Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Timoteo 2:1-26

2  No hewɔ lɛ, mibi, bo lɛ yaa nɔ oná hewalɛ yɛ duromɔ ni yɔɔ Kristo Yesu mli lɛ mli;  ni nibii ni onu yɛ minaa ní odasefoi babaoo ema nɔ mi lɛ, nomɛi nɔŋŋ otu owo gbɔmɛi anɔkwafoi adɛŋ, koni no ahã amɛ hu amɛfee mɛi ni sa jogbaŋŋ akɛ amɛtsɔɔ mɛi krokomɛi anii.  Akɛ Kristo Yesu asraafonyo kpakpa lɛ, naa amanehulu lɛ eko.  Mɔ ko mɔ ko bɛ ni sɔmɔɔ akɛ asraafonyo ní kɛ ehe woɔ shihilɛ mli guɔyelii* amli,* bɔ ni afee ni esa mɔ ni he lɛ ewo asraafoi anitsumɔ lɛ mli lɛ hiɛ.  Ni kɛji mɔ ko miishi akaŋ yɛ shwɛmɔi akaŋshii lɛ amli po lɛ, aŋɔŋ akekere lɛ afiŋ lɛ, ja eshi akaŋ lɛ yɛ ehe mlai lɛ anaa dã.  Okwaafonyo ni tsuɔ nii waa lɛ, lɛ tsutsu esa akɛ eye yibii lɛ eko.  Susumɔ nɔ ni miwieɔ lɛ he daa ni okafɔ̃ɔ; Nuŋtsɔ lɛ baahã onu nibii fɛɛ shishi.*  Kaimɔ akɛ, atee Yesu Kristo shi kɛjɛ gbohii ateŋ, ni ejɛ David seshi lɛ mli,* yɛ sane kpakpa ni mishiɛɔ lɛ naa,  nɔ hewɔ ni minaa amanehulu ni awoɔ mi tsuŋ hu akɛ efɔŋfeelɔ lɛ. Kɛ̃lɛ, Nyɔŋmɔ wiemɔ lɛ, awooo lɛ kpãa. 10  Enɛ hewɔ lɛ miyaa nɔ mifiɔ shi yɛ nibii fɛɛ mli yɛ mɛi ni ahala lɛ ahewɔ, koni amɛ hu amɛnine ashɛ yiwalaheremɔ ni tsɔɔ Kristo Yesu nɔ kɛbaa lɛ nɔ kɛ agbɛnɛ hu naanɔ anunyam nɔ. 11  Anɔkwa wiemɔ nɛ: Ekã shi faŋŋ akɛ kɛ́ wɔ kɛ lɛ gbo lɛ, wɔ kɛ lɛ baahi wala mli hu; 12  kɛ́ wɔtee nɔ wɔfi shi lɛ, wɔ kɛ lɛ baaye nɔ akɛ maŋtsɛmɛi hu; kɛ́ wɔkpa yɛ esɛɛ lɛ, lɛ hu ebaakpa yɛ wɔsɛɛ; 13  kɛ́ wɔyeee anɔkwa lɛ, lɛ lɛ eyeɔ anɔkwa be fɛɛ be, ejaakɛ enyɛŋ ekpa yɛ lɛ diɛŋtsɛ ehe sɛɛ. 14  Yaa nɔ okai amɛ nibii nɛɛ, ni otsɔɔ amɛ* yɛ Nyɔŋmɔ hiɛ akɛ amɛkanɔ yɛ wiemɔkulibii ahe, nɔ ko ni sɛɛnamɔ bɛ he kwraa lɛ, ejaakɛ eyeɔ mɛi ni boɔ toi lɛ awui.* 15  Bɔɔ mɔdɛŋ fɛɛ ni ooonyɛ ni oŋɔ ohe ohã Nyɔŋmɔ akɛ mɔ ni akpɛlɛ enɔ, nitsulɔ ni hiɛ gbooo yɛ nɔ ko ni etsu he, ní hiɛɔ anɔkwale lɛ wiemɔ lɛ mli pɛpɛɛpɛ. 16  Shi kpoomɔ yaka wiemɔi ní buleɔ krɔŋkrɔŋ nii lɛ, ejaakɛ wiemɔi nɛɛ baahã* bu ni abuuu Nyɔŋmɔ lɛ mli aya nɔ awo wu fe tsutsu lɛ, 17  ni amɛwiemɔ lɛ baagbɛ ashwã tamɔ fala fɔŋ ko ni yeɔ heloo lɛ. Amɛteŋ mɛi komɛi ji Himeneo kɛ Fileto. 18  Hii nɛɛ edu gbɛ kɛje anɔkwale lɛ he, amɛkɛɔ akɛ gbohiiashitee lɛ eba momo, ni amɛmiibutu mɛi komɛi ahemɔkɛyeli lɛ. 19  Enɛ fɛɛ sɛɛ lɛ, Nyɔŋmɔ faneshi ni wa lɛ ma shi shiŋŋ, ni ehiɛ nɛkɛ naasɔomɔ nɔ nɛɛ akɛ, “Yehowa* le mɛi ni ji enii lɛ,” kɛ agbɛnɛ hu, “Mɔ fɛɛ mɔ ni boɔ tsɛɔ Yehowa* gbɛ́i lɛ atsi ehe kɛje nii ni ejaaa ahe.” 20  Agbɛnɛ yɛ shĩa wulu ko mli lɛ, jeee tsɛnsii* ni akɛ shika tsuru fee kɛ tsɛnsii ni akɛ jwiɛtɛi fee kɛkɛ yɔɔ mli, shi moŋ nɔ ni akɛ tso fee, kɛ nɔ ni akɛ sũ fee hu yɛ mli, ni akɛ ekomɛi feɔ nibii ni hiɛ yɔɔ nyam shi ekrokomɛi lɛ akɛfeɔ nibii ni hiɛ bɛ nyam. 21  No hewɔ lɛ, kɛ́ mɔ ko tsi ehe kwraa kɛje nibii ni hiɛ bɛ nyam lɛ ahe lɛ, ebaatsɔ dɛŋdade* ní akɛfeɔ nii ni hiɛ yɔɔ nyam, nɔ ni atsuu he, ni he yɔɔ sɛɛnamɔ kɛhã nɔtsɛ lɛ, ní asaa lɛ ahã nitsumɔ kpakpa fɛɛ nitsumɔ kpakpa. 22  No hewɔ lɛ, joo nibii ni ashweɔ yɛ oblahiiaŋ lɛ anaa foi, shi moŋ okɛ mɛi ni boɔ tsɛɔ Nuŋtsɔ lɛ kɛjɛɔ tsui ni mli tse mli lɛ atiu jalɛ, hemɔkɛyeli, suɔmɔ, kɛ toiŋjɔlɛ sɛɛ. 23  Kɛfata he lɛ, kpoomɔ kwashiai aŋwanejei ní akɛkaseee nɔ ko lɛ, ejaakɛ ole akɛ amɛteɔ nɔmɔi ashi. 24  Ejaakɛ Nuŋtsɔ lɛ nyɔŋ lɛ esaaa akɛ enɔɔ, shi moŋ esa akɛ efee mɔ ni mli jɔ hã mɛi fɛɛ,* mɔ ni baanyɛ atsɔɔ nii, mɔ ni yeɔ ehe nɔ kɛ́ aye lɛ sane fɔŋ, 25  mɔ ni kɛ mlijɔlɛ wieɔ tsɔɔ mɛi ni kuɔ enaa lɛ. Ekolɛ aleenɔ, Nyɔŋmɔ baahã amɛná tsuitsakemɔ* ni no baahã amɛná anɔkwale lɛ he nilee krɔŋŋ, 26  ni amɛhiɛ baaba amɛhe nɔ, ni amɛbaaje Abonsam tsɔne lɛ mli, ejaakɛ ekɛdũ amɛ ní amɛfee esuɔmɔnaa nii.

Shishigbɛ Niŋmaa

Aloo eeenyɛ efee akɛ, “nibii ni afeɔ daa gbi lɛ.”
Sht. ŋm., “Mɔ ko mɔ ko bɛ ni sɔmɔɔ akɛ asraafonyo ní hãa shihilɛ mli guɔyeli nibii tɔ̃tɔɔ enaji.”
Aloo “baahã okɔ nibii fɛɛ sɛɛ.”
Sht. ŋm., “jɛ David dumɔwu lɛ mli.”
Sht. ŋm., “oye odase fitsofitso otsɔɔ amɛ.”
Aloo “ekpãtãa mɛi ni boɔ toi lɛ ahiɛ; ebutuɔ mɛi ni boɔ toi lɛ.”
Aloo eeenyɛ efee akɛ, “amɛbaahã.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “gbɛ́i; nii.”
Aloo “tsɛnsi; gbɛ́.”
Aloo “mɔ ni kɛ mɛi fɛɛ yeɔ yɛ hiɛshikamɔ mli.”
Aloo “baahã amɛtsake amɛjwɛŋmɔ.”