Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Efesobii 3:1-21

YITSEI LƐ AMLI SAJI

  • Teemɔŋ sane krɔŋkrɔŋ lɛ kɔɔ jeŋmajiaŋbii lɛ hu he (1-13)

    • Jeŋmajiaŋbii lɛ hu ji Kristo nanemɛi niyelɔi (6)

    • Nyɔŋmɔ naanɔ yiŋ ní eto (11)

  • Esɔle ehã Efesobii lɛ koni amɛná sɛɛyoomɔ (14-21)

3  Enɛ hewɔ lɛ, mi Paulo, ni miji Kristo Yesu gboklɛfonyo hã nyɛ, ni ji jeŋmajiaŋbii lɛ—*  kɛ́ yɛ anɔkwale mli lɛ, nyɛnu Nyɔŋmɔ duromɔ lɛ he shĩakwɛmɔ nitsumɔ ni aŋɔhã mi yɛ nyɛhewɔ lɛ he,  akɛ atsɔ kpojiemɔ ko nɔ ahã mile teemɔŋ sane krɔŋkrɔŋ lɛ, tamɔ bɔ ni mitsɔ hiɛ miŋma nyɛ he sane kuku lɛ.  No hewɔ lɛ, kɛ́ nyɛkane enɛ lɛ, nyɛbaanyɛ nyɛyɔse bɔ ni minuɔ Kristo lɛ he teemɔŋ sane krɔŋkrɔŋ lɛ shishi mihãa lɛ.  Yɛ yinɔi krokomɛi amli lɛ, ahãaa gbɔmɛi abii ale teemɔŋ sane nɛɛ, tamɔ bɔ ni amrɔ nɛɛ, atsɔ mumɔ lɛ nɔ ajie kpo atsɔɔ ebɔfoi kɛ gbalɔi krɔŋkrɔŋi lɛ,  akɛ, esa akɛ jeŋmajiaŋbii lɛ hu atsɔmɔ nanemɛi niyelɔi, kɛ gbɔmɔtso kome too lɛ nɔŋŋ henii, ní amɛ kɛ wɔ aná shiwoo lɛ mli gbɛfaŋnɔ, yɛ ekome ní amɛ kɛ Kristo Yesu efee lɛ, kɛ sane kpakpa lɛ hewɔ.  Mibatsɔ enɛ he sɔɔlɔ yɛ Nyɔŋmɔ duromɔ ni etsɔ ehewalɛ lɛ nitsumɔ lɛ nɔ eŋɔke mi tswaa lɛ naa.  Aŋɔ duromɔ nɛɛ ahã mi ní mibaa shi fe mɔ ni ji bibioo kwraa yɛ mɛi krɔŋkrɔŋi lɛ fɛɛ ateŋ lɛ, koni majaje nii ni Kristo lɛ yɔɔ ní anyɛɛɛ shishi ana lɛ he sane kpakpa lɛ matsɔɔ jeŋmaji lɛ,  ní mahã mɔ fɛɛ mɔ ana teemɔŋ sane krɔŋkrɔŋ lɛ he gbɛjianɔtoo lɛ, teemɔŋ sane ní aŋɔtee yɛ yinɔi ni eho lɛ amli, yɛ Nyɔŋmɔ, mɔ ni bɔ nibii fɛɛ lɛ mli lɛ. 10  Enɛ ba lɛ nakai koni amrɔ nɛɛ, atsɔ asafo lɛ nɔ ahã nɔyelii kɛ hegbɛi ni yɔɔ ŋwɛiniiaŋ lɛ ale Nyɔŋmɔ hiɛshikamɔ ni jieɔ ehe kpo yɛ gbɛi srɔtoi pii anɔ lɛ. 11  Enɛ kɛ naanɔ yiŋ ní eto yɛ Kristo lɛ, ni ji wɔ-Nuŋtsɔ Yesu he lɛ kpãa gbee, 12  ni hemɔkɛyeli ni wɔyɔɔ yɛ Kristo lɛ mli hewɔ lɛ, wɔwieɔ kɛ nɔmimaa, ni wɔnáa gbɛ hu kɛyaa Nyɔŋmɔ ŋɔɔ tswaa kɛ nɔmimaa. 13  No hewɔ lɛ, miikpa nyɛ fai akɛ nyɛnijiaŋ akaje wui yɛ mimanehului ní minaa yɛ nyɛhewɔ lɛ ahewɔ, ejaakɛ nomɛi ji anunyam kɛhã nyɛ. 14  Enɛ hewɔ lɛ, mikulaa shi mihãa Tsɛ lɛ, 15  mɔ ŋɔɔ ni weku fɛɛ weku ni yɔɔ ŋwɛi kɛ shikpɔŋ lɛ nɔ lɛ ná egbɛ́i kɛjɛ lɛ. 16  Misɔlemɔ ji akɛ, yɛ enunyam ni fa babaoo lɛ naa lɛ, etsɔ emumɔ lɛ nɔ ehã nyɛ hewalɛ koni nyɛhe awa yɛ nyɛmligbɛ gbɔmɔ lɛ gbɛfaŋ, 17  ni akɛ, kɛtsɔ nyɛhemɔkɛyeli lɛ nɔ lɛ, Kristo lɛ ahi nyɛtsuii amli kɛ suɔmɔ. Eba akɛ, nyɛshishifãi baamɔmɔ shi ní nyɛmamɔ shi shiŋŋ yɛ faneshi lɛ nɔ, 18  bɔ ni afee ni nyɛ kɛ mɛi krɔŋkrɔŋi lɛ fɛɛ anyɛ anu nɔ ni ji elɛɛmɔ, kɛ ekɛlɛ, kɛ enɔkwɔlɛ, kɛ emlikwɔlɛ lɛ shishi jogbaŋŋ kɛmɔ shi, 19  ní nyɛle Kristo lɛ suɔmɔ lɛ ní tekeɔ nilee lɛ, koni nibii ni Nyɔŋmɔ kɛhãa lɛ fɛɛ ayimɔ nyɛ obɔbɔ. 20  Agbɛnɛ, mɔ ni yɛ ehewalɛ ni tsuɔ nii yɛ wɔmli lɛ naa lɛ, ebaanyɛ efee babaoo kɛteke nɔ ní esaa eteke nɔ kwraa fe nibii ni wɔbiɔ loo ebaa wɔyiŋ lɛ, 21  lɛ atsɔ asafo lɛ kɛ agbɛnɛ hu Kristo Yesu nɔ aŋɔ anunyam lɛ ahã yɛ yinɔi fɛɛ mli kɛya naanɔi anaanɔ. Amen.

Shishigbɛ Niŋmaa

Etamɔ nɔ ni etsa sane nɛɛ nɔ yɛ kk. 14 lɛ.