Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 20:1-15

YITSEI LƐ AMLI SAJI

  • Afi Satan afii 1,000 (1-3)

  • Mɛi ni kɛ Kristo baaye nɔ afii 1,000 lɛ (4-6)

  • Abaajie Satan, ni no sɛɛ lɛ abaakpãtã ehiɛ (7-10)

  • Akojo gbohii lɛ yɛ maŋtsɛ sɛi yɛŋ lɛ hiɛ (11-15)

20  Ni mina ŋwɛibɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔsɔŋkɔsɔ kpeteŋkpele ko yɛ edɛŋ.  Emɔ drako lɛ, blema onufu lɛ, mɔ ni ji Abonsam kɛ Satan lɛ, ni efi lɛ afii akpe.  Ni eshɛ lɛ efɔ̃ bu kwɔŋkwɔŋ lɛ mli ni eŋa eyi ni esɔo naa, koni ekalaka jeŋmaji lɛ dɔŋŋ kɛyashi beyinɔ ní afii akpe lɛ baaba naagbee. Enɛ sɛɛ lɛ, esa akɛ ajie lɛ be fioo ko.  Ni mina maŋtsɛ sɛii, ni ahã mɛi ni tara nɔ lɛ hegbɛ akɛ amɛkojo. Hɛɛ, mina mɛi ni agbe amɛ* yɛ Yesu he odase ni amɛye kɛ Nyɔŋmɔ he sane ni amɛwie lɛ hewɔ lɛ asusumai* lɛ, kɛ mɛi ni jáko kooloo awuiyelɔ lɛ loo emaga lɛ ní amɛnáko okadi lɛ yɛ amɛhiɛŋtsei anɔ kɛ amɛdɛ̃ lɛ. Ni amɛba wala mli ni amɛkɛ Kristo lɛ ye nɔ akɛ maŋtsɛmɛi afii akpe.  (Gbohii ni eshwɛ lɛ baaa wala mli kɛyashi beyinɔ ni afii akpe lɛ ba naagbee.) Enɛ ji klɛŋklɛŋ gbohiiashitee lɛ.  Mɔ fɛɛ mɔ ní náa gbɛfaŋnɔ yɛ klɛŋklɛŋ gbohiiashitee lɛ mli lɛ yɛ miishɛɛ ni eyɛ krɔŋkrɔŋ; gbele ni ji enyɔ lɛ bɛ hewalɛ ko yɛ nɛkɛ mɛi nɛɛ anɔ, shi moŋ, amɛbaatsɔmɔ Nyɔŋmɔ osɔfoi kɛ Kristo lɛ osɔfoi, ni amɛkɛ lɛ baaye nɔ akɛ maŋtsɛmɛi afii akpe lɛ fɛɛ.  Agbɛnɛ, kɛ́ afii akpe lɛ ba naagbee nɔŋŋ lɛ, abaajie Satan kɛjɛ etsuŋwoo lɛ mli,  ni ebaaje kpo ní eyalaka nakai jeŋmaji ni yɔɔ shikpɔŋ lɛ koji ejwɛ lɛ, Gog kɛ Magog, koni ebua amɛnaa kutuu kɛhã ta lɛ. Mɛi nɛɛ ayibɔ tamɔ ŋshɔnaa shia.  Ni amɛyiŋ kɛtee shikpɔŋ muu lɛ fɛɛ nɔ, ni amɛyabɔle mɛi krɔŋkrɔŋi lɛ a-nsara lɛ kɛ maŋ ni asumɔɔ lɛ kɛkpe. Shi la jɛ ŋwɛi bashã amɛ butuu. 10  Ni ashɛ Abonsam lɛ, mɔ ni lakaa amɛ lɛ, awo la kɛ sɔlfa kpaakpo lɛ mli, he ni kooloo awuiyelɔ lɛ kɛ amale gbalɔ lɛ yɔɔ momo lɛ; ni abaapiŋ amɛ* shwane kɛ nyɔɔŋ kɛya naanɔi anaanɔ. 11  Ni mina maŋtsɛ sɛi yɛŋ kpeteŋkpele ko kɛ mɔ ni ta nɔ lɛ. Ni shikpɔŋ kɛ ŋwɛi jo foi kɛje ehiɛ, ni anáaa he ko ahã amɛ. 12  Ni mina gbohii lɛ, mɛi wuji kɛ mɛi bibii, damɔ maŋtsɛ sɛi lɛ hiɛ, ni agbele wolokpoi* anaa. Shi agbele wolokpo kroko naa; no ji wala wolokpo lɛ. Adamɔ nibii ni aŋmala yɛ wolokpoi lɛ amli lɛ anɔ akojo gbohii lɛ yɛ amɛnifeemɔi lɛ anaa. 13  Ni ŋshɔ lɛ jie gbohii ni yɔɔ emli lɛ ehã, ni gbele kɛ Gbonyo Bu* lɛ jie gbohii ni yɔɔ amɛmli lɛ amɛhã, ni akojo amɛteŋ mɔ fɛɛ mɔ yɛ enifeemɔi lɛ anaa. 14  Ni ashɛrɛ gbele kɛ Gbonyo Bu* lɛ ashwie la kpaakpo lɛ mli. Enɛ damɔ shi kɛhã gbele ni ji enyɔ lɛ, la kpaakpo lɛ. 15  Kɛfata he lɛ, mɔ fɛɛ mɔ ní anaaa akɛ aŋma egbɛ́i yɛ wala wolo lɛ mli lɛ, ashɛ lɛ afɔ̃ la kpaakpo lɛ mli.

Shishigbɛ Niŋmaa

Sht. ŋm., “mɛi ni akɛ lema lɛ gbe amɛ.”
Kwɛmɔ Wiemɔi Titrii Amligbalamɔ lɛKpo 6:9 sh. niŋ.
Aloo “abaatsĩ amɛnaa; abaawo amɛ tsuŋ.”
Woji kakadaji ni akotaa awoɔ tso he.
Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.
Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.