Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 9:1-15

9  Agbɛnɛ yɛ sɔɔmɔ ní aŋɔhãa mɛi krɔŋkrɔŋi lɛ gbɛfaŋ lɛ, ehe ehiaaa akɛ maŋma nyɛ he nɔ ko,  ejaakɛ mile bɔ ni nyɛyɔɔ he suɔmɔ waa, ni mikɛshiɔ mitsitsi mitsɔɔ Makedoniabii lɛ, akɛ afi kome nɛ ní Akaiabii lɛ saa amɛhe amɛto, ni nyɛhiɛdɔɔ lɛ ekanya amɛteŋ mɛi pii.  Shi miitsu nyɛmimɛi lɛ, koni wɔtsitsi ni wɔshiɔ yɛ nyɛhewɔ lɛ akafee yaka yɛ enɛ gbɛfaŋ, ní nyɛsaa nyɛhe nyɛto lɛɛlɛŋ, tamɔ bɔ ni mikɛɛ akɛ nyɛbaafee lɛ.  Kɛjeee nakai lɛ, kɛ́ Makedoniabii lɛ kɛ mi ba, ni amɛbana nyɛ akɛ nyɛsako nyɛhe nyɛtoko lɛ, wɔhiɛ—jeee nyɛ pɛ nyɛhiɛ—baagboi yɛ wɔhiɛ ni wɔkɛfɔ̃ nyɛnɔ lɛ hewɔ.  No hewɔ lɛ, misusu akɛ ehe miihia ni mawo nyɛmimɛi lɛ hewalɛ koni amɛtsɔ hiɛ amɛba nyɛŋɔɔ ní amɛbasaa nikeenii babaoo ní nyɛwo he shi lɛ amɛto, koni efee klalo akɛ tsuijurɔ naa nikeenii shi jeee nɔ ko ni ashɔ̃ yɛ nɔnyɛɛ naa.  Shi yɛ enɛ gbɛfaŋ lɛ, mɔ fɛɛ mɔ ni lɛteɔ nii ahe duɔ lɛ, ebaakpa fioo pɛ hu, ni mɔ fɛɛ mɔ ni duɔ babaoo lɛ baakpa babaoo hu.  Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ* loo yɛ nɔnyɛɛ naa, ejaakɛ mɔ ni hãa nɔ kɛ miishɛɛ lɛ, lɛ Nyɔŋmɔ sumɔɔ.  Kɛfata he lɛ, Nyɔŋmɔ baanyɛ ahã eduromɔ lɛ fɛɛ afa kɛteke nɔ ahã nyɛ, koni be fɛɛ be lɛ, nyɛná nɔ fɛɛ nɔ ni he hiaa nyɛ yɛ nɔ fɛɛ nɔ mli, ni nyɛná babaoo kɛhã nitsumɔ kpakpa fɛɛ nitsumɔ kpakpa hu.  (Tamɔ bɔ ni aŋma lɛ, akɛ: “Eja nii yɛ hei babaoo;* ehã ohiafoi lɛ nii. Ejalɛ lɛ yaa nɔ hiɔ shi kɛyaa naanɔ.” 10  Agbɛnɛ, mɔ ni ŋɔɔ dumɔwui babaoo ehãa nidulɔ lɛ, kɛ aboloo hu ehãa koni aye lɛ baahã nyɛ dumɔwui ni nyɛdu, ni ebaahã nyɛ babaoo ni ateke nɔ, ni ebaahã nyɛkpa jalɛ yibii babaoo.) 11  Yɛ nɔ fɛɛ nɔ mli lɛ, ajɔɔ nyɛ koni nyɛnyɛ nyɛfee ejurɔ yɛ gbɛi srɔtoi fɛɛ nɔ, ni no hãa atsɔɔ wɔnɔ akɛ shidaa hãa Nyɔŋmɔ; 12  ejaakɛ nɛkɛ sɔɔmɔ* nɛɛ, jeee akɛ aŋɔhãa koni akɛtsu mɛi krɔŋkrɔŋi lɛ ahiamɔ nii ahe nii jogbaŋŋ kɛkɛ, shi moŋ ehãa akɛ shidaa babaoo hu hãa Nyɔŋmɔ. 13  Yɛ odaseyeli ni yelikɛbuamɔ nibii ni akɛsɔmɔɔ mɛi nɛɛ kɛhãa lɛ hewɔ lɛ, amɛwoɔ Nyɔŋmɔ hiɛ nyam ejaakɛ nyɛbaa nyɛhe shi nyɛhãa Kristo lɛ he sane kpakpa lɛ, taakɛ nyɛjaje nyɛtsɔɔ lɛ, kɛ agbɛnɛ hu, akɛni nyɛjɛɔ nyɛtsui mli nyɛtsuɔ onia babaoo nyɛhãa amɛ, kɛ mɛi fɛɛ lɛ hewɔ. 14  Ni amɛkpaa fai kɛ hiɛdɔɔ amɛhãa nyɛ, ni amɛdɔɔ nyɛhe, ejaakɛ Nyɔŋmɔ duromɔ ni nɔ bɛ lɛ yɛ nyɛnɔ. 15  Shidaa ahã Nyɔŋmɔ yɛ eduromɔ keenɔ ní anyɛŋ naa atsɔɔ lɛ hewɔ.

Shishigbɛ Niŋmaa

Aloo “shishashaomɔ.”
Aloo “Eja nii babaoo.”
Aloo “sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ.”