Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 24:1-27

24  Gbii enumɔ sɛɛ lɛ, osɔfonukpa Anania kɛ maŋ lɛ mli onukpai komɛi kɛ mɔ ko ni damɔɔ maŋ hiɛ ewieɔ* ni atsɛɔ lɛ Tertulo lɛ kpeleke shi kɛba, ni amɛbawie sane ní amɛyɔɔ kɛshi Paulo lɛ amɛtsɔɔ amralo lɛ.  Be ni atsɛ Tertulo lɛ, ekɛ saji bɔi enɔshwiemɔ ekɛɛ: “Akɛni kɛtsɔ onɔ lɛ wɔná toiŋjɔlɛ babaoo, ni bɔ ni okwɛɔ nii kɛyaa shɔŋŋ lɛ ehã tsakemɔi miiba jeŋmaŋ nɛɛ mli hewɔ lɛ,  Anunyamtsɛ Felike, wɔdaa bo shi babaoo be fɛɛ be kɛ yɛ he fɛɛ he hu yɛ enɛɛmɛi fɛɛ ahewɔ.  Shi bɔ ni afee ni mikatsĩ onaa be kakadaŋŋ lɛ, miikpa bo fai yɛ omlihilɛ lɛ naa ni obo wɔ toi kuku.  Ejaakɛ wɔna akɛ nuu nɛɛ gbaa mɛi anaa,* ni ewoɔ Yudafoi fɛɛ ni yɔɔ shikpɔŋ lɛ nɔ fɛɛ lɛ yiŋ ní amɛtse atua, ni eji mɔ otu yɛ Nazarebii lɛ ajamɔ kuu lɛ mli.  Eka hu akɛ ebaabule sɔlemɔwe lɛ, no hewɔ lɛ, wɔmɔ lɛ.  —  Kɛ́ bo diɛŋtsɛ obibii lɛ saji lɛ, obaana akɛ saji ni wɔkɛshwieɔ enɔ nɛɛ fɛɛ yɛ mli.”  Kɛkɛ ni Yudafoi lɛ hu kɛ amɛnaa wo mli ni amɛma nɔ mi akɛ nibii nɛɛ yɛ mli. 10  Be ni amralo lɛ kɛ eyitso fee okadi etsɔɔ Paulo akɛ ewie lɛ, Paulo hã hetoo akɛ: “Akɛni mile jogbaŋŋ akɛ okojo jeŋmaŋ nɛɛ afii babaoo hewɔ lɛ, miyɛ he miishɛɛ akɛ majie minaa yɛ ohiɛ. 11  Kɛ́ obi mli lɛ, obaana akɛ be ni mikwɔ kɛtee Yerusalem koni miyajá lɛ, eyeko nɔ ni fe gbii nyɔŋma kɛ enyɔ; 12  ni amɛnaaa mi akɛ mikɛ mɔ ko miitaa naa yɛ sɔlemɔwe lɛ, asaŋ amɛnaaa mi akɛ miiwo asafo yuu ko yiŋ yɛ kpeehei lɛ loo yɛ maŋ lɛ mli fɛɛ koni amɛfee basabasa. 13  Ni asaŋ, saji ni amɛkɛshwieɔ minɔ amrɔ nɛɛ, amɛnyɛŋ naa amɛtsɔɔ yɛ ohiɛ akɛ anɔkwale ni. 14  Shi mikpɛlɛɔ enɛ nɔ yɛ ohiɛ akɛ mihiɔ shi yɛ shihilɛ gbɛ ni amɛtsɛɔ lɛ jamɔ kuu ko lɛ naa, ni nɛkɛ shihilɛ gbɛ nɛɛ nɔ nɔŋŋ mitsɔɔ miŋɔɔ sɔɔmɔ krɔŋŋ mihãa mitsɛmɛi a-Nyɔŋmɔ lɛ, ni miheɔ nibii fɛɛ ni aŋmala yɛ Mla lɛ kɛ Gbalɔi lɛ amli lɛ miyeɔ. 15  Ni miyɛ hiɛnɔkamɔ yɛ Nyɔŋmɔ mli, hiɛnɔkamɔ ni mɛnɛɛmɛi hu kwɛɔ gbɛ lɛ, akɛ abaatee jalɔi kɛ mɛi ni ejaaa fɛɛ shi. 16  Enɛ hewɔ lɛ, be fɛɛ be lɛ, mibɔɔ mɔdɛŋ waa koni mahiɛ henilee ni he tse* mli yɛ Nyɔŋmɔ kɛ gbɔmɛi fɛɛ hiɛ. 17  Agbɛnɛ, afii saŋŋ sɛɛ lɛ, miba koni mikɛ ejurɔfeemɔ nibii abahã mimaŋ lɛ, ni maŋɔ afɔlei hu mahã. 18  Be ni mitsuɔ nibii nɛɛ ahe nii lɛ, amɛna mi akɛ mitsuu mihe yɛ kusum naa yɛ sɔlemɔwe lɛ, shi amɛnaaa mi kɛ asafoku ko, loo akɛ miihã aafee basabasa. Shi Yudafoi komɛi ni jɛ Asia kpokpaa lɛ nɔ yɛ jɛmɛ, 19  mɛi ni kɛ́ amɛyɛ nɔ ko amɛshi mi lɛɛlɛŋ lɛ, kulɛ esa akɛ amɛbadamɔ ohiɛ ni amɛbajaje nɔ ni amɛyɔɔ kɛshi mi lɛ. 20  Aloo, hã hii ni yɔɔ biɛ lɛ diɛŋtsɛ atsɔɔ nɔ fɔŋ ni amɛna yɛ mihe be ni midamɔ Sanhedrin* lɛ hiɛ lɛ, 21  akɛ ja nɔ kome nɛɛ ni be ni midamɔ amɛteŋ lɛ mibo akɛ: ‘Gbohiiashitee lɛ hewɔ akojoɔ mi yɛ nyɛhiɛ ŋmɛnɛ gbi nɛɛ!’ lɛ kɛkɛ.” 22  Shi akɛni Felike le anɔkwa saji ni kɔɔ Gbɛ nɛɛ he lɛ jogbaŋŋ hewɔ lɛ, etsi amɛ eto ni ekɛɛ: “Be fɛɛ be ni tatsɛ Lisia baakpeleke shi kɛba lɛ, makpɛ yiŋ yɛ nyɛsaji nɛɛ ahe.” 23  Ni ekɛ famɔi hã asraafoiatsɛ lɛ akɛ eya nɔ ewo nuu lɛ tsuŋ, shi ehã ená hejɔlɛ fioo yɛ tsuŋwoohe lɛ, ni akɛ, eŋmɛ Paulo webii lɛ gbɛ koni amɛbatsu ehiamɔ nii ahe nii amɛhã lɛ. 24  Gbii komɛi asɛɛ lɛ, Felike kɛ eŋa Drusila ni ji Yuda yoo lɛ ba, ni ehã ayaŋɔ Paulo kɛba, ni ebo nɔ ni eyɔɔ kɛɛmɔ yɛ Kristo Yesu mli hemɔkɛyeli lɛ he lɛ toi. 25  Shi be ni Paulo wie jalɛ kɛ henɔyeli kɛ kojomɔ ni baaba lɛ he lɛ, Felike she gbeyei ni ehã hetoo akɛ: “Bo lɛ yaa dã, shi kɛ́ miná hegbɛ lɛ, matsu ni abatsɛ bo ekoŋŋ.” 26  Nakai be lɛ mli nɔŋŋ lɛ, eekpa gbɛ akɛ Paulo baahã lɛ shika. No hewɔ lɛ, etsuɔ ni ayatsɛɔ lɛ kɛbaa kpitiokpitio ni ekɛ lɛ gbaa sane. 27  Shi afii enyɔ sɛɛ lɛ, Porkio Festo baye Felike najiaŋ; ni akɛni Felike miisumɔ ni ehiɛ aba nyam yɛ Yudafoi lɛ ahiɛ hewɔ lɛ, eshi Paulo yɛ tsuŋwoohe lɛ.

Shishigbɛ Niŋmaa

Aloo “lɔyafonyo ko.”
Aloo “haoɔ mɛi.” Sht. ŋm., “tsɛŋemɔ hela ji lɛ.”
Aloo “ni shwamɔ ko bɛ he.”
Kwɛmɔ Mat 26:59 sh. niŋ.