Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 7:1-60

7  Shi osɔfonukpa lɛ kɛɛ: “Ani nibii nɛɛ yɛ mli nakai?”  Stefano here nɔ akɛ: “Ataamɛi, nyɛmimɛi kɛ tsɛmɛi, nyɛboa toi. Anunyam Nyɔŋmɔ lɛ jie ehe kpo etsɔɔ wɔtsɛ Abraham be ni eyɔɔ Mesopotamia lɛ dani efã kɛbahi Haran,  ni ekɛɛ lɛ akɛ: ‘Jee oshikpɔŋ lɛ nɔ kɛ owekumɛi lɛ ateŋ ni oya shikpɔŋ ni matsɔɔ bo lɛ nɔ.’  Kɛkɛ ni eje Kaldeabii ashikpɔŋ lɛ nɔ ni eyahi Haran. Ni be ni etsɛ gbo sɛɛ lɛ, Nyɔŋmɔ hã efã kɛje jɛmɛ kɛbahi shikpɔŋ nɛɛ ni nyɛyɔɔ nɔ amrɔ nɛɛ nɔ.  Ni kɛ̃lɛ, ehãaa lɛ gboshinii ko yɛ nɔ, dabi, ehãaa lɛ nɔ ni da bɔ ni ekɛ enane baama nɔ tete; shi ewo lɛ shi akɛ ekɛbaahã lɛ koni etsɔ enɔ, ni yɛ esɛɛ lɛ, ekɛbaahã eseshibii* lɛ, tsɛbelɛ no mli lɛ ebɛ bi ko.  Kɛfata he lɛ, Nyɔŋmɔ kɛɛ lɛ akɛ eseshibii* lɛ baayato gbɔ yɛ shikpɔŋ ko ni jeee amɛnɔ nɔ, ni mɛi lɛ baaye amɛ nyɔŋ ni amɛbaawa amɛ yi* afii ohai ejwɛ.  Nyɔŋmɔ kɛɛ akɛ, ‘Ni makojo nakai jeŋmaŋ ní baaye amɛ nyɔŋ lɛ, ni nibii nɛɛ asɛɛ lɛ, amɛbaaje jɛmɛ ní amɛkɛ sɔɔmɔ krɔŋŋ abahã mi yɛ biɛ nɛɛ.’  “Ekɛ ketiafoo he kpaŋmɔ ko hu hã lɛ, ni efɔ Isak ni efo lɛ ketia yɛ gbi ni ji gbi kpaanyɔ lɛ nɔ, ni Isak fɔ Yakob,* ni Yakob fɔ weku yitsei* nyɔŋma kɛ enyɔ lɛ.*  Ni weku yitsei lɛ ye Yosef he awuŋa ni amɛhɔ̃ɔ lɛ kɛtee Ejipt. Shi Nyɔŋmɔ kɛ lɛ yɛ, 10  ni ejie lɛ kɛjɛ emanehului lɛ fɛɛ mli ni ehã ená duromɔ kɛ hiɛshikamɔ yɛ Ejipt maŋtsɛ Farao hiɛ. Ni ehala lɛ akɛ eye Ejipt kɛ ewe lɛ fɛɛ nɔ. 11  Shi hɔmɔ ko ba Ejipt kɛ Kanaan fɛɛ, hɛɛ, amanehulu kpeteŋkpele ko, ni wɔtsɛmɛi lɛ náaa nɔ ko amɛye. 12  Shi Yakob nu akɛ niyenii* yɛ Ejipt, ni etsu wɔtsɛmɛi lɛ jɛmɛ nɔ ni ji klɛŋklɛŋ nɔ. 13  Nɔ ni ji shii enyɔ nɔ lɛ, Yosef jie ehe shi etsɔɔ enyɛmimɛi lɛ, ni Farao baná ele Yosef weku lɛ. 14  No hewɔ lɛ, Yosef kɛ shɛɛ maje, ni ayaŋɔ etsɛ Yakob kɛ ewekumɛi lɛ fɛɛ kɛjɛ jɛmɛ kɛba, amɛyibɔ ji mɛi* nyɔŋmai kpawo kɛ enumɔ. 15  No hewɔ lɛ, Yakob kpeleke shi kɛtee Ejipt ni egbo yɛ jɛmɛ, ni nakai nɔŋŋ wɔtsɛmɛi lɛ hu gboi. 16  Akɛ amɛ tee Shekem, ni akɛ amɛ yaŋmɛlɛ gbonyo bu ni Abraham hé kɛ jwiɛtɛi shika kɛjɛ Hamor bihii lɛ adɛŋ yɛ Shekem lɛ mli. 17  “Be ni shiwoo ni Nyɔŋmɔ tswa he adafi etsɔɔ Abraham lɛ mlibaa be lɛ miihe ashɛ lɛ, maŋ lɛ bada ni amɛyi fa babaoo yɛ Ejipt, 18  kɛyashi beyinɔ ni maŋtsɛ kroko bate shi yɛ Ejipt, ni eleee Yosef. 19  Mɔ nɛ kɛ wɔjakubii lɛ ye yɛ ŋaa mli, ni efee tsɛmɛi lɛ efɔŋ, akɛ enyɛ amɛnɔ ni amɛkpoo amɛbifabii lɛ koni amɛkahi wala mli. 20  Nakai be lɛ mli nɔŋŋ afɔ Mose, ni ehe yɛ fɛo naakpa yɛ Nyɔŋmɔ hiɛ. Ni akwɛ lɛ nyɔji etɛ yɛ etsɛ shĩa. 21  Shi be ni ashĩ lɛ afɔ̃ shi lɛ,* Farao biyoo lɛ wó lɛ ni ekwɛ lɛ tamɔ lɛ diɛŋtsɛ ebi. 22  No hewɔ lɛ, atsɔɔ Mose Ejiptbii lɛ ahiɛshikamɔ lɛ fɛɛ. Anɔkwa, no mli lɛ eyɛ hewalɛ yɛ ewiemɔi kɛ enifeemɔi amli. 23  “Agbɛnɛ be ni eye afii nyɔŋmai ejwɛ lɛ, eba etsui mli* akɛ ebaayasara* enyɛmimɛi Israelbii lɛ. 24  Be ni ehiŋmɛi gba nɔ akɛ aafee amɛteŋ mɔ kome efɔŋ lɛ, efã mɔ lɛ he ni egbe Ejiptnyo lɛ kɛtɔ mɔ ni afeɔ lɛ efɔŋ lɛ he owele. 25  Esusu akɛ enyɛmimɛi lɛ baakɔ sɛɛ akɛ Nyɔŋmɔ miitsɔ enine nɔ eehere amɛyiwala, shi amɛkɔɔɔ sɛɛ. 26  Enɔ jetsɛremɔ lɛ, ebanina amɛ ni amɛmiinɔ, ni ebɔ mɔdɛŋ akɛ ekpãtã amɛ koni toiŋjɔlɛ ahi amɛteŋ, ni ekɛɛ akɛ: ‘Ataamɛi, nyɛmimɛi ji nyɛ. Mɛni hewɔ nyɛfeɔ nyɛhe efɔŋ nɛɛ?’ 27  Shi mɔ ni feɔ enaanyo lɛ efɔŋ lɛ tsirɛ lɛ ni ekɛɛ, ‘Namɔ wó bo wɔnɔyelɔ kɛ kojolɔ? 28  Ani ootao ogbe mi tamɔ bɔ ni nyɛ lɛ ogbe Ejiptnyo lɛ?’ 29  Be ni Mose nu enɛ lɛ, ejo foi ni eyato gbɔ yɛ Midian shikpɔŋ lɛ nɔ, ni efɔ bihii enyɔ yɛ jɛmɛ. 30  “Afii nyɔŋmai ejwɛ sɛɛ lɛ, ŋwɛibɔfo ko jie ehe kpo etsɔɔ lɛ yɛ Sinai Gɔŋ lɛ he ŋa lɛ nɔ* yɛ ŋmei tso ko ni miitso lɛ mli. 31  Be ni Mose na enɛ lɛ, enaa kpɛ ehe yɛ nɔ ni ena lɛ hewɔ. Shi be ni ebɛŋkɛɔ ní ekwɛ nɔ ni ji lɛ, enu Yehowa* gbee miikɛɛ: 32  ‘Miji otsɛmɛi a-Nyɔŋmɔ lɛ, Abraham kɛ Isak kɛ Yakob Nyɔŋmɔ lɛ.’ Ni Mose he bɔi kpokpomɔ ni ekaaa akɛ ebaaya nɔ ekwɛ. 33  Yehowa* kɛɛ lɛ akɛ: ‘Jiemɔ otokota lɛ yɛ onane, ejaakɛ he ni odamɔ lɛ, shikpɔŋ krɔŋkrɔŋ ni. 34  Anɔkwa, mina bɔ ni awaa miwebii ni yɔɔ Ejipt lɛ ayi lɛ, ni minu amɛkɛ̃ɛmɔ lɛ, ni mikpeleke shi miba koni mibajie amɛ. Agbɛnɛ ba, matsu bo Ejipt.’ 35  Nɛkɛ Mose nɛɛ ni amɛkwa lɛ amɛkɛɛ: ‘Namɔ wó bo nɔyelɔ kɛ kojolɔ?’ lɛ, lɛ nɔŋŋ Nyɔŋmɔ tsɔ ŋwɛibɔfo ni jie ehe kpo etsɔɔ lɛ yɛ ŋmei tso lɛ mli lɛ nɔ etsu lɛ akɛ nɔyelɔ kɛ kpɔ̃lɔ fɛɛ lɛ. 36  Nuu nɛɛ nyiɛ amɛhiɛ kɛshi Ejipt, ni efee naakpɛɛ nii* kɛ okadii yɛ Ejipt kɛ Ŋshɔ Tsuru lɛ mli kɛ ŋa lɛ nɔ* afii nyɔŋmai ejwɛ. 37  “Nɛkɛ Mose nɛɛ ji mɔ ni kɛɛ Israelbii lɛ akɛ: ‘Nyɔŋmɔ baawó gbalɔ ko ni tamɔ mi kɛbaajɛ nyɛnyɛmimɛi lɛ ateŋ ahã nyɛ’ lɛ. 38  Mose ji mɔ ni kɛ asafo lɛ bahi ŋa lɛ nɔ,* ní ekɛ ŋwɛibɔfo ni kɛ lɛ wie yɛ Sinai Gɔŋ lɛ nɔ lɛ kɛ wɔtsɛmɛi lɛ hi jɛmɛ lɛ, ni enine shɛ wiemɔi krɔŋkrɔŋi ni hiɛ kamɔ lɛ anɔ koni eŋɔhã wɔ. 39  Wɔtsɛmɛi lɛ kpoo akɛ amɛbaabo lɛ toi, ni amɛtsi lɛ amɛto afã, ni yɛ amɛtsuii amli lɛ amɛkpale kɛtee Ejipt, 40  ni amɛkɛɛ Aaron akɛ: ‘Feemɔ nyɔŋmɔi ohã wɔ ní amɛnyiɛ wɔhiɛ. Ejaakɛ nɛkɛ Mose nɛɛ ni nyiɛ wɔhiɛ kɛje Ejipt shikpɔŋ lɛ nɔ lɛ, wɔleee nɔ ni eba enɔ.’ 41  No hewɔ lɛ, amɛfee tsinabi yɛ nakai gbii lɛ amli, ni amɛŋɔ afɔle amɛhã amaga lɛ, ni amɛbɔi amɛhewɔ miishɛɛnamɔ yɛ amɛninenaa nitsumɔi lɛ ahewɔ. 42  No hewɔ lɛ, Nyɔŋmɔ tsɔ ehe kɛje amɛmasɛi ni eŋmɛɛ amɛhe koni amɛkɛ sɔɔmɔ krɔŋŋ ahã ŋwɛi ta lɛ, taakɛ aŋma yɛ Gbalɔi lɛ awolo lɛ mli lɛ akɛ, ‘Oo Israel we, jeee mi nyɛŋɔ afɔlei kɛ nii ni aŋɔhãa lɛ nyɛhã afii nyɔŋmai ejwɛ yɛ ŋa lɛ nɔ* lɛ, aloo mi ni? 43  Moŋ lɛ, Molok buu lɛ kɛ nyɔŋmɔ Refan ŋulami lɛ nyɛwó nyɛtere; amɛji amagai ni nyɛfee koni nyɛjá amɛ lɛ. No hewɔ lɛ, matswa nyɛnaneshi tu kɛya Babilon sɛɛ tɔ̃ɔ.’ 44  “Wɔtsɛmɛi lɛ ná odase buu lɛ yɛ amɛteŋ yɛ ŋa lɛ nɔ,* tamɔ bɔ ni mɔ ni kɛ Mose wie lɛ fã lɛ akɛ eyafee buu lɛ, tamɔ nɔ ni ena lɛ henɔ pɛpɛɛpɛ lɛ. 45  Ni wɔtsɛmɛi lɛ anine shɛ buu lɛ nɔ ni amɛhiɛ kɛ ba be ni amɛkɛ Yoshua ba jeŋmaji ashikpɔŋ lɛ nɔ lɛ, mɛi ni Nyɔŋmɔ shwie amɛ yɛ wɔtsɛmɛi lɛ ahiɛ lɛ. Biɛ buu lɛ hi kɛyashi David gbii lɛ amli. 46  Lɛ ená Nyɔŋmɔ hiɛ duromɔ, ni ebi koni ahã lɛ hegbɛ ni efee shihilɛhe ehã Yakob Nyɔŋmɔ lɛ. 47  Shi Solomon moŋ ma shĩa ehã lɛ. 48  Tsɛbelɛ, Mɔ ni Nɔ Kwɔ Fe Fɛɛ lɛ ehiii shĩai ni akɛ niji fee amli, taakɛ gbalɔ lɛ wie lɛ, akɛ: 49  ‘Ŋwɛi lɛ, mimaŋtsɛ sɛi ni, ni shikpɔŋ lɛ, minajiashi maaŋoo ni. Mɛɛ shĩa nyɛbaama nyɛhã mi? Yehowa* kɛɛ. Aloo nɛgbɛ ji mihejɔɔmɔhe? 50  Minine fee nibii nɛɛ fɛɛ, aloo jeee nakai?’ 51  “Hii kuɛŋtilɔi ní afolɔko amɛtsuii kɛ amɛtoii ketia, daa nɛɛ, nyɛtsĩɔ mumɔ krɔŋkrɔŋ lɛ naa; bɔ ni nyɛtsɛmɛi lɛ fee lɛ, nakai nɔŋŋ nyɛ hu nyɛfeɔ. 52  Gbalɔi lɛ ateŋ namɔ ni nyɛtsɛmɛi lɛ waaa lɛ yi? Hɛɛ, amɛgbe mɛi ni tsɔ hiɛ amɛtswa jalɔ lɛ baa lɛ he adafi lɛ, mɔ ni amrɔ nɛɛ nyɛtsɔmɔ mɛi ni jie lɛ amɛhã kɛ mɛi ni gbe lɛ lɛ, 53  nyɛ ni nyɛnine shɛ Mla lɛ nɔ taakɛ atsɔ ŋwɛibɔfoi lɛ anɔ akɛhã lɛ, shi nyɛyeee nɔ lɛ.” 54  Anɔkwa, be ni amɛnu nibii nɛɛ, amɛmli fu waa yɛ amɛtsuiiaŋ* ni amɛbɔi amɛnyanyɔjiashi kpemɔ kɛ enɔshwiemɔ. 55  Shi lɛ lɛ, akɛni mumɔ krɔŋkrɔŋ eyi lɛ obɔ hewɔ lɛ, ekwɛ ŋwɛi gãa ni ehiŋmɛi gba Nyɔŋmɔ anunyam lɛ kɛ Yesu hu nɔ ní edamɔ Nyɔŋmɔ ninejurɔ nɔ, 56  ni ekɛɛ: “Naa! miina ni agbele ŋwɛi naa ni gbɔmɔ Bi lɛ damɔ Nyɔŋmɔ ninejurɔ nɔ.” 57  Kɛkɛ ni amɛbolɔ kɛ gbee ni wa ni amɛkɛ amɛniji tsimɔ amɛtoii ni amɛ fɛɛ amɛké kɛtee enɔ. 58  Be ni amɛtsirɛ eyisɛɛ kɛje maŋ lɛ mli lɛ, amɛbɔi lɛ tɛi tswiamɔ. Odasefoi lɛ ŋɔ amɛtadei anɔhaanɔi lɛ amɛshwie oblanyo ko ni atsɛɔ lɛ Saul lɛ naji anaa. 59  Be ni amɛtswiaa Stefano tɛi lɛ, ekpa fai nɛkɛ: “Nuŋtsɔ Yesu, ŋɔɔ mimumɔ.” 60  Kɛkɛ ni ekula shi, ni ekɛ gbee ni wa bo ekɛɛ: “Yehowa,* kaaŋɔ nɛkɛ esha nɛɛ oŋmɛ amɛnɔ.” Ni be ni ewie enɛ lɛ, etsɔ mli ewɔ yɛ gbele mli.

Shishigbɛ Niŋmaa

Aloo “eseshi.” Sht. ŋm., “edumɔwu.”
Aloo “eseshi.” Sht. ŋm., “edumɔwu.”
Aloo “amɛbaafee amɛ niseniianii.”
Aloo eeenyɛ efee akɛ, “Isak fee nakai nɔŋŋ yɛ Yakob gbɛfaŋ.”
Aloo “blematsɛmɛi.”
Aloo eeenyɛ efee akɛ, “Yakob fee nakai nɔŋŋ yɛ weku yitsei 12 lɛ agbɛfaŋ.”
Aloo “ŋmaa; abele; omɔ; loo amɛhenɔi lɛ eko.”
Aloo “susumai.”
Aloo “be ni ajie lɛ kpo lɛ.”
Aloo “ekpɛ yiŋ.”
Aloo “ebaayakwɛ.”
Kwɛmɔ Mat 3:1 sh. niŋ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “gbalɛ okadii.”
Kwɛmɔ Mat 3:1 sh. niŋ.
Kwɛmɔ Mat 3:1 sh. niŋ.
Kwɛmɔ Mat 3:1 sh. niŋ.
Kwɛmɔ Mat 3:1 sh. niŋ.
Kwɛmɔ Wiemɔi Titrii Amligbalamɔ lɛ.
Aloo “efolɔ amɛtsuiiaŋ.”
Kwɛmɔ Wiemɔi Titrii Amligbalamɔ lɛ.