Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 12:1-21

YITSEI LƐ AMLI SAJI

  • Paulo ninai (1-7a)

  • “Ŋmei ko yɛ” Paulo “heloo lɛ mli” (7b-10)

  • Bɔfoi ni he tse fe fɛɛ lɛ efeee Paulo (11-13)

  • Paulo susu Korintobii lɛ ahe (14-21)

12  Esa akɛ mashwã. Sɛɛnamɔ ko bɛ he, shi kɛ̃lɛ mibawie Nuŋtsɔ lɛ ninai kɛ kpojiemɔi ahe.  Mile gbɔmɔ ko ni kɛ Kristo efee ekome, ní afii nyɔŋma kɛ ejwɛ nɛ lɛ—kɛ́ yɛ gbɔmɔtso mli jio, jeee gbɔmɔtso mli jio, mileee; Nyɔŋmɔ le—ashá lɛ kɛtee ŋwɛi ni ji etɛ lɛ.  Hɛɛ, mile gbɔmɔ nɛɛ—kɛ́ yɛ gbɔmɔtso mli jio, jeee gbɔmɔtso mli jio, mileee; Nyɔŋmɔ le—  ashá lɛ kɛtee paradeiso ni eyanu wiemɔi ni ehiii wiemɔ ni mla hu eŋmɛɛɛ gbɛ akɛ gbɔmɔ tsĩɔ tã.  Mashwã yɛ gbɔmɔ ni tamɔ nɛkɛ he, shi mishwãŋ mihãŋ mi diɛŋtsɛ mihe, akɛ ja yɛ migbedemɔi lɛ ahe.  Ejaakɛ kɛ́ miisumɔ ni mashwã po lɛ, no efeŋ mi mɔ ni bɛ jwɛŋmɔ, ejaakɛ mawie anɔkwale. Shi mikpoo akɛ mafee nakai, bɔ ni afee ni mɔ ko mɔ ko akabu mi fe nɔ ni enaa yɛ mihe aloo nɔ ni enuɔ yɛ minaa,  yɛ nɛkɛ kpojiemɔi ni nɔ bɛ ní minine shɛ nɔ nɛɛ kɛkɛ ahewɔ. Bɔ ni afee ni mikawó mihe nɔ fe nine lɛ, ahã mi ŋmei ko yɛ heloo lɛ mli, Satan bɔfo ko, koni eya nɔ egbala mi mai,* koni mikawó mihe nɔ fe nine.  Mikpa Nuŋtsɔ lɛ fai shii etɛ yɛ enɛ he, koni ŋmei lɛ aje minɔ.  Shi ekɛɛ mi akɛ: “Miduromɔ lɛ fa hã bo, ejaakɛ mihewalɛ lɛ yeɔ emuu yɛ gbedemɔ mli.” Belɛ, mikɛ miishɛɛ baashwã yɛ migbedemɔi lɛ ahe, bɔ ni afee ni Kristo lɛ hewalɛ lɛ aya nɔ aha minɔ tamɔ buu ko. 10  No hewɔ lɛ, mináa miishɛɛ yɛ gbedemɔi amli, yɛ jɛmɔi amli, yɛ hiamɔ bei amli, yɛ yiwai kɛ shihilɛi ni mli wawai amli, yɛ Kristo hewɔ. Ejaakɛ kɛ́ migbede lɛ, no moŋ mináa hewalɛ. 11  Mitsɔ mɔ ni bɛ jwɛŋmɔ. Nyɛ nyɛnyɛ minɔ ni mifee nakai, ejaakɛ kulɛ esa akɛ nyɛjie miyi. Ejaakɛ kɛ́ mijeee nɔ ko po lɛ, nɔ kome folo po bɛ ni nyɛbɔfoi ni he tse fe fɛɛ lɛ kɛfe mi. 12  Anɔkwa, ajie bɔfo he okadii lɛ akpo yɛ nyɛteŋ kɛ shifimɔ kpele, kɛ agbɛnɛ hu kɛtsɔ okadii kɛ naakpɛɛ nii* kɛ hewalɛ nitsumɔi anɔ. 13  Ejaakɛ mɛni mli eba lɛ akɛ asafoi krokomɛi lɛ ahiɛ ba nyam yɛ fe nyɛ, akɛ ja nɔ ni mi diɛŋtsɛ lɛ mitsɔɔɔ jatsu ko mihãaa nyɛ lɛ mli? Nyɛjɛa mlihilɛ mli nyɛkɛ nɛkɛ efɔŋ nɛɛ afaa mi. 14  Naa! Enɛ ji shii etɛ nɔ ni misaa mihe akɛ miiba nyɛŋɔɔ, ni mibatsɔŋ jatsu mihãŋ nyɛ. Ejaakɛ jeee nyɛnii mitaoɔ, shi moŋ nyɛ diɛŋtsɛ; ejaakɛ akpaaa gbɛ akɛ bii baatĩa nii anaa amɛto amɛfɔlɔi, shi moŋ fɔlɔi ji mɛi ni akpaa gbɛ akɛ amɛbaatĩa nii anaa amɛto amɛbii. 15  Ejaakɛ migbɛfaŋ lɛ, miyɛ he miishɛɛ babaoo akɛ maŋɔ nii ni miyɔɔ lɛ fɛɛ mahã, ni asaŋ akɛ mi atsu nii kɛwula shi yɛ nyɛhewɔ.* Kɛ́ misumɔɔ nyɛ babaoo nɛkɛ lɛ, ani esa akɛ nyɛjie suɔmɔ ni shɛɛɛ nakai kpo nyɛtsɔɔ mi? 16  Shi bɔ fɛɛ bɔ ni sane lɛ ji lɛ, mitsɔɔɔ jatsu mihãaa nyɛ. Fɛɛ sɛɛ lɛ, nyɛkɛɔ akɛ “mihiɛ tɛ̃” ni mitsɔ “ŋaa gbɛ nɔ” midũ nyɛ. 17  Mitsɔɔɔ mɛi ni mitsu amɛ nyɛŋɔɔ lɛ ateŋ mɔ ko nɔ miyeee nyɛ amim, aloo mifee nakai? 18  Mikpa Tito fai ni mitsu lɛ kɛ nyɛmi nuu lɛ. Tito yeee nyɛ amim ko kwraa, aloo efee nakai? Ani jeee mumɔ kome too lɛ nɔŋŋ mli wɔnyiɛ yɛ? Ani jeee najiamaamɔhei kome too lɛ nɔŋŋ amli wɔnyiɛ yɛ? 19  Ani nyɛmiisusu akɛ wɔnaa sɔŋŋ wɔjieɔ wɔtsɔɔ nyɛ nɛɛ? Wɔmiiwie yɛ Nyɔŋmɔ hiɛ yɛ Kristo mli. Shi mɛi ni asumɔɔ, nɔ ni wɔfeɔ lɛ fɛɛ lɛ wɔmiifee ni wɔkɛtswa nyɛ wɔma shi. 20  Ejaakɛ miishe gbeyei akɛ yɛ gbɛ ko nɔ lɛ kɛ́ miba lɛ ekolɛ mibanaŋ nyɛ bɔ ni mitaoɔ, ni mibafeŋ bɔ ni nyɛ hu nyɛtaoɔ, moŋ lɛ ekolɛ mabana béi, awuŋayeli, girimɔi, naataamɔ, mɔfitemɔ, ablɛbiwiemɔ,* henɔwomɔ, kɛ basabasafeemɔ. 21  Kɛ́ miba ekoŋŋ lɛ, ekolɛ mi-Nyɔŋmɔ lɛ baahã mihiɛ agbo yɛ nyɛhiɛ, ni miwerɛ baaho mihe yɛ mɛi babaoo ni fee esha be ko ni eho, shi amɛtsakeko amɛtsui yɛ amɛhe ni amɛkɛwo muji nii kɛ bɔlɛnamɔ jeŋba sha* kɛ efɔŋ ni akɛ kuɛŋtimɔ feɔ* lɛ mli lɛ hewɔ.

Shishigbɛ Niŋmaa

Aloo “eyi mi.”
Aloo “gbalɛ okadii.”
Aloo “nyɛsusumai ahewɔ.”
Aloo “mɛi-ahe-wiemɔ.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “jeŋba gbonyo ni efeee mɔ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.