Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 11:1-33

11  Miná ni kulɛ nyɛná mikwashiafeemɔ fioo nɛɛ he tsui. Shi yɛ anɔkwale mli lɛ, nyɛmiiná mihe tsui!  Ejaakɛ mikɛ awuŋayeli ni jɛ Nyɔŋmɔ ŋɔɔ* lɛ miiye nyɛhe awuŋa, ejaakɛ mi diɛŋtsɛ mitsɛ nyɛhe baa mihã wu kome, ni ji Kristo lɛ, koni maŋɔ nyɛ akɛ oblayoo fro ni he tse* mahã lɛ.  Shi miishe gbeyei akɛ, yɛ gbɛ ko nɔ lɛ, bɔ ni onufu lɛ kɛ eŋaatsɔɔ lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔ kɛje tsui krɔŋŋ kɛ hetsemɔ* ni sa Kristo lɛ he.  Ejaakɛ, taakɛ eji lɛ, kɛ́ mɔ ko ba ni ebashiɛ Yesu ko ní esoro lɛ yɛ mɔ ni wɔshiɛ lɛ lɛ he, aloo nyɛná mumɔ ko ní esoro no yɛ nɔ ni nyɛnine shɛ nɔ lɛ he, aloo sane kpakpa ko ní esoro no yɛ nɔ ni nyɛkpɛlɛ nɔ lɛ he lɛ, nyɛnáa ehe tsui amrɔ nɔŋŋ.  Ejaakɛ misusuɔ akɛ nɔ kome folo po bɛ ni nyɛbɔfoi ni he tse fe fɛɛ lɛ kɛfe mi.  Shi kɛ́ mihe esako yɛ wiemɔ mli po lɛ, ekã shi faŋŋ akɛ, miyɛ nilee; anɔkwa wɔhã no fee faŋŋ wɔhã nyɛ yɛ gbɛ fɛɛ gbɛ nɔ kɛ agbɛnɛ hu, yɛ nibii fɛɛ mli.  Aloo, ani mifee esha akɛni mikɛ miishɛɛ jaje Nyɔŋmɔ sane kpakpa lɛ mitsɔɔ nyɛ ní miheee nɔ ko ní miba mihe shi bɔ ni afee ni awó nyɛnɔ lɛ hewɔ?  Mihã nibii ŋmɛɛ asafoi krokomɛi* kɛtsɔ amɛdɛŋ nibii* ni mikpɛlɛ nɔ bɔ ni afee ni manyɛ masɔmɔ nyɛ lɛ nɔ.  Kɛ̃lɛ, be ni mikɛ nyɛ yɔɔ ni ehia mi lɛ, mitsɔɔɔ jatsu mihãaa mɔ ko; ejaakɛ nyɛmimɛi ni jɛ Makedonia ba lɛ hã mi mihiamɔ nii kɛteke nɔ. Hɛɛ, yɛ gbɛ fɛɛ gbɛ nɔ lɛ, mikwɛ koni mikatsɔ jatsu mihã nyɛ, ni maya nɔ mafee nakai. 10  Gbii abɔ ni Kristo anɔkwale lɛ yɔɔ mimli nɛɛ, mikpaŋ mitsitsi ni mishiɔ nɛɛ yɛ Akaia kpokpai lɛ anɔ. 11  Mɛni hewɔ? Akɛni misumɔɔɔ nyɛ hewɔŋ? Nyɔŋmɔ le akɛ misumɔɔ nyɛ. 12  Shi nɔ ni mifeɔ lɛ, maya nɔ mafee, bɔ ni afee ni mahã mɛi ni kɛ nii* ni amɛyɔɔ lɛ shwãa, ni amɛmiitao nɔ ko nɔ amɛdamɔ* kɛtsɔɔ akɛ amɛkɛ wɔ yeɔ egbɔ lɛ anaajiemɔ lɛ afee yaka. 13  Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ní kwaa amɛfeɔ amɛhe tamɔ Kristo bɔfoi. 14  Ni enɛ bɛ naakpɛɛ, ejaakɛ Satan diɛŋtsɛ po kwaa feɔ ehe tamɔ la bɔfo. 15  No hewɔ lɛ, kɛ́ esɔɔlɔi lɛ hu kwaa feɔ amɛhe tamɔ jalɛ sɔɔlɔi lɛ, no jeee sane srɔto ko. Shi amɛnaagbee baafee tamɔ bɔ ni amɛnitsumɔi lɛ yɔɔ lɛ. 16  Miikɛɛ ekoŋŋ akɛ: Mɔ ko akasusu akɛ mibɛ jwɛŋmɔ. Shi kɛ́ nyɛsusuɔ nakai po lɛ, belɛ nyɛŋɔa mi akɛ mɔ ni bɛ jwɛŋmɔ, koni mi hu, mashi mitsitsi fioo. 17  Nɔ ni miwieɔ amrɔ nɛɛ, jeee Nuŋtsɔ lɛ nɔkwɛmɔnɔ lɛ sɛɛ minyiɛɔ lɛ, shi moŋ miiwie tamɔ bɔ ni mɔ ko ni bɛ jwɛŋmɔ baawie lɛ, tamɔ mɛi ni yɔɔ hekɛnɔfɔɔ yɛ amɛmli fe nine ní amɛshwãa lɛ wieɔ lɛ. 18  Akɛni mɛi babaoo shwãa yɛ heloo lɛ naa* hewɔ lɛ, mi hu mashwã eko. 19  Akɛni nyɛyɛ “jwɛŋmɔ” waa hewɔ lɛ, nyɛyɛ mɛi ni bɛ jwɛŋmɔ lɛ ahe tsui kɛ miishɛɛ. 20  Anɔkwa, nyɛyɛ mɔ fɛɛ mɔ ni yeɔ nyɛ nyɔŋ, mɔ fɛɛ mɔ ni yeɔ nyɛhe nii, mɔ fɛɛ mɔ ni shɔ̃ɔ nibii ni nyɛyɔɔ, mɔ fɛɛ mɔ ni wóɔ ehe nɔ yɛ nyɛnɔ, kɛ mɔ fɛɛ mɔ ni gbalaa nyɛhiɛ mai lɛ, he tsui. 21  Miiwie enɛ kɛmiishwie wɔhiɛiaŋ shi, akɛni etamɔ nɔ ni wɔfee wɔnii yɛ gbedemɔ mli lɛ hewɔ. Shi kɛ́ mɛi krokomɛi kɛ ekãa feɔ amɛnii lɛ—miiwie tamɔ mɔ ni bɛ jwɛŋmɔ—mi hu mikɛ ekãa feɔ minii. 22  Ani Hebribii ji amɛ? Mi hu eko ji mi. Ani Israelbii ji amɛ? Mi hu eko ji mi. Ani Abraham seshi* ji amɛ? Mi hu eko ji mi. 23  Ani Kristo sɔɔlɔi ji amɛ? Miiwie tamɔ sɛkɛyelɔ, mi hu eko ji mi yɛ gbɛ ni nɔ bɛ nɔ: Mitsu nitsumɔi babaoo fe amɛ, awo mi tsuŋ shii abɔ fe amɛ, ayi mi pii bɔ ni minyɛɛɛ makane, ni mikɛ gbele kpe hiɛ kɛ hiɛ shii abɔ. 24  Yudafoi yi mi kpãi shii enumɔ, ni eko fɛɛ eko lɛ, shwɛ ekome ni afee kpãi nyɔŋmai ejwɛ, 25  akɛ tsei yi mi shii etɛ, atswia mi tɛi shi kome, mikɛ meele yasha shi shii etɛ, miye jenamɔ kɛ jetsɛremɔ yɛ ŋshɔ teŋ; 26  mifã gbɛ babaoo, ni mikɛ osharai kpe yɛ fai ahiɛ, yɛ ojoyelɔi adɛŋ, yɛ mi diɛŋtsɛ mimaŋbii lɛ adɛŋ, yɛ jeŋmajiaŋbii lɛ adɛŋ, yɛ maŋ lɛ mli, yɛ ŋa lɛ nɔ,* yɛ ŋshɔ hiɛ, yɛ amale nyɛmimɛi ateŋ, 27  mitsu nii waa ni migbo deŋme, miye jenamɔi shii abɔ ní miwɔɔɔ, hɔmɔ kɛ kumai ye mi, bei babaoo lɛ mináaa niyenii, fɛ̃i ye mi ni mináaa atade.* 28  Yɛ kponɔgbɛ nibii nɛɛ asɛɛ lɛ, nɔ kroko hu yɛ ni nyɛɔ minɔ gbi fɛɛ gbi: no ji yeyeeye ni mifeɔ yɛ asafoi lɛ fɛɛ ahe lɛ. 29  Namɔ feɔ gbedee ni mi lɛ mifeee gbedee? Namɔ nane tɔ̃tɔɔ, ni mimli wooo la? 30  Kɛ́ esa akɛ mashi mitsitsi lɛ, mikɛ nibii ni hãa anaa migbedemɔ lɛ baashi mitsitsi. 31  Nuŋtsɔ Yesu Tsɛ kɛ e-Nyɔŋmɔ lɛ, mɔ ni esa akɛ ajie eyi kɛya naanɔ lɛ, le akɛ jeee malemɔ mimaleɔ. 32  Be ni miyɔɔ Damasko lɛ, no mli lɛ, amralo ni yɔɔ maŋtsɛ Areta shishi lɛ miibu Damaskobii amaŋ lɛ he koni emɔ mi, 33  shi akɛ mi wo kɛntɛŋ mli ni ashiu mi kɛtsɔ samfɛlɛ ko ni yɔɔ maŋ lɛ gbogbo lɛ he lɛ mli, ni mije edɛŋ.

Shishigbɛ Niŋmaa

Sht. ŋm., “Nyɔŋmɔ hiɛdɔɔ.”
Aloo “ni yɔɔ krɔŋŋ.”
Aloo “krɔŋŋfeemɔ.”
Sht. ŋm., “mitswa asafoi krokomɛi ojo.”
Aloo “yelikɛbuamɔ.”
Aloo “hegbɛ.”
Aloo “amɛmiitao nɔ ko amɛkɛjie amɛnaa.”
Ni tsɔɔ akɛ, yɛ gbɔmɛi anibii ahe.
Sht. ŋm., “dumɔwu.”
Kwɛmɔ Mat 3:1 sh. niŋ.
Aloo “ni minyiɛ yayai.”