Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Bɔfoi 11:1-30

11  Agbɛnɛ, bɔfoi lɛ kɛ nyɛmimɛi ni yɔɔ Yudea lɛ nu akɛ jeŋmajiaŋbii lɛ hu ekpɛlɛ Nyɔŋmɔ wiemɔ lɛ nɔ.  No hewɔ lɛ, be ni Petro kwɔ kɛba Yerusalem lɛ, mɛi ni fiɔ ketiafoo lɛ sɛɛ lɛ bɔi ehiɛ wiemɔ,*  ni amɛkɛɛ: “Otee hii ni afolɔko amɛ ketia lɛ ashĩa ni okɛ amɛ yaye nii.”  Kɛkɛ ni Petro gbala sane lɛ mli fitsofitso etsɔɔ amɛ ekɛɛ:  “No mli lɛ, miyɛ Yopa maŋ lɛ mli miisɔle, ni efee tamɔ nɔ enyɔ minɔ, ni mina ninaa ko akɛ, nɔ ko miikpeleke shi tamɔ klala agbo ní ahiɛ ekoji ejwɛ lɛ mli aashiu kɛmiijɛ ŋwɛi kɛmiiba shi, ni eba miŋɔɔ tuuntu.  Be ni mikwɛ mli jogbaŋŋ lɛ, mina shikpɔŋ nɔ kooloi naji-ejwɛɛjwɛtsɛmɛi, ŋa mli kooloi, kooloi ni wamɔɔ kɛ ŋwɛi loofɔji.  Minu gbee ko hu kɛɛ mi akɛ: ‘Petro, tee shi, gbee ni oye!’  Shi mikɛɛ: ‘Dabida, Nuŋtsɔ, ejaakɛ nɔ ko ni abule loo nɔ ko ni he tseee boteko midaaŋ pɛŋ.’  Gbee ni jɛ ŋwɛi lɛ hã hetoo nɔ ni ji shii enyɔ nɔ akɛ: ‘Kpa nibii ni Nyɔŋmɔ etsuu amɛhe lɛ tsɛmɔ akɛ nibii ni abule.’ 10  Enɛ tee nɔ, nɔ ni ji shii etɛ nɔ, ni agbala nɔ fɛɛ nɔ kɛtee ŋwɛi ekoŋŋ. 11  Ni amrɔ lɛ nɔŋŋ lɛ, hii etɛ ní atsu amɛ kɛjɛ Kaisarea kɛba miŋɔɔ badamɔ shĩa ni wɔyɔɔ mli lɛ agbó lɛ naa. 12  Kɛkɛ ni mumɔ lɛ kɛɛ mi akɛ mikɛ amɛ aya, ni miyiŋ akafee mi kɔshikɔshi kwraa. Shi nyɛmimɛi hii ekpaa nɛɛ hu kɛ mi tee, ni wɔbote nuu lɛ shĩa lɛ mli. 13  “Egba wɔ bɔ ni ena ŋwɛibɔfo lɛ damɔ eshĩa lɛ ní eekɛɛ: ‘Tsu hii kɛya Yopa ni amɛyatsɛ Simon ni atsɛɔ lɛ Petro hu lɛ kɛba, 14  ni ebaakɛɛ bo nibii ni baahã ahere bo kɛ oshĩabii lɛ fɛɛ yiwala.’ 15  Shi be ni mibɔi wiemɔ lɛ, mumɔ krɔŋkrɔŋ lɛ ba amɛnɔ tamɔ bɔ ni eba wɔ hu wɔnɔ yɛ shishijee mli lɛ. 16  Kɛkɛ ni mikai Nuŋtsɔ lɛ wiemɔ lɛ, bɔ ni efɔɔ kɛɛmɔ akɛ: ‘Yohane kɛ nu baptisi, shi nyɛ lɛ, akɛ mumɔ krɔŋkrɔŋ baabaptisi nyɛ’ lɛ. 17  No hewɔ lɛ, kɛ́ Nyɔŋmɔ ehã amɛ nakai duromɔ keenɔ lɛ nɔŋŋ ni ekɛhã wɔ mɛi ni wɔheɔ Nuŋtsɔ Yesu Kristo nɔ wɔyeɔ lɛ hu lɛ, namɔ ji mi ni manyɛ Nyɔŋmɔ naa matsĩ?”* 18  Be ni amɛnu nibii nɛɛ, amɛwieee amɛshiii lɛ dɔŋŋ,* ni amɛwo Nyɔŋmɔ hiɛ nyam amɛkɛɛ: “Belɛ, eyɛ faŋŋ akɛ, Nyɔŋmɔ ehã jeŋmajiaŋbii lɛ hu hegbɛ koni amɛtsake amɛtsui ni amɛná wala.” 19  Agbɛnɛ, mɛi ni amanehulu ni te shi yɛ Stefano gbele sɛɛ lɛ hã amɛgbɛ amɛshwã lɛ tee aahu kɛyashɛ Foinike, Kipro, kɛ Antiokia tɔ̃ɔ, shi amɛjaje wiemɔ lɛ amɛtsɔɔ Yudafoi lɛ pɛ. 20  Shi amɛteŋ hii komɛi ní jɛ Kipro kɛ Kirene lɛ ba Antiokia ni amɛbabɔi shiɛmɔ kɛ mɛi ni wieɔ Hela lɛ hãmɔ, ni amɛjaje Nuŋtsɔ Yesu he sane kpakpa lɛ amɛtsɔɔ amɛ. 21  Kɛfata he lɛ, Yehowa* nine fata amɛhe, ni mɛi babaoo batsɔmɔ héyelilɔi ni amɛkpale kɛba Nuŋtsɔ lɛ ŋɔɔ. 22  Amɛhe sane yashɛ asafo ni yɔɔ Yerusalem lɛ toiiaŋ, ni amɛtsu Barnaba kɛtee Antiokia tɔ̃ɔ. 23  Be ni eyashɛ jɛmɛ ní ena Nyɔŋmɔ duromɔ lɛ, emii shɛ ehe naakpa ni ebɔi amɛ fɛɛ hewalɛwoo akɛ amɛya nɔ amɛkɛ tsui ní fiɔ shi shiŋŋ ahi Nuŋtsɔ lɛ mli; 24  ejaakɛ eji gbɔmɔ kpakpa ni eyi obɔ kɛ mumɔ krɔŋkrɔŋ kɛ hemɔkɛyeli. Ni aŋɔ asafoku pii afata Nuŋtsɔ lɛ he. 25  No hewɔ lɛ, eyi mli etee Tarso koni eyatao Saul fitsofitso. 26  Be ni ena lɛ lɛ, ekɛ lɛ ba Antiokia. No hewɔ lɛ, afi muu fɛɛ lɛ, amɛ kɛ asafo lɛ bua amɛhe naa, ni amɛtsɔɔ asafoku pii ko nii, ni Antiokia klɛŋklɛŋ atsɛ kaselɔi lɛ yɛ Nyɔŋmɔ gbɛtsɔɔmɔ naa akɛ Kristofoi. 27  Nakai gbii lɛ amli lɛ, gbalɔi komɛi kpeleke shi kɛjɛ Yerusalem kɛba Antiokia. 28  Amɛteŋ mɔ kome ni atsɛɔ lɛ Agabo lɛ te shi ni egba yɛ mumɔ lɛ naa akɛ, hɔmɔ kpele ko miiba shikpɔŋ muu lɛ fɛɛ nɔ, ni eba mli nakai yɛ Klaudio beiaŋ. 29  No hewɔ lɛ, kaselɔi lɛ kpɛ mli akɛ amɛteŋ mɔ fɛɛ mɔ ahã bɔ ni ebaanyɛ koni akɛmaje nyɛmimɛi ni yɔɔ Yudea lɛ ní akɛyaye abua amɛ;* 30  ni amɛfee nakai, ni amɛkɛmaje asafoŋ onukpai lɛ kɛtsɔ Barnaba kɛ Saul nine nɔ.

Shishigbɛ Niŋmaa

Aloo “kɛ lɛ bɔi naataamɔ.”
Aloo “ni matsĩ Nyɔŋmɔ gbɛ?”
Sht. ŋm., “amɛfee diŋŋ.”
Kwɛmɔ Wiemɔi Titrii Amligbalamɔ lɛ.
Aloo “akɛ yelikɛbuamɔ nibii ni akɛmiisɔmɔ amɛ.”