Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 14:1-20

14  Ni mikwɛ, ni naa! Gwantɛŋbi lɛ damɔ Zion Gɔŋ lɛ nɔ, ni mɛi akpei oha-kɛ-nyɔŋmai-ejwɛ-kɛ-ejwɛ ní aŋma egbɛ́i kɛ e-Tsɛ gbɛ́i yɛ amɛhiɛŋtsei anɔ fata ehe.  Minu gbɛɛmɔ ko kɛjɛ ŋwɛi tamɔ nui pii agbɛɛmɔ, ni asaŋ etamɔ nugbɔshiimɔ kpeteŋkpele gbɛɛmɔ; ni gbɛɛmɔ ni minu lɛ tamɔ lálɔi ni miitswa amɛsaŋkui agbɛɛmɔ.  Ni amɛmiilá lala ko ni tamɔ lala hee yɛ maŋtsɛ sɛi lɛ hiɛ kɛ bɔɔ nii ejwɛ ní hiɛ kamɔ lɛ kɛ onukpai lɛ ahiɛ, ni mɔ ko mɔ ko nyɛɛɛ lala lɛ akase akɛ ja mɛi akpei oha-kɛ-nyɔŋmai-ejwɛ-kɛ-ejwɛ lɛ ni ahé kɛjɛ shikpɔŋ lɛ nɔ lɛ kɛkɛ.  Mɛnɛɛmɛi ji mɛi ni kɛ yei buleko amɛhe; anɔkwa, oblahii muji ji amɛ. Amɛji mɛi ni yaa nɔ amɛnyiɛɔ Gwantɛŋbi lɛ sɛɛ kɛyaa he fɛɛ he ni eyaa lɛ. Ahé mɛi nɛɛ kɛjɛ gbɔmɛi ateŋ akɛ klɛŋklɛŋ yibii kɛhã Nyɔŋmɔ kɛ Gwantɛŋbi lɛ,  ni anaaa amale ko yɛ amɛdaaŋ; kpa ko bɛ amɛhe.  Ni mina ŋwɛibɔfo kroko miifiliki yɛ ŋwɛi teŋ,* ni ehiɛ naanɔ sane kpakpa ní eyaajaje etsɔɔ mɛi ni yɔɔ shikpɔŋ lɛ nɔ lɛ, kɛ jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ.  Ekɛ gbee ni wa miiwie akɛ: “Nyɛshea Nyɔŋmɔ gbeyei ní nyɛkɛ anunyam ahãa lɛ, ejaakɛ ŋmɛlɛtswaa ní ekɛbaakojo lɛ eshɛ, no hewɔ lɛ, nyɛjáa mɔ ni fee ŋwɛi kɛ shikpɔŋ lɛ kɛ ŋshɔ lɛ kɛ nuhiŋmɛii lɛ.”  Ŋwɛibɔfo kroko, mɔ ni ji enyɔ nɔ, nyiɛ sɛɛ ni ekɛɛ: “Egbee shi! Babilon Kpeteŋkpele lɛ egbee shi, yoo ni hã jeŋmaji lɛ fɛɛ nu ebɔlɛnamɔ jeŋba sha* lɛ he akɔnɔ* wein lɛ eko lɛ!”  Ŋwɛibɔfo kroko, mɔ ni ji etɛ nɔ, nyiɛ amɛsɛɛ, ni ekɛ gbee ni wa kɛɛ: “Kɛ́ mɔ ko já kooloo awuiyelɔ lɛ kɛ emaga lɛ, ní ená okadi yɛ ehiɛŋtso nɔ loo enine nɔ lɛ, 10  ebaanu Nyɔŋmɔ mlifu wein ni afutuko mli ní afɔse awo E-mlifu kpulu lɛ mli lɛ hu eko, ni akɛ la kɛ sɔlfa baapiŋ lɛ yɛ ŋwɛibɔfoi krɔŋkrɔŋi lɛ ahiɛ kɛ Gwantɛŋbi lɛ hiɛ. 11  Ni amɛpiŋmɔ lɛ lasu lɛ teɔ shi kɛyaa naanɔi anaanɔ, ni mɛi ni jáa kooloo awuiyelɔ lɛ kɛ emaga lɛ, kɛ mɔ fɛɛ mɔ ni náa egbɛ́i lɛ okadi lɛ, náaa hejɔɔmɔ shwane kɛ nyɔɔŋ. 12  Biɛ shifimɔ yɛ mɛi krɔŋkrɔŋi lɛ agbɛfaŋ he ehia yɛ, mɛi ni yeɔ Nyɔŋmɔ kitãi lɛ anɔ, ní amɛhiɛɔ Yesu hemɔkɛyeli lɛ mli kpɛŋŋ lɛ.” 13  Ni minu gbee ko jɛ ŋwɛi miikɛɛ, “Ŋmaa: Gbohii ni kɛ Nuŋtsɔ lɛ efee ekome ní gboiɔ kɛjɛ be nɛɛ nɔ kɛyaa lɛ yɛ miishɛɛ. Hɛɛ, mumɔ lɛ kɛɛ, hã amɛjɔɔ amɛhe kɛjɛ amɛnitsumɔi lɛ amli, ejaakɛ amɛnitsumɔi lɛ kɛ amɛ nyiɛɔ.”* 14  Ni mikwɛ, ni naa! atatu yɛŋ ko, ni mɔ ko ni tamɔ gbɔmɔ bi ta atatu lɛ nɔ, ni shika tsuru akekere fi eyitso, ni ehiɛ nikpamɔ kakla ni naa ba yɛ edɛŋ. 15  Ŋwɛibɔfo kroko je kpo kɛjɛ sɔlemɔtsu lɛ mli, ni ebolɔ kɛ gbee ni wa ekɛɛ mɔ ni ta atatu lɛ nɔ lɛ akɛ: “Okɛ onikpamɔ kakla lɛ awo mli ni okpa nii, ejaakɛ nikpamɔ ŋmɛlɛtswaa lɛ eshɛ, ejaakɛ shikpɔŋ lɛ nɔ nikpamɔ nii lɛ etsu.” 16  Ni mɔ ni ta atatu lɛ nɔ lɛ kpã enikpamɔ kakla lɛ mli ewo shikpɔŋ lɛ nɔ, ni akpa shikpɔŋ lɛ nɔ nii lɛ. 17  Ni ŋwɛibɔfo kroko je kpo kɛjɛ sɔlemɔtsu ni yɔɔ ŋwɛi lɛ mli, ni lɛ hu ehiɛ nikpamɔ kakla ni naa ba. 18  Ni ŋwɛibɔfo kroko je kpo kɛjɛ afɔleshaa latɛ lɛ mli, ni eyɛ la lɛ nɔ hewalɛ. Ni ekɛ gbee ni wa bo etsɛ mɔ ni hiɛ nikpamɔ kakla ni naa ba lɛ, ekɛɛ: “Okɛ onikpamɔ kakla lɛ awo mli ní obua shikpɔŋ lɛ nɔ wein yibii shabii lɛ anaa, ejaakɛ eyibii lɛ etsu.” 19  Ŋwɛibɔfo lɛ kpã enikpamɔ kakla lɛ mli ewo shikpɔŋ lɛ nɔ, ni ebua shikpɔŋ lɛ nɔ wein tso yibii lɛ anaa, ni ekɛwo Nyɔŋmɔ mlifu lɛ weinŋaa bu kpeteŋkpele lɛ mli. 20  Anaanaa wein tso yibii lɛ anɔ yɛ maŋ lɛ sɛɛ, ni lá jɛ weinŋaa bu lɛ mli ni ekwɔ kɛtee ŋwɛi aahu kɛyashɛ okpɔŋɔi lɛ amanyoflɛi lɛ ahe kɛtee gbɛ jekɛmɔ stadioi akpe kɛ ohai ekpaa.*

Shishigbɛ Niŋmaa

Aloo “yɛ kɔɔyɔɔ lɛ mli; yɛ yiteŋ.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “he mlifu.”
Aloo “kɛ amɛ yaa.”
Aaafee km 296 (mi 184). Stadio kome feɔ m 185 (nat 606.95).