Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Yohane 5:1-21

5  Mɔ fɛɛ mɔ ni heɔ yeɔ akɛ Yesu ji Kristo lɛ, Nyɔŋmɔ mli ajɛ afɔ lɛ, ni mɔ fɛɛ mɔ ni sumɔɔ Nyɔŋmɔ lɛ, esumɔɔ mɔ ni ajɛ Nyɔŋmɔ mli afɔ lɛ lɛ hu.  Enɛ wɔkɛleɔ akɛ wɔsumɔɔ Nyɔŋmɔ bii lɛ, kɛji wɔsumɔɔ Nyɔŋmɔ ni wɔyeɔ ekitãi lɛ anɔ lɛ.  Ejaakɛ enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ; ni ekitãi lɛ jeee jatsu,*  ejaakɛ mɔ fɛɛ mɔ ni* ajɛ Nyɔŋmɔ mli afɔ lɛ lɛ yeɔ je lɛ nɔ kunim. Ni wɔhemɔkɛyeli lɛ ji nɔ ni wɔkɛyeɔ je lɛ nɔ kunim.  Namɔ baanyɛ aye je lɛ nɔ kunim? Ani jeee mɔ ni ená hemɔkɛyeli akɛ Yesu ji Nyɔŋmɔ Bi lɛ?  Mɔ nɛ ji mɔ ni tsɔ nu kɛ lá nɔ kɛba lɛ, Yesu Kristo, jeee nu lɛ pɛ nɔ etsɔ kɛba, shi moŋ etsɔ nu lɛ kɛ lá lɛ nɔ kɛba. Ni mumɔ lɛ miiye odase, ejaakɛ mumɔ lɛ ji anɔkwale lɛ.  Ejaakɛ odaseyelɔi etɛ yɔɔ:  mumɔ lɛ kɛ nu lɛ kɛ lá lɛ; ni etɛ lɛ fɛɛ kɛ amɛhe kpãa gbee.  Kɛ́ wɔkpɛlɛɔ gbɔmɛi adase nɔ lɛ, Nyɔŋmɔ odase lɛ da fe no. Ejaakɛ odase ni Nyɔŋmɔ yeɔ lɛ nɛ, no ji odase ni eye yɛ e-Bi lɛ he lɛ. 10  Mɔ ni náa hemɔkɛyeli yɛ Nyɔŋmɔ Bi lɛ mli lɛ, eyɛ odase lɛ yɛ lɛ diɛŋtsɛ emli. Mɔ ni náaa hemɔkɛyeli yɛ Nyɔŋmɔ mli lɛ, ehã etsɔ amalelɔ, ejaakɛ enáko hemɔkɛyeli yɛ odase ni Nyɔŋmɔ ye yɛ e-Bi lɛ he lɛ mli. 11  Ni enɛ ji odase lɛ, akɛ Nyɔŋmɔ ehã wɔ naanɔ wala, ni nɛkɛ wala nɛɛ yɛ e-Bi lɛ mli. 12  Mɔ ni yɔɔ Bi lɛ yɛ nɛkɛ wala nɛɛ; mɔ ni bɛ Nyɔŋmɔ Bi lɛ bɛ nɛkɛ wala nɛɛ. 13  Miiŋma nyɛ nibii nɛɛ, koni nyɛ mɛi ni nyɛná hemɔkɛyeli yɛ Nyɔŋmɔ Bi lɛ gbɛ́i lɛ mli lɛ, nyɛná nyɛle akɛ nyɛyɛ naanɔ wala. 14  Ni enɛ ji ekãa ni wɔyɔɔ yɛ ehiɛ lɛ,* akɛ nɔ fɛɛ nɔ ni wɔbiɔ ní kɛ esuɔmɔnaa nii kpãa gbee lɛ, eboɔ wɔ toi. 15  Ni akɛni wɔle akɛ eboɔ nɔ fɛɛ nɔ ni wɔbiɔ lɛ lɛ toi hewɔ lɛ, belɛ wɔle akɛ nibii ni wɔbi lɛ lɛ, wɔnine baashɛ nɔ. 16  Kɛ́ mɔ ko hiŋmɛi gba enyɛmi nɔ akɛ eefee esha ní kɛ mɔ eyaaa gbele mli lɛ, ekpa fai ehã enyɛmi lɛ, ni Nyɔŋmɔ baahã enyɛmi lɛ wala, hɛɛ, ekɛbaahã mɛi ni feɔ esha ni kɛ mɔ eyaaa gbele mli lɛ. Esha ni kɛ mɔ yaa gbele mli yɛ. Esha nɛɛ ji nɔ ni mikɛɛɛ lɛ akɛ ekpa he fai lɛ. 17  Nɔ fɛɛ nɔ ni ejaaa lɛ esha ni, ni kɛ̃lɛ esha ko yɛ ni kɛ mɔ eyaaa gbele mli. 18  Wɔle akɛ mɔ fɛɛ mɔ ni ajɛ Nyɔŋmɔ mli afɔ lɛ lɛ kãaa esha mli, shi moŋ mɔ ni ajɛ Nyɔŋmɔ mli afɔ lɛ lɛ* buɔ ehe, ni mɔ fɔŋ lɛ nyɛŋ ata ehe.* 19  Wɔle akɛ wɔjɛ Nyɔŋmɔ mli, shi jeŋ muu lɛ fɛɛ kã mɔ fɔŋ lɛ hewalɛ mli. 20  Shi wɔle akɛ Nyɔŋmɔ Bi lɛ eba, ni ebahã wɔ sɛɛyoomɔ* koni wɔná anɔkwafo lɛ he nilee. Ni wɔ kɛ anɔkwafo lɛ feɔ ekome kɛtsɔ e-Bi Yesu Kristo nɔ. Mɔ nɛ ji anɔkwa Nyɔŋmɔ lɛ kɛ naanɔ wala lɛ. 21  Bii bibii, nyɛkwɛa nyɛhe nɔ jogbaŋŋ yɛ amagai ahe.

Shishigbɛ Niŋmaa

Aloo “waaa.”
Sht. ŋm., “nɔ fɛɛ nɔ ni.”
Aloo “wiemɔ ni wɔwieɔ kɛ nɔmimaa yɛ ehiɛ lɛ.”
Ni tsɔɔ akɛ, Yesu Kristo, Nyɔŋmɔ Bi lɛ.
Aloo “mɔ fɔŋ lɛ nyɛɛɛ emli amɔ.”
Sht. ŋm., “jwɛŋmɔ.”