Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Yohane 4:1-21

YITSEI LƐ AMLI SAJI

  • Nyɛkaa wiemɔi ni jɛ mumɔŋ lɛ nyɛkwɛa (1-6)

  • Nyɛlea Nyɔŋmɔ ní nyɛsumɔa lɛ (7-21)

    • “Nyɔŋmɔ lɛ, suɔmɔ ji lɛ” (8, 16)

    • Gbeyeishemɔ bɛ suɔmɔ mli (18)

4  Mɛi ni asumɔɔ, nyɛkahea wiemɔ fɛɛ wiemɔ ni jɛ mumɔŋ lɛ* nyɛyea, shi moŋ nyɛkaa wiemɔi fɛɛ ni jɛ mumɔŋ lɛ* nyɛkwɛa akɛ Nyɔŋmɔ ŋɔɔ amɛjɛ lo, ejaakɛ amale gbalɔi babaoo eba je lɛ mli.  Nɛkɛ ji bɔ ni nyɛaafee nyɛle akɛ wiemɔ ni jɛ mumɔŋ lɛ jɛ Nyɔŋmɔ ŋɔɔ: Wiemɔ fɛɛ wiemɔ ni jɛ mumɔŋ ní jajeɔ akɛ Yesu Kristo ba yɛ heloo mli lɛ jɛ Nyɔŋmɔ ŋɔɔ.  Shi wiemɔ fɛɛ wiemɔ ni jɛ mumɔŋ ní ejajeee akɛ Yesu ba yɛ heloo mli lɛ, jeee Nyɔŋmɔ ŋɔɔ ejɛ. Kɛfata he lɛ, enɛ ji antikristo lɛ wiemɔ ní jɛ mumɔŋ ní nyɛnu akɛ eeba lɛ, ni amrɔ nɛɛ eyɛ je lɛ mli momo.  Bii bibii, nyɛ lɛ nyɛjɛ Nyɔŋmɔ mli, ni nyɛye amɛnɔ kunim, ejaakɛ mɔ ni kɛ nyɛ efee ekome lɛ da fe mɔ ni kɛ je lɛ efee ekome lɛ.  Amɛ lɛ, je lɛ mli amɛjɛ; no hewɔ ni amɛwieɔ wiemɔi ni jɛ je lɛ mli lɛ, ni je lɛ boɔ amɛ toi.  Wɔ lɛ, Nyɔŋmɔ mli wɔjɛ. Mɔ fɛɛ mɔ ni le Nyɔŋmɔ lɛ, eboɔ wɔ toi; mɔ fɛɛ mɔ ni jɛɛɛ Nyɔŋmɔ mli lɛ, ebooo wɔ toi. Enɛ wɔkɛyoɔ anɔkwale wiemɔ ni jɛ mumɔŋ lɛ, kɛ amale wiemɔ ni jɛ mumɔŋ lɛ.  Mɛi ni asumɔɔ, nyɛhãa wɔyaa nɔ wɔsumɔsumɔa wɔhe, ejaakɛ suɔmɔ lɛ, Nyɔŋmɔ mli ejɛ, ni mɔ fɛɛ mɔ ni sumɔɔ mɔ lɛ, Nyɔŋmɔ mli ajɛ afɔ lɛ, ni ele Nyɔŋmɔ.  Mɔ fɛɛ mɔ ni sumɔɔɔ mɔ lɛ, eleko Nyɔŋmɔ, ejaakɛ Nyɔŋmɔ lɛ, suɔmɔ ji lɛ.  Enɛ nɔ atsɔ ajie Nyɔŋmɔ suɔmɔ lɛ kpo yɛ wɔgbɛfaŋ, no ji akɛ Nyɔŋmɔ tsu e-Bi koome lɛ kɛba je lɛ mli koni wɔtsɔ enɔ wɔná wala. 10  Nɛkɛ ji bɔ ni suɔmɔ lɛ yɔɔ, jeee akɛ wɔ wɔsumɔ Nyɔŋmɔ, shi moŋ akɛ lɛ esumɔ wɔ ni etsu e-Bi lɛ akɛ kpatamɔ afɔle* yɛ wɔhe eshai lɛ ahewɔ. 11  Mɛi ni asumɔɔ, kɛ́ nɛkɛ ji bɔ ni Nyɔŋmɔ sumɔ wɔ lɛ, belɛ wɔ hu sɔ̃ kã wɔnɔ akɛ wɔsumɔsumɔɔ wɔhe. 12  Mɔ ko mɔ ko enako Nyɔŋmɔ pɛŋ. Kɛ́ wɔtee nɔ wɔsumɔsumɔɔ wɔhe lɛ, Nyɔŋmɔ yaa nɔ ehiɔ wɔmli, ni esuɔmɔ lɛ yeɔ emuu yɛ wɔmli. 13  Enɛ wɔkɛleɔ akɛ wɔ kɛ lɛ efee ekome, ni lɛ hu ekɛ wɔ efee ekome, ejaakɛ ekɛ emumɔ lɛ ehã wɔ. 14  Kɛfata he lɛ, wɔ diɛŋtsɛ wɔna ni wɔmiiye odase akɛ Tsɛ lɛ tsu e-Bi lɛ akɛ je lɛ Yiwalaherelɔ. 15  Mɔ fɛɛ mɔ ni jajeɔ akɛ Yesu ji Nyɔŋmɔ Bi lɛ, Nyɔŋmɔ yaa nɔ ekɛ mɔ nɛɛ feɔ ekome, ni lɛ hu ekɛ Nyɔŋmɔ feɔ ekome. 16  Ni wɔbale ni wɔhe suɔmɔ ni Nyɔŋmɔ sumɔɔ wɔ lɛ wɔye. Nyɔŋmɔ lɛ, suɔmɔ ji lɛ, ni mɔ ni yaa nɔ ehiɔ suɔmɔ mli lɛ, eyaa nɔ ekɛ Nyɔŋmɔ feɔ ekome ni Nyɔŋmɔ hu yaa nɔ ekɛ lɛ feɔ ekome. 17  Nɛkɛ gbɛ nɔ suɔmɔ yeɔ emuu yɛ wɔmli, koni wɔwie kɛ nɔmimaa* yɛ kojomɔ gbi lɛ nɔ, ejaakɛ bɔ ni nakai mɔ lɛ yɔɔ lɛ, nakai wɔ hu wɔyɔɔ yɛ je nɛɛ mli. 18  Gbeyeishemɔ bɛ suɔmɔ mli, shi moŋ suɔmɔ ni eye emuu lɛ shɛɔ gbeyeishemɔ efɔ̃ɔ,* ejaakɛ gbeyeishemɔ tsĩɔ wɔnaa. Anɔkwa, mɔ ni sheɔ gbeyei lɛ, eyeko emuu yɛ suɔmɔ mli. 19  Wɔjieɔ suɔmɔ kpo, ejaakɛ lɛ klɛŋklɛŋ esumɔ wɔ. 20  Kɛji mɔ ko kɛɛ akɛ, “Misumɔɔ Nyɔŋmɔ,” ni kɛ̃lɛ enyɛɔ enyɛmi lɛ, amalelɔ ji lɛ. Ejaakɛ mɔ ni sumɔɔɔ enyɛmi ní enaa lɛ lɛ, enyɛŋ esumɔ Nyɔŋmɔ ní enaaa lɛ lɛ. 21  Ni wɔná kitã nɛɛ kɛjɛ eŋɔɔ, akɛ, mɔ fɛɛ mɔ ni sumɔɔ Nyɔŋmɔ lɛ, esa akɛ esumɔ enyɛmi hu.

Shishigbɛ Niŋmaa

Sht. ŋm., “mumɔ fɛɛ mumɔ.”
Sht. ŋm., “mumɔi lɛ.”
Aloo “afɔle ni akɛsaa gbɔmɛi kɛ Nyɔŋmɔ teŋ.”
Aloo “wɔná nɔmimaa.”
Aloo “shwieɔ gbeyeishemɔ.”