ ni sa tsɛmɔ ni aŋɔtsɛ nyɛ lɛ,  yɛ heshibaa* kɛ mlijɔlɛ fɛɛ mli, yɛ tsuishitoo mli, ní nyɛná tsui nyɛhãhãa nyɛhe yɛ suɔmɔ mli,  ni nyɛbɔa mɔdɛŋ waa nyɛhiɛa ekomefeemɔ ní nyɛtsɔ mumɔ lɛ nɔ nyɛná lɛ mli, yɛ toiŋjɔlɛ ni ji kpãa ni fiɔ nyɛ efeɔ nyɛ ekome lɛ mli.  Gbɔmɔtso kome yɔɔ, kɛ mumɔ kome, tamɔ bɔ nɔŋŋ ni hiɛnɔkamɔ kome ji nɔ ni yɔɔ tsɛmɔ ni aŋɔtsɛ nyɛ lɛ mli lɛ;  Nuŋtsɔ kome, hemɔkɛyeli kome, baptisimɔ kome;  Nyɔŋmɔ kome kɛ mɛi fɛɛ a-Tsɛ kome, mɔ ni ta nii fɛɛ nɔ, ní etsɔɔ mɛi fɛɛ mli, ni eyɔɔ mɛi fɛɛ mli lɛ.  Agbɛnɛ, wɔteŋ mɔ fɛɛ mɔ lɛ, aŋɔ duromɔ ahã lɛ yɛ bɔ ni Kristo lɛ susu duromɔ keenɔ lɛ ehã lɛ lɛ naa.  Ejaakɛ ekɛɔ akɛ: “Be ni ekwɔ kɛtee ŋwɛi lɛ, eŋɔ nomii kɛtee; eŋɔ gbɔmɛi ehã akɛ nikeenii.”  Agbɛnɛ, mɛni wiemɔ ni ji “ekwɔ” lɛ tsɔɔ? Ani jeee nɔ ni etsɔɔ nɔŋŋ ji akɛ, ekpeleke shi hu kɛba shishi, ni ji shikpɔŋ lɛ nɔ lɛ? 10  Mɔ ni kpeleke shi lɛ, lɛ nɔŋŋ hu ji mɔ ni kwɔ kɛtee he ko ni kwɔ kwraa fe ŋwɛii fɛɛ, koni ewo nibii fɛɛ obɔbɔ lɛ. 11  Eŋɔ mɛi komɛi ehã akɛ bɔfoi, mɛi komɛi akɛ gbalɔi, mɛi komɛi akɛ sane kpakpa shiɛlɔi,* mɛi komɛi akɛ tookwɛlɔi kɛ tsɔɔlɔi, 12  kɛhã mɛi krɔŋkrɔŋi lɛ ajajemɔ,* kɛhã sɔɔmɔ nitsumɔ, kɛ agbɛnɛ hu, koni akɛtswa Kristo lɛ gbɔmɔtso lɛ ama shi, 13  kɛyashi beyinɔ ni wɔ fɛɛ wɔɔshɛ ekomefeemɔ he yɛ hemɔkɛyeli lɛ kɛ Nyɔŋmɔ Bi lɛ he nilee krɔŋŋ lɛ mli, ní wɔfee nuu ní eda kwraa,* ni tsɔɔ akɛ wɔda kɛmɔ shi kɛshɛ Kristo lɛ dalɛ lɛ he. 14  No hewɔ lɛ, esaaa akɛ wɔkãa he wɔfeɔ gbekɛbii, ní tsɔɔmɔ* kɔɔyɔɔ fɛɛ tsɔɔmɔ kɔɔyɔɔ ní damɔ gbɔmɛi aŋaafɔŋtoo, kɛ amalei ni asɔ̃ɔ yɛ ŋaa mli ní akɛlakaa mɛi lɛ anɔ lɛ tswaa amɛ kɛyaa kɛbaa oookɛɛ ŋshɔkei miitswa amɛ, ní ekpalaa amɛ kɛyaa kɛbaa lɛ dɔŋŋ. 15  Moŋ lɛ, be mli ni wɔwieɔ anɔkwale lɛ, nyɛhãa wɔtsɔa suɔmɔ nɔ wɔdaraa yɛ nibii fɛɛ mli kɛbotea mɔ ni ji yitso lɛ, ni ji Kristo lɛ mli. 16  Lɛ emli gbɔmɔtso lɛ henii lɛ fɛɛ tsɔɔ talɔ fɛɛ talɔ ní ŋɔɔ nɔ ni he hiaa ehãa lɛ nɔ amɛtsaratsaraa amɛhe jogbaŋŋ, ni amɛfeɔ ekome kɛtsuɔ nii. Kɛ́ henii lɛ eko fɛɛ eko miitsu nii jogbaŋŋ lɛ, ehãa gbɔmɔtso lɛ daa, be mli ni gbɔmɔtso lɛ tswaa ehe emaa shi yɛ suɔmɔ mli lɛ. 17  No hewɔ lɛ, nɔ ni miwieɔ ní miyeɔ he odase yɛ Nuŋtsɔ lɛ mli nɛ, akɛ nyɛkayaa nɔ nyɛnyiɛa tamɔ bɔ ni jeŋmaji lɛ hu nyiɛɔ yɛ amɛyaka jwɛŋmɔi* lɛ amli lɛ dɔŋŋ. 18  Amɛjwɛŋmɔ mli ewo duŋ, ni amɛtse amɛhe kɛje Nyɔŋmɔ wala lɛ he, ejaakɛ amɛbɛ nilee yɛ amɛmli, ni amɛtsui hu wa.* 19  Akɛni nɔ ko nɔ ko efeee amɛ hiɛgbele dɔŋŋ hewɔ lɛ, amɛŋɔ amɛhe amɛhã efɔŋ ni akɛ kuɛŋtimɔ feɔ,* koni amɛkɛ amimyeli atsu muji nii srɔtoi fɛɛ. 20  Shi nyɛ lɛ, jeee nɛkɛ nyɛkase akɛ Kristo lɛ ji, 21  kɛ́ nyɛnu ehe, ni atsɔ enɔ atsɔɔ nyɛ nii lɛɛlɛŋ, ejaakɛ anɔkwale lɛ, Yesu mli eyɔɔ. 22  Atsɔɔ nyɛ ní nyɛjie subaŋ* momo lɛ ní kɛ nyɛtsutsu jeŋba lɛ kpãa gbee, ní aafite lɛ yɛ nibii ní eshweɔ ní lakaa nyɛ lɛ anaa lɛ, nyɛshɛ nyɛfɔ̃. 23  Ni esa akɛ nyɛya nɔ nyɛhã nɔ titri ni kudɔɔ nyɛjwɛŋmɔ lɛ* atsɔ ehee, 24  ni esa akɛ nyɛwo subaŋ* hee ní abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ. 25  No hewɔ lɛ, amrɔ nɛɛ ní nyɛjie lakamɔ nyɛshɛ nyɛfɔ̃ lɛ, nyɛteŋ mɔ fɛɛ mɔ kɛ enaanyo gbɔmɔ awie anɔkwale, ejaakɛ wɔji henii ni wɔteŋ mɔ fɛɛ mɔ nɔ ji mɔ kroko lɛ. 26  Nyɛmli afua, shi nyɛkafea esha; nyɛkahãa hulu nyɔa shi be mli ni nyɛmli efu lolo; 27  nyɛkahãa Abonsam hegbɛ.* 28  Julɔ lɛ ekaju dɔŋŋ; moŋ lɛ, etsu nii waa, ekɛ eniji atsu nitsumɔ kpakpa, koni ená nɔ ko ní ehã mɔ ni ehia lɛ lɛ eko. 29  Wiemɔ kpɔtɔi ko akaje nyɛnaa, shi moŋ nɔ ni hi ní tswaa mɔ maa shi, taakɛ hiamɔ lɛ ji lɛ, ní mɛi ni nuɔ lɛ aná nɔ ko ní sɛɛnamɔ yɔɔ he. 30  Agbɛnɛ hu, nyɛkahãa Nyɔŋmɔ mumɔ krɔŋkrɔŋ lɛ werɛ hoa ehe,* nɔ ni akɛsɔo nyɛnaa kɛhã gbi ni abaatsɔ kpɔmɔnɔ lɛ nɔ ajie nyɛ lɛ. 31  Nyɛjiea mlijoomɔ, mlila, mlifu, bolɔmɔ, kɛ wiemɔ fɔŋ srɔtoi fɛɛ, kɛ nɔ fɛɛ nɔ ni yeɔ mɔ awui lɛ yɛ nyɛhe nyɛshɛrɛa nyɛshwiea. 32  Moŋ lɛ, nyɛmli ahia ahãhãa nyɛhe, nyɛmusuŋ atsɔtsɔa nyɛ yɛ nyɛhe, nyɛkɛfafaa nyɛhe tswaa, tamɔ bɔ ni Nyɔŋmɔ hu tsɔ Kristo nɔ ekɛfa nyɛ tswaa lɛ.

Shishigbɛ Niŋmaa

Aloo “heshibaa jwɛŋmɔ.”
Aloo “sane kpakpa jajelɔi.”
Aloo “atsɔsemɔ.”
Aloo “nuu ní eda.”
Yɛ biɛ lɛ, aawie tsɔɔmɔi, ni ji nibii ni mɛi heɔ yeɔ ní amɛjajeɔ amɛtsɔɔ lɛ ahe.
Aloo “amɛjwɛŋmɔi foji; amɛjwɛŋmɔi ni wooo yibii.”
Sht. ŋm., “egbo.”
Aloo “jeŋba gbonyo ni efeee mɔ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.
Sht. ŋm., “gbɔmɔ.”
Aloo “hewalɛ ní kudɔɔ nyɛjwɛŋmɔ lɛ.” Sht. ŋm., “nyɛjwɛŋmɔ mumɔ lɛ.”
Sht. ŋm., “gbɔmɔ.”
Aloo “asaŋ nyɛkaŋmɛa Abonsam gbɛ.”
Aloo “nyɛkafea nɔ ko ni baahã Nyɔŋmɔ mumɔ krɔŋkrɔŋ lɛ aye awerɛho.”