Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 26:1-32

YITSEI LƐ AMLI SAJI

  • Paulo jie enaa yɛ Agripa hiɛ (1-11)

  • Paulo tsɔɔ bɔ ni fee ni ebatsɔ Kristofonyo (12-23)

  • Nɔ ni Festo kɛ Agripa kɛɛ (24-32)

26  Agripa kɛɛ Paulo akɛ: “Aŋmɛ bo gbɛ akɛ ojie onaa.” Kɛkɛ ni Paulo kpã enine mli ni ejie enaa ekɛɛ:  “Maŋtsɛ Agripa, yɛ nibii fɛɛ ni Yudafoi lɛ kɛshwieɔ minɔ lɛ he lɛ, eŋɔɔ minaa akɛ bo ohiɛ majie minaa yɛ ŋmɛnɛ gbi nɛɛ,  titri lɛ akɛni ole Yudafoi lɛ akusumii kɛ naataamɔi ni yaa nɔ yɛ amɛteŋ lɛ jogbaŋŋ lɛ hewɔ. No hewɔ lɛ, miikpa bo fai ni oto otsui shi obo mi toi.  “Anɔkwa, yɛ nɔ ni kɔɔ bɔ ni miba mijeŋ mihã kɛjɛ migbekɛbiiashi yɛ miwebii* lɛ ateŋ kɛ agbɛnɛ hu, yɛ Yerusalem lɛ he lɛ, Yudafoi fɛɛ  ni le mi sá lɛ le enɛ jogbaŋŋ akɛ, miba mijeŋ yɛ wɔjamɔ lɛ mli kuu ni yɔɔ kpɛŋŋ fe fɛɛ lɛ naa, akɛ Farisifonyo, ni kɛ́ amɛmiisumɔ lɛ, amɛbaanyɛ amɛye enɛ he odase.  Shi amrɔ nɛɛ, shi ni Nyɔŋmɔ wo wɔtsɛmɛi lɛ he hiɛnɔkamɔ lɛ hewɔ midamɔ biɛ ni ayeɔ misane nɛɛ;  ni wɔwekui nyɔŋma kɛ enyɔ lɛ hu hiɛ kã nɔ akɛ amɛbaaná shiwoo nɛɛ mlibaa lɛ he sɛɛ, akɛni amɛkɛ hiɛdɔɔ ŋɔɔ sɔɔmɔ krɔŋŋ amɛhãa lɛ nyɔɔŋ kɛ shwane lɛ hewɔ. Oo Maŋtsɛ, hiɛnɔkamɔ nɛɛ hewɔ Yudafoi lɛ kɛ sane fɔ̃ɔ minɔ nɛɛ.  “Mɛni hewɔ nyɛteŋ mɛi komɛi susuɔ*akɛ ejeee anɔkwale akɛ Nyɔŋmɔ teɔ gbohii ashi lɛ?  Mi lɛ, misusu akɛ eji nɔ ni ja akɛ mafee nibii babaoo kɛte shi mawo Yesu, Nazarenyo lɛ gbɛ́i lɛ. 10  Nakai pɛpɛɛpɛ mifee yɛ Yerusalem, ni akɛni miná hegbɛ kɛjɛ osɔfoi tsiifoi lɛ adɛŋ hewɔ lɛ, miwo mɛi krɔŋkrɔŋi lɛ ateŋ mɛi babaoo tsuŋ; ni kɛ́ aaba abagbe amɛ lɛ, mifɔ̃ɔ oshiki kɛshiɔ amɛ. 11  Migbala amɛtoi shii abɔ yɛ kpeehei lɛ fɛɛ, koni no ahã amɛkwa amɛhemɔkɛyeli lɛ; ni akɛni mimli wo la waa wo amɛ hewɔ lɛ, miwa amɛ yi aahu kɛtee maji krokomɛi anɔ tete. 12  “Be ni mitsuɔ enɛɛmɛi ahe nii lɛ, be ko lɛ, miifã gbɛ kɛmiiya Damasko yɛ osɔfoi tsiifoi lɛ ahewalɛ kɛ gbɛŋmɛɛ naa, 13  ni shwane fintiŋŋ be ni minyiɛ gbɛ lɛ nɔ lɛ, Oo Maŋtsɛ, mina la ko ni kpɛɔ fe hulu la kpɛ kɛjɛ ŋwɛi kɛbabɔle mi kɛ mɛi ni kɛ mi fãa gbɛ lɛ hu. 14  Ni be ni wɔ fɛɛ wɔgbeegbee shi lɛ, minu gbee ko kɛ mi wie yɛ Hebri wiemɔ mli akɛ: ‘Saul, Saul, mɛni hewɔ owaa mi yi? Kɛ́ otee nɔ oshi kpalamɔ tso* lɛ ntia lɛ, obaaye ohe awui.’ 15  Shi mikɛɛ, ‘Bo namɔ, Onukpa?’ Ni Nuŋtsɔ lɛ kɛɛ, ‘Miji Yesu, mɔ ni owaa lɛ yi lɛ. 16  Shi tee shi ni odamɔ onaji anɔ. Enɛ hewɔ mijie mihe kpo mitsɔɔ bo nɛɛ, koni mahala bo akɛ tsulɔ kɛ odasefonyo kɛhã nibii ni ona kɛ nibii ni mahã ona yɛ mihe lɛ fɛɛ. 17  Ni majie bo kɛjɛ mɛi nɛɛ kɛ jeŋmaji lɛ adɛŋ, mɛi ni miitsu bo kɛya amɛŋɔɔ 18  koni oyagbele amɛhiŋmɛii, koni oyakpale amɛ kɛjɛ duŋ mli kɛba la he kɛ agbɛnɛ hu kɛjɛ Satan hewalɛ mli kɛba Nyɔŋmɔ ŋɔɔ, koni amɛná eshaifaa kɛ gboshinii hu yɛ mɛi ni hemɔkɛyeli ni amɛyɔɔ yɛ mimli lɛ efee amɛ krɔŋkrɔŋ* lɛ ateŋ.’ 19  “No hewɔ lɛ, Maŋtsɛ Agripa, migbooo ŋwɛi ninaa lɛ nɔ toi, 20  shi moŋ miyajaje mitsɔɔ mɛi ni yɔɔ Damasko lɛ klɛŋklɛŋ, no sɛɛ lɛ mɛi ni yɔɔ Yerusalem lɛ, kɛ agbɛnɛ hu Yudea kpokpaa lɛ nɔ fɛɛ, kɛ jeŋmaji lɛ hu, akɛ amɛtsake amɛtsui ni amɛkpale kɛba Nyɔŋmɔ ŋɔɔ ni amɛtsu nitsumɔi ni sa tsuitsakemɔ. 21  No hewɔ ni Yudafoi lɛ mɔ mi yɛ sɔlemɔwe lɛ ni amɛka akɛ amɛbaagbe mi lɛ. 22  Shi akɛni miná yelikɛbuamɔ kɛjɛ Nyɔŋmɔ dɛŋ hewɔ lɛ, mitee nɔ miye mɛi bibii kɛ mɛi wuji fɛɛ odase kɛbashi ŋmɛnɛ gbi nɛɛ, ni miwieee wiemɔ ko akɛ ja nɔ ni Gbalɔi lɛ kɛ Mose hu ewie akɛ amɛbaaba mli lɛ— 23  no ji akɛ Kristo lɛ baana nɔ, ni akɛ mɔ klɛŋklɛŋ ni abaatee lɛ shi kɛjɛ gbohii ateŋ lɛ, ebaajaje la he sane etsɔɔ mɛi nɛɛ kɛ jeŋmaji lɛ fɛɛ.” 24  Agbɛnɛ, be ni Paulo wieɔ nibii nɛɛ kɛjieɔ enaa lɛ, Festo kɛ gbee ni wa kɛɛ akɛ: “Paulo, ooye sɛkɛ! Nikasemɔ babaoo ehã ooye sɛkɛ!” 25  Shi Paulo kɛɛ: “Anunyamtsɛ Festo, jeee sɛkɛ miyeɔ, moŋ lɛ, miiwie wiemɔi ni ji anɔkwale ni jwɛŋmɔ yɔɔ mli. 26  Anɔkwa, maŋtsɛ ní miwieɔ kɛ nɔmimaa mitsɔɔ lɛ nɛɛ le nibii nɛɛ ahe saji jogbaŋŋ; ni miheɔ miyeɔ jogbaŋŋ akɛ ehiɛ hoko nibii nɛɛ eko eko nɔ ejaakɛ jeee nififiaŋ he ko afee enɛ yɛ. 27  Maŋtsɛ Agripa, ani oheɔ Gbalɔi lɛ oyeɔ? Mile akɛ oheɔ oyeɔ.” 28  Shi Agripa kɛɛ Paulo akɛ: “Yɛ be kukuoo mli lɛ, obaahã miyiŋ atsɔ ni matsɔ Kristofonyo.” 29  Kɛkɛ ni Paulo kɛɛ akɛ: “Miná ni kulɛ Nyɔŋmɔ hã ba mli akɛ, kɛ́ yɛ be kukuoo mli jio, be kplaŋŋ mli jio lɛ, jeee bo pɛ shi moŋ mɛi fɛɛ ni boɔ mi toi ŋmɛnɛ lɛ hu atsɔmɔ tamɔ mi, shi gboklɛi nɛɛ eko kɛkɛ ni akawo amɛ.” 30  Kɛkɛ ni maŋtsɛ lɛ te shi, ni amralo lɛ kɛ Bernike kɛ hii ni kɛ amɛ tara shi lɛ hu fee nakai. 31  Shi be ni amɛyaa lɛ amɛkɛ amɛhe bɔi wiemɔ amɛkɛɛ: “Nuu nɛɛ efeee nɔ ko ni sa gbele loo tsuŋwoo.” 32  Kɛkɛ ni Agripa kɛɛ Festo akɛ: “Eji nuu nɛɛ kɛ esane lɛ hãko Kaisare yeli kulɛ, abaanyɛ aŋmɛɛ ehe.”

Shishigbɛ Niŋmaa

Aloo “mimaŋbii.”
Sht. ŋm., “kojoɔ.”
Kpalamɔ tso ji tso kɛ enaa piɔpiɔ ní akɛkpalaa kooloi.
Aloo “ehã asaa amɛ ato ahã Nyɔŋmɔ.”