Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 22:1-30

22  “Ataamɛi, nyɛmimɛi kɛ tsɛmɛi, agbɛnɛ nyɛboa minaa ni mibajie matsɔɔ nyɛ nɛɛ toi.”  Anɔkwa, be ni amɛnu akɛ ekɛ amɛ miiwie yɛ Hebri wiemɔ mli lɛ, amɛfee diŋŋ fe tsutsu lɛ, ni ekɛɛ:  “Yudafonyo ji mi, ni afɔ mi yɛ Tarso yɛ Kilikia, shi atsɔse mi yɛ maŋ nɛɛ mli yɛ Gamaliel naji anaa, ni atsɔɔ mi nii yɛ wɔtsɛmɛi lɛ a-Mla lɛ naa fitsofitso, ni mihiɛ dɔɔ Nyɔŋmɔ sɔɔmɔ he tamɔ bɔ ni nyɛ fɛɛ nyɛfeɔ ŋmɛnɛ nɛɛ.  No mli lɛ, miwaa Gbɛ nɛɛ yi kɛyashiɔ gbele mli, mifimɔɔ hii kɛ yei fɛɛ ni miŋɔɔ amɛ mihãa koni awo amɛ tsuŋ,  bɔ ni osɔfonukpa lɛ kɛ onukpai lɛ agwabɔɔ lɛ fɛɛ baanyɛ aye mi odase. Miŋɔ woji hu kɛjɛ amɛdɛŋ ní mikɛyaahã nyɛmimɛi ni yɔɔ Damasko lɛ, ni no mli lɛ, minyiɛ gbɛ miiya miyafimɔ mɛi ni yɔɔ jɛmɛ lɛ ni mikɛ amɛ aba Yerusalem koni agbala amɛtoi.  “Shi be ni minyiɛ gbɛ kɛyaa ni mibɛŋkɛ Damasko lɛ, aaafee shwane fintiŋŋ mli lɛ, trukaa lɛ, la kpele ko kpɛ kɛjɛ ŋwɛi kɛbabɔle mi kɛkpe,  ni migbee shi, ni minu gbee ko miikɛɛ mi akɛ: ‘Saul, Saul, mɛni hewɔ owaa mi yi?’  Mihã hetoo akɛ: ‘Bo namɔ, Onukpa?’ Ni ekɛɛ mi akɛ: ‘Miji Yesu, Nazarenyo lɛ, mɔ ni owaa lɛ yi lɛ.’  Agbɛnɛ, hii ni fata mihe lɛ na la lɛ shi amɛnuuu mɔ ni kɛ mi wieɔ lɛ gbee. 10  Ni mikɛɛ akɛ: ‘Mɛni esa akɛ mafee, Onukpa?’ Nuŋtsɔ lɛ kɛɛ mi akɛ: ‘Tee shi ni oya Damasko, ni abaakɛɛ bo nɔ fɛɛ nɔ ni ato akɛ ofee lɛ yɛ jɛmɛ.’ 11  Shi akɛni minaaa nɔ ko nɔ ko yɛ bɔ ni nakai la lɛ kpɛ waa lɛ hewɔ lɛ, mɛi ni fata mihe lɛ mɔ minine mli kɛyashi miyashɛ Damasko. 12  “Kɛkɛ ni nuu ko ni atsɛɔ lɛ Anania ní sheɔ Nyɔŋmɔ gbeyei yɛ Mla lɛ naa, ní Yudafoi ni yɔɔ jɛmɛ lɛ fɛɛ wieɔ ehe ekpakpa lɛ, 13  ba miŋɔɔ. Ebadamɔ mimasɛi ni ekɛɛ mi akɛ: ‘Minyɛmi Saul, naa nii ekoŋŋ!’ Ni nakai ŋmɛlɛtswaa lɛ nɔ nɔŋŋ lɛ, mikwɛ ni mina lɛ. 14  Ni ekɛɛ akɛ: ‘Wɔtsɛmɛi lɛ a-Nyɔŋmɔ lɛ ehala bo koni obale esuɔmɔnaa nii ni ona jalɔ lɛ ni onu edaaŋ gbee, 15  ejaakɛ obaatsɔ ehe odaseyelɔ, koni oye nibii fɛɛ ni ona ni onu lɛ ahe odase otsɔɔ gbɔmɛi fɛɛ. 16  Ni agbɛnɛ mɛni hewɔ oshashaoɔ shi? Tee shi ni ohã abaptisi bo, ni obo otsɛ egbɛ́i lɛ kɛfɔ ohe eshai lɛ oshwie.’ 17  “Shi be ni miku misɛɛ kɛba Yerusalem ni misɔleɔ yɛ sɔlemɔwe lɛ, efee tamɔ nɔ enyɔ minɔ 18  ni mina lɛ ní eekɛɛ mi akɛ: ‘Ohe afee oya ni oje Yerusalem mramra, ejaakɛ amɛkpɛlɛŋ mihe odase ni oyeɔ lɛ nɔ.’ 19  Ni mikɛɛ: ‘Nuŋtsɔ, amɛ diɛŋtsɛ amɛle jogbaŋŋ akɛ tsutsu ko lɛ, miwoɔ mɛi ni heɔ onɔ yeɔ lɛ tsuŋ ni miyiɔ amɛ yɛ kpeehe fɛɛ kpeehe; 20  ni be ni ashwieɔ Stefano, ohe odaseyelɔ lɛ lá shi lɛ, midamɔ jɛmɛ ni mikpɛlɛ nɔ, ni mibu mɛi ni gbeɔ lɛ lɛ atadei anɔhaanɔi lɛ ahe.’ 21  Ni kɛ̃lɛ ekɛɛ mi akɛ: ‘Yaa, ejaakɛ matsu bo jeŋmaji ni yɔɔ shɔŋŋ lɛ aŋɔɔ.’” 22  Ni amɛbo lɛ toi aahu kɛbashi nɛkɛ wiemɔ nɛɛ nɔ. Kɛkɛ ni amɛhole amɛgbei anɔ amɛkɛɛ: “Ajie nɛkɛ gbɔmɔ kɛje shikpɔŋ lɛ nɔ, ejaakɛ esaaa mɔ ni hiɔ wala mli!” 23  Akɛni amɛmiibolɔ ni amɛmiifɔ̃fɔ̃ɔ amɛtadei anɔhaanɔi lɛ, ni amɛmiigbɛ mulu amɛmiishwã kɔɔyɔɔ lɛ mli hewɔ lɛ, 24  tatsɛ lɛ fã akɛ akɛ Paulo aba asraafoi ashihilɛhe lɛ, ni ekɛɛ akɛ akɛ kpelebii ayi lɛ kɛtao eyitsoŋ, koni ena nɔ tuuntu hewɔ ni amɛwieɔ gegeege amɛshiɔ Paulo yɛ nɛkɛ gbɛ nɔ lɛ. 25  Shi be ni amɛkpã emli ní amɛbaagwao lɛ lɛ, Paulo kɛɛ asraafoiatsɛ ni damɔ jɛmɛ lɛ akɛ: “Ani mla ŋmɛɔ gbɛ akɛ nyɛkɛ kpelebii ayi Romanyo ko* ni abuko lɛ fɔ?”* 26  Anɔkwa, be ni asraafoiatsɛ lɛ nu enɛ lɛ, etee tatsɛ lɛ ŋɔɔ ni eyabɔ lɛ enɛ he amaniɛ ekɛɛ: “Mɛni oto oyiŋ akɛ obaafee? Ejaakɛ nuu nɛɛ Romanyo ni.” 27  No hewɔ lɛ, tatsɛ lɛ tsi ebɛŋkɛ ni ekɛɛ lɛ akɛ: “Kɛɛmɔ mi, ani Romanyo ji bo?” Ni ekɛɛ: “Hɛɛ.” 28  Tatsɛ lɛ here nɔ akɛ: “Shika babaoo mikɛhé nɛkɛ maŋnyotsɔmɔ hegbɛi nɛɛ.” Paulo kɛɛ: “Shi mi lɛ, fɔ akɛfɔ mi.” 29  No hewɔ lɛ, amrɔ lɛ, hii ni miiba amɛbapiŋ lɛ kɛtao eyitsoŋ lɛ gbala amɛhe shi kɛje ehe; ni akɛni tatsɛ lɛ yɔse akɛ Romanyo ji lɛ ni kɛ̃lɛ ehã awo lɛ kɔsɔŋkɔsɔi hewɔ lɛ, eshe gbeyei. 30  No hewɔ lɛ, enɔ jetsɛremɔ lɛ, akɛni eetao ele nɔ tuuntu hewɔ ni Yudafoi lɛ kɛ sane fɔ̃ɔ enɔ lɛ hewɔ lɛ, eŋmɛɛ ehe ni efã osɔfoi tsiifoi lɛ kɛ Sanhedrin* muu lɛ fɛɛ akɛ amɛbabɔ gwa. Kɛkɛ ni ekɛ Paulo kpeleke shi kɛba ni ehã ebadamɔ amɛteŋ.

Shishigbɛ Niŋmaa

Aloo “Romanyo yɛ mla naa.”
Aloo “ni ayeko esane?”
Kwɛmɔ Mat 26:59 sh. niŋ.