Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 2:1-17

YITSEI LƐ AMLI SAJI

  • Paulo yiŋtoo ji ni ehã amɛná miishɛɛ (1-4)

  • Akɛfa eshafeelɔ ko, ni ahe lɛ ekoŋŋ (5-11)

  • Paulo yɛ Troia kɛ Makedonia (12, 13)

  • Sɔɔmɔ lɛ, kunimyeli akoŋshimɔ ko (14-17)

    • Wɔkɛ Nyɔŋmɔ wiemɔ lɛ yeee jara (17)

2  Ejaakɛ mikpɛ miyiŋ akɛ mibaŋ nyɛŋɔɔ ekoŋŋ yɛ awerɛhoyeli mli.  Ejaakɛ kɛ́ mihã nyɛwerɛ ho nyɛhe lɛ, namɔ baahã mimii ashɛ mihe akɛ ja mɔ ni mihã ewerɛ ho ehe lɛ?  Miŋma nɔ ni miŋma lɛ koni kɛ́ miba lɛ, mɛi ni kulɛ esa akɛ maná miishɛɛ yɛ amɛhewɔ lɛ moŋ akahã miwerɛ ho mihe, ejaakɛ miyɛ nɔmimaa akɛ nɔ ni hãa mimii shɛɔ mihe lɛ nɔŋŋ ni hãa nyɛ fɛɛ nyɛmii shɛɔ nyɛhe.  Ejaakɛ mijɛ amanehulu kɛ hejaramɔ babaoo ni yɔɔ mitsui mli lɛ mli mikɛ yaafonui babaoo ŋma nyɛ, jeee ní mikɛhã nyɛwerɛ aho nyɛhe, shi moŋ koni nyɛle bɔ ni suɔmɔ ni miyɔɔ kɛhã nyɛ lɛ mli kwɔ hã.  Agbɛnɛ, kɛ́ mɔ ko ehã aaye awerɛho lɛ, jeee mi ehã miwerɛ eho mihe lɛ, shi moŋ yɛ gbɛ ko nɔ lɛ nyɛ fɛɛ—misumɔɔɔ ni miwieɔ sane nɛɛ he veveeve.  Nakai mɔ lɛ, ehiɛ ni mɛi pii ekã nɛɛ fa hã lɛ;  agbɛnɛ, esa akɛ nyɛjɛ mlihilɛ mli nyɛkɛfa lɛ ni nyɛshɛje emii moŋ, koni awerɛhoyeli tuutu akaye enɔ kwraa.*  No hewɔ lɛ, miiwie miitsɔɔ nyɛ koni nyɛma suɔmɔ ni nyɛyɔɔ kɛhã lɛ lɛ nɔ mi nyɛhã lɛ.  Ejaakɛ enɛ hewɔ hu ni miŋma nyɛ lɛ: koni mikɛna kɛji nyɛbaatsɔɔ akɛ nyɛboɔ toi yɛ nɔ fɛɛ nɔ mli lo. 10  Kɛ́ nyɛkɛ nɔ ko fa mɔ ko lɛ, mi hu mikɛfa lɛ. Anɔkwa, nɔ fɛɛ nɔ ni mikɛfa lɛ (kɛ́ mikɛ nɔ ko efa po lɛ) nyɛhewɔ mikɛfa yɛ Kristo hiɛ, 11  koni Satan nine akashɛ wɔnɔ,* ejaakɛ wɔle eŋaatsɔi lɛ.* 12  Agbɛnɛ, be ni mishɛ Troia koni majaje Kristo lɛ he sane kpakpa lɛ, ní agbele shinaa ko naa ahã mi yɛ Nuŋtsɔ lɛ mli lɛ, 13  mimumɔ he ejɔɔɔ lɛ ejaakɛ minaaa minyɛmi Tito. No hewɔ lɛ, mikɛ amɛ ye shɛɛ ni mishi kɛtee Makedonia. 14  Shi shidaa ahã Nyɔŋmɔ, mɔ ni nyiɛɔ wɔhiɛ be fɛɛ be yɛ kunimyeli akoŋshimɔ mli be ni wɔkɛ Kristo lɛ efee ekome lɛ, kɛ agbɛnɛ hu mɔ ni tsɔɔ wɔnɔ ehãa ehe nilee lɛ he ŋma lɛ jeɔ kpo* yɛ he fɛɛ he lɛ! 15  Ejaakɛ yɛ Nyɔŋmɔ hiɛ lɛ, wɔji Kristo he ŋma krɔŋŋ yɛ mɛi ni aahere amɛyiwala lɛ ateŋ kɛ agbɛnɛ hu yɛ mɛi ni hiɛ miikpãtã lɛ ateŋ; 16  yɛ mɛi ni hiɛ miikpãtã lɛ agbɛfaŋ lɛ, wɔji gbele he fũ* ni jeɔ kɛyaa gbele mli, shi yɛ mɛi ni aahere amɛyiwala lɛ agbɛfaŋ lɛ, wɔji wala he ŋma ni jeɔ kɛyaa wala mli. Ni namɔ sa jogbaŋŋ kɛhã nibii nɛɛ? 17  Wɔ ni, ejaakɛ wɔkɛ Nyɔŋmɔ wiemɔ lɛ yeee jara* tamɔ bɔ ni mɛi pii feɔ lɛ, shi moŋ wɔkɛ Kristo efee ekome ni wɔjɛɔ tsui krɔŋŋ mli wɔwieɔ, hɛɛ, akɛ mɛi ni Nyɔŋmɔ etsu amɛ, ni wɔmiifee enɛ yɛ Nyɔŋmɔ hiɛ.

Shishigbɛ Niŋmaa

Aloo “akasu etsui.”
Aloo “akalaka wɔ.”
Aloo “eyiŋtoi lɛ; ekpatsɔi lɛ.”
Aloo “ehãa anuɔ ehe nilee lɛ he ŋma lɛ.”
Aloo “ŋma.”
Aloo “wɔkɛ Nyɔŋmɔ wiemɔ lɛ yeee guɔ; wɔhɔ̃ɔɔ Nyɔŋmɔ wiemɔ lɛ ní wɔná he sɛɛ.”