Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Tesalonikabii 4:1-18

YITSEI LƐ AMLI SAJI

  • Bɔlɛnamɔ jeŋba sha he kɔkɔbɔɔ (1-8)

  • Nyɛsumɔsumɔa nyɛhe kɛmɔa shi (9-12)

    • ‘Nyɛyea nyɛ diɛŋtsɛ nyɛshĩa sane’ (11)

  • Mɛi ni egboi yɛ Kristo mli lɛ klɛŋklɛŋ baate shi (13-18)

4  Naagbee lɛ, nyɛmimɛi, bɔ ni nyɛnine shɛ gbɛtsɔɔmɔ ni tsɔɔ bɔ ni esa akɛ nyɛnyiɛ koni nyɛsa Nyɔŋmɔ hiɛ lɛ nɔ kɛjɛ wɔŋɔɔ lɛ, tamɔ bɔ ni yɛ anɔkwale mli lɛ nyɛnyiɛɔ lɛ, wɔmiibi nyɛ, ni wɔmiikpa nyɛ fai yɛ Nuŋtsɔ Yesu mli akɛ, nyɛyaa nɔ nyɛfea nakai ní eteke nɔ fe tsutsu lɛ.  Ejaakɛ nyɛle gbɛtsɔɔmɔi* ní wɔtsɔ Nuŋtsɔ Yesu nɔ wɔkɛhã nyɛ lɛ.  Ejaakɛ enɛ ji Nyɔŋmɔ suɔmɔnaa nii, akɛ esa akɛ nyɛfee krɔŋkrɔŋ ní nyɛtsi nyɛhe kɛje bɔlɛnamɔ jeŋba sha* he.  Esa akɛ nyɛteŋ mɔ fɛɛ mɔ ale bɔ ni ebaakudɔ lɛ diɛŋtsɛ egbɔmɔtso* yɛ krɔŋkrɔŋfeemɔ kɛ woo mli,  jeee yɛ bɔlɛnamɔ he akɔnɔ ní akɛ hiɛjoomɔ tiuɔ sɛɛ ní ayeee he nɔ lɛ mli, tamɔ bɔ ni jeŋmaji ní leee Nyɔŋmɔ lɛ feɔ lɛ.  Esaaa akɛ mɔ ko mɔ ko tɛkeɔ husui ní sa ní eyeɔ enyɛmi amim yɛ sane nɛɛ mli, ejaakɛ Yehowa* kɛ nibii nɛɛ fɛɛ ahe toigbalamɔ hãa, tamɔ bɔ ni wɔtsɔ hiɛ wɔkɛɛ nyɛ momo, ní wɔbɔ nyɛ kɔkɔ waa hu yɛ he lɛ.  Ejaakɛ jeee muji nii hewɔ Nyɔŋmɔ tsɛ wɔ, shi moŋ krɔŋkrɔŋfeemɔ hewɔ.  No hewɔ lɛ, agbɛnɛ, mɔ ni kwaa enɛ lɛ, jeee gbɔmɔ ekwaa, shi moŋ Nyɔŋmɔ, mɔ ni ŋɔɔ emumɔ krɔŋkrɔŋ lɛ ehãa nyɛ lɛ.  Shi yɛ nyɛmimɛi asuɔmɔ gbɛfaŋ lɛ, ehiaaa ní wɔŋma nyɛ he sane, ejaakɛ nyɛ diɛŋtsɛ lɛ, Nyɔŋmɔ tsɔɔ nyɛ akɛ nyɛsumɔsumɔa nyɛhe. 10  Anɔkwa, nyɛmiifee nakai yɛ nyɛmimɛi lɛ fɛɛ agbɛfaŋ yɛ Makedonia fɛɛ. Shi nyɛmimɛi, wɔmiiwo nyɛ hewalɛ ní nyɛya nɔ nyɛfee nakai ní eteke nɔ fe tsutsu lɛ. 11  Nyɛkɛfea oti akɛ nyɛbaahi shi dioo, ní nyɛye nyɛ diɛŋtsɛ nyɛshĩa sane, ní nyɛkɛ nyɛniji atsu nii, tamɔ bɔ ni wɔkɛ gbɛtsɔɔmɔ ehã nyɛ lɛ, 12  koni nyɛnyiɛ fɛfɛo yɛ mɛi ni yɔɔ sɛɛ lɛ* ahiɛ, ní nɔ ko nɔ ko akahia nyɛ. 13  Kɛfata he lɛ, nyɛmimɛi, wɔmiisumɔ ni nyɛle mɛi ni miiwɔ yɛ gbele mli lɛ ahe sane, koni nyɛkaye awerɛho tamɔ bɔ ni mɛi ni eshwɛ ní bɛ hiɛnɔkamɔ ko kwraa lɛ feɔ lɛ. 14  Ejaakɛ kɛ́ wɔyɛ hemɔkɛyeli akɛ Yesu gbo ni ete shi ekoŋŋ lɛ, belɛ nakai nɔŋŋ Nyɔŋmɔ baaŋɔ mɛi ni etsɔ Yesu nɔ amɛwɔ yɛ gbele mli lɛ hu afata Yesu he kɛba. 15  Ejaakɛ enɛ ji nɔ ni wɔkɛɔ nyɛ yɛ Yehowa* wiemɔ naa, akɛ wɔ mɛi ni wɔbaahi wala mli be ni Nuŋtsɔ lɛ eba lɛ, wɔtsɔŋ mɛi ni ewɔ yɛ gbele mli lɛ ahiɛ kɔkɔɔkɔ; 16  ejaakɛ Nuŋtsɔ lɛ diɛŋtsɛ baakpeleke shi kɛjɛ ŋwɛi, ni ebaatsɛ kɛ famɔ, kɛ ŋwɛibɔfonukpa gbee kɛ Nyɔŋmɔ tɛtɛrɛmantɛrɛ, ni mɛi ní kɛ Kristo efee ekome ní egboi lɛ klɛŋklɛŋ baate shi. 17  No sɛɛ lɛ, abaashá wɔ mɛi ni wɔbaahi wala mli lɛ yɛ atatui amli kɛyafata amɛhe koni wɔkɛ Nuŋtsɔ lɛ ayakpe yɛ kɔɔyɔɔ lɛ mli; ni wɔkɛ Nuŋtsɔ lɛ baahi shi daa. 18  Belɛ, nyɛyaa nɔ nyɛkɛ wiemɔi nɛɛ ashɛjeshɛjea nyɛmii.

Shishigbɛ Niŋmaa

Aloo “famɔi.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Sht. ŋm., “egbɛ́; ekukwɛi.”
Kwɛmɔ Wiemɔi Titrii Amligbalamɔ lɛ.
Aloo “mɛi ni bɛ Kristofoi asafo lɛ mli lɛ.”
Kwɛmɔ Wiemɔi Titrii Amligbalamɔ lɛ.