Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 3:1-22

3  “Ŋmaa oyahã Sarde asafo lɛ bɔfo lɛ akɛ: Nii ni mɔ ni hiɛ Nyɔŋmɔ mumɔi kpawo lɛ kɛ ŋulamii kpawo lɛ kɛɛ nɛ: ‘Mile onifeemɔi lɛ, akɛ ohiɛ gbɛ́i* akɛ ohiɛ kã, shi ogbo.  Hã ohiɛ ahi ohe nɔ, ní owaje nii ni eshwɛ ni heɔ agboi lɛ, ejaakɛ minako akɛ otsu onitsumɔi lɛ jogbaŋŋ kɛmɔ shi* yɛ mi-Nyɔŋmɔ lɛ hiɛ.  No hewɔ lɛ, yaa nɔ ohã nɔ ni oná kɛ nɔ ni onu lɛ ahi ojwɛŋmɔ mli,* ní oya nɔ ohiɛ mli, ní otsake otsui. Anɔkwa, kɛ́ ohiɛ etsɛ̃ɛɛ lɛ, maba tamɔ julɔ, ni oleŋ nɔ ŋmɛlɛtswaa nɔ ni maba onɔ lɛ kwraa.  “‘Kɛ̃lɛ, oyɛ aŋkroaŋkroi fioo komɛi* yɛ Sarde ní buleee amɛtadei lɛ, ni amɛkɛ mi baanyiɛ yɛ atadei yɛji amli, ejaakɛ amɛsa nakai.  No hewɔ lɛ, mɔ ni yeɔ kunim lɛ, abaawo lɛ atadei yɛji, ni migbeŋ* egbɛ́i yɛ wala wolo lɛ mli kɔkɔɔkɔ, shi moŋ matsĩ egbɛ́i lɛ tã yɛ mi-Tsɛ kɛ ebɔfoi* lɛ ahiɛ.  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’  “Ŋmaa oyahã Filadelfia asafo lɛ bɔfo lɛ akɛ: Nii ni mɔ ni yɔɔ krɔŋkrɔŋ, anɔkwafo lɛ, mɔ ni hiɛ David samfee lɛ, mɔ ni gbeleɔ ni mɔ ko ŋaaa, ní eŋaa hu ni mɔ ko gbeleee lɛ kɛɛ nɛ:  ‘Mile onifeemɔi lɛ—naa! mikɛ shinaa ni agbele ema ohiɛ, ni mɔ ko nyɛŋ aŋa. Ni mile akɛ hewalɛ fioo oyɔɔ, ni oye miwiemɔ lɛ nɔ, ni okwako migbɛ́i lɛ.  Naa! Mahã mɛi ni jɛ Satan kpeehe lɛ ní kɛɔ akɛ Yudafoi ji amɛ, ni kɛ̃lɛ amɛjeee, shi malemɔ moŋ amɛmaleɔ lɛ—naa! mahã amɛba ní amɛbakoto onaji anaa, ni mahã amɛle akɛ misumɔɔ bo. 10  Akɛni oye mishifimɔ lɛ he wiemɔ lɛ nɔ* hewɔ lɛ, mi hu mikɛ bo baato yɛ kaa ŋmɛlɛtswaa lɛ ní baaba shikpɔŋ muu lɛ fɛɛ nɔ, koni akɛka mɛi ni yɔɔ shikpɔŋ lɛ nɔ lɛ mli. 11  Miiba oya. Yaa nɔ ohiɛ nɔ ni oyɔɔ lɛ mli, koni mɔ ko mɔ ko akashɔ̃ okekere lɛ. 12  “‘Mɔ ni yeɔ kunim lɛ—mafee lɛ akulashiŋ yɛ mi-Nyɔŋmɔ lɛ sɔlemɔwe lɛ mli, ni ejeŋ kpo kɛjɛŋ mli dɔŋŋ, ni maŋma mi-Nyɔŋmɔ lɛ gbɛ́i kɛ mi-Nyɔŋmɔ lɛ maŋ lɛ, ni ji Yerusalem Hee lɛ ní jɛɔ ŋwɛi ekpelekeɔ shi kɛjɛɔ mi-Nyɔŋmɔ lɛ ŋɔɔ lɛ gbɛ́i, kɛ mi diɛŋtsɛ migbɛ́i hee lɛ, yɛ enɔ. 13  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’ 14  “Ŋmaa oyahã Laodikea asafo lɛ bɔfo lɛ akɛ: Nii ni Amen lɛ, anɔkwa odasefonyo ní yeɔ anɔkwa lɛ, Nyɔŋmɔ nibɔɔ lɛ shishijee lɛ kɛɛ nɛ: 15  ‘Mile onifeemɔi lɛ, akɛ obɛ ŋanii ni odɔko klakla hu. Miná ni kulɛ ofee ŋanii aloo odɔ klakla. 16  No hewɔ lɛ, akɛni kulɔkulɔ oyɔɔ ni obɛ ŋanii ni odɔko klakla hu hewɔ lɛ, mibafɛ̃ bo yɛ midaaŋ mashwie. 17  Ejaakɛ okɛɔ akɛ: “Niiatsɛ ji mi ni miyɛ nii ni nɔ ko nɔ ko ehiaaa mi,” shi oleee akɛ ooye awerɛho ni onii hu yɛ mɔbɔ ni ohiafo kɛ shwilafo kɛ heyayaiatsɛ ji bo, 18  miiwo bo ŋaa akɛ ohé shika tsuru ní atsuu he yɛ la mli yɛ miŋɔɔ koni otsɔ niiatsɛ, kɛ atadei yɛji koni owo ní akana oyayaiaŋ hiɛgbele lɛ, kɛ hiŋmɛi tsofa ní okɛkpa ohiŋmɛii anɔ koni ona nii. 19  “‘Mɛi fɛɛ ni midɔɔ amɛhe lɛ, mikuneɔ* amɛ ni mitsɔseɔ amɛ. No hewɔ lɛ, ohiɛ adɔ ní otsake otsui. 20  Naa! midamɔ shinaa lɛ naa miishi.* Kɛ́ mɔ ko nu migbee ní egbele shinaa lɛ, maba eshĩa lɛ ni mikɛ lɛ baabaye gbɛkɛ niyenii lɛ, ni lɛ hu ekɛ mi baaye. 21  Mɔ ni yeɔ kunim lɛ, mahã ekɛ mi ata mimaŋtsɛ sɛi lɛ nɔ, tamɔ bɔ nɔŋŋ ni mi hu miye kunim ní mikɛ mi-Tsɛ ta emaŋtsɛ sɛi lɛ nɔ lɛ. 22  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’”

Shishigbɛ Niŋmaa

Aloo “ale bo.”
Aloo “otsu onitsumɔi lɛ ogbe naa.”
Aloo “yaa nɔ okai nɔ ni oná kɛ nɔ ni onu lɛ.”
Sht. ŋm., “gbɛ́ii fioo komɛi.”
Aloo “mitsumɔŋ.”
Aloo “eŋwɛibɔfoi.”
Aloo eeenyɛ efee akɛ, “Akɛni onyiɛ shifimɔ he nɔkwɛmɔnɔ ní mifee lɛ sɛɛ.”
Aloo “mijajeɔ.”
Aloo “miitswa kɔkɔɔkɔ.”