Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Timoteo 6:1-21

YITSEI LƐ AMLI SAJI

  • Esa akɛ nyɔji kɛ woo ahã amɛnuŋtsɔmɛi (1, 2)

  • Amale tsɔɔlɔi kɛ shikasuɔmɔ (3-10)

  • Gbɛtsɔɔmɔi kɛhã Nyɔŋmɔ gbɔmɔ (11-16)

  • Tekemɔ nɔ yɛ nitsumɔi kpakpai amli (17-19)

  • Buu nɔ ni atu awo odɛŋ lɛ he (20, 21)

6  Mɛi ni yɔɔ nyɔŋyeli kɔɔŋtso shishi lɛ aya nɔ abu amɛnuŋtsɔmɛi lɛ akɛ mɛi ni woo fɛɛ sa amɛ, koni mɔ ko akawie Nyɔŋmɔ gbɛ́i lɛ kɛ tsɔɔmɔ lɛ he efɔŋ ko kwraa.  Kɛfata he lɛ, mɛi ni yɔɔ nuŋtsɔmɛi ni ji héyelilɔi lɛ, amɛkagbe amɛhe guɔ akɛni nyɛmimɛi ji amɛ lɛ hewɔ. Moŋ lɛ, esa akɛ amɛsɔmɔ amɛ jogbaŋŋ fe tsutsu lɛ, ejaakɛ mɛi ni náa amɛsɔɔmɔ kpakpa lɛ he sɛɛ lɛ ji héyelilɔi kɛ mɛi ni asumɔɔ. Yaa nɔ otsɔɔ nibii nɛɛ, ní okɛ wiemɔkɛtsɔɔmɔi nɛɛ ahã.  Kɛ́ mɔ ko tsɔɔ tsɔɔmɔ kroko ni ekpɛlɛɛɛ gbɛtsɔɔmɔ ni jɛ wɔ-Nuŋtsɔ Yesu Kristo ŋɔɔ ní hãa mɔ náa hewalɛ* lɛ nɔ, ni asaŋ ekpɛlɛɛɛ tsɔɔmɔ ni hãa ajieɔ Nyɔŋmɔjamɔ su kpo lɛ nɔ lɛ,  no lɛ ewó ehe nɔ, ni enuuu nɔ ko nɔ ko shishi. Naataamɔi kɛ wiemɔi ahe ŋwanejei eye lɛ sɛkɛ.* Nibii ni jɛɔ enɛɛmɛi amli baa ji mɔnɔklɔmɔ, béi, heguɔgbee,* mɛi ahe susumɔi fɔji,  saji ní he ehiaaa ahe naataamɔi ní afɔ̃ɔɔ, ní gbɔmɛi ní amɛjwɛŋmɔi efite ní ashɔ̃ anɔkwale lɛ yɛ amɛdɛŋ lɛ teɔ lɛ shi, mɛi ni susuɔ akɛ Nyɔŋmɔjamɔ su ji nɔ ko ní akɛtaoɔ sɛɛnamɔ.  Eji anɔkwale akɛ, sɛɛnamɔ kpele yɛ Nyɔŋmɔjamɔ su he, kɛji mɔ mii shɛɔ enii ahe kɛfataa he.*  Ejaakɛ wɔkɛ nɔ ko baaa je lɛ mli, ni asaŋ wɔnyɛŋ wɔkɛ nɔ ko aya hu.  No hewɔ lɛ, kɛ́ wɔyɛ niyenii* kɛ atade* lɛ, wɔmii baashɛ nibii nɛɛ ahe.  Shi mɛi ni etswa amɛfai shi akɛ amɛbaatsɔmɔ niiatsɛmɛi lɛ gbeɔ kaa* kɛ tsɔne kɛ kwashiai akɔnɔi pii ní yeɔ awui ní kɛ gbɔmɛi yaa hiɛkpatamɔ kɛ fitemɔ mli lɛ amli. 10  Ejaakɛ shikasuɔmɔ ji nibii fɔji srɔtoi fɛɛ ashishifãi lɛ eko, ni akɛni mɛi komɛi di suɔmɔ nɛɛ sɛɛ hewɔ lɛ, amɛdu gbɛ kɛje hemɔkɛyeli lɛ he, ni amɛkɛ hejaramɔi babaoo egbulɔ amɛhe fɛɛ. 11  Shi bo lɛ, Oo Nyɔŋmɔ gbɔmɔ, joo nibii nɛɛ anaa foi. Shi tiumɔ jalɛ, Nyɔŋmɔjamɔ su, hemɔkɛyeli, suɔmɔ, shifimɔ, kɛ mlijɔlɛ sɛɛ. 12  Wu hemɔkɛyeli lɛ he ta kpakpa lɛ; mɔ naanɔ wala lɛ mli kpɛŋŋ, nɔ hewɔ ní atsɛ bo, ní ojaje jajemɔ fɛfɛo yɛ he yɛ odasefoi pii ahiɛ hu lɛ. 13  Miifã bo yɛ Nyɔŋmɔ, mɔ ni hãa nibii fɛɛ yaa nɔ hiɔ wala mli lɛ, kɛ Kristo Yesu, mɔ ni, akɛ odasefonyo lɛ, ejaje jajemɔ fɛfɛo yɛ Pontio Pilato hiɛ lɛ hiɛ 14  akɛ oye kitã lɛ nɔ yɛ gbɛ ni kpa ko bɛ he ní anáŋ he sane ko atã nɔ, kɛyashi wɔ-Nuŋtsɔ Yesu Kristo kpojiemɔ lɛ, 15  nɔ ni Nɔyelɔ Hewalɔ kome pɛ ní yɔɔ miishɛɛ lɛ baajie kpo yɛ be* ni ato kɛhã no lɛ mli lɛ. Lɛ ji mɛi ni yeɔ nɔ akɛ maŋtsɛmɛi lɛ a-Maŋtsɛ, kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ, 16  mɔ hu ni lɛ ekome pɛ eyɔɔ gbɔmɔtso ni gbooo, ní ehiɔ la ni anyɛŋ abɛŋkɛ mli lɛ, mɔ ni gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ. Lɛ enɔ ji woo kɛ naanɔ hewalɛ lɛ. Amen. 17  Wiemɔ otsɔɔ* mɛi ni ji niiatsɛmɛi yɛ shihilɛ gbɛjianɔtoo ni yɔɔ amrɔ nɛɛ* mli lɛ akɛ amɛkapupu amɛhe,* ni amɛhiɛ akakã ninámɔ ní bɛ shweshweeshwe lɛ nɔ, shi moŋ Nyɔŋmɔ, mɔ ni ŋɔɔ nibii ní wɔnáa mli ŋɔɔmɔ lɛ fɛɛ ehãa wɔ ní etekeɔ nɔ lɛ nɔ. 18  Kɛɛmɔ amɛ ni amɛtsu nitsumɔ kpakpa, amɛteke nɔ yɛ nitsumɔi kpakpai amli, amɛfee ejurɔ,* amɛsumɔ nihãmɔ, 19  ní amɛkɛbɔ jwetri shweshweeshwe amɛhã amɛhe ní efee faneshi kpakpa kɛhã wɔsɛɛ, koni amɛmɔ wala diɛŋtsɛ lɛ mli kpɛŋŋ. 20  Timoteo, buu nɔ ni atu awo odɛŋ lɛ he, ni okwa yaka wiemɔi ní buleɔ krɔŋkrɔŋ nii kɛ agbɛnɛ hu susumɔi ni kɛ amɛhe kpãaa gbee ní amaleɔ akɛɔ akɛ eji “nilee” lɛ. 21  Akɛni mɛi komɛi kɛ nilee nɛɛ pupuɔ amɛhe hewɔ lɛ, amɛdu gbɛ kɛje hemɔkɛyeli lɛ he. Duromɔ lɛ kɛ nyɛ ahi shi.

Shishigbɛ Niŋmaa

Aloo “ní tsaa mɔ; ní sɛɛnamɔ yɔɔ he.”
Aloo “ehé ejwɛŋmɔ bɔ ni esaaa.”
Aloo “wiemɔi fɔji.”
Sht. ŋm., “kɛji mɔ hãa nii ni eyɔɔ lɛ faa hãa lɛ kɛfataa he.”
Aloo “nɔ ni wɔkɛlɛɔ wɔhe.”
Aloo “wɔɔhe.” Sht. ŋm., “hehaanii.”
Ni ji, efɔŋ he kaa.
Sht. ŋm., “bei.”
Aloo “Fã.”
Aloo “yinɔ ni yɔɔ amrɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “amɛkajwɛŋ nii wuji.”
Aloo “amɛdɛŋ akpɔ.”