Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Tesalonikabii 2:1-20

2  Nyɛmimɛi, nyɛ diɛŋtsɛ nyɛle lɛɛlɛŋ akɛ saramɔ ní wɔbasara nyɛ lɛ efeee yaka.  Ejaakɛ eyɛ mli akɛ klɛŋklɛŋ lɛ wɔna nɔ, ni afee wɔ niseniianii yɛ Filipi, tamɔ bɔ ni nyɛle lɛ moŋ, shi wɔ-Nyɔŋmɔ lɛ hã wɔná ekãa koni wɔkɛjaje Nyɔŋmɔ sane kpakpa lɛ wɔtsɔɔ nyɛ yɛ shiteekɛwoo babaoo mli.*  Ejaakɛ wɔwiemɔkɛtsɔɔmɔ lɛ, jeee tɔmɔ, loo muji nii mli ejɛ, ni asaŋ lakamɔ bɛ mli,  shi tamɔ bɔ ni Nyɔŋmɔ ebu wɔ akɛ wɔsa akɛ atu sane kpakpa lɛ awo wɔdɛŋ lɛ, nakai wɔwieɔ, jeee koni wɔkɛsa gbɔmɛi ahiɛ, shi moŋ koni wɔkɛsa Nyɔŋmɔ, mɔ ni pɛiɔ wɔtsuii amli lɛ hiɛ.  Anɔkwa, nyɛle akɛ wɔwieko yiteŋmuluwoo wiemɔ ko pɛŋ, ni asaŋ wɔkwako wɔfeko nɔ ko kɛ yiŋtoo akɛ wɔye amim dã; Nyɔŋmɔ ji odasefonyo!  Asaŋ wɔtaooo gbɔmɛi ahiɛnyam yɛ nyɛŋɔɔ loo mɛi krokomɛi aŋɔɔ, tsɛbelɛ akɛ Kristo bɔfoi lɛ, kulɛ wɔbaanyɛ wɔtsɔ jatsu ni jara wa wɔhã nyɛ.  Moŋ lɛ, wɔmli jɔ yɛ nyɛteŋ, tamɔ bɔ ni yoo ní miihã fufɔ kɛ suɔmɔ kwɛɔ lɛ diɛŋtsɛ ebii lɛ.*  No hewɔ lɛ, akɛni wɔdɔɔ nyɛhe hewɔ lɛ, wɔtswa wɔfai shi* akɛ jeee Nyɔŋmɔ sane kpakpa lɛ pɛ wɔkɛbaahã nyɛ, shi moŋ wɔ diɛŋtsɛ wɔhe* hu, ejaakɛ wɔbasumɔ nyɛ naakpa.  Nyɛmimɛi, ekã shi faŋŋ akɛ nyɛkaiɔ nitsumɔ ní wɔtsu waa kɛ deŋme ní wɔgbo lɛ. Be mli ni wɔshiɛɔ Nyɔŋmɔ sane kpakpa lɛ wɔtsɔɔ nyɛ lɛ, wɔtsu nii nyɔɔŋ kɛ shwane koni wɔkɛ jatsu ni jara wa ko akafɔ̃ nyɛteŋ mɔ ko nɔ. 10  Nyɛji odasefoi, ni nakai nɔŋŋ ji Nyɔŋmɔ hu, akɛ wɔba wɔjeŋ yɛ nyɛ ní nyɛji héyelilɔi lɛ ateŋ akɛ anɔkwafoi, jalɔi, kɛ mɛi ni shwamɔ ko bɛ amɛhe. 11  Nyɛle jogbaŋŋ akɛ wɔtee nɔ wɔwie wɔtsɔɔ nyɛteŋ mɔ fɛɛ mɔ, ni wɔshɛje nyɛteŋ mɔ fɛɛ mɔ mii, ni wɔye nyɛteŋ mɔ fɛɛ mɔ odase, tamɔ bɔ ni tsɛ feɔ ebii lɛ, 12  koni nyɛya nɔ nyɛnyiɛ bɔ ni sa Nyɔŋmɔ, mɔ ni tsɛɔ nyɛ kɛbaa e-Maŋtsɛyeli kɛ enunyam lɛ mli lɛ. 13  Anɔkwa, no hewɔ ni wɔ hu wɔdaa Nyɔŋmɔ shi ni wɔfɔ̃ɔɔ lɛ, ejaakɛ be ni nyɛnine shɛ Nyɔŋmɔ wiemɔ ní nyɛnu yɛ wɔnaa lɛ nɔ lɛ, nyɛkpɛlɛ nɔ, jeee akɛ gbɔmɛi awiemɔ, shi moŋ akɛ Nyɔŋmɔ wiemɔ, tamɔ bɔ ni eji hu lɛɛlɛŋ lɛ, nɔ ni miitsu nii hu yɛ nyɛ ní nyɛji héyelilɔi lɛ amli lɛ. 14  Ejaakɛ, nyɛmimɛi, nyɛtsɔmɔ mɛi ni kaseɔ Nyɔŋmɔ asafoi ní kɛ Kristo Yesu efee ekome ní yɔɔ Yudea lɛ, ejaakɛ amanehului ní nyɛna yɛ nyɛ diɛŋtsɛ nyɛmaŋbii lɛ adɛŋ lɛ, no nɔŋŋ amɛ hu amɛnaa yɛ Yudafoi lɛ adɛŋ, 15  mɛi ni gbe Nuŋtsɔ Yesu po kɛ gbalɔi lɛ, ní amɛwa wɔ yi lɛ. Kɛfata he lɛ, amɛsaaa Nyɔŋmɔ hiɛ, moŋ lɛ, amɛwuɔ amɛshiɔ nibii ni he yɔɔ sɛɛnamɔ kɛhã gbɔmɛi fɛɛ lɛ, 16  ejaakɛ amɛbɔɔ mɔdɛŋ akɛ amɛbaatsĩ wɔ gbɛ koni wɔkawie wɔtsɔɔ jeŋmajiaŋbii lɛ, ní ahere amɛyiwala. Yɛ nɛkɛ gbɛ nɔ lɛ, amɛwoɔ amɛhe eshai lɛ obɔ daa. Shi emlifu lɛ eba amɛnɔ agbɛnɛ. 17  Shi nyɛmimɛi, be ni atse wɔ kɛje nyɛhe* (yɛ heloo mli, shi jeee yɛ wɔtsuii amli) be kukuoo ko kɛkɛ lɛ, wɔbɔ mɔdɛŋ fɛɛ ní wɔɔnyɛ koni wɔna nyɛ yɛ heloo mli* ejaakɛ wɔmiishwe waa ní wɔna nyɛ. 18  Enɛ hewɔ lɛ, wɔtao akɛ wɔba nyɛŋɔɔ, hɛɛ, mi Paulo lɛ, jeee shi kome kɛkɛ mibɔ mɔdɛŋ akɛ mafee nakai, shi shii enyɔ; kɛ̃lɛ Satan folɔ wɔnaji ateŋ. 19  Ejaakɛ mɛni ji wɔhiɛnɔkamɔ, loo wɔmiishɛɛ, loo wɔmlifilimɔ akekere yɛ wɔ-Nuŋtsɔ Yesu hiɛ, yɛ be ni eba lɛ mli? Ani yɛ anɔkwale mli lɛ jeee nyɛ ni? 20  Ekã shi faŋŋ akɛ, nyɛji wɔnunyam kɛ wɔmiishɛɛ.

Shishigbɛ Niŋmaa

Aloo eeenyɛ efee akɛ, “yɛ pelemɔ babaoo mli.”
Aloo “dɔɔ lɛ diɛŋtsɛ ebii ahe lɛ.”
Sht. ŋm., “esa wɔhiɛ jogbaŋŋ.”
Aloo “wɔsusumai.”
Aloo “be ni ahã nyɛgboi nyɛshi wɔ.”
Sht. ŋm., “koni wɔna nyɛhiɛ.”