Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 3:1-26

3  Agbɛnɛ, Petro kɛ Yohane miikwɔ kɛmiiya sɔlemɔwe lɛ yɛ sɔlemɔ ŋmɛlɛtswaa lɛ mli, ŋmɛlɛtswaa ni ji nɛɛhu lɛ nɔ,*  ni atere nuu ko ni ji akpake kɛjɛ fɔmɔ mli. Daa gbi lɛ, amɛkɛ lɛ baŋmɛɔ sɔlemɔwe lɛ shinaa ni atsɛɔ lɛ Fɛfɛo lɛ masɛi, koni enyɛ ebi mɛi ni boteɔ sɔlemɔwe lɛ ní amɛfee lɛ ejurɔ.  Be ni ehiŋmɛi gba Petro kɛ Yohane nɔ akɛ amɛmiihe amɛbote sɔlemɔwe lɛ, ebɔi amɛ bimɔ ní amɛfee lɛ ejurɔ.  Shi Petro kɛ Yohane fɛɛ kwɛ lɛ tɛ̃ɛ ni amɛkɛɛ: “Kwɛmɔ wɔ.”  No hewɔ lɛ, ekwɛ amɛ gãa kɛ gbɛkpamɔ akɛ ebaaná nɔ ko kɛjɛ amɛdɛŋ.  Shi Petro kɛɛ: “Jwiɛtɛi kɛ shika tsuru lɛ, mibɛ eko, shi nɔ ni miyɔɔ lɛ, no miŋɔhãa bo nɛɛ. Yɛ Yesu Kristo, Nazarenyo lɛ gbɛ́i mli lɛ, nyiɛmɔ!”  Kɛkɛ ni emɔ eninejurɔ mli ni ewó enɔ edamɔ shi. Amrɔ lɛ, enaji kɛ enanetalɔi lɛ amli wala;  ni ehuru edamɔ shi, ni ebɔi nyiɛmɔ, ni ekɛ amɛ bote sɔlemɔwe lɛ, ní eenyiɛ ní eetumɔ ní eejie Nyɔŋmɔ yi.  Ni mɛi lɛ fɛɛ na lɛ ní eenyiɛ ní eejie Nyɔŋmɔ yi. 10  Ni amɛbɔi lɛ yoomɔ akɛ lɛ ji nuu ni tsutsu ko lɛ etaa sɔlemɔwe lɛ Agbó Fɛfɛo lɛ naa ebiɔ ni afee lɛ ejurɔ lɛ, ni amɛhe jɔ̃ amɛhe ni amɛnaa kpɛ amɛhe naakpa yɛ nɔ ni eba nuu lɛ nɔ lɛ hewɔ. 11  Be ni nuu nɛɛ hiɛ Petro kɛ Yohane mli lolo lɛ, mɛi lɛ fɛɛ ké yuu kɛba amɛŋɔɔ yɛ he ni atsɛɔ jɛmɛ Solomon Koishi lɛ, ní amɛnaa ekpɛ amɛhe waa. 12  Be ni Petro na enɛ lɛ, ekɛɛ mɛi lɛ akɛ: “Israel hii, mɛni hewɔ enɛ feɔ nyɛ naakpɛɛ nɛkɛ, ni mɛni hewɔ nyɛkwɛɔ wɔ tamɔ nɔ ni wɔ diɛŋtsɛ wɔhewalɛ naa loo wɔ-Nyɔŋmɔjamɔ su wɔkɛhã nuu nɛɛ nyiɛɔ nɛɛ? 13  Abraham kɛ Isak kɛ Yakob Nyɔŋmɔ lɛ, wɔtsɛmɛi a-Nyɔŋmɔ lɛ, ewo e-Tsulɔ Yesu hiɛ nyam, mɔ ni nyɛŋɔ lɛ nyɛhã ni nyɛkwa lɛ yɛ Pilato hiɛ, eyɛ mli akɛ lɛ lɛ ekpɛ mli akɛ ebaaŋmɛɛ ehe lɛ. 14  Hɛɛ, nyɛkwa nakai mɔ krɔŋkrɔŋ kɛ jalɔ lɛ, ni nyɛbi ni aŋɔ nuu ni ji gbɔmɔgbelɔ lɛ moŋ ahã nyɛ, 15  ni nyɛgbe Hiɛnyiɛlɔ-Nukpa kɛhã wala lɛ. Shi Nyɔŋmɔ tee lɛ shi kɛjɛ gbohii ateŋ, ni wɔji anɔkwa sane nɛɛ he odasefoi. 16  Ni atsɔ egbɛ́i lɛ nɔ, kɛ agbɛnɛ hu hemɔkɛyeli ni wɔyɔɔ yɛ egbɛ́i lɛ mli lɛ nɔ ahã nuu nɛɛ ni nyɛnaa ni nyɛle lɛ hu lɛ ená hewalɛ. Emli hemɔkɛyeli lɛ ni ehã nuu nɛɛ he ewa lɛ jogbaŋŋ yɛ nyɛ fɛɛ nyɛhiɛ nɛɛ. 17  Ni agbɛnɛ, nyɛmimɛi, mile akɛ lé ni nyɛleee hewɔ ni nyɛfee lɛ, tamɔ nyɛnɔyelɔi lɛ hu fee lɛ nɔŋŋ. 18  Shi yɛ nɛkɛ gbɛ nɔ lɛ, Nyɔŋmɔ ehã nibii ni etsɔ gbalɔi lɛ fɛɛ naa etsɔ hiɛ etswa amɛhe adafi akɛ, e-Kristo lɛ baana nɔ lɛ eba mli. 19  “No hewɔ lɛ, nyɛtsakea nyɛtsui ni nyɛkpalea koni agbe nyɛhe eshai lɛ, koni tsuiwoo bei ajɛ Yehowa diɛŋtsɛ ŋɔɔ* aba 20  ní etsu Kristo lɛ, Yesu, mɔ ni ahala ahã nyɛ lɛ kɛba. 21  Mɔ nɛ ji mɔ ni esa akɛ ŋwɛi ato lɛ kɛyashi bei ni abaasaa nibii fɛɛ ni Nyɔŋmɔ wie he yɛ egbalɔi krɔŋkrɔŋi ni hi shi yɛ blema lɛ anaa lɛ. 22  Yɛ anɔkwale mli lɛ, Mose kɛɛ akɛ: ‘Yehowa* Nyɔŋmɔ baawó gbalɔ ko ni tamɔ mi kɛbaajɛ nyɛnyɛmimɛi lɛ ateŋ ahã nyɛ. Esa akɛ nyɛbo nɔ fɛɛ nɔ ni ebaakɛɛ nyɛ lɛ toi. 23  Anɔkwa, mɔ fɛɛ mɔ* ni booo nakai Gbalɔ lɛ toi lɛ, abaakpãtã ehiɛ kwraa kɛbaajɛ mɛi lɛ ateŋ.’ 24  Ni gbalɔi babaoo ni wie lɛ fɛɛ lɛ, kɛjɛ Samuel kɛ mɛi ni nyiɛ esɛɛ lɛ anɔ lɛ, amɛ hu amɛjaje gbii nɛɛ faŋŋ amɛtsɔɔ. 25  Nyɛji gbalɔi lɛ kɛ kpaŋmɔ ni Nyɔŋmɔ kɛ nyɛtsɛmɛi lɛ kpaŋ lɛ bii, be ni ekɛɛ Abraham akɛ: ‘Ni oseshi* lɛ nɔ abaatsɔ ajɔɔ shikpɔŋ lɛ nɔ wekui fɛɛ’ lɛ. 26  Be ni Nyɔŋmɔ tsu e-Tsulɔ lɛ, etsu lɛ kɛba nyɛŋɔɔ klɛŋklɛŋ, koni ebajɔɔ nyɛ kɛtsɔ kpalemɔ ni eeehã nyɛteŋ mɔ fɛɛ mɔ akpale kɛjɛ enifɔjianii lɛ amli lɛ nɔ.”

Shishigbɛ Niŋmaa

Ni tsɔɔ akɛ, aaafee shwane ŋmɛji 3.
Sht. ŋm., “ajɛ Yehowa hiɛ.” Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “susuma fɛɛ susuma.”
Sht. ŋm., “odumɔwu.”