Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Tesalonikabii 3:1-13

3  No hewɔ lɛ, be ni wɔnyɛɛɛ naa wɔdamɔ dɔŋŋ lɛ, wɔsusu akɛ ehi jogbaŋŋ akɛ wɔ pɛ wɔya nɔ wɔhi Atene;  ni wɔtsu Timoteo, ni ji wɔnyɛmi nuu kɛ Nyɔŋmɔ sɔɔlɔ* yɛ Kristo lɛ he sane kpakpa lɛ mli lɛ, koni ebawo nyɛ hewalɛ* ni eshɛje nyɛmii yɛ nyɛhemɔkɛyeli lɛ hewɔ,  koni amanehului nɛɛ akahoso mɔ ko mɔ ko.* Ejaakɛ nyɛ diɛŋtsɛ nyɛle akɛ wɔnyɛŋ wɔjo nɔnai nɛɛ anaa foi.*  Ejaakɛ be ni wɔkɛ nyɛ yɔɔ lɛ, wɔkɛɛ nyɛ wɔto akɛ wɔbaana amanehulu, ni tamɔ bɔ ni nyɛle lɛ, eba mli nakai.  No hewɔ ni be ni minyɛɛɛ naa madamɔ dɔŋŋ lɛ, mitsu koni mikɛle nyɛnɔkwayeli lɛ he sane, akɛ aleenɔ Kalɔ lɛ ebaka nyɛ yɛ gbɛ ko nɔ, ni nitsumɔ ní wɔtsu waa lɛ efee yaka lo.  Shi amrɔ nɛɛ Timoteo ejɛ nyɛŋɔɔ eba wɔŋɔɔ, ni ebagba wɔ nyɛnɔkwayeli lɛ kɛ nyɛsuɔmɔ lɛ he sane kpakpa, akɛ nyɛyaa nɔ nyɛkaiɔ wɔ kɛ miishɛɛ be fɛɛ be, ni akɛ, nyɛmiishwe ní nyɛna wɔ, tamɔ bɔ ni wɔ hu wɔshweɔ ní wɔna nyɛ lɛ.  Nyɛmimɛi, no hewɔ ni yɛ wɔhejaramɔ* kɛ wɔmanehulu lɛ fɛɛ mli lɛ, nyɛ kɛ agbɛnɛ hu anɔkwayeli ní nyɛjieɔ lɛ kpo lɛ eshɛje wɔmii lɛ.  Ejaakɛ kɛ́ nyɛmiidamɔ shi shiŋŋ yɛ Nuŋtsɔ lɛ mli lɛ, wɔnáa hewalɛ hee.*  Ejaakɛ mɛɛ shidaa po wɔɔnyɛ wɔkɛhã Nyɔŋmɔ yɛ nyɛhewɔ koni wɔkɛto miishɛɛ kpele ní wɔná yɛ nyɛhewɔ yɛ wɔ-Nyɔŋmɔ lɛ hiɛ lɛ najiaŋ? 10  Nyɔɔŋ kɛ shwane fɛɛ lɛ, wɔkɛ hiɛdɔɔ kpaa fai waa bɔ ni wɔɔnyɛ koni wɔna nyɛ yɛ heloo mli* ní wɔŋɔ nɔ ni eshwɛ nyɛ yɛ nyɛhemɔkɛyeli lɛ gbɛfaŋ lɛ wɔhã nyɛ. 11  Agbɛnɛ, wɔ-Nyɔŋmɔ kɛ wɔ-Tsɛ lɛ diɛŋtsɛ kɛ wɔ-Nuŋtsɔ Yesu agbele gbɛ ko ahã wɔ koni wɔba nyɛŋɔɔ. 12  Kɛfata he lɛ, Nuŋtsɔ lɛ ahã suɔmɔ ní nyɛkɛsumɔsumɔɔ nyɛhe kɛ mɛi fɛɛ lɛ afa fe tsutsu lɛ, hɛɛ, eteke nɔ, tamɔ bɔ ni wɔ hu wɔsumɔɔ nyɛ babaoo lɛ, 13  koni ehã nyɛtsuii ahe awa, ní shwamɔ ko akahi he yɛ krɔŋkrɔŋfeemɔ mli yɛ wɔ-Nyɔŋmɔ kɛ wɔ-Tsɛ lɛ hiɛ yɛ be ni wɔ-Nuŋtsɔ Yesu eba ní emɛi krɔŋkrɔŋi lɛ fɛɛ fata ehe lɛ mli.

Shishigbɛ Niŋmaa

Aloo eeenyɛ efee akɛ, “kɛ Nyɔŋmɔ naanyo nitsulɔ.”
Aloo “ebawaje nyɛ.”
Sht. ŋm., “akahã mɔ ko mɔ ko didã.”
Aloo “nɔ ni ato afɔ̃ shi ahã wɔ ji no.”
Sht. ŋm., “wɔhiamɔ.”
Sht. ŋm., “wɔhiɔ wala mli.”
Sht. ŋm., “nyɛhiɛ.”