Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ Kwɛmɔ afi 2013 nɔ̃ lɛ

2 Timoteo 1:1-18

EMLI SAJI

  • Ŋamɔ (1, 2)

  • Paulo da Nyɔŋmɔ shi yɛ Timoteo hemɔkɛyeli lɛ hewɔ (3-5)

  • Yaa nɔ ohã Nyɔŋmɔ nɔkeenɔ lɛ atso (6-11)

  • Yaa nɔ ohiɛ wiemɔi ni hãa mɔ náa hewalɛ lɛ mli (12-14)

  • Paulo henyɛlɔi kɛ enanemɛi (15-18)

1  Paulo, Kristo Yesu bɔfo yɛ Nyɔŋmɔ suɔmɔ naa, kɛ agbɛnɛ hu yɛ wala ni tsɔɔ Kristo Yesu nɔ kɛbaa lɛ he shiwoo lɛ naa,  kɛyahã Timoteo, bi ni asumɔɔ: Duromɔ, mɔbɔnalɛ, kɛ toiŋjɔlɛ ni jɛ Nyɔŋmɔ, ni ji Tsɛ lɛ, kɛ Kristo Yesu, wɔ-Nuŋtsɔ lɛ dɛŋ ahã bo.  Miida Nyɔŋmɔ, mɔ ni miŋɔɔ sɔɔmɔ krɔŋŋ mihãa tamɔ bɔ ni mitsɛmɛi lɛ fee lɛ shi, ni mifeɔ nakai kɛ henilee ni he tse, ni mifɔ̃ɔɔ bo kaimɔ yɛ fai ní mikɛ hiɛdɔɔ kpaa nyɔɔŋ kɛ shwane lɛ mli.  Kɛ́ mikai oyaafonui lɛ, mishweɔ akɛ mana bo, koni mayi obɔ kɛ miishɛɛ.  Ejaakɛ mikaiɔ ohemɔkɛyeli ni osato bɛ mli, ní hi onaa Loise kɛ onyɛ Eunike mli klɛŋklɛŋ, ní miyɔɔ nɔmimaa akɛ eyɛ bo hu omli lɛ.  Enɛ hewɔ lɛ, miikai bo ní oya nɔ otsi Nyɔŋmɔ nɔkeenɔ ni yɔɔ omli ní oná be ni mikɛ miniji ŋmɛlɛ onɔ lɛ mli, tamɔ atsiɔ la mli lɛ.  Ejaakɛ Nyɔŋmɔ hãaa wɔ gbeyeishemɔ mumɔ, shi moŋ ehã wɔ hewalɛ kɛ suɔmɔ kɛ jwɛŋmɔ ni sa mumɔ.  No hewɔ lɛ, ohiɛ akagbo yɛ wɔ-Nuŋtsɔ lɛ he odaseyeli lɛ he aloo yɛ mi ni miji gboklɛfonyo yɛ ehewɔ lɛ he, shi moŋ naa sane kpakpa lɛ he amanehulu lɛ eko yɛ Nyɔŋmɔ hewalɛ naa.  Ehere wɔyiwala, ni ekɛ tsɛmɔ krɔŋkrɔŋ tsɛ wɔ, jeee wɔnitsumɔi ahewɔ, shi moŋ, yɛ lɛ diɛŋtsɛ eyiŋtoo kɛ eduromɔ lɛ hewɔ. Aŋɔ enɛ ahã wɔ yɛ Kristo Yesu mli momoomo dani blema bei lɛ, 10  shi amrɔ nɛɛ, atsɔ wɔ-Yiwalaherelɔ Kristo Yesu kpojiemɔ lɛ nɔ ajie no kpo faŋŋ; lɛ efo gbele sɛɛ ni etsɔ sane kpakpa lɛ nɔ ehã la kpɛ yɛ wala kɛ nɔ ni fiteee nɔ, 11  nɔ hewɔ ni awó mi shiɛlɔ kɛ bɔfo kɛ tsɔɔlɔ lɛ. 12  Enɛ hewɔ nɔŋŋ minaa amanehului nɛɛ, shi mihiɛ gbooo. Ejaakɛ mile mɔ ni mihe enɔ miye lɛ, ni miyɛ nɔmimaa akɛ ebaanyɛ ebu nɔ ni mitu miwo edɛŋ lɛ he kɛyashi nakai gbi lɛ nɔ. 13  Yaa nɔ onyiɛ wiemɔi ni hãa mɔ náa hewalɛ* ní onu kɛjɛ minaa lɛ he nɔkwɛmɔnɔ* lɛ sɛɛ yɛ hemɔkɛyeli kɛ suɔmɔ ní jɛɔ ekome ní akɛ Kristo Yesu efee lɛ mli kɛbaa lɛ mli. 14  Tsɔ mumɔ krɔŋkrɔŋ ni hiɔ wɔmli lɛ nɔ obu nɔ kpakpa ni atu awo odɛŋ nɛɛ he. 15  Ole enɛ akɛ mɛi fɛɛ ni yɔɔ Asia kpokpaa lɛ nɔ lɛ ekpa yɛ misɛɛ, ni amɛteŋ mɛi komɛi ji Figelo kɛ Hermogene. 16  Nuŋtsɔ lɛ ana Onesiforo shĩabii lɛ mɔbɔ, ejaakɛ ebaa miŋɔɔ kpitiokpitio ni ebahãa mihe jɔɔ mi, ni ehiɛ gbooo migboklɛi lɛ ahe. 17  Shi be ni eba Roma lɛ, etao mi jogbaŋŋ ni ena mi. 18  Nuŋtsɔ lɛ ahã ená Yehowa* dɛŋ mɔbɔnalɛ yɛ nakai gbi lɛ nɔ. Ni ole sɔɔmɔ ni esɔmɔ yɛ Efeso lɛ fɛɛ jogbaŋŋ.

Shishigbɛ Niŋmaa

Aloo “ní tsaa mɔ; ní sɛɛnamɔ yɔɔ he.”
Aloo “he tɛ ni afo; he ohɛlɛŋ.”
Kwɛmɔ Wiemɔi Titrii Amligbalamɔ lɛ.