Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 5:1-42

5  Shi nuu ko ni atsɛɔ lɛ Anania, kɛ eŋa Safira hɔ̃ɔ amɛshikpɔŋ ko.  Shi ekɛ shika ni ená lɛ eko to sɛɛ, ni eŋa hu le he eko, ni ekɛ fã ko pɛ ba ni ekɛbashwie bɔfoi lɛ anaji anaa.  Shi Petro kɛɛ: “Anania, mɛni hewɔ Satan eyi otsuiŋ obɔ koni omale otsɔɔ mumɔ krɔŋkrɔŋ lɛ, ni okɛ shikpɔŋ lɛ yinii lɛ eko ato sɛɛ?  Bei abɔ ni eyɔɔ odɛŋ lɛ, ani jeee onɔ ni? Ni be ni ohɔ̃ɔ hu lɛ, ani shika lɛ jeee bo diɛŋtsɛ onɔ? Mɛni hewɔ oto nɛkɛ yiŋ yɛ otsuiŋ? Jeee gbɔmɛi omale otsɔɔ nɛɛ, shi Nyɔŋmɔ moŋ ni.”  Be ni Anania nu wiemɔi nɛɛ, egbee shi* ni egbo. Ni gbeyei kpele mɔmɔ mɛi fɛɛ ni nu lɛ.  Kɛkɛ ni oblahii lɛ te shi, ni amɛkɛ mamai bala lɛ, ni amɛwó lɛ kɛje kpo ni amɛyafu lɛ.  Agbɛnɛ, aaafee ŋmɛlɛtswai etɛ sɛɛ lɛ, eŋa ba jɛmɛ, ni lɛ lɛ eleee nɔ ni eba.  Petro kɛɛ lɛ akɛ: “Kɛɛmɔ mi, ani bɔ ni nyɛyi enyɔ lɛ hɔ̃ɔ shikpɔŋ lɛ nyɛhe nɛ?” Ekɛɛ akɛ: “Hɛɛ, nɛkɛ ni.”  No hewɔ lɛ, Petro kɛɛ lɛ akɛ: “Mɛni hewɔ nyɛyi enyɔ lɛ fɛɛ kpaŋ akɛ nyɛbaaka Yehowa* mumɔ lɛ? Naa! Mɛi ni yafu owu lɛ anaji yɔɔ shinaa lɛ naa lɛ, ni amɛbaawó bo hu kɛya.” 10  Amrɔ lɛ, egbee shi* yɛ Petro naji anaa ni egbo. Be ni oblahii lɛ ba mli lɛ, amɛbana akɛ egbo, ni amɛwó lɛ kɛje kpo ni amɛyafu lɛ yɛ ewu lɛ masɛi. 11  Ni gbeyei kpele mɔ asafo muu lɛ fɛɛ kɛ mɛi fɛɛ ni nu nibii nɛɛ ahe lɛ. 12  Agbɛnɛ hu, atsɔ bɔfoi lɛ aniji anɔ atee nɔ afee okadii kɛ naakpɛɛ nii* babaoo yɛ mɛi lɛ ateŋ; ni amɛ fɛɛ amɛkpeɔ yɛ Solomon Koishi lɛ. 13  Lɛɛlɛŋ, mɛi krokomɛi lɛ ateŋ mɔ ko mɔ ko náaa ekãa ni ekɛ ehe adɔmɔ amɛ; kɛ̃lɛ, mɛi lɛ kafoɔ amɛ naakpa. 14  Nɔ ni fe nakai lɛ, mɛi ni heɔ Nuŋtsɔ lɛ nɔ yeɔ, hii kɛ yei babaoo, bafataa amɛhe. 15  Amɛkɛ helatsɛmɛi po ba gbɛjegbɛi titrii lɛ anɔ ni amɛkɛ amɛ ŋmɛlɛ sai kɛ saatsei bibii anɔ, koni kɛ́ Petro miiho lɛ, ehɔɔŋ kɛkɛ atsɔ amɛteŋ mɛi komɛi anɔ. 16  Agbɛnɛ hu, asafoku ni jɛ maji ni jwere Yerusalem hewɔ lɛ amli lɛ tee nɔ amɛbabua amɛhe naa, ni amɛhiɛ helatsɛmɛi kɛ mɛi ni mumɔi ni he tseee gbaa amɛnaa lɛ kɛba, ni atsa amɛ fɛɛ. 17  Shi osɔfonukpa lɛ kɛ mɛi fɛɛ ni fata ehe, ni ji Sadukifoi lɛ ajamɔ kuu lɛ mli bii lɛ te shi ni awuŋayeli yi amɛ obɔ. 18  Ni amɛmɔmɔ bɔfoi lɛ ni amɛkɛ amɛ yawo maŋ tsuŋwoohe lɛ. 19  Shi nyɔɔŋ lɛ mli lɛ, Yehowa* bɔfo* gbele tsuŋwoohe lɛ shinai lɛ, ni ejie amɛ, ni ekɛɛ: 20  “Nyɛyaa sɔlemɔwe lɛ nyɛyadamɔa shi, ni nyɛyaa nɔ nyɛwiea wiemɔi fɛɛ ni kɔɔ wala nɛɛ he lɛ nyɛtsɔa mɛi lɛ.” 21  Be ni amɛnu enɛ lɛ, amɛbote sɔlemɔwe lɛ leebi maŋkpa ni amɛbɔi nitsɔɔmɔ. Agbɛnɛ, be ni osɔfonukpa lɛ kɛ mɛi ni fata ehe lɛ bashɛ shi lɛ, amɛtsɛ Sanhedrin* lɛ kɛ Israelbii anukpai lɛ agwabɔɔ lɛ fɛɛ kɛkpe, ni amɛtsu kɛtee tsuŋwoohe lɛ koni ayajie bɔfoi lɛ kɛba amɛhiɛ. 22  Shi be ni bulɔi lɛ shɛ jɛmɛ lɛ amɛnaaa amɛ yɛ tsuŋwoohe lɛ. No hewɔ lɛ, amɛku amɛsɛɛ ni amɛbabɔ amɛmaniɛ 23  amɛkɛɛ: “Wɔna akɛ aŋa tsuŋwoohe lɛ naa kpɛŋŋ, ni bulɔi lɛ damɔ shinai lɛ anaa, shi be ni wɔgbele lɛ, wɔnaaa mɔ ko yɛ mli.” 24  Anɔkwa, be ni sɔlemɔwe nɔkwɛlɔ lɛ kɛ osɔfoi tsiifoi lɛ fɛɛ nu wiemɔi nɛɛ, amɛhiɛ fee amɛ yaa yɛ bɔ ni enɛ naa baayakpa ahã lɛ hewɔ. 25  Shi mɔ ko ba ni ebabɔ amɛ amaniɛ akɛ: “Naa! Hii ni nyɛkɛ amɛ wo tsuŋwoohe lɛ yɛ sɔlemɔwe lɛ, amɛdamɔ shi ni amɛmiitsɔɔ mɛi lɛ nii.” 26  Kɛkɛ ni sɔlemɔwe nɔkwɛlɔ lɛ kɛ ebulɔi lɛ yiŋ amɛtee ni amɛyakpala amɛ kɛba, shi jeee nɔnyɛɛ naa, ejaakɛ amɛmiishe gbeyei akɛ mɛi lɛ baatswia amɛ tɛi. 27  No hewɔ lɛ, amɛkɛ amɛ ba ni amɛkɛ amɛ badamɔ Sanhedrin lɛ hiɛ. Ni osɔfonukpa lɛ bibii amɛ saji 28  ni ekɛɛ: “Wɔwo nyɛ kitã veveeve akɛ nyɛkatsɔa nii yɛ gbɛ́i nɛɛ mli dɔŋŋ, ni kɛ̃lɛ, naa! nyɛhã Yerusalem eyi obɔ kɛ nyɛtsɔɔmɔ lɛ, ni nyɛtswa nyɛfai shi akɛ nyɛkɛ nuu nɛɛ lá lɛ baaba wɔnɔ.” 29  Petro kɛ bɔfoi krokomɛi lɛ hã amɛ hetoo akɛ: “Esa akɛ wɔboɔ Nyɔŋmɔ moŋ toi akɛ nɔyelɔ fe gbɔmɛi. 30  Wɔtsɛmɛi a-Nyɔŋmɔ lɛ tee Yesu, mɔ ni nyɛsɛŋ lɛ yɛ tso jaŋŋ* nɔ, ni nyɛgbe lɛ lɛ shi. 31  Nyɔŋmɔ wó mɔ nɛ nɔ akɛ Hiɛnyiɛlɔ-Nukpa kɛ Yiwalaherelɔ kɛtee eninejurɔ nɔ, koni eŋɔ tsuitsakemɔ kɛ eshaifaa ehã Israel. 32  Ni wɔji saji nɛɛ ahe odasefoi, ni nakai nɔŋŋ ji mumɔ krɔŋkrɔŋ lɛ hu ni Nyɔŋmɔ kɛhãa mɛi ni boɔ lɛ toi akɛ nɔyelɔ lɛ.” 33  Be ni amɛnu enɛ lɛ, amɛmli wo la* ni amɛtao akɛ amɛgbe amɛ. 34  Shi Farisifonyo ko ni atsɛɔ lɛ Gamaliel lɛ te shi damɔ shi yɛ Sanhedrin lɛ mli; eji Mla tsɔɔlɔ ni mɛi lɛ fɛɛ buɔ lɛ waa, ni efã akɛ akɛ hii lɛ aje kpo fioo. 35  Ni ekɛɛ amɛ akɛ: “Israel hii, nyɛkwɛa jogbaŋŋ yɛ nɔ ni nyɛto nyɛyiŋ akɛ nyɛbaafee hii nɛɛ he. 36  Akɛ nɔkwɛmɔnɔ lɛ, be ko ni eho lɛ, Teuda te shi ni ekɛɛ mɔ ko ji lɛ, ni hii komɛi, aaafee ohai ejwɛ kɛ amɛhe yadɔmɔ ekuu lɛ. Shi agbe lɛ, ni mɛi ni nyiɛɔ esɛɛ lɛ fɛɛ gbɛ shwã ni amɛnine nyɛ shi. 37  Yɛ mɔ nɛ sɛɛ lɛ, Yuda, Galileanyo lɛ te shi yɛ gbɛ́iŋmaa gbii lɛ amli, ni egbala mɛi kɛnyiɛ esɛɛ. Nakai nuu lɛ hu hiɛ kpãtã, ni mɛi fɛɛ ni nyiɛɔ esɛɛ lɛ gbɛ shwã. 38  No hewɔ lɛ, yɛ shihilɛ ni yaa nɔ amrɔ nɛɛ mli lɛ, miikɛɛ nyɛ akɛ, nyɛkɛ nyɛhe akawoa hii nɛɛ asane mli, shi nyɛshia amɛ. Ejaakɛ, kɛ́ gbɔmɛi adɛŋ yiŋtoo nɛɛ loo nitsumɔ nɛɛ jɛ lɛ, ebaagu; 39  shi kɛ́ Nyɔŋmɔ dɛŋ ejɛ lɛ, nyɛnyɛŋ amɛ nyɛgu. Kɛjeee nakai lɛ, no lɛ nyɛbaafee mɛi ni kɛ Nyɔŋmɔ diɛŋtsɛ nɔɔ.” 40  Ni amɛbo eŋaawoo lɛ toi, ni amɛtsɛ bɔfoi lɛ, amɛgwao* amɛ, ni amɛfã amɛ akɛ amɛkpa wiemɔ yɛ Yesu gbɛ́i mli, ni amɛŋmɛɛ amɛhe. 41  No hewɔ lɛ, amɛshi Sanhedrin lɛ hiɛ amɛtee kɛ miishɛɛ babaoo ejaakɛ egbɛ́i lɛ hewɔ lɛ, abu amɛ akɛ mɛi ni sa akɛ ashwieɔ amɛhiɛiaŋ shi. 42  Ni amɛtee nɔ amɛtsɔɔ nii ni amɛjaje Kristo lɛ, Yesu, he sane kpakpa lɛ daa gbi yɛ sɔlemɔwe lɛ kɛ shĩa fɛɛ shĩa, ni amɛfɔ̃ɔɔ.

Shishigbɛ Niŋmaa

Aloo “eflaŋ.”
Kwɛmɔ Wiemɔi Titrii Amligbalamɔ lɛ.
Aloo “eflaŋ.”
Aloo “gbalɛ okadii.”
Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Kwɛmɔ Mat 26:59 sh. niŋ.
Aloo “tso.”
Aloo “efolɔ amɛtsuiiaŋ.”
Aloo “amɛyi.”