Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 6:1-18

YITSEI LƐ AMLI SAJI

  • Esaaa akɛ akɛ Nyɔŋmɔ mlihilɛ lɛ shwɛɔ (1, 2)

  • Awie Paulo sɔɔmɔ lɛ he (3-13)

  • Nyɛkɛ mɛi ni heee yeee lɛ akahia kɔɔŋtso kome shishi (14-18)

6  Akɛni wɔkɛ lɛ efee ekome kɛmiitsu nii hewɔ lɛ, wɔmiiwo nyɛ hewalɛ hu akɛ, nyɛkakpɛlɛa Nyɔŋmɔ duromɔ lɛ nɔ ní nyɛhã yiŋtoo ni yɔɔ sɛɛ lɛ fee yaka.  Ejaakɛ ekɛɔ akɛ: “Yɛ be ni sa mli lɛ, mibo bo toi, ni yɛ yiwalaheremɔ gbi ko nɔ lɛ, miye mibua bo.” Naa! Amrɔ nɛɛ ji be ni sa jogbaŋŋ lɛ. Naa! Amrɔ nɛɛ ji yiwalaheremɔ gbi lɛ.  Wɔtɔ̃tɔŋ mɔ ko mɔ ko nane yɛ gbɛ ko kwraa nɔ, koni wɔsɔɔmɔ lɛ he akaba shwamɔ;  shi moŋ, yɛ gbɛ fɛɛ gbɛ nɔ lɛ, wɔjieɔ wɔhe yi akɛ Nyɔŋmɔ sɔɔlɔi, kɛtsɔ shi ni wɔfiɔ yɛ nibii babaoo amli lɛ nɔ, yɛ amanehului amli, yɛ hiamɔ bei amli, yɛ shihilɛi ni mli wawai amli,  yɛ yii amli, yɛ tsuŋwoohei, yɛ basabasafeemɔi amli, yɛ nitsumɔ dɛŋdɛŋ mli, yɛ kpeshii amli, yɛ bei ni wɔyeee nii amli;  yɛ hetsemɔ mli, yɛ nilee mli, yɛ tsuishitoo mli, yɛ mlihilɛ mli, yɛ mumɔ krɔŋkrɔŋ mli, yɛ suɔmɔ ni osato bɛ mli lɛ mli,  yɛ anɔkwale wiemɔ mli, yɛ Nyɔŋmɔ hewalɛ mli; kɛtsɔ jalɛ tawuu nii ni ahiɛɔ yɛ ninejurɔ* kɛ abɛku* fɛɛ lɛ nɔ,  kɛtsɔ anunyam kɛ hiɛshishwiemɔ nɔ, kɛtsɔ amaniɛ gbonyo kɛ amaniɛ kpakpa nɔ. Abuɔ wɔ tamɔ mɛi ni lakaa mɛi, ni kɛ̃lɛ anɔkwafoi ji wɔ,  abuɔ wɔ tamɔ mɛi ni aleee, ni kɛ̃lɛ ale wɔ jogbaŋŋ, abuɔ wɔ akɛ mɛi ni miigboi,* ni kɛ̃lɛ naa! wɔhiɛ kamɔ, abuɔ wɔ tamɔ mɛi ni agbala wɔtoi,* ni kɛ̃lɛ, aŋɔko wɔ ahãko gbele, 10  abuɔ wɔ tamɔ mɛi ni miiye awerɛho, shi wɔmii shɛɔ wɔhe daa, abuɔ wɔ tamɔ ohiafoi, shi wɔhãa mɛi pii tsɔmɔɔ niiatsɛmɛi, abuɔ wɔ tamɔ mɛi ni bɛ nɔ ko, ni kɛ̃lɛ wɔyɛ nibii fɛɛ. 11  Korintobii, wɔgbele wɔnaabu koni wɔkɛ nyɛ awie,* ni wɔgbele wɔtsui naa gbanyaa hu. 12  Wɔgbeleɔ wɔtsui naa wɔhãa nyɛ,* shi nyɛ lɛ, nyɛŋaa nyɛtsui naa nyɛwoɔ wɔ. 13  No hewɔ lɛ, nyɛfea nakai nɔŋŋ nyɛhãa wɔ—mikɛ nyɛ miiwie tamɔ mibii—nyɛ hu nyɛgbelea nyɛtsuii anaa gbanyaa.* 14  Nyɛkɛ mɛi ni heee yeee lɛ akahia kɔɔŋtso kome shishi,* ejaakɛ eŋmɛŋ pɛpɛɛpɛ. Ejaakɛ mɛɛ naanyobɔɔ yɔɔ jalɛ kɛ mlatɔmɔ teŋ? Aloo mɛɛ tsakpãa yɔɔ la kɛ duŋ teŋ? 15  Kɛfata he lɛ, mɛɛ gbeekpãmɔ yɔɔ Kristo kɛ Belial* teŋ? Aloo mɛɛ wekukpaa yɔɔ héyelilɔ* kɛ mɔ ni heee yeee lɛ teŋ?* 16  Ni mɛɛ ekomefeemɔ yɔɔ Nyɔŋmɔ sɔlemɔwe lɛ kɛ amagai teŋ? Ejaakɛ wɔji Nyɔŋmɔ hiɛkãalɔ lɛ sɔlemɔwe; taakɛ Nyɔŋmɔ kɛɛ lɛ, akɛ: “Mahi amɛteŋ ni manyiɛ yɛ amɛteŋ, ni matsɔ amɛ-Nyɔŋmɔ, ni amɛbaatsɔ mimaŋ.” 17  “‘No hewɔ lɛ, nyɛjea amɛteŋ, ni nyɛtsea nyɛhe,’ Yehowa* kɛɛ, ‘ni nyɛkpaa nɔ ni he tseee lɛ hetaa’”; “‘ni mahere nyɛ atuu.’” 18  “‘Ni matsɔ nyɛtsɛ, ni nyɛbaatsɔmɔ mibihii kɛ mibiyei,’ Yehowa,* Ofe lɛ, kɛɛ.”

Shishigbɛ Niŋmaa

Ekolɛ kɛhã tutuamɔ.
Ekolɛ kɛhã hefãmɔ.
Aloo “abuɔ wɔ akɛ mɛi ni sa gbele.”
Aloo “atsɔse wɔ.”
Aloo “wɔwie faŋŋ wɔtsɔɔ nyɛ.”
Aloo “Gbɛ yɛ wɔmli hã nyɛ.”
Aloo “nyɛ hu nyɛlɛa nyɛmli.”
Aloo “nyɛkɛ mɛi ni heee yeee lɛ akatsaa.”
Ejɛ Hebri mli, ni eshishi ji “He Bɛ Sɛɛnamɔ.” Ekɔɔ Satan he.
Aloo “anɔkwafo.”
Aloo “mɛɛ nijaa héyelilɔ kɛ mɔ ni heee yeee lɛ yɔɔ?”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.