Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ Kwɛmɔ afi 2013 nɔ̃ lɛ

2 Petro 3:1-18

EMLI SAJI

  • Hefɛoyelɔi lɛ kuɔ amɛhiɛ amɛfɔ̃ɔ hiɛkpatamɔ ni baa lɛ nɔ (1-7)

  • Yehowa sɛɛ gbalaaa shi (8-10)

  • Nyɛsusua nɔ gbɔmɛi ni esa akɛ nyɛtsɔmɔ lɛ he (11-16)

    • Ŋwɛi hee kɛ shikpɔŋ hee (13)

  • Nyɛkwɛa jogbaŋŋ koni akahã nyɛdu gbɛ (17, 18)

3  Agbɛnɛ, mɛi ni asumɔɔ, enɛ ji wolo ni ji enyɔ nɔ ni miŋmaa nyɛ, ni taakɛ eji yɛ nɔ ni miŋma klɛŋklɛŋ lɛ mli lɛ, miitsɔ kaimɔ nɔ miikanya nyɛnyɛmɔ ni nyɛkɛjwɛŋɔ jogbaŋŋ lɛ yɛ enɛ hu mli,  koni nyɛkai wiemɔi ni gbalɔi krɔŋkrɔŋi lɛ wie sá* lɛ kɛ Nuŋtsɔ kɛ Yiwalaherelɔ lɛ kitãi lɛ ni atsɔ nyɛbɔfoi lɛ anɔ akɛhã lɛ.  Klɛŋklɛŋ kwraa lɛ, nyɛlea enɛ akɛ, naagbee gbii lɛ amli lɛ, hefɛoyelɔi kɛ amɛfɛoyeli baaba, amɛbaanyiɛ yɛ nibii ni amɛ diɛŋtsɛ amɛshweɔ lɛ anaa  ni amɛbaakɛɛ akɛ: “Nɛgbɛ be ni eba ni awo he shi lɛ yɔɔ? Naa, kɛjɛ beyinɔ ni wɔtsɛmɛi lɛ yawɔwɔi yɛ gbele mli nɛɛ, nibii fɛɛ miiya nɔ tamɔ bɔ ni amɛji kɛjɛ adebɔɔ shishijee mli lɛ nɔŋŋ.”  Ejaakɛ amɛjeɔ gbɛ amɛkuɔ amɛhiɛ amɛfɔ̃ɔ anɔkwa sane nɛɛ nɔ, akɛ kɛjɛ blema tɔ̃ɔ lɛ ŋwɛi yɛ, ni shikpɔŋ hu jɛ nu mli ebama shi shiŋŋ ni eyɛ nu teŋ yɛ Nyɔŋmɔ wiemɔ lɛ naa;  ni akɛ, atsɔ nomɛi anɔ akɛ nu afua kpãtã je ni yɔɔ nakai beiaŋ lɛ hiɛ.  Shi ŋwɛi kɛ shikpɔŋ ni yɔɔ amrɔ nɛɛ, nakai wiemɔ lɛ nɔŋŋ nɔ atsɔ akɛ amɛ to hã la, ni akɛ amɛ eto kɛyashi kojomɔ kɛ mɛi ni ebuuu Nyɔŋmɔ lɛ ahiɛkpatamɔ gbi lɛ nɔ.  Kɛ̃lɛ, mɛi ni asumɔɔ, nyɛkakua nyɛhiɛ nyɛfɔ̃a anɔkwa sane nɛɛ nɔ akɛ, Yehowa* buɔ gbi kome akɛ afii akpe, kɛ afii akpe hu akɛ gbi kome.  Jeee akɛ Yehowa* sɛɛ miigbala shi yɛ eshiwoo lɛ gbɛfaŋ, taakɛ mɛi komɛi buɔ nɔ ko ni sɛɛ egbala shi lɛ, shi moŋ etsui shi etoɔ ehãa nyɛ, ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui. 10  Shi Yehowa* gbi lɛ baaba tamɔ julɔ, nɔ mli ni ŋwɛi baaho aya kɛ nugbɔshiimɔ gbɛɛmɔ ni naa wa,* shi shishijee nibii ni edɔ la waa lɛ baasere, ni abaakpa shikpɔŋ lɛ kɛ emli nitsumɔi lɛ ahe mama. 11  Akɛni abaasere nɛkɛ nibii nɛɛ fɛɛ yɛ nɛkɛ gbɛ nɔ hewɔ lɛ, nyɛsusua nɔ gbɔmɛi ni esa akɛ nyɛtsɔmɔ yɛ jeŋbai krɔŋkrɔŋi kɛ nifeemɔi ni tsɔɔ Nyɔŋmɔjamɔ su lɛ amli lɛ he, 12  be mli ni nyɛmɛɔ ni nyɛhãa Yehowa* gbi lɛ baa* lɛ hiɔ nyɛjwɛŋmɔ mli jogbaŋŋ lɛ,* gbi ni akɛbaakpãtã ŋwɛi hiɛ yɛ la mli ni shishijee nibii lɛ baasere yɛ dɔlɛ ni naa wa waa lɛ mli lɛ! 13  Shi yɛ eshiwoo lɛ naa lɛ, wɔmiimɛ ŋwɛi hee kɛ shikpɔŋ hee, ni nomɛi amli jalɛ baahi. 14  No hewɔ lɛ, mɛi ni asumɔɔ, akɛni nyɛmiimɛ nibii nɛɛ hewɔ lɛ, nyɛbɔa mɔdɛŋ fɛɛ ni nyɛaanyɛ koni yɛ naagbee lɛ ena nyɛ ní muji kɛ kpa ko bɛ nyɛhe, yɛ toiŋjɔlɛ mli. 15  Kɛfata he lɛ, nyɛbua wɔ-Nuŋtsɔ lɛ tsuishitoo lɛ akɛ yiwalaheremɔ, tamɔ bɔ pɛ ni Paulo, wɔnyɛmi ni wɔsumɔɔ lɛ lɛ hu ŋma nyɛ yɛ hiɛshikamɔ ni aŋɔhã lɛ lɛ naa lɛ, 16  ewieɔ nibii nɛɛ ahe taakɛ efeɔ yɛ ewoji lɛ fɛɛ mli lɛ. Shi nibii komɛi yɛ nomɛi amli ní shishinumɔ wa, ni mɛi ni leee nɔ ko* ní nane mɔko shi lɛ tsɔmɔɔ nɛkɛ nibii nɛɛ ahiɛ amɛbumɔɔ shi, tamɔ bɔ ni amɛfeɔ Ŋmalɛi ni eshwɛ lɛ hu kɛkpãtãa amɛ diɛŋtsɛ amɛhiɛ lɛ. 17  No hewɔ lɛ, mɛi ni asumɔɔ, nyɛ lɛ, akɛni nyɛle enɛ momo hewɔ lɛ, nyɛkwɛa jogbaŋŋ koni mlatɔlɔi lɛ atɔmɔ lɛ akahã nyɛ kɛ amɛ fɛɛ du gbɛ ni nyɛjɛ nyɛ diɛŋtsɛ nyɛshifimɔ lɛ* mli nyɛgbee shi. 18  Dabida, moŋ lɛ, nyɛyaa nɔ nyɛdaraa yɛ wɔ-Nuŋtsɔ kɛ Yiwalaherelɔ Yesu Kristo duromɔ kɛ ehe nilee lɛ mli. Lɛ aŋɔ anunyam ahã amrɔ nɛɛ kɛ agbɛnɛ hu kɛmiiya naanɔ gbi lɛ nɔ. Amen.

Shishigbɛ Niŋmaa

Aloo “nibii ni gbalɔi krɔŋkrɔŋi lɛ gba.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “gbɛɛmɔ ni hoɔ oya.”
Kwɛmɔ Wiemɔi Titrii Amligbalamɔ lɛ.
Sht. ŋm., “be ni Yehowa gbi lɛ eba.”
Aloo “nyɛmɛɔ ni nyɛshweɔ Yehowa gbi lɛ baa lɛ.” Sht. ŋm., “nyɛmɛɔ ni nyɛwoɔ be ni Yehowa gbi lɛ eba lɛ foi lɛ.”
Aloo “mɛi ni ekaseko nɔ ko.”
Aloo “shi ni nyɛdamɔ jogbaŋŋ lɛ.”