Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Petro 1:1-21

1  Simon Petro, ni ji Yesu Kristo nyɔŋ kɛ bɔfo lɛ, ŋma kɛyahã mɛi ni tsɔ wɔ-Nyɔŋmɔ lɛ kɛ Yiwalaherelɔ Yesu Kristo jalɛ lɛ nɔ amɛná hemɔkɛyeli ni jara wa tamɔ wɔnɔ lɛ nɔŋŋ* lɛ:  Nyɔŋmɔ kɛ Yesu, wɔ-Nuŋtsɔ lɛ he nilee krɔŋŋ lɛ ahã duromɔ kɛ toiŋjɔlɛ aya nɔ afa ahã nyɛ,  ejaakɛ e-Nyɔŋmɔ hewalɛ lɛ eŋɔ nibii fɛɛ ni hi hã wala kɛ Nyɔŋmɔjamɔ su lɛ ehã wɔ* yɛ mɔ ni tsɔ lɛ diɛŋtsɛ enunyam kɛ ejeŋba kpakpa nɔ etsɛ wɔ lɛ he nilee krɔŋŋ lɛ mli.  Etsɔ nibii nɛɛ anɔ eŋɔ shiwoi kpelekpelei ni jara wa lɛ ehã wɔ,* koni nyɛtsɔmɔ enɛɛmɛi anɔ nyɛná Nyɔŋmɔ su lɛ mli gbɛfaŋnɔ, akɛni nyɛjo fitemɔ ni yɔɔ je lɛ mli ní jɛɔ nibii fɔji ní ashweɔ lɛ* mli kɛbaa lɛ naa foi lɛ hewɔ.  Enɛ nɔŋŋ hewɔ lɛ, nyɛbɔa mɔdɛŋ fɛɛ ni nyɛaanyɛ ní nyɛkɛ jeŋba kpakpa afataa nyɛhemɔkɛyeli lɛ he, ní nyɛkɛ nilee afataa nyɛjeŋba kpakpa lɛ he,  ní nyɛkɛ henɔyeli afataa nyɛnilee lɛ he, ní nyɛkɛ shifimɔ afataa nyɛhenɔyeli lɛ he, ní nyɛkɛ Nyɔŋmɔjamɔ su afataa nyɛshifimɔ lɛ he,  ní nyɛkɛ nyɛmimɛi ahedɔɔ afataa nyɛ-Nyɔŋmɔjamɔ su lɛ he, ní nyɛkɛ suɔmɔ afataa nyɛnyɛmimɛi ahedɔɔ lɛ he.  Ejaakɛ kɛ́ nibii nɛɛ yɛ nyɛmli ní efa kɛteke nɔ lɛ, ehãŋ nyɛfee mɛi ni tara shi efolo aloo mɛi ni wooo yibii yɛ wɔ-Nuŋtsɔ Yesu Kristo he nilee krɔŋŋ lɛ gbɛfaŋ.  Ejaakɛ mɔ fɛɛ mɔ ni bɛ nɛkɛ nibii nɛɛ, shwilafo ji lɛ, eŋamɔ ehiŋmɛii ewo la lɛ,* ni ehiɛ ekpa nɔ akɛ atsuu ehe kɛjɛ eshai ni efee tsutsu lɛ amli. 10  No hewɔ lɛ, nyɛmimɛi, nyɛbɔa mɔdɛŋ fɛɛ ní nyɛaanyɛ ní nyɛhã nyɛtsɛmɔ kɛ nyɛhalamɔ lɛ afee nɔ ni ama nɔ mi ahã nyɛ, ejaakɛ kɛ́ nyɛtee nɔ nyɛfee nibii nɛɛ, nyɛnine enyɛŋ shi kɔkɔɔkɔ. 11  Anɔkwa, nɛkɛ gbɛ nɔ abaatsɔ ahã nyɛná gbɛ ni yɔɔ nyam kɛbote wɔ-Nuŋtsɔ kɛ Yiwalaherelɔ Yesu Kristo naanɔ Maŋtsɛyeli lɛ mli. 12  Enɛ hewɔ lɛ, mito miyiŋ akɛ makai nyɛ nibii nɛɛ be fɛɛ be, tsɛbelɛ nyɛle nibii nɛɛ, ni nyɛnane emɔ shi jogbaŋŋ yɛ anɔkwale ni yɔɔ nyɛmli lɛ mli. 13  Shi gbii abɔ ni miyɔɔ buu nɛɛ mli* lɛ, mibuɔ akɛ eja gbɛ akɛ mikɛ kaimɔi akanya nyɛ, 14  ejaakɛ mile akɛ etsɛŋ ni abaajie mibuu lɛ kɛya, tamɔ bɔ ni wɔ-Nuŋtsɔ Yesu Kristo hu ejie kpo faŋŋ etsɔɔ mi lɛ. 15  Mafee bɔ fɛɛ bɔ ni manyɛ be fɛɛ be koni kɛ́ mishi lɛ, nyɛ diɛŋtsɛ nyɛnyɛ nyɛkai nibii nɛɛ* nyɛhã nyɛhe. 16  Dabi, jeee adesãi ni afolɔ atã yɛ ŋaa mli asɛɛ wɔnyiɛ wɔjaje wɔ-Nuŋtsɔ Yesu Kristo hewalɛ kɛ be ni eba lɛ he sane wɔtsɔɔ nyɛ, shi moŋ, wɔna enunyam kpele lɛ kɛ wɔhiŋmɛii. 17  Ejaakɛ enine shɛ woo kɛ anunyam nɔ kɛjɛ Nyɔŋmɔ, ni ji Tsɛ lɛ ŋɔɔ, be ni anunyam kpele lɛ wie wiemɔi nɛɛ etsɔɔ lɛ lɛ,* akɛ: “Mɔ nɛ ji mi-Bi ni misumɔɔ lɛ lɛ, mɔ ni mi diɛŋtsɛ mikpɛlɛ enɔ lɛ.” 18  Hɛɛ, wɔnu wiemɔi nɛɛ akɛ ejɛ ŋwɛi be mli ni wɔkɛ lɛ yɔɔ gɔŋ krɔŋkrɔŋ lɛ nɔ lɛ. 19  No hewɔ lɛ, ama gbalɛ wiemɔ lɛ nɔ mi ahã wɔ fe tsutsu lɛ, ni nyɛmiifee jogbaŋŋ akɛ nyɛkɛ nyɛjwɛŋmɔ miima nɔ akɛ kane ní miitso yɛ duŋ mli (kɛyashi je baatsɛre ni toloo lɛ* baate shi) yɛ nyɛtsuii amli. 20  Ejaakɛ klɛŋklɛŋ kwraa lɛ, nyɛle akɛ Ŋmalɛ mli gbalɛ ko gbalɛ ko jɛɛɛ gbɔmɔ ko niiamlitsɔɔmɔ mli. 21  Ejaakɛ gbalɛ ko bako yɛ gbɔmɔ suɔmɔ naa pɛŋ, shi moŋ mumɔ krɔŋkrɔŋ lɛ tsirɛ* gbɔmɛi ni amɛwie wiemɔi ní jɛ Nyɔŋmɔ ŋɔɔ.

Shishigbɛ Niŋmaa

Aloo “amɛná hemɔkɛyeli ni ji hegbɛ ni kɛ wɔnɔ lɛ yeɔ egbɔ.”
Aloo “eke wɔ tswaa.”
Aloo “eke wɔ tswaa.”
Aloo “ní jɛɔ akɔnɔ fɔŋ.”
Aloo eeenyɛ efee akɛ, “eshwila, enaaa shɔŋŋ nii.”
Aloo “agba nɛɛ shishi,” ni tsɔɔ akɛ, eshikpɔŋ nɔ gbɔmɔtso lɛ.
Aloo “nyɛnyɛ nyɛtsĩ nibii nɛɛ atã.”
Sht. ŋm., “kɛ gbee nɛɛ wie tsɔɔ lɛ.”
Aloo “leebi ŋulami lɛ.”
Sht. ŋm., “kpala.”