Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 15:1-41

15  Agbɛnɛ, hii komɛi kpeleke shi kɛjɛ Yudea kɛba ni amɛbabɔi nyɛmimɛi lɛ tsɔɔmɔ akɛ: “Kɛ́ afolɔɔɔ nyɛ ketia yɛ Mose kusum lɛ naa lɛ, anyɛŋ nyɛyiwala ahere.”  Shi be ni Paulo kɛ Barnaba kɛ amɛ kpãaa gbee, ni amɛ kɛ amɛ taa naa saŋŋ lɛ, ato akɛ Paulo, Barnaba kɛ mɛi krokomɛi lɛ ateŋ mɛi komɛi akwɔ kɛya bɔfoi lɛ kɛ onukpai lɛ aŋɔɔ yɛ Yerusalem yɛ sane* nɛɛ hewɔ.  No hewɔ lɛ, be ni asafo lɛ yajie amɛ gbɛ lɛ, hii nɛɛ tsa amɛgbɛnyiɛmɔ lɛ nɔ kɛyatsɔ Foinike kɛ Samaria, ni amɛgba jeŋmajiaŋbii lɛ atsakemɔ lɛ fitsofitso amɛtsɔɔ, ni amɛkɛhã nyɛmimɛi lɛ fɛɛ ná miishɛɛ babaoo.  Be ni amɛshɛ Yerusalem lɛ, asafo lɛ kɛ bɔfoi lɛ kɛ onukpai lɛ here amɛ hiɛmɛɛ, ni amɛgba amɛ nibii pii ni Nyɔŋmɔ tsɔ amɛnɔ efee lɛ.  Shi Farisifoi lɛ ajamɔ kuu lɛ mli bii lɛ ateŋ mɛi komɛi ni amɛbatsɔmɔ héyelilɔi lɛ te shi kɛjɛ amɛsɛii anɔ ni amɛkɛɛ: “Ehe miihia ni afolɔ amɛ ketia ni afã amɛ koni amɛye Mose Mla lɛ nɔ.”  No hewɔ lɛ, bɔfoi lɛ kɛ onukpai lɛ bua amɛhe naa koni amɛtao sane nɛɛ mli.  Be ni amɛsusu nii ahe* saŋŋ lɛ, Petro te shi ni ekɛɛ amɛ akɛ: “Ataamɛi, nyɛmimɛi, nyɛle jogbaŋŋ akɛ kɛjɛ mra mli tɔ̃ɔ Nyɔŋmɔ hala mi kɛjɛ nyɛteŋ akɛ minaa esa akɛ jeŋmajiaŋbii lɛ anu wiemɔ lɛ he sane kpakpa lɛ yɛ ní amɛhe amɛye.  Ni Nyɔŋmɔ, mɔ ni le tsuiŋ lɛ, hã amɛ mumɔ krɔŋkrɔŋ tamɔ bɔ ni ehã wɔ hu lɛ nɔŋŋ, ni ekɛye odase.  Ni ehãaa srɔto ko kwraa ahi wɔ kɛ amɛ teŋ, shi moŋ etsɔ hemɔkɛyeli nɔ etsuu amɛtsuii ahe. 10  No hewɔ lɛ, agbɛnɛ, mɛni hewɔ nyɛkɛ kɔɔŋtso ni wɔ kɛ wɔtsɛmɛi lɛ fɛɛ nyɛɛɛ atere lɛ fɔ̃ɔ kaselɔi lɛ akuɛ nɔ kɛkaa Nyɔŋmɔ lɛ? 11  Nɔ ni tamɔɔɔ nakai lɛ, wɔyɛ hemɔkɛyeli akɛ Nuŋtsɔ Yesu duromɔ lɛ nɔ atsɔɔ ahereɔ wɔyiwala, ni amɛ hu amɛheɔ amɛyeɔ nakai nɔŋŋ.” 12  Kɛkɛ ni amɛ fɛɛ amɛfee diŋŋ, ni amɛbɔi Barnaba kɛ Paulo toiboo, ni Barnaba kɛ Paulo gba amɛ okadii kɛ naakpɛɛ nii* babaoo ni Nyɔŋmɔ tsɔ amɛnɔ efee yɛ jeŋmaji lɛ ateŋ lɛ. 13  Be ni amɛwie amɛgbe naa lɛ, Yakobo here nɔ ekɛɛ: “Ataamɛi, nyɛmimɛi, nyɛboa mi toi. 14  Simeon egba wɔ fitsofitso bɔ ni Nyɔŋmɔ gbala ejwɛŋmɔ kɛba jeŋmaji lɛ anɔ klɛŋklɛŋ kwraa koni ehala amɛteŋ mɛi komɛi kɛhã egbɛ́i lɛ. 15  Ni enɛ kɛ Gbalɔi lɛ awiemɔi lɛ kpãa gbee, taakɛ aŋma lɛ, akɛ: 16  ‘Nibii nɛɛ asɛɛ lɛ maku misɛɛ maba ni masaa mama David buu* ni ekumɔ lɛ; mama etsukoi lɛ ekoŋŋ ni masaa mama shi, 17  koni mɛi ni baashwɛ lɛ kɛ jeŋmajiaŋbii lɛ fɛɛ ni akɛ migbɛ́i tsɛɔ amɛ lɛ anyɛ atao Yehowa* sɛɛ gbɛ kɛ hiɛdɔɔ, Yehowa* kɛɛ, lɛ ji mɔ ni feɔ nibii nɛɛ, 18  ni ale kɛjɛ teteete.’ 19  No hewɔ lɛ, miyiŋkpɛɛ* ji akɛ, akagba mɛi ni jɛ jeŋmajiaŋbii lɛ ateŋ ni miikpale kɛmiiba Nyɔŋmɔ ŋɔɔ lɛ anaa, 20  shi moŋ aŋma amɛ akɛ, amɛtsi amɛhe kɛje nibii ni amagai ebule ahe, kɛje bɔlɛnamɔ jeŋba sha* he, kɛje kooloi ni ashɔ̃tɔ* ahe, kɛ agbɛnɛ hu kɛje lá he. 21  Ejaakɛ kɛjɛ blema beebe lɛ, Mose yɛ mɛi ni shiɛɔ lɛ yɛ maŋ fɛɛ maŋ mli, ni hejɔɔmɔ gbi fɛɛ hejɔɔmɔ gbi lɛ, akaneɔ eniŋmai lɛ atsɔɔ mɛi yɛ kpeehei lɛ.” 22  Kɛkɛ ni bɔfoi lɛ kɛ onukpai lɛ kɛ asafo muu lɛ fɛɛ kpɛ mli akɛ amɛbaahala hii komɛi kɛjɛ amɛteŋ ni amɛtsu amɛ kɛ Paulo kɛ Barnaba kɛya Antiokia; amɛtsu Yuda ni atsɛɔ lɛ Barsaba lɛ, kɛ Sila, mɛi ni nyiɛɔ hiɛ yɛ nyɛmimɛi lɛ ateŋ lɛ. 23  Nɔ ni amɛŋma, ní amɛtsɔ amɛnɔ amɛkɛmaje lɛ nɛ: “Bɔfoi lɛ kɛ onukpai lɛ, nyɛnyɛmimɛi lɛ, kɛhã nyɛmimɛi ni yɔɔ Antiokia, Siria, kɛ Kilikia ni jɛ jeŋmajiaŋbii lɛ ateŋ lɛ: Wɔmiiŋa nyɛ! 24  Akɛni wɔnu akɛ wɔteŋ mɛi komɛi yiŋ amɛba ni amɛkɛ nɔ ni amɛbawie lɛ bagba nyɛnaa, ni amɛmiibɔ mɔdɛŋ akɛ amɛkpãtã nyɛhiɛ,* tsɛbelɛ wɔkɛ gbɛtsɔɔmɔi hãko amɛ, hewɔ lɛ, 25  wɔ fɛɛ wɔkpɛ mli akɛ wɔbaahala hii wɔfata wɔsuɔlɔi Barnaba kɛ Paulo he ni wɔtsu amɛ nyɛŋɔɔ, 26  hii enyɔ nɛɛ eŋɔ amɛwala* amɛhã yɛ wɔ-Nuŋtsɔ Yesu Kristo gbɛ́i lɛ hewɔ. 27  No hewɔ lɛ, wɔmiitsu Yuda kɛ Sila, koni amɛ hu amɛkɛ amɛnaabu ababɔ nyɛ nibii nɛɛ nɔŋŋ ahe amaniɛ. 28  Ejaakɛ esa mumɔ krɔŋkrɔŋ lɛ kɛ wɔ hu wɔhiɛ akɛ wɔkɛ jatsu kroko akafɔ̃ nyɛnɔ dɔŋŋ, akɛ ja nibii ni he hiaa nɛɛ kɛkɛ: 29  akɛ nyɛyaa nɔ nyɛtsia nyɛhe kɛjea nibii ni akɛshã afɔle ahã amagai ahe, kɛjea lá he, kɛjea kooloi ni ashɔ̃tɔ* ahe, kɛ agbɛnɛ hu kɛjea bɔlɛnamɔ jeŋba sha* he. Kɛ́ nyɛtee nɔ nyɛtsi nyɛhe kwraa kɛje nibii nɛɛ ahe lɛ, ebaahi ehã nyɛ. Nyɛhia shi jogbaŋŋ!”* 30  No hewɔ lɛ, be ni awo hii nɛɛ gbɛ lɛ, amɛkpeleke shi kɛtee Antiokia, ni amɛbua asafo muu lɛ fɛɛ naa ni amɛkɛ wolo lɛ hã amɛ. 31  Be ni amɛkane lɛ, amɛmii shɛ amɛhe naakpa yɛ hewalɛwoo lɛ hewɔ. 32  Ni Yuda kɛ Sila lɛ, akɛni amɛ diɛŋtsɛ lɛ amɛji gbalɔi hu hewɔ lɛ, amɛhã wiemɔi babaoo kɛwo nyɛmimɛi lɛ hewalɛ, ni amɛwaje amɛ. 33  Be ni amɛye be ko yɛ jɛmɛ lɛ, nyɛmimɛi lɛ wo amɛ gbɛ yɛ toiŋjɔlɛ mli kɛtee mɛi ni tsu amɛ lɛ aŋɔɔ. 34  — 35  Shi Paulo kɛ Barnaba hi Antiokia ni amɛtsɔɔ nii ni amɛkɛ mɛi krokomɛi babaoo hu fee ekome kɛjaje Yehowa* wiemɔ lɛ he sane kpakpa lɛ amɛtsɔɔ. 36  Gbii komɛi asɛɛ lɛ, Paulo kɛɛ Barnaba akɛ: “Agbɛnɛ* hã wɔku wɔsɛɛ wɔyasara nyɛmimɛi ni yɔɔ maŋ fɛɛ maŋ ni wɔyajaje Yehowa* wiemɔ lɛ yɛ mli lɛ, ni wɔkwɛ bɔ ni amɛyɔɔ.” 37  Barnaba ŋmɔ eyiŋ kpɔ akɛ ebaaŋɔ Yohane, mɔ ni atsɛɔ lɛ Marko lɛ efata amɛhe kɛya. 38  Shi Paulo sumɔɔɔ akɛ eŋɔɔ lɛ kɛfataa amɛhe, akɛni eshi amɛ yɛ Pamfilia ni ekɛ amɛ eyatsuuu nitsumɔ lɛ hewɔ. 39  Kɛkɛ ni trukaa lɛ, mlifu ni naa wa te shi yɛ amɛteŋ, ni no hã amɛgbala amɛmli; ni Barnaba ŋɔ Marko efata ehe ni amɛyabote lɛlɛ mli kɛtee Kipro. 40  Paulo hala Sila, ni be ni nyɛmimɛi lɛ tu Paulo amɛwo Yehowa* duromɔ lɛ mli lɛ, eyiŋ etee. 41  Eyakpa Siria kɛ Kilikia eyawaje asafoi lɛ.

Shishigbɛ Niŋmaa

Aloo “naataamɔ.”
Aloo “amɛtaa naa.”
Aloo “gbalɛ okadii.”
Aloo “asese; we.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “misusumɔ.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “kooloi ni agbe shi afɔseko amɛlá ashwieko shi.”
Aloo “nyɛsusumai ahiɛ.”
Aloo “amɛsusumai.”
Aloo “kooloi ni agbe shi afɔseko amɛlá ashwieko shi.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “Nyɛkɛ shihilɛ jurɔ.”
Kwɛmɔ Wiemɔi Titrii Amligbalamɔ lɛ.
Aloo eeenyɛ efee akɛ, “Bɔ fɛɛ bɔ ni fee lɛ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.