Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Timoteo 3:1-16

3  Anɔkwa wiemɔ nɛ: Kɛ́ mɔ ko miitao etsɔ nɔkwɛlɔ lɛ, eetao nitsumɔ kpakpa.  Esa akɛ nɔkwɛlɔ lɛ afee mɔ ni anáŋ ehe sane ko atã, wu ni yɔɔ ŋa kome, mɔ ni ŋmɛɔ pɛpɛɛpɛ yɛ enifeemɔi amli, mɔ ni yɔɔ jwɛŋmɔ ni sa,* mɔ ni nyiɛɔ yɛ gbɛjianɔtoo naa,* gbɔfeelɔ, mɔ ni baanyɛ atsɔɔ nii,  jeee dãatɔlɔ, jeee yiwalɔ,* shi moŋ mɔ ni nuɔ nii ashishi, jeee béilɔ, jeee shikasuɔlɔ,  mɔ ni kwɛɔ lɛ diɛŋtsɛ ewe nɔ jogbaŋŋ, ni ebii ŋɔɔ amɛhe amɛwoɔ eshishi kɛ mɔdɛŋbɔɔ* fɛɛ  (ejaakɛ kɛ́ mɔ ko leee bɔ ni eeefee ekwɛ lɛ diɛŋtsɛ ewe nɔ lɛ, te eeefee tɛŋŋ ekwɛ Nyɔŋmɔ asafo lɛ nɔ lɛ?),  jeee mɔ ni batsɔ Kristo kaselɔ etsɛko koni ekawó ehe nɔ ni egbee fɔbuu kojomɔ ní Abonsam gbee mli lɛ mli.  Kɛfata he lɛ, esa akɛ mɛi ni yɔɔ sɛɛ lɛ* hu aye ehe odase kpakpa* koni ekagbee ahorabɔɔ* kɛ Abonsam tsɔne mli.  Nakai nɔŋŋ esa akɛ asafoŋ sɔɔlɔi afee mɔdɛŋbɔlɔi,* jeee lilɛi-nta-tsɛmɛi,* jeee mɛi ni nuɔ dãa babaoo, jeee mɛi ni kɛ amimyeli tiuɔ kutumpɔo sɛɛnamɔ sɛɛ,  mɛi ni hiɛɔ hemɔkɛyeli he teemɔŋ sane krɔŋkrɔŋ lɛ yɛ henilee ni he tse mli. 10  Shi esa akɛ aka mɛnɛɛmɛi hu akwɛ akɛ amɛsa* dã; no sɛɛ lɛ, bei abɔ ní sane ko bɛ amɛhe lɛ, ahã amɛsɔmɔ akɛ sɔɔlɔi. 11  Nakai nɔŋŋ yei lɛ hu afee mɔdɛŋbɔlɔi,* jeee mɛi ni gbeɔ mɛi ahe guɔ, amɛfee mɛi ni ŋmɛɔ pɛpɛɛpɛ yɛ amɛnifeemɔi amli, mɛi ni yeɔ anɔkwa yɛ nibii fɛɛ mli. 12  Asafoŋ sɔɔlɔi lɛ afee wumɛi ni yɔɔ ŋa komekome, mɛi ni kwɛɔ amɛbii kɛ amɛ diɛŋtsɛ amɛwei anɔ jogbaŋŋ. 13  Ejaakɛ mɛi ni sɔmɔɔ jogbaŋŋ lɛ miiná shidaamɔ kpakpa amɛmiihã amɛhe ni agbɛnɛ hu amɛnyɛɔ amɛwieɔ kɛ nɔmimaa babaoo yɛ hemɔkɛyeli ni yɔɔ Kristo Yesu mli lɛ mli. 14  Eyɛ mli akɛ mihiɛ kã nɔ akɛ etsɛŋ ni maba oŋɔɔ moŋ, shi miiŋma bo nibii nɛɛ, 15  koni kɛ́ mitsɛ lɛ, ole bɔ ni sa akɛ oba ojeŋ ohã yɛ Nyɔŋmɔ we, ni ji Nyɔŋmɔ hiɛkãalɔ lɛ asafo lɛ, anɔkwale lɛ akulashiŋ kɛ enɔdaamɔnɔ lɛ mli. 16  Anɔkwa, ekã shi faŋŋ akɛ Nyɔŋmɔjamɔ su he teemɔŋ sane krɔŋkrɔŋ nɛɛ ji nɔ ko kpele: ‘Ajie lɛ kpo yɛ heloo mli, abu lɛ jalɔ yɛ mumɔ mli, ejie ehe kpo etsɔɔ ŋwɛibɔfoi, ashiɛ lɛ yɛ jeŋmaji ateŋ, ahe enɔ aye yɛ je lɛŋ, aŋɔ lɛ kɛtee ŋwɛi yɛ anunyam mli.’

Shishigbɛ Niŋmaa

Aloo “mɔ ni yɔɔ jwɛŋmɔ kpakpa; mɔ ni hiɛ kã shi.”
Aloo “mɔ ni toɔ nibii ahe gbɛjianɔ jogbaŋŋ.”
Aloo “jeee ninekpokpookpotsɛ.”
Ni tsɔɔ akɛ, amɛkɛ nibii efeee shwɛmɔ.
Aloo “mɛi ni bɛ Kristofoi asafo lɛ mli lɛ.”
Aloo “esa akɛ ená gbɛ́i kpakpa yɛ mɛi ni yɔɔ sɛɛ lɛ ateŋ.”
Aloo “hiɛshishwiemɔ.”
Aloo “mɛi ni kɛ nibii efeee shwɛmɔ.”
Aloo “jeee mɛi ni kɛ amɛwiemɔ lakaa mɛi.”
Aloo “aka mɛnɛɛmɛi hu akwɛ akɛ amɛshɛɔ nɔ ni ataoɔ lɛ he lo.”
Aloo “mɛi ni kɛ nibii efeee shwɛmɔ.”