Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 9:1-43

9  Shi Saul, ni no mli lɛ ekã he eewo Nuŋtsɔ lɛ kaselɔi lɛ ahe gbeyei ni eesumɔ waa ni egbe amɛ lɛ, tee osɔfonukpa lɛ ŋɔɔ  ni eyabi lɛ koni ehã lɛ woji ni ekɛya kpeehei ni yɔɔ Damasko lɛ, koni eyafimɔ mɔ fɛɛ mɔ ní ebaana akɛ efata mɛi ní nyiɛ Gbɛ Lɛ* nɔ lɛ ahe, hii jio, yei jio, kɛba Yerusalem.  Agbɛnɛ, be ni enyiɛ gbɛ lɛ nɔ ni eebɛŋkɛ Damasko lɛ, trukaa lɛ la ko kpɛ kɛjɛ ŋwɛi kɛbabɔle lɛ,  ni egbee shi ni enu gbee ko miikɛɛ lɛ akɛ: “Saul, Saul, mɛni hewɔ owaa mi yi?”  Saul bi akɛ: “Bo namɔ, Onukpa?” Ni ekɛɛ: “Miji Yesu, mɔ ni owaa lɛ yi lɛ.  Shi tee shi ni oya maŋ lɛ mli, ni abaakɛɛ bo nɔ ni esa akɛ ofee.”  Agbɛnɛ, hii ni kɛ lɛ nyiɛ lɛ etɔ mu kɛdamɔ shi, anɔkwa, amɛmiinu gbee ko shi amɛnaaa mɔ ko mɔ ko.  Ni Saul te shi kɛjɛ shikpɔŋ, ni ehiŋmɛii jwere nɔ moŋ, shi enaaa nii. No hewɔ lɛ, amɛmɔ enine mli ni amɛkɛ lɛ tee Damasko.  Ni enaaa nii, ni asaŋ eyeee nii ni enuuu nɔ ko gbii etɛ. 10  Kaselɔ ko yɛ Damasko ni atsɛɔ lɛ Anania, ni Nuŋtsɔ lɛ kɛɛ lɛ yɛ ninaa mli akɛ: “Anania!” Ni ekɛɛ: “Naa mi, Nuŋtsɔ.” 11  Nuŋtsɔ lɛ kɛɛ lɛ akɛ: “Tee shi, yaa gbɛjegbɛ ni atsɛɔ lɛ Trɔmɔɔ lɛ nɔ, ni oyabi nuu ko ni atsɛɔ lɛ Saul ni jɛ Tarso lɛ shi, yɛ Yuda we lɛ. Ejaakɛ naa! eesɔle, 12  ni ena yɛ ninaa mli akɛ nuu ko ni atsɛɔ lɛ Anania ba mli ni ekɛ eniji baŋmɛlɛ enɔ koni ena nii ekoŋŋ.” 13  Shi Anania hã hetoo akɛ: “Nuŋtsɔ, minu nuu nɛɛ he sane yɛ mɛi babaoo anaa, akɛ efee omɛi krɔŋkrɔŋi ni yɔɔ Yerusalem lɛ efɔŋ babaoo. 14  Ni biɛ hu lɛ, ená hegbɛ kɛjɛ osɔfoi tsiifoi lɛ adɛŋ akɛ ebamɔmɔ* mɛi fɛɛ ni boɔ tsɛɔ ogbɛ́i lɛ.” 15  Shi Nuŋtsɔ lɛ kɛɛ lɛ akɛ: “Yaa! ejaakɛ mɔ nɛ ji dɛŋdade ko ni ahala ahã mi koni ehiɛ migbɛ́i lɛ kɛya jeŋmaji lɛ kɛ maŋtsɛmɛi kɛ Israelbii lɛ ahiɛ. 16  Ejaakɛ mibatsɔɔ lɛ faŋŋ, amanehului abɔ ni esa akɛ ena yɛ migbɛ́i lɛ hewɔ.” 17  No hewɔ lɛ, Anania tee ni eyabote shĩa lɛ, ni ekɛ eniji ŋmɛlɛ enɔ ni ekɛɛ: “Minyɛmi Saul, Nuŋtsɔ Yesu, mɔ ni jie ehe kpo etsɔɔ bo yɛ gbɛ ni onyiɛ nɔ kɛbaa lɛ nɔ lɛ etsu mi kɛba koni ona nii ekoŋŋ ni oyi obɔ kɛ mumɔ krɔŋkrɔŋ.” 18  Ni amrɔ lɛ nibii komɛi ni tamɔ loo he totoi jɛ ehiŋmɛii amli shwie shi, ni ena nii ekoŋŋ. Ni ete shi ni abaptisi lɛ, 19  ni eye nii ni ená hewalɛ. Ekɛ kaselɔi ni yɔɔ Damasko lɛ hi shi gbii komɛi, 20  ni amrɔ lɛ ebɔi Yesu he sane shiɛmɔ yɛ kpeehei lɛ akɛ, mɔ nɛ ji Nyɔŋmɔ Bi lɛ. 21  Shi mɛi fɛɛ ni nuɔ lɛ anaa kpɛɔ amɛhe ni amɛkɛɔ akɛ: “Ani jeee mɔ nɛ ji mɔ ni wa mɛi ni yɔɔ Yerusalem ní boɔ tsɛɔ gbɛ́i nɛɛ ayi waa lɛ? Biɛ nɛɛ hu ni eba lɛ, ani jeee ba eba koni ebamɔmɔ amɛ ni ekɛ amɛ ayahã* osɔfoi tsiifoi lɛ?” 22  Shi Saul tee nɔ ená hewalɛ babaoo ni ehã Yudafoi ni yɔɔ Damasko lɛ anaa kpɛ amɛhe ejaakɛ ekɛ odaseyelii ni mɔɔ shi tsɔɔ faŋŋ akɛ mɔ nɛ ji Kristo lɛ. 23  Agbɛnɛ, gbii babaoo sɛɛ lɛ, Yudafoi lɛ tee eyi nɔ apam akɛ amɛbaagbe lɛ. 24  Shi Saul ná ele ŋaa ni amɛtsɔ yɛ ehe lɛ. Amɛbuɔ agbói lɛ anaa hu daa shwane kɛ nyɔɔŋ bɔ ni afee ni amɛgbe lɛ. 25  No hewɔ lɛ, ekaselɔi lɛ ŋɔ lɛ nyɔɔŋ ni amɛkɛ lɛ wo kɛntɛŋ mli ni amɛshiu lɛ kɛtsɔ fɔlɔ ko ni yɔɔ gbogbo lɛ mli lɛ mli kɛyayi shi. 26  Be ni eyashɛ Yerusalem lɛ, ebɔ mɔdɛŋ koni eyafata kaselɔi lɛ ahe, shi amɛ fɛɛ amɛmiishe lɛ gbeyei ejaakɛ amɛheee amɛyeee akɛ kaselɔ ji lɛ. 27  No hewɔ lɛ, Barnaba baye ebua lɛ, ni enyiɛ ehiɛ kɛtee bɔfoi lɛ aŋɔɔ, ni ebɔ amɛ fitsofitso bɔ ni Saul na Nuŋtsɔ lɛ yɛ gbɛ lɛ nɔ, ni akɛ, ekɛ lɛ wie, kɛ bɔ ni Saul kɛ ekãa wie Yesu gbɛ́i lɛ he yɛ Damasko lɛ. 28  No hewɔ lɛ, etee nɔ ekɛ amɛ hi shi, ni ekɛ amɛ yaa baa yɛ Yerusalem, ni ekɛ ekãa wieɔ yɛ Nuŋtsɔ lɛ gbɛ́i mli. 29  Ekɛ Yudafoi ni wieɔ Hela lɛ wieɔ ni ekɛ amɛ taa naa, shi amɛka shii abɔ akɛ amɛbaagbe lɛ. 30  Be ni nyɛmimɛi lɛ ná le enɛ lɛ, amɛkɛ lɛ kpeleke shi kɛtee Kaisarea ni amɛwo lɛ gbɛ kɛtee Tarso. 31  Anɔkwa, asafo lɛ ná toiŋjɔlɛ yɛ Yudea kɛ Galilea kɛ Samaria fɛɛ agbɛnɛ, ni enane tee nɔ mɔ shi; ni be ni enyiɛɔ yɛ Yehowa* gbeyeishemɔ kɛ mumɔ krɔŋkrɔŋ lɛ miishɛjemɔ mli lɛ, etee nɔ eshwere. 32  Agbɛnɛ, be ni Petro kpaa kpokpaa lɛ nɔ fɛɛ lɛ, ekpeleke shi kɛtee mɛi krɔŋkrɔŋi ni yɔɔ Lida lɛ hu aŋɔɔ. 33  Jɛmɛ ena nuu ko ni atsɛɔ lɛ Ainea lɛ yɛ, ni ekaje kɛkã esaa nɔ afii kpaanyɔ sɔŋŋ, ejaakɛ ekumɔ. 34  Petro kɛɛ lɛ akɛ: “Ainea, Yesu Kristo miitsa bo. Tee shi ni oŋmɛ osaa lɛ.” Ni amrɔ lɛ ete shi. 35  Be ni mɛi fɛɛ ni yɔɔ Lida kɛ Sharon Ŋa lɛ nɔ lɛ na lɛ lɛ, amɛkpale kɛba Nuŋtsɔ lɛ ŋɔɔ. 36  Agbɛnɛ, kaselɔ ko yɛ Yopa ni atsɛɔ lɛ Tabita, ni eshishi yɛ Hela mli ji “Dorka.”* Eyi obɔ kɛ nitsumɔi kpakpai kɛ ejuji ni efeɔ ohiafoi lɛ. 37  Shi nakai gbii lɛ amli lɛ, ehe baye ni egbo. No hewɔ lɛ, amɛju ehe, ni amɛkɛ lɛ yaŋmɛ ŋwɛi asa ko nɔ. 38  Akɛni Lida bɛŋkɛ Yopa hewɔ lɛ, be ni kaselɔi lɛ nu akɛ Petro yɛ nakai maŋ lɛ mli lɛ, amɛtsu hii enyɔ kɛtee eŋɔɔ ni amɛyakpa lɛ fai akɛ: “Ofainɛ kaashashao shi akɛ oooba wɔŋɔɔ.” 39  Ni Petro te shi ni ekɛ amɛ tee. Ni be ni eshɛ jɛmɛ lɛ, amɛkɛ lɛ kwɔ kɛtee ŋwɛi asa lɛ nɔ; ni okulafoi lɛ fɛɛ badamɔ ehiɛ ní amɛmiifofoi, ni amɛkɛ atadei kɛ atadei yuuyui* ní Dorka fee be ni ekɛ amɛ yɔɔ lolo lɛ miitsɔɔ lɛ. 40  Kɛkɛ ni Petro hã mɔ fɛɛ mɔ je kpo, ni ekula shi esɔle. Kɛkɛ ni etsɔ ehe ekwɛ gbonyo lɛ, ni ekɛɛ: “Tabita, tee shi!” Ni Tabita gbele ehiŋmɛii, ni be ni ehiŋmɛi gba Petro nɔ lɛ, eho eta shi. 41  Ni Petro mɔ enine mli ni ewó enɔ, ni etsɛ mɛi krɔŋkrɔŋi lɛ kɛ okulafoi lɛ, ni ekɛ lɛ damɔ amɛhiɛ hiɛkãalɔ. 42  Aná ale enɛ yɛ Yopa fɛɛ, ni mɛi babaoo he Nuŋtsɔ lɛ nɔ amɛye. 43  Ni etee nɔ ehi Yopa gbii saŋŋ yɛ kooloo hewolo kpoolɔ ko ni atsɛɔ lɛ Simon lɛ ŋɔɔ.

Shishigbɛ Niŋmaa

Enɛ kɔɔ Kristofoi ashihilɛ gbɛ kɛ tsɔɔmɔ lɛ he.
Sht. ŋm., “ebafimɔ; ekɛ gboklɛi abawo.”
Sht. ŋm., “koni ebafimɔ amɛ ni ekpala amɛ kɛyahã.”
Kwɛmɔ Wiemɔi Titrii Amligbalamɔ lɛ.
Hela gbɛ́i Dorka kɛ Aramaik gbɛ́i Tabita lɛ fɛɛ shishi ji “Odabɔ.”
Aloo “atadei anɔhaanɔi.”