Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 12:1-17

YITSEI LƐ AMLI SAJI

  • Yoo lɛ, binuu lɛ, kɛ drako lɛ (1-6)

  • Mikael kɛ drako lɛ wu ta (7-12)

    • Ashɛ drako lɛ afɔ̃ shikpɔŋ lɛ nɔ (9)

    • Abonsam le akɛ be fioo kɛkɛ eyɔɔ (12)

  • Drako lɛ wa yoo lɛ yi (13-17)

12  Ni ana okadi kpeteŋkpele ko yɛ ŋwɛi: Yoo ko ni ewula kɛ hulu,* ni nyɔɔŋtsere yɛ enajiashi, ni ŋulamii nyɔŋma kɛ enyɔ akekere fi eyitso,  ni ehiɛ musu. Ni eebolɔ, ni eekɔmɔ ni ehe miijara lɛ ní ebaafɔ.  Ana okadi kroko yɛ ŋwɛi. Naa! Drako kpeteŋkpele ní tsuɔ tamɔ lalilɛi ní yɔɔ yitsei kpawo kɛ akolontoi nyɔŋma, ni maŋtsɛ faii* kpawo bumɔ eyitsei lɛ;  ni elei miigbala ŋwɛi ŋulamii amlijai etɛ mli ekome, ni etsirɛ amɛ eshwie shikpɔŋ lɛ nɔ. Ni drako lɛ tee nɔ edamɔ yoo ni baafɔ lɛ hiɛ, koni kɛ́ efɔ lɛ, emi ebi lɛ.  Ni efɔ binuu, hɛɛ nuu, mɔ ni kɛ dadetso baakpala jeŋmaji lɛ fɛɛ tamɔ tookwɛlɔ feɔ lɛ. Ni ashá ebi lɛ kɛtee Nyɔŋmɔ ŋɔɔ kɛ emaŋtsɛ sɛi lɛ masɛi.  Ni yoo lɛ jo foi kɛtee ŋa lɛ nɔ,* he ni Nyɔŋmɔ esaa he ko yɛ ehã lɛ lɛ, kɛ he ni amɛbaalɛ lɛ gbii akpe kɛ ohai enyɔ kɛ nyɔŋmai ekpaa yɛ lɛ.  Ni ta te shi yɛ ŋwɛi: Mikael* kɛ ebɔfoi* lɛ fã drako lɛ nɔ ta, ni drako lɛ kɛ ebɔfoi* lɛ kɛ amɛ wu  shi amɛnyɛɛɛ,* asaŋ amɛnáaa gbɛ dɔŋŋ yɛ ŋwɛi.  No hewɔ lɛ, ashɛ drako kpeteŋkpele lɛ afɔ̃, blema onufu lɛ, ní atsɛɔ lɛ Abonsam kɛ Satan lɛ, mɔ ni lakaa shikpɔŋ muu lɛ fɛɛ* lɛ; ashɛ lɛ afɔ̃ shikpɔŋ, ni ashɛrɛ ebɔfoi* lɛ hu ashwie afata ehe. 10  Ni minu gbee ko ni wa yɛ ŋwɛi miikɛɛ: “Agbɛnɛ, wɔ-Nyɔŋmɔ lɛ yiwalaheremɔ lɛ kɛ ehewalɛ lɛ kɛ e-Maŋtsɛyeli lɛ eba, ni e-Kristo lɛ kɛ ehegbɛ lɛ ebɔi nitsumɔ, ejaakɛ ashɛ mɔ ni kɛ sane fɔ̃ɔ wɔnyɛmimɛi lɛ anɔ, mɔ ni kɛ sane fɔ̃ɔ amɛnɔ shwane kɛ nyɔɔŋ yɛ wɔ-Nyɔŋmɔ lɛ hiɛ lɛ afɔ̃! 11  Ni amɛye enɔ kunim yɛ Gwantɛŋbi lɛ lá lɛ hewɔ, kɛ agbɛnɛ hu yɛ amɛdaseyeli wiemɔ lɛ hewɔ, ni kɛ́ eba lɛ akɛ amɛbaagboi tete lɛ, amɛdɔɔɔ amɛsusumai ahe.* 12  Enɛ hewɔ lɛ, nyɛ ŋwɛii kɛ nyɛ mɛi ni nyɛyɔɔ jɛmɛ, nyɛnáa miishɛɛ! Kpoo hã shikpɔŋ lɛ kɛ ŋshɔ lɛ, ejaakɛ Abonsam ekpeleke shi kɛba nyɛŋɔɔ, egiri waa diɛŋtsɛ, ejaakɛ ele akɛ be fioo kɛkɛ eyɔɔ.” 13  Agbɛnɛ, be ni drako lɛ na akɛ ashɛ lɛ afɔ̃ shikpɔŋ lɛ, ewa yoo lɛ ni fɔ binuu lɛ yi. 14  Shi aŋɔ okropɔŋ kpele lɛ fiji enyɔ lɛ ahã yoo lɛ, koni efiliki kɛya eshihilɛhe lɛ yɛ ŋa lɛ nɔ, he ni abaalɛ lɛ yɛ, be kɛ bei kɛ be fã* ní onufu lɛ enaaa lɛ* lɛ. 15  Ni onufu lɛ fɛ̃ nu tamɔ faa ko kɛjɛ edaaŋ eshwie yoo lɛ sɛɛ, koni faa lɛ amii yoo lɛ. 16  Shi shikpɔŋ lɛ baye ebua yoo lɛ, ni shikpɔŋ lɛ gbele edaaŋ ni emi faa ní drako lɛ fɛ̃ kɛjɛ edaaŋ eshwie lɛ. 17  No hewɔ lɛ, drako lɛ mli fu yoo lɛ, ni eyiŋ etee ní ekɛ yoo lɛ seshi* ní eshwɛ ní yeɔ Nyɔŋmɔ kitãi lɛ anɔ ní akɛ nitsumɔ ewo amɛdɛŋ akɛ amɛye Yesu he odase lɛ ayawu.

Shishigbɛ Niŋmaa

Aloo “ewo hulu tamɔ atade.”
Aloo “akekerei.”
Kwɛmɔ Mat 3:1 sh. niŋ.
Eshishi ji “Namɔ Tamɔ Nyɔŋmɔ?”
Aloo “eŋwɛibɔfoi.”
Aloo “eŋwɛibɔfoi.”
Aloo eeenyɛ efee akɛ, “shi aye enɔ [ni tsɔɔ akɛ, aye drako lɛ nɔ] kunim.”
Aloo “shikpɔŋ lɛ nɔ hei ni mɛi yɔɔ lɛ fɛɛ.”
Aloo “eŋwɛibɔfoi.”
Aloo “amɛwala he.” Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, bei etɛ kɛ fã.
Sht. ŋm., “kɛje onufu lɛ hiɛ.”
Sht. ŋm., “dumɔwu.”