Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 4:1-37

4  Be ni mɛi enyɔ lɛ kɛ mɛi lɛ wieɔ lɛ, osɔfoi lɛ, sɔlemɔwe nɔkwɛlɔ lɛ, kɛ Sadukifoi lɛ ba amɛnɔ.  Amɛmli efu ejaakɛ bɔfoi lɛ miitsɔɔ mɛi lɛ anii ni amɛmiijaje amɛmiitsɔɔ kpetekplee akɛ atee Yesu shi kɛjɛ gbohii ateŋ.*  No hewɔ lɛ, amɛmɔmɔ bɔfoi lɛ ni amɛyawo amɛ tsuŋ kɛyashi enɔ jetsɛremɔ, ejaakɛ no mli lɛ je ena momo.  Shi mɛi ni bo wiemɔ lɛ toi lɛ ateŋ mɛi babaoo he amɛye, ni hii lɛ ayibɔ bashɛ aaafee akpei enumɔ.  Enɔ jetsɛremɔ lɛ, amɛnɔyelɔi lɛ, onukpai lɛ, kɛ woloŋmalɔi lɛ bua amɛhe naa yɛ Yerusalem,  ni Ana ni ji osɔfo tsiifonyo lɛ, Kaiafa, Yohane, Aleksandro, kɛ mɛi fɛɛ ni ji osɔfo tsiifonyo lɛ wekumɛi lɛ hu yɛ jɛmɛ.  Amɛkɛ Petro kɛ Yohane badamɔ amɛteŋ ni amɛbɔi amɛ bimɔ akɛ: “Mɛɛ hewalɛ naa aloo namɔ gbɛ́i mli nyɛfee enɛ yɛ?”  Kɛkɛ ni Petro ni mumɔ krɔŋkrɔŋ eyi lɛ obɔ lɛ kɛɛ amɛ akɛ: “Maŋ lɛŋ nɔyelɔi kɛ onukpai,  kɛ́ ekpakpa ni wɔfee nuu obubuafo ko hewɔ ŋmɛnɛ gbi nɛɛ nyɛtaoɔ wɔmli, ni nyɛmiisumɔ nyɛle mɔ ni hã nuu nɛɛ he wa lɛ lɛ, 10  no lɛ, nyɛ fɛɛ kɛ Israelbii fɛɛ anáa alea akɛ, Yesu Kristo, Nazarenyo ni nyɛgbe lɛ yɛ tso jaŋŋ nɔ, shi Nyɔŋmɔ tee lɛ shi kɛjɛ gbohii ateŋ lɛ gbɛ́i mli, kɛ agbɛnɛ hu kɛtsɔ enɔ ni nuu nɛɛ damɔ nyɛhiɛ yɛ biɛ ni ehe ewa lɛ nɛɛ. 11  Mɔ nɛ ji ‘tɛ ni nyɛ ni nyɛji tsũtswalɔi lɛ ebuuu lɛ hãaa nɔ ko, ni ebatsɔ koŋtɛ titri’* lɛ. 12  Kɛfata he lɛ, yiwalaheremɔ ko bɛ mɔ kroko mli, ejaakɛ gbɛ́i kroko bɛ ŋwɛi shishi ni aŋɔhã yɛ gbɔmɛi ateŋ ni esa akɛ atsɔ nɔ ahere wɔyiwala.” 13  Agbɛnɛ, be ni amɛna bɔ ni Petro kɛ Yohane wie kɛ nɔmimaa,* ni amɛyɔse hu akɛ amɛji mɛi ni leee woloŋ* kɛ mɛi foji kɛkɛ lɛ, amɛnaa kpɛ amɛhe. Ni amɛbɔi yɔsemɔ akɛ amɛkɛ Yesu hi shi. 14  Be ni amɛhiɛ nuu ni atsa lɛ ni kɛ bɔfoi lɛ damɔ shi lɛ kwɛmɔ lɛ, amɛnáaa nɔ ko amɛwie kɛhã sane nɛɛ hetoo. 15  No hewɔ lɛ, amɛfã amɛ akɛ amɛje Sanhedrin* asa lɛ nɔ kɛya agbó lɛ naa, ni amɛkɛ amɛhe bɔi ajinatoo 16  amɛkɛɛ: “Mɛni wɔfee hii nɛɛ? Ejaakɛ, atsɔ amɛnɔ afee okadi ko ni sa kadimɔ waa lɛɛlɛŋ, okadi ni Yerusalembii fɛɛ ena, ni wɔnyɛŋ wɔje he ŋwane. 17  No hewɔ lɛ, bɔ ni afee ni sane nɛɛ akagbɛ eshwã yɛ mɛi lɛ ateŋ dɔŋŋ lɛ, nyɛhãa wɔwoa amɛhe gbeyei ni wɔkɛa amɛ akɛ amɛkawie yɛ gbɛ́i nɛɛ mli amɛmiitsɔɔ mɔ ko mɔ ko dɔŋŋ.” 18  Kɛkɛ ni amɛtsɛ amɛ kɛba ni amɛfã amɛ akɛ amɛkawie nɔ ko nɔ ko dɔŋŋ, asaŋ amɛkatsɔɔ nii yɛ Yesu gbɛ́i mli dɔŋŋ. 19  Shi Petro kɛ Yohane here nɔ amɛkɛɛ amɛ akɛ: “Kɛ́ eja yɛ Nyɔŋmɔ hiɛ akɛ aboɔ nyɛ moŋ toi fe Nyɔŋmɔ lɛ, nyɛ diɛŋtsɛ nyɛkojoa nyɛhãa nyɛhe. 20  Shi wɔ lɛ wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” 21  No hewɔ lɛ, be ni amɛsaa amɛwo amɛhe gbeyei lɛ, amɛŋmɛɛ amɛhe, ejaakɛ amɛnáaa nɔ ko ni amɛbaadamɔ nɔ amɛgbala amɛtoi, ni amɛfeee nakai hu yɛ mɛi lɛ ahewɔ, ejaakɛ amɛ fɛɛ amɛmiijie Nyɔŋmɔ yi yɛ nɔ ni eba lɛ hewɔ. 22  Ejaakɛ nuu ni atsa lɛ yɛ naakpɛɛ gbɛ nɔ nɛɛ eye fe afii nyɔŋmai ejwɛ. 23  Be ni aŋmɛɛ amɛhe lɛ, amɛtee kaselɔi krokomɛi lɛ aŋɔɔ ni amɛyabɔ amɛ nɔ ni osɔfoi tsiifoi lɛ kɛ onukpai lɛ kɛɛ amɛ lɛ. 24  Be ni amɛnu enɛ lɛ, amɛkɛ jwɛŋmɔ kome hole amɛgbei anɔ amɛhã Nyɔŋmɔ ni amɛkɛɛ: “Nuŋtsɔ Ofe, bo ji mɔ ni bɔ ŋwɛi kɛ shikpɔŋ kɛ ŋshɔ kɛ nibii fɛɛ ni yɔɔ amɛmli lɛ, 25  kɛ mɔ ni tsɔ mumɔ krɔŋkrɔŋ nɔ ewie yɛ wɔtsɛ David, otsulɔ lɛ, naa akɛ: ‘Mɛni hewɔ jeŋmaji lɛ eyoyoro ni mɛi lɛ jwɛŋɔ yaka nii anɔ lɛ? 26  Shikpɔŋ lɛ nɔ maŋtsɛmɛi lɛ te shi amɛdamɔ shi ni nɔyelɔi lɛ fee ekome amɛte shi amɛshi Yehowa* kɛ mɔ ni efɔ lɛ mu lɛ.’* 27  Ejaakɛ yɛ anɔkwale mli lɛ, Herode kɛ Pontio Pilato kɛ jeŋmajiaŋbii lɛ kɛ Israelbii lɛ bua amɛhe naa yɛ maŋ nɛɛ mli amɛshi otsulɔ krɔŋkrɔŋ Yesu, mɔ ni ofɔ lɛ mu lɛ, 28  kɛtsu nɔ ni onine kɛ oyiŋtoo lɛ ekpɛ mli eto akɛ ebaaba lɛ he nii. 29  Ni agbɛnɛ, Yehowa,* kwɛmɔ wɔhe gbeyei ni amɛwoɔ lɛ, ni ohã onyɔji lɛ aya nɔ awie owiemɔ lɛ kɛ ekãa fɛɛ, 30  be mli ni okpãa onine mli kɛhãa tsamɔ, ni atsɔɔ otsulɔ krɔŋkrɔŋ Yesu gbɛ́i lɛ nɔ afeɔ okadii kɛ naakpɛɛ nii* lɛ.” 31  Be ni amɛkpa fai kɛ hiɛdɔɔ* amɛgbe naa lɛ, he ni amɛbua amɛhe naa yɛ lɛ hoso, ni mumɔ krɔŋkrɔŋ lɛ yimɔ amɛ fɛɛ obɔbɔ ni amɛwie Nyɔŋmɔ wiemɔ lɛ kɛ ekãa. 32  Kɛfata he lɛ, mɛi babaoo ni he amɛye lɛ fɛɛ hiɛ tsui kome kɛ susuma* kome, ni amɛteŋ mɔ ko mɔ ko po tsɛɛɛ enibii ni eyɔɔ lɛ amli eko akɛ lɛ diɛŋtsɛ enɔ, shi moŋ amɛfee nibii ni amɛyɔɔ lɛ fɛɛ ekome. 33  Ni bɔfoi lɛ kɛ hewalɛ kpele tee nɔ amɛye Nuŋtsɔ Yesu shitee lɛ he odase, ni duromɔ babaoo yɛ amɛ fɛɛ amɛnɔ. 34  Anɔkwa, mɔ ko mɔ ko bɛ amɛteŋ ni nɔ ko he hiaa lɛ, ejaakɛ mɛi fɛɛ ni yɔɔ shikpɔji loo shĩai lɛ hɔ̃ɔhɔ̃ɔ ni amɛkɛ shika ni amɛnáa lɛ baa, 35  ni amɛkɛbashwieɔ bɔfoi lɛ anaji anaa. Ni ajaraa ahãa mɔ fɛɛ mɔ, bɔ ni he hiaa lɛ lɛ. 36  No hewɔ lɛ, Yosef, mɔ ni bɔfoi lɛ tsɛɔ lɛ Barnaba (ni eshishi ji, “Miishɛjemɔ Bi”) lɛ, ní eji Levinyo, ní jɛ Kipro lɛ, 37  yɛ shikpɔŋ ko ni ehɔ̃ɔ ni ekɛ shika lɛ ba ni ekɛbashwie bɔfoi lɛ anaji anaa.

Shishigbɛ Niŋmaa

Aloo “amɛmiijaje gbohiiashitee lɛ, titri lɛ, Yesu nɔ lɛ, amɛmiitsɔɔ kpetekplee.”
Sht. ŋm., “koŋ lɛ yitso.”
Aloo “kɛ ekãa.”
Aloo “mɛi ni ekaseko nii,” ni tsɔɔ akɛ, atsɔseko amɛ yɛ rabifoi askul ko kwraa mli; etsɔɔɔ akɛ amɛleee nikanemɔ kɛ niŋmaa.
Kwɛmɔ Mat 26:59 sh. niŋ.
Kwɛmɔ Wiemɔi Titrii Amligbalamɔ lɛ.
Aloo “e-Kristo lɛ.”
Kwɛmɔ Wiemɔi Titrii Amligbalamɔ lɛ.
Aloo “gbalɛ okadii.”
Aloo “amɛsɔle kɛ hiɛdɔɔ.”
Kwɛmɔ Wiemɔi Titrii Amligbalamɔ lɛ.