Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 2:1-29

2  “Ŋmaa oyahã Efeso asafo lɛ bɔfo lɛ akɛ: Nii ni mɔ ni hiɛ ŋulamii kpawo lɛ yɛ eninejurɔ, ní enyiɛɔ shika tsuru kanetsei kpawo lɛ ateŋ lɛ kɛɛ nɛ:  ‘Mile onifeemɔi lɛ, kɛ nitsumɔ ni otsuɔ waa lɛ kɛ oshifimɔ lɛ, ni akɛ oŋmɛɛɛ mɛi fɔji agbɛ, ni akɛ oka mɛi ni kɛɔ akɛ bɔfoi ji amɛ, shi amɛjeee lɛ okwɛ, ni ona akɛ amalelɔi ji amɛ.  Agbɛnɛ hu, ofiɔ shi, ni otee nɔ ohiɛ nibii amli yɛ migbɛ́i lɛ hewɔ, ni etɔko bo.  Kɛ̃lɛ, nɔ ni miyɔɔ kɛshi bo nɛ, no ji akɛ oŋmɛɛ o-klɛŋklɛŋ suɔmɔ lɛ he.  “‘No hewɔ lɛ, kaimɔ he ni ojɛ ogbee shi lɛ, ní otsake otsui ní otsu nitsumɔi ní otsu klɛŋklɛŋ lɛ. Kɛji ofeee nakai lɛ, maba oŋɔɔ, ni majie okanetso lɛ kɛje egbɛhe lɛ, ja otsake otsui.  Fɛɛ sɛɛ lɛ, obɔɔ enɛ he mɔdɛŋ: onyɛɔ nitsumɔi ní atsuɔ yɛ Nikolai jamɔ kuu lɛ mli, ní mi hu minyɛɔ lɛ.  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ: Mɔ ni yeɔ kunim lɛ, mahã eye wala tso lɛ ni yɔɔ Nyɔŋmɔ paradeiso lɛ mli lɛ nɔ yibii.’  “Ŋmaa oyahã Smirna asafo lɛ bɔfo lɛ akɛ: Nii ni ‘Klɛŋklɛŋ mɔ lɛ kɛ Naagbee mɔ lɛ,’ mɔ ni gbo ni eba wala mli ekoŋŋ lɛ, kɛɛ nɛ:  ‘Mile omanehulu lɛ kɛ ohia lɛ—shi niiatsɛ ji bo—ni mile mɛi ni kɛɔ akɛ Yudafoi ji amɛ, shi yɛ anɔkwale mli lɛ amɛjeee, shi moŋ amɛji Satan kpeehe* lɛ amusubɔɔ lɛ. 10  Kaashe amanehului ni obaana lɛ gbeyei. Naa! Abonsam baaya nɔ aŋɔ nyɛteŋ mɛi komɛi awo tsuŋ koni akɛka nyɛ kɛmɔ shi, ni nyɛbaana amanehulu gbii nyɔŋma. Feemɔ anɔkwafo kɛyashi gbele mli tete, ni mahã bo wala akekere lɛ. 11  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ: Mɔ ni yeɔ kunim lɛ, gbele ni ji enyɔ lɛ yeŋ lɛ awui ko kɔkɔɔkɔ.’ 12  “Ŋmaa oyahã Pergamo asafo lɛ bɔfo lɛ akɛ: Nii ni mɔ ni hiɛ klante kakadaŋŋ kɛ enaa nta ni naa ba lɛ kɛɛ nɛ: 13  ‘Mile he ni oyɔɔ lɛ, ni ji he ni Satan maŋtsɛ sɛi lɛ yɔɔ lɛ; ni kɛ̃lɛ okã he ohiɛ migbɛ́i lɛ mli kpɛŋŋ, ni okwaaa hemɔkɛyeli ní oyɔɔ yɛ mimli lɛ yɛ midasefonyo anɔkwafo Antipa gbii lɛ amli tete, mɔ ni agbe lɛ yɛ nyɛmasɛi, yɛ he ni Satan yɔɔ lɛ. 14  “‘Kɛ̃lɛ miyɛ nibii fioo komɛi kɛshi bo, no ji akɛ, oyɛ mɛi yɛ jɛmɛ ni hiɛ Bileam tsɔɔmɔ lɛ mli, mɔ ni tsɔɔ Balak akɛ ekɛ nanetɔ̃tɔmɔnɔ afɔ̃ Israelbii lɛ ahiɛ, ní amɛye nibii ni akɛshã afɔle ahã amagai, ní amɛkɛ amɛhe awo bɔlɛnamɔ jeŋba sha* mli lɛ. 15  Nakai nɔŋŋ hu oyɔɔ mɛi ni hiɛ Nikolai jamɔ kuu lɛ tsɔɔmɔ lɛ mli. 16  No hewɔ lɛ, tsakemɔ otsui. Kɛji ofeee nakai lɛ, miiba oŋɔɔ oya, ni mikɛ amɛ baabawu kɛ midaaŋ klante kakadaŋŋ lɛ. 17  “‘Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ: Mɔ ni yeɔ kunim lɛ, mahã lɛ mana ni akɛtee lɛ eko, ni mahã lɛ fɔbitɛ yɛŋ, ni yɛ fɔbitɛ lɛ nɔ lɛ, aŋma gbɛ́i hee ko ní mɔ ko mɔ ko leee akɛ ja mɔ ni náa fɔbitɛ lɛ kɛkɛ.’ 18  “Ŋmaa oyahã Tiatira asafo lɛ bɔfo lɛ akɛ: Nii ni Nyɔŋmɔ Bi lɛ, mɔ ni hiŋmɛii tamɔ lalilɛi ní enaji* tamɔ akɔɔble krɔŋŋ lɛ kɛɛ nɛ: 19  ‘Mile onifeemɔi lɛ, kɛ osuɔmɔ lɛ kɛ ohemɔkɛyeli lɛ kɛ osɔɔmɔ lɛ kɛ oshifimɔ lɛ, ni akɛ, nibii ní ofeɔ sɛɛkpee nɛɛ fe nɔ ni ofee tsutsu lɛ. 20  “‘Kɛ̃lɛ, nɔ ni miyɔɔ kɛshi bo nɛ, no ji akɛ onáa nakai yoo Yezebel, mɔ ni tsɛɔ ehe gbalɔ yoo, ní etsɔɔ minyɔji lɛ anii ní elakaa amɛ koni amɛkɛ amɛhe awo bɔlɛnamɔ jeŋba sha* mli, ní amɛye nibii ní akɛshã afɔle ahã amagai lɛ, he tsui. 21  Ni mihã lɛ be koni ekɛtsake etsui, shi esumɔɔɔ akɛ etsake etsui kɛje ebɔlɛnamɔ jeŋba sha* lɛ he. 22  Naa! miiba mashɛ lɛ mafɔ̃ hela saa nɔ, ni mɛi ni kɛ lɛ fiteɔ gbãla lɛ, mashɛrɛ amɛ mawo amanehulu kpeteŋkpele mli, ja amɛtsake amɛtsui kɛje enifeemɔi lɛ ahe. 23  Ni mikɛ gbele hela baagbe ebii lɛ, koni asafoi lɛ fɛɛ aná ale akɛ miji mɔ ni taoɔ mligbɛ susumɔi* kɛ tsuii amli lɛ, ni mahã nyɛteŋ mɔ fɛɛ mɔ bɔ ni sa nyɛnifeemɔi lɛ. 24  “‘Shi miikɛɛ nyɛ mɛi ni nyɛshwɛ yɛ Tiatira lɛ, mɛi fɛɛ ní enyiɛɛɛ tsɔɔmɔ nɛɛ sɛɛ, ní amɛnáaa amɛle nɔ ni atsɛɔ lɛ “Satan nibii ni mli kwɔlɔ” lɛ akɛ: Mikɛ jatsu kroko eŋmɛŋ nyɛnɔ. 25  Fɛɛ sɛɛ lɛ, nyɛhiɛa nɔ ni nyɛyɔɔ lɛ mli kɛyashi beyinɔ ni maba. 26  Ni mɔ ni yeɔ kunim, ní ehiɛɔ minifeemɔi lɛ amli kɛyashiɔ naagbee lɛ, mahã lɛ hegbɛ yɛ jeŋmaji lɛ anɔ, 27  tamɔ bɔ ni mi hu miná kɛjɛ mi-Tsɛ ŋɔɔ lɛ, ni ekɛ dadetso baakpala mɛi lɛ tamɔ tookwɛlɔ feɔ lɛ, koni ejwara amɛ dukuduku tamɔ ajwaraa sũ kukwɛii* lɛ. 28  Ni mahã lɛ leebi ŋulami lɛ. 29  Mɔ ni yɔɔ toi lɛ, hã enu nɔ ni mumɔ lɛ kɛɔ asafoi lɛ.’

Shishigbɛ Niŋmaa

Kwɛmɔ Mat 4:23 sh. niŋ.
Kwɛmɔ Wiemɔi Titrii Amligbalamɔ lɛ.
Aloo “enanetokotai.”
Kwɛmɔ Wiemɔi Titrii Amligbalamɔ lɛ.
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “bɔ ni mɔ ko nuɔ nii ahe yɛ emli tɔ̃ɔ.” Sht. ŋm., “sabai.”
Aloo “sũ gbɛ́i.”