Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 11:1-19

11  Ni ahã mi gãlã ko ni tamɔ tso,* ni ekɛɛ: “Tee shi ni osusu Nyɔŋmɔ sɔlemɔtsu lɛ kɛ afɔleshaa latɛ lɛ, ni okane mɛi ni jáa Nyɔŋmɔ yɛ mli lɛ.  Shi kpo lɛ ni yɔɔ sɔlemɔtsu lɛ agbó lɛ naa lɛ, shi no, kaasusu, ejaakɛ akɛhã jeŋmaji lɛ, ni amɛbaanaanaa maŋ krɔŋkrɔŋ lɛ nɔ nyɔji nyɔŋmai ejwɛ kɛ enyɔ.  Mahã midasefoi enyɔ lɛ awo kpekpe ni amɛgba gbii akpe kɛ ohai enyɔ kɛ nyɔŋmai ekpaa.”  Akɛ oliv tsei enyɔ lɛ kɛ kanetsei enyɔ lɛ feɔ mɛnɛɛmɛi ahe okadi, ni amɛdamɔ shikpɔŋ lɛ nɔ Nuŋtsɔ lɛ hiɛ.  Kɛ́ mɔ ko miitao aye amɛ awui ko lɛ, la jɛɔ amɛdaaŋ ni ekpãtãa amɛhenyɛlɔi lɛ ahiɛ. Kɛ́ eba lɛ akɛ mɔ ko miitao aye amɛ awui lɛ, nɛkɛ gbɛ nɔ nɔŋŋ sa akɛ atsɔ agbe lɛ.  Mɛnɛɛmɛi yɛ hegbɛ akɛ amɛŋa ŋwɛi naa koni nugbɔ akanɛ yɛ amɛgbalɛ gbii lɛ amli, ni amɛyɛ hegbɛ hu yɛ nui lɛ anɔ akɛ amɛhã etsɔ lá, ní amɛkɛ haomɔi srɔtoi ahao shikpɔŋ lɛ shii abɔ ni amɛsumɔɔ.  Kɛ́ amɛgbe amɛdaseyeli lɛ naa lɛ, kooloo awuiyelɔ ní jɛ bu kwɔŋkwɔŋ lɛ mli lɛ kɛ amɛ baawu ta, ni ebaaye amɛnɔ kunim ni ebaagbe amɛ.  Ni amɛgbohii lɛ baajwere gbɛjegbɛ titri ní yɔɔ maŋ kpeteŋkpele lɛ mli lɛ nɔ, nɔ ni yɛ mumɔŋ shishinumɔ naa lɛ atsɛɔ lɛ Sodom kɛ Ejipt lɛ, he ni agbe amɛ-Nuŋtsɔ lɛ hu yɛ tso jaŋŋ lɛ nɔ yɛ lɛ.  Ni gbɔmɛi srɔtoi kɛ wekui kɛ wiemɔi kɛ jeŋmaji lɛ ateŋ mɛi komɛi baakwɛ amɛgbohii lɛ gbii etɛ kɛ fã, ni amɛŋmɛŋ gbɛ ni akɛ amɛgbohii lɛ ayaŋmɛ gbonyo bu mli. 10  Ni mɛi ni yɔɔ shikpɔŋ lɛ nɔ lɛ baaná miishɛɛ babaoo yɛ amɛhewɔ, ni amɛmli baafili amɛ, ni amɛbaamajemajee amɛhe nikeenii, ejaakɛ nɛkɛ gbalɔi enyɔ nɛɛ piŋ mɛi ni yɔɔ shikpɔŋ lɛ nɔ lɛ. 11  Gbii etɛ kɛ fã lɛ sɛɛ lɛ, wala mumɔ jɛ Nyɔŋmɔ ŋɔɔ babote amɛmli, ni amɛte shi amɛdamɔ amɛnaji anɔ, ni gbeyei kpeteŋkpele mɔmɔ mɛi ni na amɛ lɛ. 12  Ni amɛnu gbee ni wa ko jɛ ŋwɛi miikɛɛ amɛ akɛ: “Nyɛkwɔa kɛbaa biɛ nɛɛ.” Ni amɛkwɔ kɛtee ŋwɛi yɛ atatu lɛ mli, ni amɛhenyɛlɔi lɛ na amɛ.* 13  Nakai ŋmɛlɛtswaa lɛ nɔ nɔŋŋ lɛ, shikpɔŋhosomɔ kpele ko ba, ni maŋ lɛ mlijai nyɔŋma mli ekome wule; ni shikpɔŋhosomɔ lɛ gbe mɛi akpei kpawo, ni gbeyei mɔmɔ mɛi ni shwɛ lɛ, ni amɛŋɔ anunyam amɛhã ŋwɛi Nyɔŋmɔ lɛ. 14  Kpoo ni ji enyɔ lɛ eho. Naa! Kpoo ni ji etɛ lɛ miiba oya. 15  Ŋwɛibɔfo ni ji kpawo lɛ kpã etɛtɛrɛmantɛrɛ lɛ. Ni anu gbei ni wa yɛ ŋwɛi miikɛɛ akɛ: “Je lɛŋ maŋtsɛyeli lɛ etsɔ wɔ-Nuŋtsɔ lɛ kɛ e-Kristo lɛ Maŋtsɛyeli, ni ebaaye maŋtsɛ kɛya naanɔi anaanɔ.” 16  Ni onukpai nyɔŋmai enyɔ kɛ ejwɛ ni tara amɛmaŋtsɛ sɛii anɔ yɛ Nyɔŋmɔ hiɛ lɛ kɛ amɛhiɛ bumɔ shi ni amɛjá Nyɔŋmɔ 17  amɛkɛɛ: “Wɔmiida bo shi, Yehowa* Nyɔŋmɔ, Ofe lɛ, mɔ ni yɔɔ amrɔ nɛɛ kɛ mɔ ni yɛ momo lɛ, ejaakɛ oŋɔ ohewalɛ kpeteŋkpele lɛ, ni obɔi nɔyeli akɛ maŋtsɛ. 18  Shi jeŋmaji lɛ amli fu, ni bo diɛŋtsɛ omlifu lɛ ba, ni be ni ato lɛ shɛ, be ni abaakojo gbohii lɛ ní ajuro onyɔji ni ji gbalɔi lɛ kɛ mɛi krɔŋkrɔŋi lɛ kɛ mɛi ni sheɔ ogbɛ́i lɛ gbeyei lɛ, mɛi bibii kɛ mɛi wuji lɛ, ní afite mɛi ni fiteɔ shikpɔŋ lɛ.”* 19  Ni agbele Nyɔŋmɔ sɔlemɔtsu ni yɔɔ ŋwɛi lɛ naa, ni ana ekpaŋmɔ adeka lɛ yɛ esɔlemɔtsu lɛ mli. Ni sarawai gbala ni gbei kɛ nugbɔshiimɔi kɛ shikpɔŋhosomɔi kɛ nugbɔŋtɛi babaoo ba.

Shishigbɛ Niŋmaa

Aloo “nisusumɔtso.”
Aloo “miikwɛ amɛ.”
Kwɛmɔ Wiemɔi Titrii Amligbalamɔ lɛ.
Aloo “ní akpãtã mɛi ni kpãtãa shikpɔŋ lɛ hiɛ lɛ ahiɛ lɛ.”