Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Tesalonikabii 5:1-28

YITSEI LƐ AMLI SAJI

  • Yehowa gbi lɛ baa lɛ (1-5)

    • “Toiŋjɔlɛ kɛ shweshweeshwe!” (3)

  • Esa akɛ wɔya nɔ wɔshi kpe ni wɔhiɛ ahi wɔhe nɔ (6-11)

  • Wiemɔkɛtsɔɔmɔi (12-24)

  • Naagbee ŋamɔ (25-28)

5  Agbɛnɛ, nyɛmimɛi, yɛ bei lɛ kɛ gbii ni ato lɛ agbɛfaŋ lɛ, ehiaaa ni aŋma nyɛ he nɔ ko.  Ejaakɛ nyɛ diɛŋtsɛ nyɛle jogbaŋŋ akɛ Yehowa* gbi lɛ miiba tamɔ bɔ pɛ ní julɔ baa nyɔɔŋ lɛ.  Be mli ni amɛbaakɛɛ akɛ, “Toiŋjɔlɛ kɛ shweshweeshwe!” lɛ, no mli nɔŋŋ ni hiɛkpatamɔ baabati amɛ shi trukaa, tamɔ bɔ ni kɔmɔmɔ taa yoo ni hiɛ musu he lɛ, ni amɛjeŋ mli kɔkɔɔkɔ.  Shi nyɛmimɛi, nyɛ lɛ, nyɛbɛ duŋ mli, ní gbi lɛ baabati nyɛ shi tamɔ bɔ ni jetsɛremɔ batiɔ julɔi ashi lɛ,  ejaakɛ nyɛ fɛɛ lɛ, la bii kɛ shwane bii ji nyɛ. Wɔjeee nyɔɔŋ loo duŋ bii.  No hewɔ lɛ, agbɛnɛ, nyɛkahãa wɔwɔa tamɔ mɛi ni eshwɛ lɛ feɔ lɛ, shi moŋ nyɛhãa wɔyaa nɔ wɔshia kpe ní wɔhiɛ ahia wɔhe nɔ.*  Ejaakɛ mɛi ni wɔɔ lɛ, nyɔɔŋ amɛwɔɔ, ni mɛi ni tɔrɔɔ dãa lɛ, nyɔɔŋ amɛtɔrɔɔ.  Shi wɔ mɛi ni wɔji shwane bii lɛ, nyɛhãa wɔhiɛ ahia wɔhe nɔ* ní wɔwo hemɔkɛyeli kɛ suɔmɔ akɛ dama, kɛ yiwalaheremɔ he hiɛnɔkamɔ lɛ akɛ fai  ejaakɛ Nyɔŋmɔ halaaa wɔ ehãaa mlifu, shi moŋ ehala wɔ koni wɔtsɔ wɔ-Nuŋtsɔ Yesu Kristo nɔ wɔná yiwalaheremɔ. 10  Egbo ehã wɔ, koni kɛ́ wɔmiiya nɔ wɔmiishi kpe jio, wɔwɔ* jio, wɔ kɛ lɛ fɛɛ ahi wala mli. 11  No hewɔ lɛ, nyɛyaa nɔ nyɛwowoa nyɛhe hewalɛ,* ní nyɛtswatswaa nyɛhe nyɛmaa shi, tamɔ bɔ ni yɛ anɔkwale mli lɛ nyɛfeɔ lɛ. 12  Nyɛmimɛi, agbɛnɛ, wɔmiikpa nyɛ fai akɛ, nyɛjiea bulɛ kpo nyɛtsɔa mɛi ni tsuɔ nii waa yɛ nyɛteŋ, ní amɛkwɛɔ nyɛnɔ yɛ Nuŋtsɔ lɛ mli, ní amɛwieɔ amɛtsɔɔ nyɛ lɛ; 13  ní nyɛhiɛ asɔ amɛ naakpa diɛŋtsɛ yɛ suɔmɔ mli, yɛ nitsumɔ ní amɛtsuɔ lɛ hewɔ. Nyɛhãa toiŋjɔlɛ ahia nyɛteŋ. 14  Nɔ ni tamɔɔɔ nakai lɛ, nyɛmimɛi, wɔmiikpa nyɛ fai ní nyɛbɔ mɛi ni enyiɛɛɛ yɛ gbɛjianɔtoo naa lɛ kɔkɔ,* nyɛshɛjea mɛi ni ehao* lɛ amii, nyɛyea nyɛbuaa gbedelɔi lɛ, nyɛtoa nyɛtsui shi nyɛhãa mɛi fɛɛ. 15  Nyɛkwɛa ni mɔ ko kɛ efɔŋ akato efɔŋ najiaŋ, shi moŋ be fɛɛ be lɛ, nyɛtiua ekpakpa sɛɛ nyɛhãhãa nyɛhe kɛ mɛi krokomɛi fɛɛ. 16  Nyɛmii ashɛa nyɛhe jogbaŋŋ be fɛɛ be. 17  Nyɛsɔlea daa ni nyɛkafɔ̃a. 18  Nyɛdaa shi yɛ nɔ fɛɛ nɔ he. Enɛ ji Nyɔŋmɔ suɔmɔnaa nii yɛ Kristo Yesu mli yɛ nyɛgbɛfaŋ. 19  Nyɛkagbea mumɔ lɛ la lɛ. 20  Nyɛkagbea gbalɛi ahe guɔ. 21  Nyɛkaa nii fɛɛ nyɛkwɛa; nyɛmɔa nɔ ni hi lɛ mli kpɛŋŋ. 22  Nyɛtsia nyɛhe kɛjea efɔŋfeemɔ fɛɛ efɔŋfeemɔ he. 23  Toiŋjɔlɛ Nyɔŋmɔ lɛ diɛŋtsɛ atsuu nyɛhe kwraa kɛmɔ shi. Ni abaa nyɛmumɔ kɛ nyɛsusuma* kɛ nyɛgbɔmɔtso lɛ yi akɛ nɔ ni eye emuu yɛ gbɛ fɛɛ gbɛ nɔ ní shwamɔ ko bɛ he yɛ be ni wɔ-Nuŋtsɔ Yesu Kristo eba lɛ mli. 24  Anɔkwafo ji mɔ ni tsɛɔ nyɛ lɛ, ni bɔ fɛɛ bɔ ni fee lɛ, ebaafee nakai. 25  Nyɛmimɛi, nyɛyaa nɔ nyɛsɔlea nyɛhãa wɔ. 26  Nyɛŋaa nyɛmimɛi lɛ fɛɛ kɛ naashɔmɔ krɔŋkrɔŋ. 27  Mikɛ sɔ̃ ni yɔɔ hiɛdɔɔ miifɔ̃ nyɛnɔ yɛ Nuŋtsɔ lɛ gbɛ́i mli akɛ nyɛhãa akanea wolo nɛɛ ahãa nyɛmimɛi lɛ fɛɛ. 28  Wɔ-Nuŋtsɔ Yesu duromɔ lɛ kɛ nyɛ ahi shi.

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Aloo “ní wɔya nɔ wɔhã nyɛmɔi ní wɔkɛsusuɔ nii ahe lɛ atsua nii jogbaŋŋ.”
Aloo “nyɛhãa wɔyaa nɔ wɔhãa nyɛmɔi ní wɔkɛsusuɔ nii ahe lɛ atsua nii jogbaŋŋ.”
Aloo “wɔwɔ yɛ gbele mli.”
Aloo “nyɛshɛjeshɛjea nyɛmii.”
Aloo “nyɛwiea nyɛtsɔa mɛi ni enyiɛɛɛ yɛ gbɛjianɔtoo naa lɛ.”
Aloo “mɛi ni nijiaŋ eje wui.” Sht. ŋm., “mɛi ni yɔɔ susuma bibioo.”
Aloo “nyɛwala.” Kwɛmɔ Wiemɔi Titrii Amligbalamɔ lɛ.