Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 4:1-18

YITSEI LƐ AMLI SAJI

  • Sane kpakpa lɛ la lɛ (1-6)

    • Ashwila mɛi ni heee yeee lɛ ajwɛŋmɔi (4)

  • Jwetri yɛ sũ nii amli (7-18)

4  No hewɔ lɛ, akɛni akɛ sɔɔmɔ nɛɛ ewo wɔdɛŋ yɛ mɔbɔ ni ana wɔ lɛ hewɔ lɛ, wɔŋmɛɛɛ nibii ahe.  Shi moŋ wɔkwa hiɛgbejianii ní afeɔ yɛ teemɔŋ lɛ, wɔnyiɛɛɛ yɛ kutumpɔo mli, asaŋ wɔkɛ nɔ ko futuuu Nyɔŋmɔ wiemɔ lɛ; shi moŋ wɔtsɔɔ anɔkwale lɛ ní wɔjieɔ lɛ kpo faŋŋ lɛ nɔ wɔjieɔ wɔhe yi wɔhãa gbɔmɔ fɛɛ gbɔmɔ henilee yɛ Nyɔŋmɔ hiɛ.  Kɛ́ yɛ anɔkwale mli lɛ, aha sane kpakpa ni wɔjajeɔ lɛ hiɛ lɛ, mɛi ni hiɛ miikpãtã lɛ ateŋ aha hiɛ yɛ,  mɛi ateŋ ni shihilɛ gbɛjianɔtoo nɛɛ* nyɔŋmɔ lɛ eshwila mɛi ni heee yeee lɛ ajwɛŋmɔi lɛ yɛ, koni Kristo lɛ, ni ji Nyɔŋmɔ henɔ lɛ he sane kpakpa ni yɔɔ nyam lɛ la lɛ akakpɛ amɛnɔ.  Ejaakɛ jeee wɔ diɛŋtsɛ wɔhe sane wɔshiɛɔ, shi moŋ wɔshiɛɔ Yesu Kristo he sane akɛ lɛ ji Nuŋtsɔ, ni wɔ lɛ, nyɛnyɔji ji wɔ yɛ Yesu hewɔ.  Ejaakɛ Nyɔŋmɔ ji mɔ ni kɛɛ akɛ: “La lɛ ajɛ duŋ lɛ mli akpɛ” lɛ, ni etsɔ Kristo hiɛ nɔ ehã Nyɔŋmɔ nilee ni yɔɔ nyam lɛ la lɛ ekpɛ yɛ wɔtsuii anɔ.  Shi wɔyɛ jwetri nɛɛ yɛ sũ nii* amli, koni hewalɛ ni fa kɛteke nɔ lɛ afee Nyɔŋmɔ nɔ, shi jeee nɔ ni jɛ wɔ diɛŋtsɛ wɔŋɔɔ.  Afifiaa wɔ waa yɛ gbɛ fɛɛ gbɛ nɔ, shi jeee kpɛŋŋ bɔ ni wɔnyɛɛɛ wɔtsi wɔhe; wɔyiŋ feɔ wɔ kɔshikɔshi, shi jeee bɔ ni wɔbɛ tsɔmɔhe ko kwraa;*  awaa wɔ yi, shi akpooko wɔ; atsirɛɔ wɔ atswiaa shi, shi wɔhiɛ kpãtãko. 10  Be fɛɛ be lɛ, wɔgbɔmɔtso lɛ tsɔɔ shihilɛ ni baanyɛ agbe mɔ ní tamɔ nɔ ni Yesu kɛkpe lɛ mli, koni Yesu wala lɛ hu aje kpo faŋŋ yɛ wɔgbɔmɔtso lɛ mli. 11  Ejaakɛ wɔ mɛi ni wɔhiɛ kamɔ lɛ, daa gbi lɛ wɔkɛ gbele kpeɔ hiɛ kɛ hiɛ yɛ Yesu hewɔ, koni Yesu wala lɛ hu aje kpo faŋŋ yɛ wɔheloo ni baagbo lɛ mli. 12  No hewɔ lɛ, gbele miitsu nii yɛ wɔmli, shi nyɛ lɛ, wala miitsu nii yɛ nyɛmli. 13  Agbɛnɛ, akɛni wɔyɛ hemɔkɛyeli mumɔ kome lɛ nɔŋŋ, tamɔ nɔ ni aŋma yɛ he akɛ: “Mijie hemɔkɛyeli kpo, ni no hewɔ miwie lɛ” hewɔ lɛ; wɔ hu wɔjieɔ hemɔkɛyeli kpo, ni no hewɔ lɛ, wɔwieɔ, 14  ejaakɛ wɔle akɛ mɔ ni tee Yesu shi lɛ baatee wɔ hu shi afata Yesu he ni ekɛ wɔ kɛ nyɛ fɛɛ baayahã lɛ. 15  Ejaakɛ nibii nɛɛ fɛɛ lɛ, nyɛhewɔ amɛyaa nɔ, koni duromɔ lɛ aya nɔ afa kɛteke nɔ babaoo fe tsutsu lɛ, ejaakɛ mɛi babaoo miiŋɔ shidaa amɛmiihã kɛmiiwo Nyɔŋmɔ hiɛ nyam. 16  No hewɔ lɛ, wɔŋmɛɛɛ nibii ahe, shi moŋ kɛ́ wɔkponɔgbɛ gbɔmɔ lɛ miifite po lɛ, ekã shi faŋŋ akɛ, wɔmligbɛ gbɔmɔ lɛ miitsɔ ehee gbi fɛɛ gbi. 17  Eyɛ mli akɛ amanehulu* lɛ ji be kukuoo ko nɔ, ni etsiii moŋ, shi nakai amanehulu lɛ hãa wɔnáa anunyam ni nɔ bɛ kwraa* ní hiɔ shi kɛyaa naanɔ; 18  ni nakai be lɛ mli nɔŋŋ lɛ, wɔkɛ wɔhiŋmɛii emaaa nibii ni anaa lɛ anɔ, shi moŋ nibii ni anaaa lɛ anɔ. Ejaakɛ nibii ni anaa lɛ hiɔ shi be kukuoo ko, shi nibii ni anaaa lɛ hiɔ shi kɛyaa naanɔ.

Shishigbɛ Niŋmaa

Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “yɛ kpuji ní akɛ sũ fee.”
Aloo eeenyɛ efee akɛ, “shi wɔnijiaŋ ejeee wui.”
Aloo “jaramɔ shihilɛ.”
Sht. ŋm., “ni tsii waa.”