Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Petro 2:1-22

2  Shi amale gbalɔi hu te shi yɛ mɛi lɛ ateŋ, tamɔ bɔ ni amale tsɔɔlɔi baaba nyɛ hu nyɛteŋ lɛ. Mɛnɛɛmɛi kɛ jamɔ kui ni kɛ hiɛkpatamɔ baa baababote mli nigii, ni amɛbaakwa nuŋtsɔ lɛ ni hé amɛ lɛ po, ni amɛkɛ hiɛkpatamɔ ni he yɔɔ oya baaba amɛ diɛŋtsɛ amɛnɔ.  Kɛfata he lɛ, mɛi babaoo baanyiɛ efɔŋ ni amɛkɛ kuɛŋtimɔ feɔ* lɛ sɛɛ, ni amɛhewɔ lɛ, abaawie anɔkwale gbɛ lɛ he efɔŋ.  Agbɛnɛ hu, amimyeli hewɔ lɛ, amɛkɛ kutumpɔo wiemɔi baatao ní amɛná nyɛhe sɛɛ. Shi amɛkojomɔ lɛ, akpɛ mli ato kɛjɛ blema beebe, ni eshashaooo shi, ni amɛhiɛkpatamɔ lɛ wɔɔɔ.  Ekã shi faŋŋ akɛ Nyɔŋmɔ eŋɔɔɔ ŋwɛibɔfoi ni fee esha lɛ ahe ekeee amɛ, shi moŋ eshɛrɛ amɛ eshwie Tartaro,* ekɛ duŋ kpii kɔsɔŋkɔsɔi fimɔ amɛ* koni akɛ amɛ ato ahã kojomɔ.  Ni eŋɔɔɔ blema je lɛ he ekeee lɛ, shi moŋ ebaa Noa, jalɛ shiɛlɔ lɛ, kɛ mɛi kpawo krokomɛi ayi, be ni ekɛ nu afua ba mɛi ni ebuuu Nyɔŋmɔ lɛ aje lɛ nɔ lɛ.  Ni ebu maji ni ji Sodom kɛ Gomora lɛ fɔ be ni ehã amɛtsɔ lamulu lɛ, ni ekɛfee nibii ni baaba lɛ ahe nɔkwɛmɔnɔ ehã mɛi ni ebuuu Nyɔŋmɔ lɛ.  Ni ejie Lot, jalɔ lɛ, mɔ ni hao babaoo yɛ efɔŋ ni mlatɔlɔi lɛ kɛ kuɛŋtimɔ fee* lɛ hewɔ lɛ—  ejaakɛ nakai jalɔ lɛ piŋ esusuma* ni ja lɛ daa gbi yɛ mlatɔmɔ nifeemɔi ni ena ni enu be ni eyɔɔ amɛteŋ lɛ hewɔ.  No hewɔ lɛ, Yehowa* le bɔ ni eeefee ejie mɛi ni jieɔ Nyɔŋmɔjamɔ su kpo lɛ kɛjɛ jaramɔ shihilɛ mli, shi mɛi ni ejaaa lɛ, ekɛ amɛ toɔ kɛhã hiɛkpatamɔ* yɛ kojomɔ gbi lɛ nɔ, 10  titri lɛ mɛi ni taoɔ akɛ amɛbule mɛi krokomɛi aheloo lɛ, ní amɛgbeɔ nɔyeli he guɔ* lɛ. Amɛtsui esa ni amɛyeɔ amɛtsui naa sane, amɛsheee gbeyei akɛ amɛbaawie anunyam gbɔmɛi ahe efɔŋ, 11  tsɛbelɛ, eyɛ mli akɛ ŋwɛibɔfoi lɛ yɛ nyɛmɔ kɛ hewalɛ fe amɛ moŋ, shi amɛkɛ sane efɔ̃ɔɔ amɛnɔ ni amɛwieee wiemɔi fɔji amɛshiii amɛ, yɛ bulɛ ni amɛyɔɔ kɛhã Yehowa* lɛ hewɔ.* 12  Shi nɛkɛ gbɔmɛi nɛɛ, ni tamɔ kooloi ni bɛ jwɛŋmɔ ní amɛfɔmɔ su kɛkɛ ni kudɔɔ amɛ ní afɔɔ amɛ* koni amɔmɔ amɛ ní akpãtã amɛhiɛ lɛ, wieɔ nibii ni amɛleee he nɔ ko lɛ ahe efɔŋ. Amɛ diɛŋtsɛ amɛgbɛ ni kɛ mɔ yaa hiɛkpatamɔ mli lɛ baakpãtã amɛhiɛ, 13  awuiyeli gbɛ ni amɛ diɛŋtsɛ amɛkɔ lɛ yeɔ amɛ awui. Amɛbuɔ ogbɔjɔ shihilɛ—yɛ shwane fintiŋŋ mli po—akɛ nii ni ŋɔɔ. Amɛji muji kɛ kpajei, mɛi ni náa miishɛɛ kɛtekeɔ nɔ yɛ amɛlakamɔ tsɔɔmɔi lɛ amli* be mli ni amɛkɛ nyɛ feɔ ekome kɛyeɔ nii lɛ. 14  Amɛhiŋmɛii eyimɔ obɔbɔ kɛ gbalafitemɔ ni amɛnyɛɛɛ amɛkpa eshafeemɔ, ni amɛlakaa mɛi* ni nane mɔko shi lɛ. Amɛyɛ tsui ni atsɔse lɛ yɛ amimyeli mli. Amɛji bii ni alomɔ. 15  Akɛni amɛje gbɛ trɔmɔɔ lɛ nɔ hewɔ lɛ, ahã amɛdu gbɛ. Amɛnyiɛ Beor bi Bileam gbɛ lɛ nɔ, mɔ ni sumɔ efɔŋfeemɔ he nyɔmɔwoo, 16  shi akune* lɛ yɛ mla ni lɛ diɛŋtsɛ etɔ̃ lɛ hewɔ lɛ. Nitsumɔ kooloo ni leee wiemɔ lɛ kɛ gbɔmɔ gbee wie kɛtsĩ sɛkɛyeli gbɛ ní gbalɔ lɛ kɔ lɛ naa. 17  Mɛnɛɛmɛi ji nuhiŋmɛii ní nu bɛ mli kɛ afuai ní ahum ni naa wa kpalaa amɛ, ni akɛ duŋ ni yɔɔ kpii fe fɛɛ eto ehã amɛ. 18  Amɛwieɔ wiemɔi wuji ní sɛɛnamɔ ko bɛ he. Amɛtsɔɔ nibii ni heloo lɛ shweɔ kɛ nibii fɔji ni akɛ kuɛŋtimɔ feɔ* lɛ anɔ amɛlakaa mɛi ni je mɛi ni baa amɛjeŋ yɛ nɔfɔŋfeemɔ mli lɛ adɛŋ etsɛko lɛ. 19  Amɛwoɔ amɛ shi akɛ amɛbaahã amɛye amɛhe, tsɛbelɛ, amɛ diɛŋtsɛ lɛ fitemɔ nyɔji ji amɛ; ejaakɛ kɛ́ mɔ ko ye mɔ ko nɔ lɛ, mɔ ni aye enɔ lɛ etsɔ nyɔŋ ehã mɔ ni ye enɔ lɛ.* 20  Ekã shi faŋŋ akɛ, kɛ́ amɛtsɔ Nuŋtsɔ kɛ Yiwalaherelɔ Yesu Kristo he nilee krɔŋŋ nɔ amɛjo je lɛ bulemɔ nii lɛ anaa foi, ní sɛɛ mli lɛ amɛkɛ amɛhe yawo nibii nɛɛ nɔŋŋ amli ekoŋŋ ni nibii nɛɛ ye amɛnɔ lɛ, amɛnaagbee shihilɛ lɛ etsɔ efɔŋ fe tsutsu nɔ lɛ. 21  Eji amɛnáaa amɛle jalɛ gbɛ lɛ jogbaŋŋ kulɛ ehi, fe nɔ ni amɛbaale ní sɛɛ mli lɛ amɛkpale kɛje kitã krɔŋkrɔŋ ní amɛnine shɛ nɔ lɛ he. 22  Nɔ ni anɔkwa abɛ lɛ kɛɔ lɛ eba mli yɛ amɛnɔ akɛ: “Gbee lɛ eku esɛɛ kɛtee lɛ diɛŋtsɛ eshwee he, ni kpolotoo yoo ni aju ehe lɛ esaa eyakokolo ŋmɔtɔ lɛ mli.”

Shishigbɛ Niŋmaa

Aloo “amɛjeŋbai gbohii ni efeee amɛ hiɛgbele.” Hela wiemɔkuli ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo eeenyɛ efee akɛ, “ekɛ amɛ ewo duŋ kpii bui amli.”
Aloo “jeŋba gbonyo ni efeee mɔ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Sht. ŋm., “koni efolɔ amɛ eshwie.”
Aloo “amɛnyaŋeɔ nuŋtsɔyeli.”
Kwɛmɔ Wiemɔi Titrii Amligbalamɔ lɛ.
Aloo “yɛ Yehowa hiɛ.”
Aloo “ní yɛ adebɔɔ naa lɛ afɔɔ amɛ.”
Aloo “mɛi ni kɛ miishɛɛ ni eteke nɔ tsɔɔ amɛlakamɔ tsɔɔmɔi lɛ.”
Aloo “susumai.”
Aloo “ajaje.”
Aloo “jeŋbai gbohii ni efeee mɔ hiɛgbele.” Hela wiemɔkuli ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
Aloo “kɛ́ nɔ ko ye mɔ ko nɔ lɛ, mɔ lɛ etsɔ nɔ ni ye enɔ lɛ nyɔŋ.”