Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 6:1-15

YITSEI LƐ AMLI SAJI

  • Ahala hii kpawo koni amɛsɔmɔ (1-7)

  • Akɛ sane fɔ̃ Stefano nɔ akɛ eebɔ musu (8-15)

6  Agbɛnɛ, nakai gbii lɛ amli, be ni kaselɔi lɛ ayi faa lɛ, Yudafoi ni wieɔ Hela lɛ wie amɛshi Yudafoi ni wieɔ Hebri lɛ, ejaakɛ akuɔ hiɛ ashwieɔ amɛyei okulafoi lɛ anɔ yɛ nii ni ajaa daa gbi lɛ mli.  No hewɔ lɛ, Mɛi Nyɔŋma kɛ Enyɔ lɛ tsɛ kaselɔi lɛ fɛɛ kɛkpe ni amɛkɛɛ: “Ejaaa* akɛ wɔshiɔ Nyɔŋmɔ wiemɔ lɛ ni wɔyajaa niyenii yɛ okpɔlɔi ahe.  No hewɔ lɛ, nyɛmimɛi, nyɛ diɛŋtsɛ nyɛhalaa nyɛteŋ hii kpawo ni yɔɔ gbɛ́i kpakpa,* ni mumɔ kɛ hiɛshikamɔ eyi amɛ obɔ, koni wɔŋɔ amɛ wɔto nitsumɔ ni he hiaa nɛɛ nɔ;  shi wɔ lɛ, wɔbaahiɛ sɔlemɔ kɛ wiemɔ lɛ he sɔɔmɔ lɛ mli.”  Nɔ ni amɛwie lɛ sa kaselɔi lɛ fɛɛ hiɛ, ni amɛhala Stefano, nuu ko ni hemɔkɛyeli kɛ mumɔ krɔŋkrɔŋ eyi lɛ obɔ lɛ, kɛ Filipo, Prokoro, Nikanora, Timon, Parmena, kɛ Nikolao, mɔ ni jɛ Antiokia ni ebatsɔ Yudafonyo lɛ.  Amɛkɛ amɛ ba bɔfoi lɛ aŋɔɔ, ni be ni bɔfoi lɛ sɔle amɛgbe naa lɛ, amɛkɛ amɛniji ŋmɛlɛ amɛnɔ.  Ni Nyɔŋmɔ wiemɔ lɛ tee nɔ gbɛ shwã, ni kaselɔi lɛ ayibɔ tee nɔ eku ebɔ he babaoo yɛ Yerusalem; ni osɔfoi lɛ ateŋ mɛi babaoo bɔi hemɔkɛyeli lɛ nɔkpɛlɛmɔ.  Agbɛnɛ, Stefano ní Nyɔŋmɔ duromɔ kɛ hewalɛ eyi lɛ obɔ lɛ fee naakpɛɛ nii* kɛ okadii wuji yɛ mɛi lɛ ateŋ.  Shi hii komɛi ni ji kuu ko ni atsɛɔ lɛ Mɛi ni Eye Amɛhe Kpeehe* lɛ mli bii lɛ kɛ mɛi komɛi ni ji Kirenebii kɛ Aleksandriabii, kɛ mɛi komɛi ni jɛ Kilikia kɛ Asia lɛ ba koni amɛkɛ Stefano abataa naa. 10  Shi amɛnyɛɛɛ hiɛshikamɔ kɛ mumɔ ni ekɛwieɔ lɛ naa amɛdamɔ. 11  Kɛkɛ ni amɛyawo hii komɛi ayiŋ yɛ teemɔŋ koni amɛkɛɛ akɛ: “Wɔnu ni eewie musubɔɔ wiemɔi eeshi Mose kɛ Nyɔŋmɔ.” 12  Ni amɛwo maŋbii lɛ, onukpai lɛ, kɛ woloŋmalɔi lɛ ayiŋ, ni amɛba enɔ trukaa, ni amɛmɔ lɛ ekãa naa ni amɛkpala lɛ kɛtee Sanhedrin* lɛ hiɛ. 13  Ni amɛkɛ amale odasefoi ba, ni amɛbakɛɛ akɛ: “Nuu nɛɛ wieɔ eshiɔ he krɔŋkrɔŋ nɛɛ kɛ Mla lɛ ni efɔ̃ɔɔ. 14  Akɛ nɔkwɛmɔnɔ lɛ, wɔnu ni eekɛɛ akɛ nɛkɛ Yesu Nazarenyo nɛɛ baakumɔ biɛ nɛɛ eshwie shi ni ebaatsake kusumii ni Mose shi ehã wɔ lɛ.” 15  Ni be ni mɛi ni tara Sanhedrin lɛ mli lɛ kwɛɔ lɛ gãa lɛ, amɛna ehiɛ tamɔ ŋwɛibɔfo ko hiɛ.

Shishigbɛ Niŋmaa

Sht. ŋm., “Esaaa.”
Aloo “hii kpawo ni awieɔ amɛhe ekpakpa.”
Aloo “gbalɛ okadii.”
Kwɛmɔ Mat 4:23 sh. niŋ.
Kwɛmɔ Mat 26:59 sh. niŋ.