Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 27:1-44

27  Agbɛnɛ, akɛni akpɛ mli akɛ akɛ wɔ baawo meele mli kɛya Italia hewɔ lɛ, amɛŋɔ Paulo kɛ gboklɛfoi krokomɛi amɛwo asraafoiatsɛ ko ni atsɛɔ lɛ Yulio ni jɛ Augusto asraafoi akuu lɛ mli lɛ dɛŋ.  Be ni wɔbote meele ko ni jɛ Adramitio ní baafã kɛyatsɔ Asia kpokpaa lɛ ŋshɔnaa maji lɛ anɔ lɛ mli lɛ, wɔfã; no mli lɛ Aristarko, ni ji Makedonianyo ko ni jɛ Tesalonika lɛ fata wɔhe.  Enɔ jetsɛremɔ lɛ, wɔyadamɔ Sidon, ni Yulio kɛ Paulo ye yɛ mlihilɛ naa,* ni eŋmɛ lɛ gbɛ ní eya enanemɛi lɛ aŋɔɔ ní amɛkwɛ lɛ.  Ni wɔkɛ meele fã kɛjɛ jɛmɛ ni wɔshrã Kipro he koni no abu wɔhe kɛjɛ kɔɔyɔɔ lɛ he, ejaakɛ no mli lɛ wɔmiikpee kɔɔyɔɔ.  Ni wɔtsɔ ŋshɔ lɛ hiɛ kɛnyiɛ Kilikia kɛ Pamfilia koŋ nɔ ni wɔyadamɔ Mira yɛ Likia.  Ni asraafoiatsɛ lɛ na meele ko ni jɛ Aleksandria ní miiya Italia yɛ jɛmɛ, ni ehã wɔkwɔ no.  Agbɛnɛ, wɔkɛ meele lɛ nyiɛ blɛoo gbii saŋŋ, ni ekpakpa ko dani wɔbashɛ Knido. Akɛni kɔɔyɔɔ lɛ eŋmɛɛɛ wɔ gbɛ hewɔ lɛ, wɔshrã Kreta he yɛ Salmone koni no abu wɔhe kɛjɛ kɔɔyɔɔ lɛ he.  Ni ekpakpa ko dani wɔnyɛ wɔfo mli kɛba he ko ni atsɛɔ jɛmɛ Lɛjiadaamɔhe Fɛfɛo ní bɛŋkɛ Lasea maŋ lɛ.  Be saŋŋ eho, ni kɛbashi be nɛɛ eyɛ oshara akɛ abaanyiɛ ŋshɔ hiɛ ejaakɛ Kpatamɔ Gbi* ni ahiɔ ŋmaa lɛ po eho, no hewɔ lɛ, Paulo wo ŋaa ko, 10  ekɛɛ amɛ akɛ: “Ataamɛi, miina akɛ nifitemɔ kɛ niŋmɛɛmɔ pii baaba gbɛfãa nɛɛ mli, ni jeee meele lɛ kɛ emli jatsui lɛ anɔ kɛkɛ, shi wɔwala* hu.” 11  Shi asraafoiatsɛ lɛ bo meele kudɔlɔ lɛ kɛ meeletsɛ lɛ toi moŋ fe nɔ ni eeebo nɔ ni Paulo wieɔ lɛ toi. 12  Akɛni lɛjiadaamɔhe lɛ jeee he ko ni sa kɛhã fɛ̃ibeyeli hewɔ lɛ, amɛteŋ mɛi babaoo wo ŋaa akɛ afã kɛje jɛmɛ, ní akwɛ akɛ amɛbaanyɛ amɛyashɛ Foinike, lɛjiadaamɔhe ko ni yɔɔ Kreta ni kwɛɔ wuoyi-boka kɛ kooyi-boka gbɛ lɛ lo, koni amɛyaye fɛ̃i be lɛ yɛ jɛmɛ. 13  Be ni kɔɔyɔɔ hɛrɛbii ko tswa kɛjɛ wuoyigbɛ lɛ, amɛsusu akɛ amɛyiŋtoo lɛ baaba mli, ni amɛfamɔ sɛ́kɛi lɛ, ni amɛfã kɛshrã Kreta he kpaakpa. 14  Shi etsɛɛɛ kɛkɛ ni ahum ko ni atsɛɔ lɛ Yurakilo* lɛ fã kɛba ŋshɔkpɔ lɛ nɔ. 15  Akɛni meele lɛ miijija waa ni enyɛɛɛ kɔɔyɔɔ lɛ ekpee hewɔ lɛ, wɔhã kɔɔyɔɔ lɛ kpala wɔ. 16  Kɛkɛ ni wɔkɛ foi shrã ŋshɔkpɔ bibioo ko ni atsɛɔ lɛ Kauda lɛ he koni no abu wɔhe kɛjɛ kɔɔyɔɔ lɛ he, ni kɛ̃lɛ ekpakpa ko dani wɔnyɛ wɔmɔ bonto* ni yɔɔ meele lɛ sɛɛ lɛ mli. 17  Shi be ni amɛgbala bonto lɛ kɛwo meele lɛ mli lɛ, amɛkɛ nibii fimɔ meele lɛ, ni akɛni amɛmiishe gbeyei akɛ amɛbaayagbee Sirti* shia lɛ nɔ hewɔ lɛ, amɛjie abalaa lɛ he nibii lɛ, ni kɔɔyɔɔ lɛ kpala wɔ. 18  Akɛni ahum lɛ miitswa meele lɛ gbeyeigbeyei hewɔ lɛ, enɔ jetsɛremɔ lɛ, amɛjie meele lɛ mli nibii lɛ eko amɛshwie. 19  Ni gbi ni ji gbi etɛ lɛ nɔ lɛ, amɛkɛ amɛ diɛŋtsɛ amɛniji jie meele lɛ he nibii lɛ ekomɛi amɛshwie. 20  Akɛni hulu loo ŋulamii pueee gbii saŋŋ, ni ahum ni tswaa kpeɔ wɔ lɛ hu naa wa naakpa* hewɔ lɛ, wɔhiɛnɔkamɔ akɛ abaahere wɔyiwala lɛ fɛɛ bɔi tãa. 21  Be ni amɛteŋ mɔ ko mɔ ko yeko nii be saŋŋ lɛ, Paulo te shi damɔ shi yɛ amɛteŋ ni ekɛɛ: “Ataamɛi, kulɛ esa akɛ nyɛboɔ miŋaawoo lɛ toi, ní akafã kɛje Kreta ní wɔkɛ nifitemɔ kɛ niŋmɛɛmɔ nɛɛ bakpe. 22  Fɛɛ sɛɛ lɛ, amrɔ nɛɛ, miiwo nyɛ hewalɛ akɛ nyɛtsɛa nyɛtsuii nyɛŋmɛa nyɛmli,* ejaakɛ nyɛteŋ mɔ ko* wala eŋmɛŋ lɛ, ja meele lɛ kɛkɛ. 23  Nyɔɔŋ nɛɛ mli lɛ, Nyɔŋmɔ, mɔ nɔ ni miji kɛ mɔ hu ni mikɛ sɔɔmɔ krɔŋŋ hãa lɛ lɛ, bɔfo* ko badamɔ mimasɛi, 24  ni ekɛɛ, ‘Kaashe gbeyei, Paulo. Esa akɛ oyadamɔ Kaisare hiɛ, ni naa! Nyɔŋmɔ eŋɔ mɛi ni kɛ bo yɔɔ meele lɛ mli lɛ fɛɛ eke bo.’ 25  No hewɔ lɛ, ataamɛi, nyɛtsɛa nyɛtsuii nyɛŋmɛa nyɛmli,* ejaakɛ miheɔ Nyɔŋmɔ miyeɔ akɛ bɔ ni abakɛɛ mi lɛ, ebaaba mli nakai pɛpɛɛpɛ. 26  Shi esa akɛ wɔyasha shi yɛ ŋshɔkpɔ ko nɔ.” 27  Agbɛnɛ, gbi ni ji nyɔŋma kɛ ejwɛ lɛ nyɔɔŋ be ni wɔkpalaa kɛyaa kɛbaa yɛ Adria Ŋshɔ lɛ nɔ lɛ, nyɔɔŋteŋ lɛ amlakumɛi lɛ bɔi susumɔ akɛ amɛmiibɛŋkɛ shikpɔŋ ko. 28  Amɛŋmɛɛ susumɔ kpãa lɛ he amɛwo ŋshɔ lɛ mli, ni amɛná abasaŋ nyɔŋmai enyɔ,* no hewɔ lɛ, amɛtee hiɛ fioo ni amɛŋmɛɛ he ekoŋŋ ni amɛná abasaŋ nyɔŋma kɛ enumɔ.* 29  Ni akɛni amɛmiishe gbeyei akɛ ekolɛ wɔbaayagbee tɛsai anɔ hewɔ lɛ, amɛŋmɛ sɛ́kɛi ejwɛ yɛ meele lɛ sɛɛgbɛ, ni amɛná ni kulɛ je etsɛre. 30  Shi be ni amlakumɛi lɛ taoɔ amɛjo foi kɛje meele lɛ mli, ni amɛkwa amɛshi bonto lɛ amɛma ŋshɔ lɛ hiɛ tamɔ nɔ ni amɛyaaŋmɛ sɛ́kɛi yɛ meele lɛ yitsogbɛ lɛ, 31  Paulo kɛɛ asraafoiatsɛ lɛ kɛ asraafoi lɛ akɛ: “Kɛji hii nɛɛ ehiii meele lɛ mli lɛ, no lɛ anyɛŋ nyɛyiwala ahere.” 32  Kɛkɛ ni asraafoi lɛ folɔ bonto lɛ he taŋkpei lɛ ni amɛhã eyagbee shi. 33  Agbɛnɛ be ni je miihe atsɛre lɛ, Paulo wo amɛ fɛɛ hewalɛ akɛ amɛye nɔ ko, ni ekɛɛ: “Ŋmɛnɛ ji gbi ni ji nyɔŋma kɛ ejwɛ ní nyɛtee nɔ nyɛkɛ yeyeeyefeemɔ emɛ ní nyɛyeko nɔ ko nɔ ko kwraa. 34  No hewɔ lɛ, miiwo nyɛ hewalɛ ni nyɛye nɔ ko; ejaakɛ no hi hã nyɛ, ejaakɛ nyɛteŋ mɔ ko mɔ ko yiteŋtsɔi kome folo hiɛ kpãtãŋ.” 35  Be ni ewie enɛ lɛ, ekɔ aboloo,* ni eda Nyɔŋmɔ shi yɛ amɛ fɛɛ amɛhiɛ, ekumɔ mli, ni ebɔi yeli. 36  Ni amɛ fɛɛ amɛtsui nyɔ amɛmli ni amɛ hu amɛbɔi niyeli. 37  Wɔ mɛi ni wɔyɔɔ meele lɛ mli lɛ fɛɛ naa shiɔ mɛi* ohai enyɔ kɛ nyɔŋmai kpawo kɛ ekpaa. 38  Be ni amɛye nii ni amɛtɔrɔ lɛ, amɛshɛrɛ ŋmaa ni amɛwó lɛ amɛshwie ŋshɔ lɛ mli koni meele lɛ afee huyɛhuyɛ. 39  Be ni je tsɛre lɛ, amɛyɔseee shikpɔŋ lɛ shi amɛna bele ko kɛ enaa shia, ni amɛtswa amɛfai shi akɛ, kɛ́ amɛaanyɛ lɛ, amɛbaahã meele lɛ ayakpeleke jɛmɛ. 40  No hewɔ lɛ, amɛfolɔ sɛ́kɛi lɛ amɛwo ŋshɔ lɛ mli, ni nakai be lɛ mli nɔŋŋ lɛ, amɛfɛne kudɔi lɛ ahe taŋkpei lɛ; ni amɛshi meele lɛ hiɛgbɛ abalaa lɛ koni kɔɔyɔɔ lɛ akpala meele lɛ kɛya ŋshɔnaagbɛ. 41  Be ni amɛyagbee shia ni etĩa babaoo yɛ ŋshɔ lɛ mli lɛ nɔ lɛ, amɛkɛ meele lɛ yasha shi ni meele lɛ yitsogbɛ lɛ yatsɛkɛ shi ni etsiii ehe, shi ŋshɔkei lɛ anaawalɛ lɛ jwara meele lɛ sɛɛgbɛ lɛ dukuduku. 42  Kɛkɛ ni asraafoi lɛ kpɛ mli akɛ amɛbaagbe gboklɛfoi lɛ, koni mɔ ko mɔ ko akasere kɛmiiya ni ejo foi. 43  Shi akɛni asraafoiatsɛ lɛ etswa efai shi akɛ ebaabaa Paulo yi hewɔ lɛ, eŋmɛɛɛ amɛ gbɛ ni amɛtsu amɛyiŋtoo lɛ he nii. Efã mɛi ni baanyɛ asere lɛ akɛ amɛtu amɛgbee ŋshɔ lɛ mli ni amɛ tsutsu amɛya shikpɔŋ, 44  ní mɛi ni eshwɛ lɛ ateŋ mɛi komɛi abumɔ ŋmoŋmoloji anɔ ní mɛi krokomɛi hu abumɔ meele koi lɛ anɔ kɛnyiɛ sɛɛ. No hewɔ lɛ, amɛ fɛɛ amɛyashɛ shikpɔŋ shweshweeshwe.

Shishigbɛ Niŋmaa

Aloo “ekɛ Paulo ye yɛ gbɛ ni tsɔɔ akɛ esumɔɔ gbɔmɔ nɔ.”
Ayeɔ gbi nɛɛ yɛ Tishri nyɔɔŋ lɛ ní kɛ wɔŋmɛnɛŋmɛnɛ beaŋ September loo October yeɔ egbɔ lɛ nɔ, ni eji be ni nugbɔ bɔiɔ nɛmɔ, kɛ be ni ŋshɔ lɛ feɔ hamahama.
Aloo “wɔsusumai.”
Ni tsɔɔ akɛ, kooyi-boka kɔɔyɔɔ ko.
Lɛlɛ bibioo ko ni akɛwoɔ meele he ni abaanyɛ akɛbaa mɛi ayi.
Kwɛmɔ Wiemɔi Titrii Amligbalamɔ lɛ.
Sht. ŋm., “jeee nɔ ko bibioo.”
Aloo “nyɛnáa ekãa.”
Aloo “susuma ko.”
Aloo “ŋwɛibɔfo.”
Aloo “nyɛnáa ekãa.”
Aaafee m 36 (nat 120).
Aaafee m 27 (nat 90).
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Aloo “susumai.”