Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Kpojiemɔ 1:1-20

YITSEI LƐ AMLI SAJI

  • Kpojiemɔ ko ni jɛ Nyɔŋmɔ ŋɔɔ, ni ekɛtsɔ Yesu nɔ ekɛhã (1-3)

  • Ŋamɔ ni akɛmaje asafoi kpawo lɛ (4-8)

    • “Miji Alfa lɛ kɛ Omega lɛ” (8)

  • Yohane yaje Nuŋtsɔ lɛ gbi lɛ nɔ yɛ mumɔ naa (9-11)

  • Yesu ni awo ehiɛ nyam lɛ he ninaa (12-20)

1  Nii ni Nyɔŋmɔ kɛhã Yesu Kristo ní lɛ hu ejie lɛ kpo* koni ekɛtsɔɔ enyɔji lɛ nibii ni sa akɛ aba mli oya nɔŋŋ. Ni etsu ebɔfo lɛ, ni etsɔ ebɔfo lɛ nɔ ekɛbahã enyɔŋ Yohane yɛ okadii amli;  Yohane ji mɔ ni ye Nyɔŋmɔ wiemɔ lɛ kɛ Yesu Kristo odase lɛ he odase, hɛɛ, eye nibii fɛɛ ni ena lɛ he odase.  Mɔ ni kaneɔ gbalɛ nɛɛ mli wiemɔi lɛ kɛ mɛi ni nuɔ emli wiemɔi lɛ ní amɛyeɔ nibii ni aŋmala yɛ mli lɛ anɔ lɛ yɛ miishɛɛ, ejaakɛ be ni ato lɛ eshɛ etã.  Yohane ŋma kɛyahã asafoi kpawo ni yɔɔ Asia kpokpaa lɛ nɔ lɛ: Duromɔ kɛ toiŋjɔlɛ ahã nyɛ kɛjɛ “mɔ ni yɔɔ amrɔ nɛɛ kɛ mɔ ni yɛ momo kɛ mɔ ni baaba lɛ” dɛŋ, kɛ agbɛnɛ hu kɛjɛ mumɔi kpawo ni yɔɔ emaŋtsɛ sɛi lɛ hiɛ lɛ ŋɔɔ,  kɛ agbɛnɛ hu, kɛjɛ Yesu Kristo, “Odasefonyo Anɔkwafo lɛ,” “kromɔbi kɛjɛ gbohii ateŋ lɛ,” kɛ “shikpɔŋ lɛ nɔ maŋtsɛmɛi lɛ a-Nɔyelɔ lɛ” dɛŋ. Mɔ ni sumɔɔ wɔ ní etsɔ lɛ diɛŋtsɛ elá lɛ nɔ ehã wɔye wɔhe kɛjɛ wɔhe eshai lɛ amli lɛ—  ni ehã wɔtsɔmɔ maŋtsɛmɛi,* osɔfoi kɛhã e-Nyɔŋmɔ kɛ e-Tsɛ lɛ—hɛɛ, lɛ aŋɔ anunyam kɛ hewalɛ ahã kɛya naanɔ. Amen.  Naa! Eeba kɛ atatui lɛ, ni hiŋmɛi fɛɛ hiŋmɛi baana lɛ, kɛ mɛi ni tsurɔ lɛ nii lɛ; ni shikpɔŋ lɛ nɔ wekui lɛ fɛɛ baagbala amɛhe mai kɛtsɔɔ akɛ amɛmiiye awerɛho yɛ ehewɔ. Hɛɛ, Amen.  Yehowa* Nyɔŋmɔ kɛɛ, “Miji Alfa lɛ kɛ Omega lɛ,* mɔ ni yɔɔ amrɔ nɛɛ kɛ mɔ ni yɛ momo kɛ mɔ ni baaba lɛ, Ofe lɛ.”  Mi Yohane, nyɛnyɛmi kɛ mɔ ni kɛ nyɛ náa gbɛfaŋnɔ yɛ amanehulu lɛ kɛ maŋtsɛyeli lɛ kɛ shifimɔ lɛ mli yɛ Yesu ní wɔkɛbɔɔ lɛ hewɔ lɛ, miyɛ ŋshɔkpɔ ni atsɛɔ lɛ Patmo lɛ nɔ, yɛ Nyɔŋmɔ he sane ni miwieɔ kɛ Yesu he odase ni miyeɔ lɛ hewɔ. 10  Yɛ mumɔ lɛ naa lɛ, miyaje Nuŋtsɔ lɛ gbi lɛ nɔ, ni minu gbee ko ni naa wa tamɔ tɛtɛrɛmantɛrɛ gbɛɛmɔ yɛ misɛɛ, 11  ní kɛɛ akɛ: “Nɔ ni onaa lɛ, ŋmaa owo wolokpo* mli ní okɛmaje asafoi kpawo lɛ: yɛ Efeso, yɛ Smirna, yɛ Pergamo, yɛ Tiatira, yɛ Sarde, yɛ Filadelfia, kɛ agbɛnɛ hu, yɛ Laodikea.” 12  Mitsɔ mihe koni makwɛ mɔ ni kɛ mi wieɔ lɛ, ni be ni mitsɔ mihe lɛ, mina shika tsuru kanetsei kpawo, 13  ni mɔ ko tamɔ gbɔmɔ bi yɛ kanetsei lɛ ateŋ, ni ewo atade yuu ni shɛɔ enajiashi, ni ekɛ shika tsuru mlifiinɔ efi etsitsi. 14  Kɛfata he lɛ, eyitso kɛ eyitsɔi yɛɔ tamɔ kooloo hetsɔi yɛŋ, tamɔ snoo, ni ehiŋmɛii tamɔ lalilɛi, 15  ni enaji* tamɔ akɔɔble krɔŋŋ ní edɔ yɛ flɔnɔɔ mli, ni egbee tamɔ nui babaoo gbɛɛmɔ. 16  Ni ehiɛ ŋulamii kpawo yɛ eninejurɔ, ni klante kakadaŋŋ kɛ enaa nta ni naa ba jɛ edaaŋ, ni ehiɛ tamɔ hulu ni miitso kɛ ehewalɛ fɛɛ. 17  Be ni mina lɛ lɛ, migbee shi yɛ enaji anaa tamɔ mɔ ni egbo. Ni ekɛ eninejurɔ ŋmɛ minɔ ni ekɛɛ: “Kaashe gbeyei. Miji Klɛŋklɛŋ mɔ lɛ kɛ Naagbee mɔ lɛ, 18  kɛ mɔ ni hiɛ kã lɛ, ni migbo, shi naa! mihiɛ kã kɛmiiya naanɔi anaanɔ, ni mihiɛ gbele kɛ Gbonyo Bu* lɛ naa samfei lɛ. 19  No hewɔ lɛ, ŋmaa nibii ni ona lɛ, kɛ nibii ni yɔɔ lɛ, kɛ nibii ni baaba yɛ enɛɛmɛi asɛɛ lɛ. 20  Shi ŋulamii kpawo ni ona yɛ mininejurɔ nɔ lɛ kɛ shika tsuru kanetsei kpawo lɛ ahe teemɔŋ saji krɔŋkrɔŋi lɛ nɛ: Ŋulamii kpawo lɛ damɔ shi kɛhã asafoi kpawo lɛ abɔfoi lɛ, ni kanetsei kpawo lɛ damɔ shi kɛhã asafoi kpawo lɛ.

Shishigbɛ Niŋmaa

Aloo “ekpa he mama; egbele naa.”
Sht. ŋm., “maŋtsɛyeli.”
Kwɛmɔ Wiemɔi Titrii Amligbalamɔ lɛ.
Aloo “A lɛ kɛ Z lɛ.” Alfa ji nɔ ni jeɔ Hela niŋmaa okadii lɛ ashishi, ni Omega ji nɔ ni gbeɔ naa.
Wolo kakadaŋŋ ni akotaa awoɔ tso he.
Aloo “enanetokotai.”
Aloo “Hedis,” ni tsɔɔ akɛ, mfonirifeemɔŋ gbonyo bu kome kɛhã adesai. Kwɛmɔ Wiemɔi Titrii Amligbalamɔ lɛ.