Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

2 Korintobii 1:1-24

1  Paulo, Kristo Yesu bɔfo yɛ Nyɔŋmɔ suɔmɔ naa, kɛ wɔnyɛmi Timoteo, kɛyahã Nyɔŋmɔ asafo ni yɔɔ Korinto lɛ, kɛ mɛi krɔŋkrɔŋi fɛɛ ni yɔɔ Akaia fɛɛ lɛ:  Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Ajie wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ, musuŋtsɔlɛi a-Tsɛ lɛ kɛ miishɛjemɔ fɛɛ Nyɔŋmɔ lɛ yi,  mɔ ni shɛjeɔ wɔmii* yɛ wɔjaramɔ shihilɛi* fɛɛ mli, koni wɔ hu wɔnyɛ wɔkɛ miishɛjemɔ ni wɔnáa kɛjɛɔ Nyɔŋmɔ dɛŋ lɛ ashɛje mɛi krokomɛi ni kɛ jaramɔ shihilɛ fɛɛ jaramɔ shihilɛ kpeɔ* lɛ amii.  Ejaakɛ bɔ ni amanehului ni wɔnaa yɛ Kristo hewɔ lɛ faa kɛtekeɔ nɔ yɛ wɔmli lɛ, nakai nɔŋŋ miishɛjemɔ ni wɔnáa kɛtsɔɔ Kristo lɛ nɔ lɛ hu faa kɛtekeɔ nɔ.  Agbɛnɛ, kɛ́ wɔkɛ jaramɔ shihilɛi miikpe* lɛ, nyɛmiishɛjemɔ kɛ nyɛyiwalaheremɔ hewɔ ni; ni kɛ́ aashɛje wɔmii lɛ, no shɛjeɔ nyɛmii, ni miishɛjemɔ nɛɛ tsuɔ nii kɛyeɔ ebuaa nyɛ koni nyɛfi shi yɛ amanehului ni nyɛkɛkpeɔ ni wɔ hu wɔkɛ nakai amanehului nɔŋŋ kpeɔ lɛ amli.  Ni hiɛnɔkamɔ ni wɔyɔɔ yɛ nyɛgbɛfaŋ lɛ gbugbaaa, ejaakɛ wɔle akɛ, bɔ ni nyɛnaa amanehului lɛ eko lɛ, nakai nɔŋŋ nyɛbaaná miishɛjemɔ lɛ hu eko.  Ejaakɛ, nyɛmimɛi, wɔsumɔɔɔ ni wɔkɛ amanehulu ni wɔkɛkpe yɛ Asia kpokpaa lɛ nɔ lɛ atee nyɛ. Wɔyaje nɔnyɛɛ kpele shishi fe bɔ ni wɔbaanyɛ wɔkɛ wɔ diɛŋtsɛ wɔhewalɛ adamɔ naa, ni wɔhiɛ kãaa wɔwala nɔ tete.  Anɔkwa, wɔnu he akɛ gbele fɔbuu kã wɔnɔ. Enɛ ba lɛ nakai koni wɔkaŋɔ wɔhiɛ wɔfɔ̃ wɔ diɛŋtsɛ wɔhe nɔ, shi moŋ wɔŋɔfɔ̃ Nyɔŋmɔ ni teɔ gbohii ashi lɛ nɔ. 10  Ejie wɔ kɛjɛ nɔ ko wulu tamɔ gbele mli, ni ebaajie wɔ, ni wɔyɛ hiɛnɔkamɔ yɛ emli akɛ ebaaya nɔ hu ejie wɔ. 11  Nyɛ hu nyɛbaanyɛ nyɛtsɔ fai ni nyɛkɛ hiɛdɔɔ baakpa yɛ wɔhewɔ lɛ nɔ nyɛye nyɛbua. Kɛ́ nyɛfee nakai lɛ, no baahã mɛi babaoo ada shi ahã wɔ, ejaakɛ wɔná duromɔ yɛ mɛi babaoo asɔlemɔi* ní ahã hetoo lɛ hewɔ. 12  Ejaakɛ nɔ ni wɔshwãa yɛ mli lɛ nɛ, wɔhenilee yeɔ he odase akɛ, wɔkɛ krɔŋkrɔŋfeemɔ kɛ tsui krɔŋŋ ni jɛ Nyɔŋmɔ ŋɔɔ lɛ baa wɔjeŋ yɛ je lɛ mli, titri lɛ yɛ nyɛteŋ, jeee kɛ heloo gbɛfaŋ hiɛshikamɔ, shi moŋ kɛ Nyɔŋmɔ duromɔ. 13  Ejaakɛ wɔŋmaaa nɔ ko nɔ ko wɔhãaa nyɛ akɛ ja nibii ni nyɛbaanyɛ nyɛkane* ní nyɛnu shishi, ni miyɛ hiɛnɔkamɔ akɛ nyɛbaaya nɔ nyɛnu nibii nɛɛ ashishi kɛmɔ shi,* 14  tamɔ bɔ ni nyɛ hu nyɛnuɔ shishi yɛ gbɛ ko nɔ, akɛ nyɛshwãanɔ ji wɔ, tamɔ bɔ ni nyɛ hu nyɛbaafee wɔshwãanɔ yɛ wɔ-Nuŋtsɔ Yesu gbi lɛ nɔ lɛ. 15  No hewɔ lɛ, akɛni miyɛ nɔmimaa yɛ enɛ he hewɔ lɛ, mito miyiŋ akɛ maba nyɛŋɔɔ klɛŋklɛŋ, koni nyɛná hegbɛ ni ji shii enyɔ nɔ kɛná miishɛɛ;* 16  ejaakɛ mito miyiŋ akɛ mabatsɔ nyɛŋɔɔ kɛya Makedonia, ni asaŋ maku misɛɛ kɛjɛ Makedonia maba nyɛŋɔɔ ekoŋŋ, koni nyɛyajie mi gbɛ kɛya Yudea. 17  Anɔkwa, be ni mito miyiŋ nɛkɛ lɛ, mibuuu sane lɛ akɛ nɔ ko flɛflɛ, aloo jeee nakai? Aloo ani heloonaa mitoɔ miyiŋ yɛ nibii ahe yɛ, ni mikɛɔ akɛ “Hɛɛ, hɛɛ,” kɛkɛ lɛ “Dabi, dabi”? 18  Shi nyɛbaanyɛ nyɛkɛ nyɛhiɛ afɔ̃ Nyɔŋmɔ nɔ akɛ, nɔ ni wɔkɛɔ nyɛ lɛ jeee “hɛɛ” ni kɛ̃lɛ “dabi.” 19  Ejaakɛ Nyɔŋmɔ Bi, Yesu Kristo, mɔ ni atsɔ wɔ, ni ji mi kɛ Silvano* kɛ Timoteo nɔ ashiɛ ehe sane yɛ nyɛteŋ lɛ tsɔɔɔ “hɛɛ” ni kɛ̃lɛ “dabi,” shi moŋ “hɛɛ” lɛ etsɔ “hɛɛ” yɛ egbɛfaŋ. 20  Ekɔɔɔ he eko bɔ ni Nyɔŋmɔ shiwoi lɛ fa hã lɛ, kɛtsɔ enɔ lɛ, amɛtsɔ “hɛɛ.” No hewɔ lɛ, kɛtsɔ enɔ hu lɛ, akɛɔ Nyɔŋmɔ akɛ “Amen,” koni atsɔ wɔnɔ awo Nyɔŋmɔ hiɛ nyam. 21  Shi Nyɔŋmɔ ji mɔ ni maa nɔ aduatsɔ akɛ nyɛ kɛ wɔ fɛɛ ji Kristo nii, ni lɛ nɔŋŋ ji mɔ ni fɔ wɔ mu. 22  Ekɛ enaasɔomɔ nɔ lɛ hu esɔo wɔnaa ni ehã wɔ nɔ ni baaba lɛ he shiŋmɛɛnɔ lɛ,* no ji mumɔ lɛ, yɛ wɔtsuii amli. 23  Agbɛnɛ, miitsɛ Nyɔŋmɔ ni ebaye odase eshi mi,* akɛ mɔbɔ ni minaa nyɛ lɛ hewɔ ni mibako Korinto lolo lɛ. 24  Jeee akɛ wɔji nyɛhemɔkɛyeli lɛ nɔ nuŋtsɔmɛi, shi moŋ, wɔji nyɛnanemɛi nitsulɔi yɛ nyɛmiishɛɛnamɔ hewɔ, ejaakɛ nyɛhemɔkɛyeli lɛ hewɔ nyɛdamɔ shi lɛ.

Shishigbɛ Niŋmaa

Aloo “woɔ wɔ hewalɛ.”
Aloo “wɔmanehului.”
Aloo “ni naa amanehulu fɛɛ amanehulu.”
Aloo “wɔmiina amanehulu.”
Aloo “yɛ hiɛi babaoo asɔlemɔi.”
Aloo eeenyɛ efee akɛ, “nibii ni nyɛle jogbaŋŋ momo.”
Sht. ŋm., “kɛyashi naagbee.”
Aloo eeenyɛ efee akɛ, “nyɛná he sɛɛ shii enyɔ.”
Atsɛɔ lɛ Sila hu.
Aloo “yibaafoonɔ lɛ (shika ni akɛfɔ̃ɔ shi kɛtsɔɔ akɛ abaahé nɔ ko lɛɛlɛŋ); nɔ ni baaba lɛ he nɔmimaa (shiwoo) lɛ.”
Aloo “misusuma.”