Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 8:1-24

8  Agbɛnɛ, nyɛmimɛi, wɔmiitao ni nyɛle Nyɔŋmɔ duromɔ ni aŋɔhã Makedonia asafoi lɛ he sane.  Be ni amɛnaa amanehulu yɛ kaa wulu ko ní amɛkɛkpeɔ lɛ mli lɛ, miishɛɛ ni amɛná kɛteke nɔ kɛ ohia butuu ni amɛyeɔ lɛ hã ana akɛ niiatsɛmɛi ji amɛ, ejaakɛ amɛfee ejurɔ babaoo.*  Ejaakɛ amɛfee yɛ amɛnyɛmɔ naa, hɛɛ, miiye odase akɛ amɛfee fe bɔ ni amɛbaanyɛ po,  ni amɛjɛ amɛ diɛŋtsɛ amɛsuɔmɔ mli amɛtee nɔ amɛkpa wɔ fai kɛ hiɛdɔɔ koni wɔhã amɛná hegbɛ ní amɛjɛ mlihilɛ mli amɛhã nɔ ko, ní amɛná yelikɛbuamɔ nibii ni akɛsɔmɔɔ mɛi krɔŋkrɔŋi lɛ mli gbɛfaŋnɔ.  Ni jeee bɔ ni wɔkpa gbɛ lɛ kɛkɛ, shi moŋ, amɛŋɔ amɛ diɛŋtsɛ amɛhe amɛhã Nuŋtsɔ lɛ klɛŋklɛŋ kɛ wɔ hu yɛ Nyɔŋmɔ suɔmɔ naa.  No hewɔ lɛ, wɔwo Tito hewalɛ akɛ, bɔ ni eje nitsumɔ nɛɛ shishi momo yɛ nyɛteŋ lɛ, nakai nɔŋŋ esa akɛ egbe nɛkɛ mlihilɛ mli ni nyɛjɛɔ nyɛhãa nɔ ko lɛ hu naa.  Kɛ̃lɛ, bɔ ni nyɛtekeɔ nɔ yɛ nɔ fɛɛ nɔ mli, yɛ hemɔkɛyeli kɛ wiemɔ kɛ nilee kɛ mɔdɛŋbɔɔ fɛɛ mli, kɛ agbɛnɛ hu yɛ suɔmɔ ni wɔyɔɔ kɛhã nyɛ lɛ mli lɛ, nyɛtekea nɔ hu yɛ nɛkɛ mlihilɛ mli ni ajɛɔ ahãa nɔ nɛɛ mli.  Jeee akɛ miiwie enɛ ni mikɛwo nyɛ kitã, shi moŋ koni mahã nyɛle mɛi krokomɛi amɔdɛŋbɔɔ kɛ agbɛnɛ hu koni mikɛka nyɛsuɔmɔ lɛ makwɛ akɛ eyɛ krɔŋŋ lo.  Ejaakɛ nyɛle wɔ-Nuŋtsɔ Yesu Kristo duromɔ lɛ, akɛ no mli lɛ niiatsɛ ji lɛ moŋ, shi etsɔ ohiafo yɛ nyɛhewɔ, koni nyɛtsɔ ehia lɛ nɔ nyɛtsɔmɔ niiatsɛmɛi. 10  Ni misusumɔ yɛ enɛ he nɛ: Enɛ hi hã nyɛ, ejaakɛ mina akɛ afi kome nɛ ní jeee akɛ nyɛje efeemɔ shishi kɛkɛ, shi moŋ nyɛtsɔɔ akɛ nyɛmiishwe ni nyɛfee hu. 11  No hewɔ lɛ, agbɛnɛ, nyɛgbea nɔ ni nyɛje efeemɔ shishi lɛ hu naa, koni nyɛjɛ nɔ ni nyɛyɔɔ lɛ mli nyɛgbe nɔ ni nyɛsumɔɔ waa akɛ nyɛfee lɛ naa. 12  Ejaakɛ klɛŋklɛŋ lɛ, kɛ́ mɔ yɛ he suɔmɔ waa lɛ, no lɛ esa hiɛ jogbaŋŋ yɛ nɔ ni mɔ lɛ yɔɔ lɛ naa, jeee nɔ ni mɔ lɛ bɛ lɛ naa. 13  Ejaakɛ misumɔɔɔ akɛ mahã nibii afee mlɛo ahã mɛi krokomɛi, ni nyɛ lɛ ewa ehã nyɛ; 14  shi moŋ bɔ ni afee ni nibii aŋmɛ pɛpɛɛpɛ lɛ, nyɛnii ni nyɛná kɛteke nɔ amrɔ nɛɛ ayatsu amɛhiamɔ lɛ he nii, koni amɛ hu amɛnii ni amɛná kɛteke nɔ lɛ abatsu nyɛhiamɔ lɛ he nii, koni nibii aŋmɛ pɛpɛɛpɛ. 15  Tamɔ bɔ ni aŋma lɛ, akɛ: “Mɔ ni yɔɔ pii lɛ, ebɛ pii fe nine, ni mɔ ni yɔɔ fioo lɛ, ebɛ lɛ butuu kwraa.” 16  Agbɛnɛ, shidaa ahã Nyɔŋmɔ ejaakɛ ekɛ nyɛhe mɔdɛŋ ni wɔbɔɔ lɛ nɔŋŋ eko wo Tito tsui mli, 17  ejaakɛ emɔ hewalɛwoo lɛ mli lɛɛlɛŋ, shi akɛni eyɛ he miishɛɛ waa hewɔ lɛ, eeba nyɛŋɔɔ yɛ lɛ diɛŋtsɛ esuɔmɔ naa. 18  Shi wɔmiitsu nyɛmi nuu ní eyi ni ajieɔ yɛ sane kpakpa lɛ gbɛfaŋ lɛ egbɛ eshwã kɛtee asafoi lɛ fɛɛ mli lɛ kɛmiifata ehe kɛba. 19  Jeee no pɛ, shi moŋ asafoi lɛ hala lɛ hu akɛ efata wɔhe kɛfãfãa gbɛ be ni wɔkɛ nikeenii nɛɛ ni ajɛ mlihilɛ mli akɛhã lɛ yasɔmɔɔ kɛwoɔ Nuŋtsɔ lɛ hiɛ nyam, ni agbɛnɛ hu, wɔkɛtsɔɔ akɛ wɔmiisumɔ waa ni wɔye wɔbua lɛ. 20  No hewɔ lɛ, wɔmiikwɛ jogbaŋŋ koni mɔ ko akana tɔmɔ ko yɛ wɔhe yɛ nɛkɛ onia babaoo ni aŋɔhã wɔ akɛ wɔkɛyasɔmɔ nɛɛ gbɛfaŋ. 21  Ejaakɛ ‘wɔkɛ anɔkwayeli tsuɔ nɔ fɛɛ nɔ he nii, jeee yɛ Yehowa* hiɛ kɛkɛ, shi moŋ yɛ gbɔmɛi ahiɛ hu.’ 22  Kɛfata he lɛ, wɔmiitsu wɔnyɛmi nuu ko kɛmiifata amɛhe kɛba, mɔ ni wɔka lɛ shii abɔ ni wɔna akɛ ebɔɔ mɔdɛŋ yɛ nibii pii amli, shi amrɔ nɛɛ eebɔ mɔdɛŋ fe tsutsu lɛ yɛ ehiɛ ni ekɛfɔ̃ɔ nyɛnɔ babaoo lɛ hewɔ lɛ. 23  Shi kɛ́ nyɛyɛ sanebimɔ ko yɛ Tito he lɛ, eji mihefatalɔ* kɛ minaanyo nitsulɔ yɛ nyɛhilɛkɛhamɔ hewɔ; aloo kɛ́ nyɛyɛ sanebimɔi komɛi yɛ wɔnyɛmimɛi lɛ ahe lɛ, amɛji asafoi lɛ abɔfoi kɛ Kristo anunyam. 24  No hewɔ lɛ, nyɛjiea nyɛsuɔmɔ lɛ kpo nyɛtsɔa amɛ, ni nyɛhãa asafoi lɛ anaa nɔ hewɔ ni wɔkɛ nyɛ shiɔ wɔtsitsi lɛ.

Shishigbɛ Niŋmaa

Aloo “kɛteke nɔ.”
Kwɛmɔ Wiemɔi Titrii Amligbalamɔ lɛ.
Sht. ŋm., “mɔ ni kɛ mi náa gbɛfaŋnɔ.”