Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 9:1-21

9  Ŋwɛibɔfo ni ji enumɔ lɛ kpã etɛtɛrɛmantɛrɛ lɛ. Ni mina ŋulami ko ní ejɛ ŋwɛi ebagbee shikpɔŋ lɛ nɔ, ni akɛ bu kwɔŋkwɔŋ lɛ naa samfee lɛ hã ŋulami lɛ.  Egbele bu kwɔŋkwɔŋ lɛ naa, ni lasu te shi kɛjɛ bu lɛ mli tamɔ flɔnɔɔ kpeteŋkpele ko mli lasu, ni bu lɛ mli lasu lɛ hewɔ lɛ, hulu lɛ wo duŋ, ni kɔɔyɔɔ lɛ hu nakai nɔŋŋ.  Ni baalabii jɛ lasu lɛ mli kɛba shikpɔŋ lɛ nɔ, ni ahã amɛ hewalɛ, hewalɛ kome too lɛ nɔŋŋ ní shikpɔŋ lɛ nɔ nyɔŋmɔŋkrakroi lɛ yɔɔ lɛ.  Akɛɛ amɛ akɛ amɛkaye shikpɔŋ lɛ nɔ jwɛi lɛ loo kwɛ̃ɛ nɔ ko loo tso ko awui, akɛ ja mɛi ni bɛ Nyɔŋmɔ naasɔomɔ nɔ lɛ okadi lɛ yɛ amɛhiɛŋtsei anɔ lɛ kɛkɛ.  Ni ahãaa baalabii lɛ hegbɛ akɛ amɛgbe amɛ, shi moŋ akɛ amɛpiŋ amɛ nyɔji enumɔ, ni amɛpiŋmɔ lɛ tamɔ piŋmɔ ni mɔ piŋɔ kɛ́ nyɔŋmɔŋkrakro tsɛ̃ lɛ lɛ.  Nakai gbii lɛ amli lɛ, mɛi baatao gbele, shi amɛnaŋ kɔkɔɔkɔ, ni amɛbaashwe akɛ amɛgboi, shi gbele baajo amɛnaa foi.  Ni baalabii lɛ apuemɔ tamɔ okpɔŋɔi ni asaa amɛ kɛhã ta; nibii komɛi ni tamɔ shika tsuru akekerei fimɔ amɛyitsei, ni amɛhiɛiaŋ tamɔ gbɔmɛi ahiɛiaŋ,  shi amɛyitsɔi tamɔ yei ayitsɔi. Ni amɛnyanyɔji tamɔ jatai anɔ,  ni amɛwo damai tamɔ dade damai. Ni amɛfijiaŋ gbɛɛmɔ tamɔ shwiilii ni okpɔŋɔi miigbala kɛ foi kɛmiiya ta agbɛɛmɔ. 10  Agbɛnɛ hu, amɛyɛ leii kɛ amɛnaa tsɛ̃rɛmɔ nii tamɔ nyɔŋmɔŋkrakroi anɔ, ni amɛhewalɛ ni amɛkɛbaaye mɛi awui nyɔji enumɔ lɛ yɛ amɛleii lɛ amli. 11  Amɛyɛ maŋtsɛ ni yeɔ amɛnɔ, bu kwɔŋkwɔŋ lɛ bɔfo* lɛ. Ni atsɛɔ egbɛ́i yɛ Hebri mli akɛ Abadon,* shi yɛ Hela mli lɛ, atsɛɔ egbɛ́i akɛ Apolion.* 12  Kpoo kome lɛ eho. Naa! Kpoi enyɔ miiba lolo yɛ nibii nɛɛ asɛɛ. 13  Ŋwɛibɔfo ni ji ekpaa lɛ kpã etɛtɛrɛmantɛrɛ lɛ. Ni minu gbee ko kɛjɛ shika tsuru afɔleshaa latɛ ni ma Nyɔŋmɔ hiɛ lɛ akolontoi lɛ amli 14  ní miikɛɛ ŋwɛibɔfo ni ji ekpaa ní hiɛ tɛtɛrɛmantɛrɛ lɛ akɛ: “Fɛnemɔ ŋwɛibɔfoi ejwɛ lɛ ní afimɔ amɛ yɛ Yufrate faa kpeteŋkpele lɛ naa lɛ.” 15  Ni afɛne ŋwɛibɔfoi ejwɛ lɛ ní asaa amɛ ato ŋmɛlɛtswaa lɛ kɛ gbi lɛ kɛ nyɔɔŋ lɛ kɛ afi lɛ koni amɛgbe gbɔmɛi lɛ amlijai etɛ mli ekome. 16  Tabilɔi ni tara okpɔŋɔi lɛ anɔ lɛ ayibɔ ji akpei nyɔŋmai enyɔ toi akpei nyɔŋma;* minu amɛyibɔ lɛ. 17  Ni bɔ ni mina okpɔŋɔi lɛ kɛ amɛnɔtaralɔi lɛ yɛ ninaa lɛ mli nɛ: Amɛwo damai ni hiɛ la kɛ hiakinto-bluu* kɛ wuɔfɔ su, ni okpɔŋɔi lɛ ayitsei tamɔ jatai ayitsei, ni la kɛ lasu kɛ sɔlfa fãa kɛjɛɔ amɛdaaŋ. 18  Nɛkɛ haomɔi etɛ ni ji la lɛ kɛ lasu lɛ kɛ sɔlfa lɛ ní fãa kɛjɛɔ amɛdaaŋ nɛɛ, akɛgbe gbɔmɛi amlijai etɛ mli ekome. 19  Ejaakɛ okpɔŋɔi lɛ ahewalɛ yɛ amɛdaaŋ kɛ amɛleii amli, ejaakɛ amɛleii lɛ tamɔ onufui, ni yitsei yɛ he, ni nomɛi amɛkɛyeɔ awui lɛ. 20  Shi gbɔmɛi ni shwɛ ni nɛkɛ haomɔi nɛɛ egbeee amɛ lɛ, amɛtsakeee amɛtsui yɛ amɛninenaa nitsumɔi lɛ ahe; amɛkpaaa daimonioi lɛ kɛ shika tsuru kɛ jwiɛtɛi kɛ akɔɔble kɛ tɛ kɛ tso amagai ní amɛnaaa nii ní amɛnuuu nii ní amɛnyɛɛɛ amɛnyiɛ lɛ ajamɔ. 21  Ni amɛtsakeee amɛtsui yɛ gbɔmɛi ni amɛgbeɔ kɛ mumɔi ni amɛkɛshãraa kɛ bɔlɛnamɔ jeŋba sha* ni amɛkɛ amɛhe woɔ mli kɛ amɛjui lɛ ahe.

Shishigbɛ Niŋmaa

Aloo “ŋwɛibɔfo.”
Eshishi ji “Hiɛkpatamɔ.”
Eshishi ji “Hiɛkpatalɔ.”
Ni tsɔɔ akɛ, 200,000,000.
Eji su ni yɔɔ bluu waa.
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.