Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Efesobii 1:1-23

1  Paulo, Kristo Yesu bɔfo yɛ Nyɔŋmɔ suɔmɔ naa, ŋma kɛyahã mɛi krɔŋkrɔŋi ni yɔɔ Efeso ni ji anɔkwafoi ni kɛ Kristo Yesu efee ekome lɛ:  Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Ajie wɔ-Nuŋtsɔ Yesu Kristo Nyɔŋmɔ lɛ kɛ e-Tsɛ lɛ yi, ejaakɛ yɛ ekome ní wɔ kɛ Kristo efee lɛ hewɔ lɛ, ejɔɔ wɔ kɛ mumɔŋ jɔɔmɔ fɛɛ jɔɔmɔ yɛ ŋwɛiniiaŋ,  taakɛ ehala wɔ ni wɔ kɛ lɛ* afee ekome dani ato je lɛ shishi,* koni wɔfee krɔŋkrɔŋ ni kpa ko akahi wɔhe yɛ ehiɛ yɛ suɔmɔ mli lɛ.  Ejaakɛ ekpɛ mli eto akɛ ebaatsɔ Yesu Kristo nɔ eŋɔ wɔ akɛ lɛ diɛŋtsɛ ebii, bɔ ni sa ehiɛ kɛ agbɛnɛ hu, yɛ esuɔmɔ naa,  koni ajie eyi yɛ eduromɔ ni yɔɔ nyam ni ejɛ mlihilɛ mli etsɔ mɔ ni esumɔɔ lɛ lɛ nɔ eŋɔduro wɔ lɛ hewɔ.  Atsɔ mɔ nɛɛ lá lɛ nɔ awo kpɔmɔnɔ lɛ kɛjie wɔ, hɛɛ, akɛ wɔtɔmɔi lɛ faa wɔ, yɛ Nyɔŋmɔ duromɔ babaoo lɛ naa.  Ehã nɛkɛ duromɔ nɛɛ eteke nɔ ehã wɔ yɛ hiɛshikamɔ kɛ niiashishinumɔ* fɛɛ mli  kɛtsɔ esuɔmɔnaa nii lɛ he teemɔŋ sane krɔŋkrɔŋ lɛ ni ehã wɔle lɛ nɔ. Lɛ diɛŋtsɛ eto eyiŋ yɛ no he bɔ ni sa ehiɛ 10  kɛhã gbɛjianɔtoo ko* yɛ bei ni ato lɛ naagbee, koni ebua nibii fɛɛ naa yɛ Kristo lɛ mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ. Hɛɛ, yɛ lɛ 11  mɔ ni wɔ kɛ lɛ efee ekome ni ahala wɔ kɛ lɛ hu akɛ niyelɔi lɛ mli, ejaakɛ mɔ ni tsuɔ nibii fɛɛ ní ekpɛɔ eyiŋ yɛ he lɛ ahe nii yɛ esuɔmɔ naa lɛ, tsɔ hiɛ ehala wɔ yɛ eyiŋtoo lɛ naa, 12  koni atsɔ wɔ mɛi ni wɔná hiɛnɔkamɔ yɛ Kristo lɛ mli klɛŋklɛŋ lɛ nɔ ajie Nyɔŋmɔ yi ní awo ehiɛ nyam. 13  Shi nyɛ hu, be ni nyɛnu anɔkwale wiemɔ lɛ, ni ji nyɛyiwalaheremɔ lɛ he sane kpakpa lɛ, nyɛná hiɛnɔkamɔ yɛ emli. Be ni nyɛhe nyɛye sɛɛ lɛ, atsɔ enɔ akɛ mumɔ krɔŋkrɔŋ ni awo he shi lɛ sɔo nyɛnaa, 14  ni no ji wɔgboshinii lɛ he shiŋmɛɛnɔ* kɛ yiŋtoo akɛ atsɔ kpɔmɔnɔ ko nɔ ajie Nyɔŋmɔ diɛŋtsɛ webii* lɛ, ní akɛjie eyi ní akɛwo ehiɛ nyam. 15  Enɛ hewɔ lɛ, mi hu, kɛjɛ be ni minu hemɔkɛyeli ni nyɛyɔɔ yɛ Nuŋtsɔ Yesu mli, kɛ suɔmɔ kpo ní nyɛjieɔ nyɛtsɔɔ mɛi krɔŋkrɔŋi lɛ fɛɛ lɛ he lɛ, 16  mikpaaa shidaa yɛ nyɛhewɔ. Miyaa nɔ mitsĩɔ nyɛtã yɛ misɔlemɔi amli, 17  koni wɔ-Nuŋtsɔ Yesu Kristo Nyɔŋmɔ lɛ, anunyam Tsɛ lɛ, ahã nyɛ hiɛshikamɔ kɛ kpojiemɔ mumɔ yɛ ehe nilee krɔŋŋ lɛ mli. 18  Ehã nyɛtsui hiŋmɛii anɔ etse, koni nyɛle hiɛnɔkamɔ ní etsɛ nyɛ kɛba mli, anunyam babaoo ní eyɔɔ akɛ gboshinii kɛhã mɛi krɔŋkrɔŋi lɛ, 19  kɛ bɔ ni ehewalɛ kpele lɛ tekeɔ nɔ babaoo hãa wɔ mɛi ni ji héyelilɔi lɛ. Anaa hewalɛ kpele nɛɛ yɛ bɔ ni ekɛ enyɛmɔ kpele lɛ tsu nii, 20  yɛ Kristo gbɛfaŋ lɛ mli, be ni etee lɛ shi kɛjɛ gbohii ateŋ, ni ekɛ lɛ ta eninejurɔ nɔ yɛ ŋwɛiniiaŋ lɛ, 21  ni ehã enɔ kwɔ kwraa fe nɔyeli fɛɛ nɔyeli, kɛ hegbɛ fɛɛ hegbɛ, kɛ hewalɛ fɛɛ hewalɛ, kɛ onukpayeli fɛɛ onukpayeli, kɛ gbɛ́i fɛɛ gbɛ́i ni awo, jeee yɛ shihilɛ gbɛjianɔtoo nɛɛ* mli kɛkɛ, shi moŋ yɛ nɔ ni baaba lɛ hu mli. 22  Agbɛnɛ hu, Nyɔŋmɔ ŋɔ nibii fɛɛ eto Kristo najiashi, ni eŋɔ lɛ efee nibii fɛɛ yitso ehã asafo lɛ, 23  ni ji egbɔmɔtso lɛ, ní ebɔyimɔ lɛ woɔ nibii fɛɛ obɔ yɛ gbɛ fɛɛ gbɛ nɔ lɛ.

Shishigbɛ Niŋmaa

Ni tsɔɔ akɛ, wɔ kɛ Kristo.
Sht. ŋm., “dani ashɛ (dumɔwu) afɔ̃ shi,” ni tsɔɔ akɛ, dani Adam kɛ Hawa bɔi amɛbii lɛ ahɔŋɔɔ.
Aloo “jwɛŋmɔ kpakpa.”
Aloo “koni eto nibii ahe gbɛjianɔ.”
Aloo “yibaafoonɔ (shika ni akɛfɔ̃ɔ shi kɛtsɔɔ akɛ abaahé nɔ ko lɛɛlɛŋ); nɔ ni baaba lɛ he nɔmimaa (shiwoo).”
Sht. ŋm., “nii.”
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.