Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 8:1-13

YITSEI LƐ AMLI SAJI

  • Atse naasɔomɔ nɔ ni ji kpawo lɛ (1-6)

  • Akpã klɛŋklɛŋ tɛtɛrɛmantɛrɛi ejwɛ lɛ (7-12)

  • Atswa kpoi etɛ he adafi (13)

8  Be ni etse naasɔomɔ nɔ ni ji kpawo lɛ, afee diŋŋ yɛ ŋwɛi aaafee ŋmɛlɛtswaa fã.  Ni mina ŋwɛibɔfoi kpawo ni damɔ Nyɔŋmɔ hiɛ lɛ, ni aŋɔ tɛtɛrɛmantɛrɛi kpawo ahã amɛ.  Ŋwɛibɔfo kroko ní hiɛ shika tsuru tsofa-kɛ-ŋmashãa nɔ ba, ni ebadamɔ afɔleshaa latɛ lɛ he, ni aŋɔ tsofa-kɛ-ŋma babaoo ahã lɛ, koni eŋɔhã yɛ shika tsuru afɔleshaa latɛ lɛ ní ma maŋtsɛ sɛi lɛ hiɛ lɛ nɔ kɛfata mɛi krɔŋkrɔŋi lɛ fɛɛ asɔlemɔi lɛ ahe.  Tsofa-kɛ-ŋma lɛ lasu lɛ te shi kɛjɛ ŋwɛibɔfo lɛ dɛŋ kɛtee Nyɔŋmɔ hiɛ, ni mɛi krɔŋkrɔŋi lɛ asɔlemɔi lɛ hu fata he.  Shi amrɔ lɛ, ŋwɛibɔfo lɛ ŋɔ tsofa-kɛ-ŋmashãa nɔ lɛ, ni eje afɔleshaa latɛ lɛ nɔ la lɛ eko ewo lɛ obɔ, ni etsi eshwie shikpɔŋ lɛ nɔ. Ni nugbɔshiimɔi kɛ gbei kɛ sarawagbalamɔi kɛ shikpɔŋhosomɔ ba.  Ni ŋwɛibɔfoi kpawo lɛ ni hiɛ tɛtɛrɛmantɛrɛi kpawo lɛ saa amɛhe koni amɛkpã.  Klɛŋklɛŋ mɔ lɛ kpã etɛtɛrɛmantɛrɛ lɛ. Ni nugbɔŋtɛ kɛ la ní lá futu mli ba, ni atsi ashwie shikpɔŋ lɛ nɔ; ni shikpɔŋ lɛ mlijai etɛ mli ekome shã, ni tsei amlijai etɛ mli ekome shã, ni jwɛi fɔ fɛɛ shã.  Ŋwɛibɔfo ni ji enyɔ lɛ kpã etɛtɛrɛmantɛrɛ lɛ. Ni ashɛ nɔ ko ni tamɔ gɔŋ kpeteŋkpele ko ní miishã kɛ la afɔ̃ ŋshɔ lɛ mli. Ni ŋshɔ lɛ mlijai etɛ mli ekome tsɔ lá;  ni ŋshɔ lɛ mli bɔɔ nii ní hiɛ kamɔ* lɛ amlijai etɛ mli ekome gboi, ni meelei lɛ amlijai etɛ mli ekome fite. 10  Ŋwɛibɔfo ni ji etɛ lɛ kpã etɛtɛrɛmantɛrɛ lɛ. Ni ŋulami kpeteŋkpele ko ní miitso tamɔ kane jɛ ŋwɛi bagbee shi, ni egbee fai lɛ amlijai etɛ mli ekome kɛ nuhiŋmɛii lɛ anɔ. 11  Ŋulami lɛ gbɛ́i ji Joomɔtso. Ni enɛ hã nui lɛ amlijai etɛ mli ekome joo, ni mɛi pii gboi yɛ nui lɛ ahewɔ, ejaakɛ amɛmiijoo. 12  Ŋwɛibɔfo ni ji ejwɛ lɛ kpã etɛtɛrɛmantɛrɛ lɛ. Ni atswa hulu lɛ mlijai etɛ mli ekome kɛ nyɔɔŋtsere lɛ mlijai etɛ mli ekome kɛ ŋulamii lɛ amlijai etɛ mli ekome nɔ, bɔ ni afee ni amɛmlijai etɛ mli ekomekome awo duŋ, ní shwane mlijai etɛ mli ekome lɛ, akaná la, ni nyɔɔŋ hu nakai nɔŋŋ. 13  Ni mikwɛ, ni minu akɛ okropɔŋ ko ní miifiliki yɛ ŋwɛi teŋ lɛ kɛ gbee ni wa kɛɛ: “Kpoo, kpoo, kpoo hã mɛi ni yɔɔ shikpɔŋ lɛ nɔ lɛ, yɛ tɛtɛrɛmantɛrɛi ni eshwɛ ni ŋwɛibɔfoi etɛ lɛ miiba amɛbakpã lɛ agbɛɛmɔi lɛ ahewɔ!”

Shishigbɛ Niŋmaa

Aloo “bɔɔ nii ní yɔɔ susumai.”